Tsie No
Hɛn Egya nyim dɛ ber a suro na yennyim dza ɔbɛba etwa hɛnho ehyia no, dza ɔbɔboa hɛn kɛse koraa nye yebetsie Ne Ba no.
Mo nuanom na nkyerɛbaa adɔfo, mbrɛ osi na menya ndaase dɛ, yedua abaefo mfir do, yeetum abɔ mu ehyia mu na yɛrobɔsɔr Kwesida anapa yi. Mbrɛ woesi na wɔayɛ nhyira ama hɛn dɛ Jesus Christ asɛmpa no wɔdze asan ananmu aba asaase do!
Adapɛn kakra wɔabɛsen no, hɛn mu dodowara ehyia ntõtõ wɔ hɛn ankorankor abrabɔ mu. Asaase-wosow, ogya, nsuyirii, na iyinom ekyir no hɛn daa daa nhyehyɛɛ a no do etwa na ɔdze edziban na, fie ndzɛmba na sika ho nã aba.
Iyi nyinara mu no, yɛkamfo hom na yɛda hom ase dɛ hom asan mu eyi dɛ hom betsie Ewuradze n’asɛm wɔ ahokyer ber yi mu, ber hom kã hɛn ho wɔ wiadze mfɛndzanan ehyiadzi mu no. Sum a ɔkã abrɛbrɛsɛ ho rehyɛ kɛse no, ɔma Jesus Christ ne kan no hyerɛn ara yie kyɛn ber biara. Hom ndwen papa no a hɛn mu kor biara botum ayɛ, ber a begyabegyayɛ asoɛr wɔ wiadze mu yi. Hom dɔ na gyedzi wɔ Agyenkwa no mu botum ayɛ ɔhyɛwbɔ ama obi ma oebopue Jesus Christ asɛmpa no ne Nsan-ananmu mãhyɛ no do.
Mfe ebien a abɛsen no, emi na Akyerɛbaa Nelson ehyia hom mu mpempem wɔ wiadze nyina mu. Yenye hom ehyia wɔ park akɛse do na wɔ ahɔho mbea asado kɛse. Bea biara no, matse dɛ mowɔ hɔn a wɔyɛ Ewuradze ne mpamufo hɔn no mu, na muruhu Israel mboano no a ɔrokɔ do wɔ m’enyi do.
Yɛtse nda a “hɛn egyanom aper atweɔn mber tsentsen.”1 Yenya enyim egua ntsenae dɛ yɛbɛyɛ dza ɔrokɔ do ho adasefo dza Nephi hunii wɔ enyido-adzehu nko mu no dɛ Nyame Eguambaa no no tum, dɛ oesian “aba Ewuradze n’ahyɛmu mba no a wɔapetse wɔ asaase nyinara enyi no do; na wɔdze ndzeyɛtsenenee na enyimnyam nye Nyankopɔn no tum kɛse ayɛ akontar.”2
Hom, mo nuambanyin na nkyerɛbaa, hom kã mbarimba, mbaa, na mbofra no a Nephi hunii hɔn no ho. Dwen dɛm ho!
Bea a hom tse biara no anaa ma hom gyinabew tse biara no mmfa ho, Ewuradze, Jesus Christ nye w’Agyenkwa, na Nyame no nkɔnhyɛnyi Joseph Smith nye wo nkɔnhyɛnyi. Wohun no siei ana wɔrotow asaase no ne fapem dɛ ɔbɛyɛ mberano a odzi ekyir no nkɔnhyɛnyi, ber a wɔremmfa biribiara nnsuma”3 Ahotseweefo no. Nyikyerɛ kɔ do pem fi Ewuradze hɔ ba wɔ nsanananmu a ɔrokɔ do ber yi mu.
Jesus Christ asɛmpa a wɔdze asan-ananmu aba asaase yi do no, wo ntseasee wɔ ho nye dɛn?
Ɔkyerɛ dɛ ɔwo na w’ebusua wobotum asɔw hɔn ano abɔ mu afebɔɔ! Ɔkyerɛ dɛ osiandɛ obi a ɔwɔ tumdzi fi Jesus Christ hɔ oenuma wo na woesi wo pi dɛ N’Asɔrba no, ibotum enya Sunsum Krɔnkrɔn no n’anyɛnkoyɛ. Ɔbɛma wo kwankyerɛ na ɔabɔ woho ban. Ɔkyerɛ dɛ wonnkegyaa wo dabiarada dɛ innyi awerɛkyekye anaa innyi kwan a wɔdze kɔ Nyame nkyɛn dɛ Ɔmboa wo. Ɔkyerɛ dɛ asɔfodzi tumdzi botum ehyira wo ber a egye ayɛdze horow a ohia na enye Nyankopɔn dzi ahyɛmu na esie ahyɛmudzi no. Nokwar yinom yɛ sekyɛ ma hɛn akoma, nkankara dɛm ber yi mu a ehum kɛse robɔ yi.
Mormon Nwoma no kã enyibuei ebien hɔn nsoɛree na hɔn asehwe ho nsɛm. Hɔn abakɔsɛm kyerɛ mbrɛ osi yɛ mberɛw ma nyimpa dodowara dɛ hɔn werɛ befir Nyame, wɔapoow Ewuradze no nkɔnhyɛfo, na wɔahwehwɛ tum, atsenkã na honam akɔndɔdze.4 Tsetse nkɔnhyɛfo esido ara akã “ndzɛmba akɛse a ɔyɛ nwanwa ho nsɛm, na wɔanngye enndzi.”5
Ɔtse dɛm ara wɔ hɛn nda yi mu. Mfe pii mu no, wɔatse ndzɛmba akɛse a ɔyɛ nwanwa fi akasadaka horow a woehyira do wɔ wiadze nyina mu. Naaso nkorɔfo dodowara mmfua nokwar yinom osiandɛ wonnyim bea a wɔbɔhwehwɛ efi6 anaa osiandɛ woritsie hɔn a wonnyi nokwar ne nyina anaa osiandɛ wɔapow nokwar no dze afa wiadze ahwehwɛdze.
Abɔnsam ɔawea. Mfe mpempem mu no ɔdze rema wɔahwɛ papa dɛ bɔn na wɔahwɛ bɔn dɛ papa.7 Ne nsɛm taa yɛ dede, abran mu, na ahopɔw mu.
Mbom, ɔson nsɛm a ofi hɛn Ɔsor Egya hɔ ba no koraa. Odzi nkitaho kommyɛ na pefee mu a ɔnnyɛ kyinkyenɛnn ama yɛanntse No ase.8
Mfatoho, ber biara a Ɔbɛda No Dɔba a Wɔwoo no Kortoo akyerɛ adasamba wɔ asaase do no, Ɔayɛ no wɔ nkasafua nwanwa kumabaa mu. Nsakyeree Bepɔw no do Ɔrekasa kyerɛ Peter, James, na John no, Nyame kãa dɛ, “Oyi nye mo Dɔba no: hom ntsie no.”9 Ne nsɛm a Ɔdze maa Nephifo a wɔtsetse Bountiful nye: “Hom nhwɛ mo Dɔba a ɔsɔ m’enyi yie, no mu na mahyɛ me dzin enyimnyam—hom ntsie no.”10 Na dza Ɔkãa kyerɛ Joseph Smith, wɔ dɛm dawurbɔ nwanwa no a obue mberano yi ano no, Nyame kãa no tsia ara dɛ, “Iyi nye Mo Dɔba. Tsie No!”11
Afei, mo nuanom na nkyerɛbaa, hom nsusu nokwar a ɔwɔ ndzɛmba ebiasa a osii a yɛakã no sesei no ho, ansaana Egya no bɛda Ba no edzi no, nkorɔfo a wɔwɔ hɔ no nna wɔwɔ suro gyinabew mu, na binom so wɔ abagura bi mu.
Asomafo no suroi ber a wohun Jesus Christ a mununkum etwa noho ehyia wɔ Nsakyeree Bepɔw no do.
Nephifo no suroi osiandɛ nna woedua ɔsɛɛ na sum mu nda pii mu.
Joseph Smith nna sum mu etumfo akyekyer no ansaana ɔsorsor rubue.
Hɛn Egya nyim dɛ ber a suro na yennyim dza ɔbɛba etwa hɛnho ehyia no, dza ɔbɔboa hɛn kɛse koraa nye yebetsie Ne Ba no.
Osiandɛ ber a yɛhwehwɛ etsie—etsie—Ne Ba no ampara no, yebenya kwankyerɛ dze ehu dza ɔsɛ dɛ yɛyɛ wɔ gyinabew biara mu.
Kasafua a odzi kan wɔ Nkyerɛkyerɛ na Ahyɛmudzi mu no nye hom ntsie.12 Iyi kyerɛ dɛ yebetsie a yɛayɛ hɛn adwen dɛ yɛbɛyɛ setsie.”13 Hom ntsie kyerɛ dɛ “hom ntsie No”— tsie dza Agyenkwa no kã na nkyii ayɛ aso ama N’afotu. Nkasafua ebien no—”Tsie No”—Nyame ma hɛn nhwɛdo ma konyimdzi, na enyigye wɔ abrabɔ yi mu. Ɔsɛ dɛ yɛtse Ewuradze ne nsɛm, yetsie nsɛm no na yɛyɛ aso ma dza Ɔakã akyerɛ hɛn!
Ber a yɛhwehwɛ dɛ yɛyɛ Jesus Christ esuafo no, hɛn mbɔdzembɔ dɛ yebetsie No no hia enyidahɔdze. Ɔgye enyidaho na daa daa mbɔdzembɔ ama yɛdze Ne nsɛm, Ne nkyerɛkyerɛ, na No nokwar ahyɛ hɛn abrabɔ mu mã.
Yennkotum atwer nsɛm a yehyia no awerɛfir mu ara wɔ social media do. Nkasafua ɔpepeepe wɔ internet do na adzetɔnfo ebudo wɔ do a daa wɔdze dede na abɔnsam n’emumuyɛdze fora mu no, henfa na yebotum yɛakɔ eketsie No?
Yebotum yɛakɔ kyerɛwsɛm no mu. Wɔkyerɛkyerɛ hɛn Jesus Christ na N’asɛmpa ho nsɛm, No Werdambɔ ne kɛse, na hɛn Egya n’enyigye na ɔpon ho nhyehyɛɛ kɛse no. Daa daa yɛdze hɛnho rehyɛ kyerɛwsɛm mu no hia papaapa ma yeenya sunsum mu nkwa, nkankara nda yinom a begyabegyayɛ rodɔɔ sõ yi. Ber a yɛmee wɔ Christ ne nsɛm mu daa daa no, Christ ne nsɛm no bɛkyerɛ hɛn mbrɛ yensi ngyina nkõdzen a yɛanndwen ho da dɛ obesi no, no enyim.
Yebotum so [e]tsie No wɔ temple mu. Ewuradze ne fie yɛ adzesũa fie. Hɔ no Ewuradze kyerɛkyerɛ wɔ nankasa No kwan do. Hɔ no ayɛdze kor biara kyerɛkyerɛ Agyenkwa no ho nsɛm. Hɔ no yesũa mbrɛ yebesi bobue ntwamutam tam no kakra na yɛnye ɔsor enya nkitahodzi pefee mu. Hɔ no yesũa mbrɛ yebesi bɛkã abɔnsam n’enyim na yɛatwe Ewuradze n’asɔfodzi tum no dze ahyɛ hɛn na hɔn a yɛdɔ hɔn no dzen. Mbrɛ ɔsɛ dɛ hɛn nyina yɛper enyigye mu kɔhwehwɛ sumabew wɔ hɔ.
COVID-19 akwansidze mber kakra yi, sɛ woyiyi fi hɔ a, meserɛ hom nhyehyɛ mber bi a hom dze bɛtaa akɔsɔr na hom asom wɔ temple. Dɛm mber no mu sima kor biara behyira ɔwo na w’ebusua wɔ akwan a biribiara bio nnkotum dze aba. Hom mfa mber ndwendwen dza hom tse na hom atsenkã ho ber a hom wɔ hɔ no. Hom mbisa Ewuradze ma Ɔnkyerɛkyerɛ hom mbrɛ hom besi bobue ɔsorsor ma woehyira hom abrabɔ na hɔn a hom dɔ hɔn na hom som hɔn no.
Ber a sesei yennkotum asom wɔ temple mu no, moto nsa frɛ hom dɛ hom mfa hom ho nhyɛ ebusua abakɔsɛm mu yie, a ebusua abakɔsɛm nhwehwɛmu na indexing kã ho. Mobɔ anohoba dɛ sɛ wo mber a ihwer wɔ temple na ebusua abakɔsɛm edwuma ho kɔ sor a, mbrɛ itum etsie No no bɔkɔ sor na woetu mpon so.
Yetsie No pefee ara so yie ber a yesiesie hɛn tum a yɛdze tse Sunsum Krɔnkrɔn n’awɔsa no. Oekehia kɛse seseiara kyɛn ber biara dɛ ibohu mbrɛ Sunsum no si nye wo kasa. Nyametsir mu no, Sunsum Krɔnkrɔn no nye ɔsomafo. Ɔdze adwendwen a Egya na Ɔba pɛ dɛ inya no bɛba w’adwen mu. Ɔyɛ Ɔwerɛkyekyefo no. Ɔdze asomdwee atsenkã bɛba w’akoma mu. Ɔgye nokwar no ho dase na obesi dza ɔyɛ nokwar no pi ber a iritsie na erekenkan Ewuradze n’asɛm no.
Mesan totɔserɛ hom dɛ hom nyɛ biribiara a obehia dze atow hom sunsum mu atsenkã mu a, wɔdze bɛgye ankorankor nyikyerɛ no.
Ereyɛ dɛm no bɔboa wo me mbrɛ ibesi bɔkɔ kan wɔ w’abrabɔ mu, dza ibɛyɛ wɔ esian ber mu, na mbrɛ ibesi bohu na ekwetsir abɔnsam ne ndaadaa horow no.
Na, ewiei, yetsie No ber a yɛreyɛ aso ama nkɔnhyɛfo, adzehufo, na oyikyerɛfo. Jesus Christ N’Asomafo a wɔahyɛ hɔn asɔfo no gye Noho dase daa. Wɔkyerɛ kwan no ber a yɛfa hɛn kwan dua ɔnnkyebo abrabɔ sũahu yaayaw a nnhu kwan no mu yie no.
Ebɛnadze na ɔbɛba sɛ igye enyim ara tsie, tsie dze yɛ aso, na eyɛ dza Agyenkwa no akã na dza Ɔdze rudua No nkɔnhyɛfo mu rekã no sesei no a? Mobɔ hom anohoba dɛ wɔdze tum a wɔdze sɔw nsɔhwɛ, aperdzi, na mberɛwyɛ bɛkã hom ho. Mobɔ hom anwanwadze ho anohoba wɔ hom awar mu, ebusua nkitahodzi, na hom daa daa edwumayɛ mu. Na mobɔ anohoba dɛ wo tum a edze bɛtse enyigye no bɔdɔɔ sõ, basabasayɛ mpo rodɔɔ sõ wɔ w’abrabɔ mu no.
Ebɔbira 2020 wiadze mfɛndzanan ehyiadzi yi nye hɛn mber a yɛdze hyɛ dza osii a ɔsesãa wiadze no ho fa. Ber a hɛn enyi daa Joseph Smith n’Enyido-adzehu a Odzi Kan ne mfe 200 afrenhyia do no, President a Odzi Kan na n’Apamfo na Asomafo Abaguafo Duebien no dwendween dza yebotum ayɛ a ɔfata dze ahyɛ dza osii soronko yi ho fa.
Nyame a oyii Noho kyerɛe ɔdasanyi no na ɔhyɛɛ Jesus Christ N’asɛmpa ne mãhyɛ Nsanananmu na ɔdze mberano mãhyɛ no bɔbɔɔ adze.
Yɛdween ho dɛ ana yɛnyɛ nkaadze bi nsi hɔ. Naaso ber a yɛdwendween abakɔsɛm mu asɛm tsitsir yi ho na Enyido-adzehu a Odzi Kan a no nsunsuando tserɛw kɔ aman nyina do no, yenyaa nkenyan dɛ nkaadze a ɔnnyɛ dza wɔdze ɔbo pa anaa boba ayɛ mbom nkasafua—nkasafua awɔse mu na dawurbɔ krɔnkrɔn—a wɔakyerɛw, nnyɛ “abopon do” mbom wɔakyerɛw ekrukye no wɔ hɛn “nyimpa akomapon” do.14
Fitsi ber a wɔhyehyɛɛ Asɔr no, dawurbɔ enum pɛr na wɔdze ato gua, a dza odzi ekyir no yɛ “Ebusua No, Dawurbɔ a wɔdze ma Wiadze,” President Gordon B. Hinckley dze too gua wɔ afe 1995 mu.
Afei ber a yɛdwendwen mber soronko yi wɔ wiadze abakɔsɛm mu na Ewuradze n’ahyɛdze dɛ yɛmboaboa Israel ano wɔ Jesus Christ Ne Mbae a Otsĩa Ebien ho ahoboboa mu no, hɛn, President a Odzi Kan na n’Apamfo na Asomafo Abaguafo Duebien no dze dawurbɔ a odzi do yi to gua. Ne dzin dze “Jesus Christ N’Asɛmpa ne Nsanananmu: Mfe Ahaebien Dawurbɔ a wɔdze ma Wiadze.” President a Odzi Kan na n’Apamfo na Asomafo Abaguafo Duebien no na wɔkyerɛwee. Da ɔhyɛ do yɛ Ebɔbira 2020. Ama maayɛ ndɛ ho ahoboa no, midzii kan twaa dawurbɔ yi wɔ Kwã Krɔnkrɔn no mu, bea a Joseph Smith dzii kan hun Egya na Ɔba no, guu efir do.
“Yɛpaa mu kã no ahobrɛadze mu dɛ Nyankopɔn dɔ Ne mba a wɔwɔ wiadze aman nyina mu no. Nyame Egya no ama hɛn awoo krɔnkrɔn, abrabɔ a ne saso nnyi, na No Dɔba, Jesus Christ no werdam afɔrbɔ a ɔmmbɔadze da no. Ɔnam Egya no tum do, Jesus soɛɛr bio na odzii owu do konyim. Ɔyɛ hɛn Agyenkwa, hɛn Fasusufo, na hɛn Pomfo.
“Mfe ahaebien a abɛsen kɔ no, wɔ fefɛw da anapa fɛɛfɛw bi wɔ afe 1820 mu no, akɔkowaba Joseph Smith a, ɔrohwehwɛ ehu asɔr kor a ɔnkɔdɔm no, kɔr ndua kwaa a ɔbɛn ne fie mu wɔ New York etsifi, USA. Nna ɔwɔ nsɛmbisa a ɔfa ne kra no nkwagye ho na onyaa awerɛhyɛmu dɛ Nyankopɔn bɛkyerɛ no kwan.
“Ahobrɛadze mu ara, yɛbɔ no dawur dɛ wɔ ne mpaabɔ ho mbuae mu no, Nyankopɔn Egya no na Ne Ba Jesus Christ, puee Joseph Smith do na ɔhyɛɛ ‘ndzɛmba nyina ahyɛananmu” (Ndwuma 3:21) no ase dɛ mbrɛ woedzi kan akã wɔ Bible mu no. Enyido-adzehu yi mu no, osũaa dɛ asɔpɔkan Asomafo no hɔn wu ekyir no, Christ N’Ahyɛmu Fofor Asɔr no yewee fii wiadze. Joseph na ɔbɛyɛ edwindadze wɔ ne nsan ananmu no mu.
“Yesi no pi dɛ wɔ Egya na Ɔba no Hɔn kwankyerɛ ase no, abɔfo baa bɛkyerɛkyerɛɛ Joseph na wɔsanee kyekyeer Jesus Christ N’Asɔr no. John Onumanyi no a ɔasoɛr efi owufo mu no dze tumdzi a wɔdze yɛ nsumuhyɛ enuma no sanee bae. Asɔpɔkan Asomafo hɔn mu baasa—Peter, James, na John—dze asomafo na asɔfodzi tumdzi nsaafee no saan ananmu bae. Binom so bae, a Elijah kã ho, a ɔdze tumdzi a wɔdze kã ebusua ebusua bɔ mu afebɔɔ wɔ onnyiewiei nkitahodzi mu a ɔtra owu mu bae.
“Yɛgye ho dase bio dɛ wɔmaa Joseph Smith Nyame akyɛdze na tum dɛ ɔmfa nkyerɛ tsetse kyerɛwee ase: Mormon Nwoma no—Jesus Christ n’Ahyɛmu Kor so. Jesus Christ nankasa No somdwuma wɔ nkorɔfo a wɔwɔ Anee Wiadze Afamu wɔ No Wusoɛr ekyir ara no, no ho nsɛm kã nwoma krɔnkrɔn yi ne nkrataafa ho. Ɔkyerɛkyerɛ hɛn abrabɔ no botae na ɔkyerɛkyerɛ Christ ne nkyerɛkyerɛ mu a, ɔyɛ dɛm botae no ne fapem. Dɛ ɔyɛ kyerɛwsɛm a ɔnye Bible no nam dɛ adamfo no, Mormon Nwoma no gye dase dɛ adasa nyina yɛ Egya a ɔwɔ Sor dɔfo ne mbabanyin na ne mbabaa, dɛ Ɔwɔ nhyehyɛɛ krɔnkrɔn ma hɛn abrabɔ, na dɛ Ne Ba, Jesus Christ, kasa ndɛ tse dɛ tsetse ber so mu no.
“Yɛbɔ no dawur dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no, a wɔkyekyeer no Ebɔbira 6, 1830, nye Christ N’Ahyɛmu Fofor Asɔr no a wɔdze asan anamu aba no. Asɔr no tsim no kotowdo-bo tsitsir, Jesus Christ N’emudzi abraba do, na No Werdambɔ a ɔmmbɔadze da na No Wusoɛr ampaara no do. Jesus Christ asan afrɛ Asomafo bio na Ɔama hɔn asɔfodzi tumdzi. Ɔto nsa frɛ hɛn nyina dɛ yɛmbra Ne nkyɛn na N’Asɔr mu, mbɛgye Sunsum Krɔnkrɔn, nkwagye ayɛdze horow, na yenya enyigye a ɔmmbɔadze da.
“Afei mfe ahaebien abɛsen fitsi Nsanananmu yi a Nyankopɔn Egya no na No Dɔba, Jesus Christ hyɛɛ ase no. Ɔpepe a wɔwɔ wiadze yi mu efua iyinom a osisii ho nyimdzee a wɔhyɛɛ ho nkɔm no.
“Yɛbɔ no dawur enyigye mu dɛ Nsanananmu a wɔbɔɔ ho anohoba no dua nyikyerɛ a ɔkɔ do no do dze kɔ kan. Asaase yi rennda ho nnyɛ dɛmara bio, osiandɛ Nyame ‘bɛkã ndzɛmba nyina abɔ mu kor wɔ Christ mu’ (Ephesusfo 1:10).
“Yɛdze obu na enyisɔ no, hɛn N’Asomafo to nsa frɛ obiara dɛ ombohu—dɛ mbrɛ yenyim no—dɛ ɔsorsor ebue. Yesi no pi dɛ Nyankopɔn reda Ne pɛ edzi ma Ne mbabanyin na ne mbabaa adɔfo no. “Yɛgye dase dɛ hɔn a mpaabɔ mu ara wosũa Nsanananmu ho asɛm na wɔdze gyedzi dzi dwuma no, wobehyira hɔn ma woenya hɔnankasa hɔn dasegye wɔ no krɔnkrɔnyɛ na no botae ho, dɛ obesiesie wiadze no ama hɛn Ewuradze na hɛn Agyenkwa, Jesus Christ ne Mbae a Otsĩa Ebien a wɔabɔ ho anohoba no.’’16
Enuanom na nkyerɛbaa adɔfo, iyi nye hɛn mfe ahaebien afrɛnhyia dawurbɔ dze ma wiadze a ɔfa Jesus Christ N’Asɛmpa Nsanananmu wɔ ne mãhyɛ mu ho. Wɔakyerɛ ase akɔ kasa ahorow 12 mu. Ɔnnkɛyɛr na kasa ahorow binom so atoa do. Nsa bɛkã no ntsɛmara wɔ Asɔr no no website, a ibotum enya nkyerɛwee no bi. Hom nsũa no ankorankor, na hom nye hom ebusua mu mba na anyɛnkofo. Hom ndwendwen nokwar ahorow no ho na hom ndwen mbrɛ dɛm nokwar no benya nhyɛdo wɔ hom abrabɔ mu do sɛ hom tsie, hom yɛ aso, na hom dzi mbrasɛm na ahyɛmudzi a ɔkã ho no a.
Minyim dɛ Joseph Smith yɛ nkɔnhyɛnyi a wohun no siei a Ewuradze saan mu yii no dɛ ombobue mberano yi a odzi ewie. Woduaa no do na Ewuradze N’Asɔr no wɔdze asan ananmu aba asaase no. Joseph dze no mbɔgyaa sɔɔw ne dasegye ano. Mbrɛ misi dɔ no na midzi no nyi.
Nyame tse ase! Jesus nye Christ no! N’Asɔr no wɔasan ananmu dze aba. Ɔno na N’Egya, hɛn Ɔsor Egya, rohwɛ hɛn do. Megye ho dase wɔ Jesus Christ ne dzin krɔnkrɔn no mu, amen.