Hosanna na Hallelujah—Christ Tseasefo No: Nsanananmu na Easter N’Akoma
Hosanna na hallelujah mber yi no, tow hallelujah—osiandɛ Obedzi hen afebɔɔ!
Enuanom adɔfo: yɛdze hosanna na hallelujah no, yɛkaa Jesus Christ ɔtseasefo no wɔ Nsanananmu na Easter a ɔrokɔdo mber yi mu. Ɔdze ɔdɔ a odzi mu no, hɛn Agyenkwa ma hɛn awerɛhyɛmu dɛ: “hom benya asomdwee wɔ mo mu. Wiadze mu dze, hom wɔ ahohia: naaso hom nhyɛ dzen; medzi wiadze do konyim”1
Mfe pii a abasen kɔ no, ber a menye me yer hyiaa ebusua fɛɛfɛw bi no, hɔn ba basiaba kakraba, Ivy, fɛr mu ara kɛfaa ne violin bae. Oyii violin sanku no, miaa mu na ɔdze rosin to do. Afei ɔsanee dze sanku no hyɛɛ nwoma no mu, bɔɔ no mu adze, na ɔtsenaa ase. Orusua bɔ no, ɔakyɛ dza onyim nyina wɔ violin no ho sesei. Afei, mfe pii ekyir no, Ivy bɔ violin no dɛɛdɛdɛw.
Ɔnnkyebo mber yi mu no, hɛn nyinara tse dɛ Ivy kakraba na ne violin no. Yɛhyɛ ase wɔ ahyɛse no. Yesua na yɛwɔw do no, yenyin na yetu mpon. Mber resen no, nyimpa ne pɛ na ɔnnkyebo suahu boa hɛn ma yɛbɛyɛ tse dɛ hɛn Agyenkwa ber a yɛnye No yɛ edwuma wɔ No wenyin ture no mu2 na yedzi N’ahyɛmu anamɔn kwan no do.
Nkaada ahorow, a mfe ahaebien ka ho no, tsi nsanananmu no nhwɛdo ahorow no mu.3 Yɛrekaa Jesus Christ n’asɛmpa ne Nsanananmu a ɔrokɔ do no, yɛsan so yɛ Easter ho ahoboa. Ebien nyina mu no, yedzi dɛw wɔ Jesus Christ ne nsanee no ho. Ɔtse ase—nnyɛ dada no nko, mbom sesei; mma binom ara, mbom ma obiara. Ɔbae na Ɔaba rebɛsa akoma a ebubu no yarba, Ɔagye ndɔmmumfo, Ɔama enyifurafo ehu adze, na Oegyaa hɔn a woepirapira no.4 Ɔno yɛ hɛn mu kor biara. No ɔpon anohoba no ka ho, a hɛn abrabɔ dada, dza yɛ wɔ mu sesei, anaa hɛn ndaamba ɔhaw no mmfa ho.
Ɔkyena yɛ Menakɔnson Kwesida. Amambra kwan do no, nna menakɔnson yɛ sɛnkyerɛdze a wɔdze kyerɛ dɛwdzi wɔ hɛn Ewuradze mu, tse dɛ wɔ Christ ne Jerusalem Nhɛnmu Konyimdzi mu a, “nyimpa dodow …faa berɛw. na wofiir edzi dɛ worikehyia no kwan.’’5 (Hom bɛpɛ dɛ wobohu dɛ Harry Anderson ne adrɔ a ɔnoara yɛɛ no sɛn President Russell M. Nelson ne ɔfese, no pon n’ekyir hɔ ara.) Nyikyerɛ nwoma mu no, hɔn a woyi Nyankopɔn na Eguambaa ayew no yɛ a “wɔhyehyɛ ntar fitaa, na berɛw kurakura hɔn nsamu.’’6 Wɔdze “tsenenee bataker’’ na “enyimnyam abɔtsir’’ no berɛw kaa ho wɔ Kirtland Temple tu hyɛ Nyame nsa mpaabɔ no mu.7
Nokwar, Menakɔnson Kwesida ne tsitsiryɛ no tra nyimpa dodow a wɔdze berɛw rekyia Jesus. Menakɔnson Kwesida no, Jesus hɛɛn Jerusalɛm wɔ akwan a anokwafo no hun no dɛ nkɔnhyɛ ne mãhyɛ. Dɛ mbrɛ Zechariah8 na Ɔdwontowfo dzii kan kãa no nkɔnhyɛ mu no, hɛn Ewuradze hɛɛn Jerusalem a nna ɔtsena asoaso pɔnkɔ do ber a nyimpa dɔm retsẽatsea mu dɛ “Hosanna wɔ sorsor.’’9 Hosanna n’asekyerɛ “gye sesei.’’10 Tse dɛ dadaw no, sesei so, yedzi dɛw “Osiarfo nye nyia ɔnam Ewuradze dzin mu reba no.’’11
Dapɛn a odzi Menakɔnson Kwesida do nye Easter Kwesida. President Russell M. Nelson kyerɛkyerɛ dɛ Jesus Christ “bae botua kaw a Ɔno nndze, osiandɛ nna yɛdze kaw a yennkotum etua.’’12 Nokwar, ɔnam Christ no Werdambɔ do no, Nyankopɔn ne mba nyinara “botum enya nkwa, ber a wɔyɛ setsie ma mbra no na Asɛmpa n’ayɛdze ahrow no.’’13 Easter ber no, yɛtow hallelujah. Hallelujah n’asekyerɛ “ye Ewuradze Jehovah ayew.’’14 Hallelujah Chorus wɔ Handel ne Messiah mu no yɛ Easter mpaamukã dɛɛdɛw dɛ Ɔno nye “Ahemfo Hen, na Ewuranom wura.’’15
Menakɔnson Kwesida na Easter Kwesida ntamu no dza osisii krɔnkrɔn no yɛ hosanna na hallelujah ho asɛm. Hosanna yɛ hɛn ntotɔserɛ ma Nyankopɔn dɛ ɔngye hɛn. Hallelujah kyerɛ hɛn ayeyi ma Ewuradze wɔ nkwagye na nkwagye ntowdo ho enyidado. Hosanna na hallelujah mu no yehu Jesus Christ ɔtseasefo no dɛ Easter na da a odzi ekyir nsanananmu n’akoma.
Nda a odzi ekyir Nsanananmu no dze Nyankopɔn a Opuei nyimpa do hyɛ ase—pɛpɛɛpɛr dɛ Nyame Egya na Ne Ba, Jesus Christ pueii akokɔwaba nkɔhyɛnyi Joseph Smith do. Nkɔnhyɛnyi Joseph kãa dɛ, “Itum hwɛ sor kaan sima enum a, ibohu akyɛn dza ibɛkenkan nyina a wɔakyerɛw da wɔ asɛm no ho.’’16 Osiandɛ sorsor ebuei bio ntsi, yenyim na “yɛgye Nyankopɔn, Onnyiewiei Egya no, na Ne Ba, Jesus Christ, na Sunsum Krɔnkrɔn no dzi’’17—Nyametsir krɔnkrɔn no.
Easter Kwesida, Ebɔbira 3,1836, Nsanananmu ne nda ahyɛase mu no, Jesus Christ ɔtseasefo no pueii ber a wɔtuu Kirtland Temple no hyɛɛ Nyame nsa ekyir no. Hɔn a wohun No gyee No ho dase wɔ ogya na nsu ebirabɔ nsɛm mu dɛ: “Nna n’enyiwa tse dɛ gya; framee, ne tsir nhwi no yɛ fufuw dɛ esukwankyɛba korɛngyenn; n’enyim hyerɛɛn bor ewia ne kan; do, na ne ndze yɛɛ dɛ nsu kɛse a ɔrepem, kyirididi, Jehovah no ne ndze mpo a ɔrekã.’’18
Dɛm ber no, hɛn Agyenkwa paa mu kãa dɛ, “Emi nye ɔkandzifo nye okyidzifo no; emi nye nyia ɔtse ase no, emi nye nyia wokum no no; emi nye hom dzimafo wɔ Egya no nkyɛn.’’19 Bio, ebirabɔ nsɛm—ɔkandzifo nye okyidzifo, nyia ɔtse ase no na nyia wokum no. Ɔno nye Alpha nye Omega, ahyɛse na ewiei,20 hɛn gyedzi ne dzikamfo nye no wiefo.21
Jesus Christ, pueii ekyir no Moses, Elias, na Elijah so bae. Ɔnam akwankyerɛ krɔnkrɔn do no, nkaano nkɔnhyɛfo akɛse yinom dze asɔfodzi nsaafee na etumdzi no saan ananmu bae. Dɛm ntsi, “wɔdze mberano yi ne nsaafee no ama’’22 wɔ N’Asɔr a wɔdze asan ananmu aba no mu ma wɔdze ehyira Nyankopɔn ne mba nyinara.
Elijah ne mbae wɔ Kirtland Temple mu no so yɛ Malachi ne Ahyɛmu Dadaw nkɔnhyɛ ne mãhyɛ dɛ Elijah bɛsan aba ‘’ansaana Ewuradze ne da kɛse a ɔyɛ hu no aba.’’23 Ɔyɛe no, Elijah ne mpuei no, ɔannhyɛ dara dze, nye Jewfo hɔn Apaho afe no a, ntɔyɛe enyidzi mu ara enyida Elijah ne mbae no kwan kehyiae a nna ɔsɛ dɛ ɔba no dɛm.
Jewfo ebusua ebusua dodow ara wodzi mu no siesie bea bi wɔ hɔn edzibanpon ho ma Elijah. Dodow ara hyɛ kɔɔpow mã tɛntɛn dze to nsa frɛ no na wɔma no akwaaba. Na binom, Apaho Seder ntɔyɛe ber no, soma abofra bi kɔ abow no ho, ɔtɔfabi a wɔwɔw no, dze hwɛ sɛ Elijah wɔ abowano rotweɔn ma ɔato nsa afrɛ no dɛ ɔmbra mu a.24
Nkɔnhyɛ ne mãhyɛ na ndzɛmba nyina a wɔdze bɛsan ananmu n’anohoba a ɔka ho no,25 Elijah bae dɛ mbrɛ wɔbɔɔ anohoba no, wɔ Easter na Apaho n’ahyɛse ber no. Ɔdze nsɔwano etumdzi a wɔdze bɛkyekyer ebusua ebusua wɔ asaase do na wɔ sor bae. Dɛ mbrɛ Moroni kyerɛɛkyerɛ Nkɔnhyɛnyi Joseph dɛ, Elijah “dze anohoba a wɔdze bɔɔ egyanom no bɛhyɛ mba hɔn akoma mu, na mba no hɔn akoma bɛdan akɔ hɔn egyanom hɔ. Moroni kɔɔr do dɛ “sɛ annyɛ dɛm a,’’ “ber a [Ewuradze] bɛba no asaase no bɛsɛɛ koraa.’’26 Elijah no sunsum no, da Sunsum Krɔnkrɔn no edzi, twe hɛn bɛn hɛn ebusuasantsen a—wɔasen kɔ, wɔwɔ hɔ ndɛ, na wɔbɛba ndaamba—wɔ hɛn genealogy, abakɔsɛm, ahorow na temple so mu.
Hom mma yɛnsan so nkã dza Apaho kyerɛ tsiabaa. Apaho kaa Israelmba a wɔgye hɔn fii mfe 400 nkowaasom mu no. Exodus nwoma no kã mbrɛ ɔgye yi sii bae wɔ ntwɛr, dwuw, atsɛn, mbowa hɔn wu, pɔmpɔ, tutu ekur, ɔsorbo na ogya, mbɛbɛw, na sum kebii ɔyardɔm ho asɛm kyerɛ. Yardɔm a odzi ewiei no hunahuna mbakanmba a wɔwɔ asaase do no hɔn wu, na nnyɛ Israelfo hɔn efiefie mu dze —sɛ ofidua no dze eguambaa a onndzi dzɛm, onyin abakan no bɔgya no petse hɔn mpondua n’etsifi no ho a.27
Owu bɔfo no twaa mu wɔ efiefie a wɔdze eguambaa ne bɔgya sɛnkyerɛdze apetse ho no ho.28 Dɛm ntwamu, anaa apaho, no gyina hɔ ma Jesus Christ a odzii owu do koraakoraa no. Nokwar, Nyame Eguambaa no werdam bɔgya no ma hɛn Guanhwɛfo Pa no tum ma ɔboa No nkorɔfo ano wɔ mbea mbea nyina na gyinabew horow mu kɔ No nguankuw no mu dwudwoodwo wɔ ntwamutam afã ebien no.
Tsitsir ara, Mormon Nwoma no kã “Christ no wusoɛr na tum ho asɛm’’29—Easter tsirmpɔw—wɔ nsanananmu ebien ne nsɛm mu.
Odzi Kan,wusor ka hɛn nyimpadua no “bɛsanananmu esisi ne sibew ma edzi mu’’; “nsa benya nsa na anan dze ama nyimpadua no’’; nyew, “nhwi kor mpo rennyew.’’30 Anohoba yi ma hɔn a wonnyi nsa anaa anan; hɔn a wonnhu adze, wɔnntse asɛm, anaa wɔnnanatsew; anaa sintɔ biara no enyidado. Ohu hɛn. Ɔma yedzi mu.
Easter na hɛn Ewuradze no Werdambɔ ho anohoba a otsĩa ebien no nye dɛ sunsum mu no “ndzɛmba nyina bɛsanananmu esisi ne sibew.’’31 Sunsum mu nsanananmu yi, kyerɛ hɛn ndwuma na apɛdze ahorow. Tse dɛ paanoo wɔ nsu do no,32 ɔdze “dza oye,’’ tsenenee,’’ “pɛryɛ,’’ na “ehumbɔbɔr,’’ san ananmu.33 Ɔnnyɛ ahobow dɛ nkɔnhyɛnyi Alma kã kasfua nsanananmu mpɛn 2234 ber a ɔhyɛ hɛn dɛ “yendzi pɛrpɛr, bu atsɛntsenenee, na yɛ papa daa nyina.’’35
Osiandɛ “Nyankopɔn noara bɔɔ werdam ma wiadze bɔn ntsi,’’36 Ewuradze no Werdambɔ no tum nnyɛ dza nna ɔwɔ hɔ nko yie, mbom dza obotum abɛyɛ no so yie dɛmara. Osiandɛ Onyim hɛn yaw, atseetsee, nyarba, ahorow hɛn “nsɔhwɛ biara ma ɔtse,’’ ntsi37 Ɔdze ehumbɔbɔr no, Obotum aboa hɛn dɛ mbrɛ hɛn mberɛyɛ tse.38 Osiandɛ Nyankopɔn yɛ “Nyame a odzi mu, Nyame a ɔtsen, na Nyame a ɔwɔ ehumbɔbɔr’’ so ntsi, “ehumbɔbɔr ho nhyehyɛɛ no botum “aaba abɛpata pɛrpɛrdzi n’ahwehwɛdze.’’39 Yenu hɛnho na yɛyɛ dza yebotum nyina. Otwa hɛnho hyia onnyiewiei mu “wɔ no dɔ abasa no mu.’’40
Ndɛ yɛhyɛ nsanananmu na owusor ho fa. Wɔka moho no, midzi dɛw wɔ Jesus Christ n’asɛmpa ne mãhyɛ ne Nsanananmu no a ɔrokɔdo no ho. Dɛ mbrɛ mfe 200 a abasen kɔ fefɛw ber yi no, kan na nyikyerɛ kɔ do dua Ewuradze no nkɔnhyɛnyi ɔtseasefo na N’Asɔr a wɔdze Ne dzin frɛ no—Jesus Christ N’Asɔr a ɔwɔ hɔ ma Nda a Odzi Ekyir Ahotseweefo do ba—na odua ankorankor nyikyerɛ na nkenyan a ɔnam Sunsum Krɔkrɔn n’akyɛdze nwanwa no do ba.
Wɔkã moho, wɔ Easter ber yi, megye Nyankopɔn, hɛn Onnyiewiei Egya, na No Dɔba, Jesus Christ tseasefo no ho dase. Emumuyɛ mu ara wɔbɔɔ adasamba mbeamudua mu na ekyir no wɔsoɛree. Naaso ɔtseasefo Jesus Christ nko No bɔbea a odzi mu a Ɔdze soɛree no da ho wɔ mbeamudua n’ahyɛnsewdze no wɔ Ne nsa, n’anan ho, na ne mfemu. Ɔno nko na Obotum ase dɛ, “Mekrukye wo wɔ me nsayamu.’’41 Ɔno nko na Obotum ase dɛ: “Emi nye nyia wɔmaa no do no. Emi nye Jesus a wɔbɔɔ no mbeamudua mu no. Emi nye Nyame ne Ba no.’’42
Tse dɛ Ivy kakraba na ne violin no, ihɛn wɔ akwanhorow bi mu no yɛda ho rehyɛ ase. Nokwar mu ara, “Enyiwa nnhunii na aso nntsee, na ɔnnhɛn nyimpa akoma mu, ndzɛmba a Nyankopɔn esiesie ama hɔn a wɔdɔ no.”43 Mber yinom mu no, yebotum esua Nyankopɔn ne papayɛ na hɛn ndaamba krɔnkrɔn ma Nyankopɔn no dɔ ma oenyin wɔ hɛn mu ber a yɛhwehwɛ No na yɛboa hɛnho nkorkor ho asɛm. Akwan afofor na mbeambea afofor mu no, yebotum ayɛ na yɛabɛyɛ, nsensaneeba tsĩa nsensaneeba, ayamuyie tsĩa ayamuyie, dɛ ankorankor mu na yɛabɔbɔmu no.
Enuanom adɔfo wɔ beebiara, ber a yehyia na yɛbɔmu sua adze no, hom gyedzi na papayɛ, dze asɛmpa n’enyigye na n’enyisɔ nkã na ɔhyɛ me mã. Hom dase na asɛmpa akwantu no hyɛ me dase na asɛmpa akwantu no mã. Hom haw na enyigye, hom dɔ ma Nyankopɔn ofidua na Ahotseweefo kuw no, na hom ntseasee wɔ nokwar na kan a wɔdze asan no ho a wɔdze bɔ bra no ma me mãhyɛ wɔ asɛmpa a wɔdze asan ananmu aba, a ɔtseasefo Jesus Christ nye n’akoma no, nyin. Yɛbɔmu nya awerɛhyɛmu, “isum mu o, ekan mu o, Ewuradze, enye me ntsena.’’44 Koryɛ mu no yenyim, wɔ hɛn adzesoadze na haw mu no, yebotum akan hɛn nhyira.45 Daa daa ndzɛmba na ndzɛmba nktsenketse na ɔnnyɛ dzen mu no, yebotum ehu ndzɛmba akɛse a wɔaba hɛn abrabɔ mu.46
“Na ɔbɛba dɛ wɔbɔboaboa atseneneefo ano efi aman nyinara mu na wɔaba Zion, na wɔbɔtow daapem enyigye ndwom.’’47 Hosanna na hallelujah mber yi no, tow hallelujah—osiandɛ Obedzi hen afebɔɔ! Tsẽa mu hosanna, ma Nyame na Eguambaa no! Jesus Christ ne dzin krɔnkrɔn no mu, amen.