Erubu Atsɛn Tsenenee

Elder Ronald A. Rasband ne Kasae

Ɔkã Eduosuon no ho

Ama oebu atsɛmbu tsenenee no, Agyenkwa no werdam afɔrbɔ no besiesie sunsum mu yaw na mberɛwyɛ a binom dze tsia hɛn no efi hɔ.

Mormon Nwoma no kyerɛkyerɛ Christ ne Nkyerɛkyerɛ

Ɔbɛsɛ a abasen no, President Russell M. Nelson too hɛn tafɛrbanyimbɔmu dɛ yɛndwendwen nkyɛ mbrɛ hɛn abrabɔ besi asesã sɛ awerɛfir mu ara “woyi nyimdzee a yeenya efi Mormon Nwomaa no mu no fi hɔ a.’’¹ Madwendwen asɛmbisa yi ho, na minyim no pefee dɛ hom mu dodow so ayɛ dɛm. Adwen tsitsir kor bi esi do aba mpn pii dɛ—sɛ Mormon Nwoma ne pefeeyɛ wɔ Christ na No werdam afɔrbɔ ho nkyerɛkyerɛ nnyi hɔ a, nnkyɛ henfa na mebɛdan enya asomdwee?

Christ ne nkyerɛkyerɛ no—a ɔyɛ gyedzi wɔ Christ mu, nnuhu, enuma, Sunsum Krɔnkrɔn n’akyɛdze, na erosɔw dze akɔ ewiei no wɔ nkwagye fapem na ayɛdze horow no mu no—wɔakyerɛkyerɛ no mber pii wɔ Nsanananmu ne kyerɛwsɛm nyinara mu a mbom tum tsitsir wɔ Mormon Nwoma no mu.² Nkyerɛkyerɛ no dze gyedzi wɔ Christ mu hyɛ ase, na ne ndzɛmba mu kor biara gyina awerɛhyɛmu wɔ No werdam afɔbɔ no mu.

Dɛ mbrɛ President Nelson akyerɛkyerɛ no, “Mormon Nwoma no da Jesus Christ no Werdambɔ no ho ntseasee tumdzi mapã ne mãhyɛ mu ho a wonnkohu no beebiara edzi.’’³ Mpɛn dodow a yɛtse Agyenkwa no n’akyɛdze krɔnkrɔn ase no, mpɛn dodow a yebohu, wɔ hɛn adwen mu na hɛn akoma mu,⁴ President Nelson no nokwardzi awerɛhyɛmu dɛ “Mormon Nwoma no ne nokwar no wɔ tum dze sã yarba, mã ahomka, dze nsanananmu, dze kyekye werɛ, dze hyɛ dzen, dze pepa enyinsuwa, na ɔma hɛn akra n’enyi gye.’’⁵

Agyenkwa No Werdambɔ no Dze Pɛrpɛrdzi N’Ahwehwɛdze Nyinara Ma

Mormon Nwoma no n’adzetsitsir na asomdwee a ɔdze ma hɛn ntseasee wɔ Agyenkwa no no Werdambɔ ho nye ne nkyerɛkyerɛ dɛ Christ n’ehumbɔbɔr afɔrbɔ no hyɛ pɛrpɛrdzi n’ahwehwɛdze nyinara mã. Dɛ mbrɛ Alma kyerɛkyerɛɛ mu no, “Dɛm ntsi Nyankopɔn nankasa dze noho ayɛ werdambɔ dze ama wiadze bɔn nyina, ama ehumbɔbɔr ho nhyehyɛɛ no aaba abɛpata pɛrpɛrdzi n’ahwehwɛdze, ama Nyankopɔn aayɛ Nyame a odzi mu, Nyame a ɔtsen, nye Nyame a ɔwɔ ehumbɔbɔr so.’’⁶ Egya n’ehumbɔbɔr nhyehyɛɛ no⁷—dza kyerɛwsɛm san so frɛ no enyigye ho nhyehyɛɛ no⁸ anaa nkwagye nhyehyɛɛ no⁹—nnkotum ewie yɛ kɛpem dɛ pɛrpɛrdzi ne nsa kaa n’ahwehwɛdze nyinara.

Naaso ebɛnadze nye “pɛrpɛdzi n’ahwehwɛadze?’’ Hwɛ Alma noara no suahu. Kaa dɛ, mber a nna ɔyɛ aberantsewa no, Alma kyinii dɛ ɔrohwehwɛ “asɛɛ asɔr no.’’¹⁰ Nokwar, Alma kãa kyerɛ ne ba Helaman dɛ “hɛl ne yaw maa moho hyehyee me ara yie’’ osiandɛ “medzii [Nyankopɔn] ne mba pii ewu’’ yie ber a “magye hɔn akɔ ɔsɛɛ mu.’’¹¹

Alma kyerɛkyerɛɛ mu kyerɛɛ Helaman dɛ ewiei no onyaa asomdwee ber a “ m’adwen twee’’ n’egya ne nkyerɛkyerɛ a “ɔfa Jesus Christ … a ɔreba … abɔbɔ werdam dze etua wiadze bɔn no.’’¹² Alma a nna oenya nnuhu no totɔe serɛɛ Christ n’ehumbɔbɔr¹³ na afei ɔtsee enyigye na mboa mber a ohun dɛ Christ abɔ ama no bɔn ahorow no na oetua dza pɛrpɛrdzi hia nyinara. Bio, ebɛnadze na nkyɛ pɛrpɛrdzi behia efi Alma hɔ? Dɛ mbrɛ Alma nankasa kyerɛɛkyerɛ ekyir no dɛ, “adze a noho nntsew biara runntum nntsena Nyankopɔn n’ahenman mu.’’¹⁴ Dɛm ntsi, nna Alma no mboa no bi bɛyɛɛ dɛ, sɛ ehumbɔbɔr endzi egyina mu a nkyɛ, pɛrpɛrdzi besiw no kwan dɛ ɔbɛsan akɔ nye Ɔsor Egya akɛtsena.¹⁵

Agyenkwa No Sã Epirakur a Yennkotum Asã no Yarba

Naaso ana nna Alma n’enyigye no tsimii wɔ no nko do dɛ—obokwetsir n’ asotwe na obotum asan akɔ Egya ne nkyɛn a? Yenyim dɛ Alma sanee so dzii yaw wɔ hɔn a nna oegya hɔn efi nokwar no ho no.¹⁶ Mbom nna Alma nankasa nnkotum ama hɔn a ogyaa hɔn kɔree no nnsan anaa ɔnnsã hɔn yarba. Nna nankasa nnkotum ehu no pefee dɛ sɛ wɔbɛma hɔn kwanpa ma woesua Christ ne nkyerɛkyerɛ no na wɔdze ne fapem horow no ehyira hɔn a. Nna onnkotum dze hɔn a woewuwu no a n’ator nkyerɛkyerɛ no da ho fura hɔn enyiwa no asan aba nkwa mu bio.

Dɛ mbrɛ President Boyd K. Packer kyerɛkyerɔɛ no mber bi no: “Adwendwen a ɔgyee Alma … nye iyi: Idze dza wɔdze san ananmu no nnkotum asan ananmu, eresã epirakur no a nnkotum asa no yarba, eresiesie dza ibui na nnkotum esiesie no nye Christ no werdambɔ no botae ankasa.’’¹⁷ Nokwar dɛwdzi a Alma n’adwen “tsee ase’’ no, nnyɛ dɛ wobotum atsew ɔno ankasa nko noho ara mbom dɛ hɔn a opira hɔn no so botum enya ayarsã na woedzi mu.

Agyenkwa N’Afɔrbɔ no Ma Atsɛn Tsenenee

Mfe pii annsaana awerɛhyɛmu nkyerɛkyerɛ yi rebɛgye Alma no, nna Ɔhen Benjamin akyerɛkyerɛ ayarsa ne kɛse a Agyenkwa no werdam afɔrbɔ dze mae no ho asɛm. Ɔhen Benjamin paa mu kãa dɛ “Nyame no bɔfoe na ɔdaa nsɛm a ɔyɛ enyigye na ɔyɛ dɛw kɛse edzi akyerɛ me.’’¹⁸ Nsɛm a ɔyɛ dɛw kɛse no mu kor nye nokwar no dɛ Christ bohu amandze na oewu ama hɛn bɔn na mfomdo dze ahwɛ no dɛ “ atsɛmbu tsenenee aaba adasamba do.’’¹⁹

Ebɛnadze pɛɛ na “atsɛmbu tsenenee’’ hia? Nyiyimu a odzi do no, Ɔhen benjamin kyerɛɛkyerɛ mu dɛ, ama atsɛmbu tsenenee aba mu no, Agyenkwa no bɔgya no bɔɔ werdam “dze etua bɔn a ɔwɔ hɔn a wɔahwe ase wɔ Adam ne mbrato ntsi no’’, na “hɔn a woewuwu a wonnyim Nyankopɔn ne pɛ a ɔfa hɔn ho anaa wɔyɛɛ bɔn a nna wonnyim.’’²⁰ Ɔkyerɛɛkyerɛ dɛ, atsɛmbu tsenenee san so hia dɛ, “Christ no bɔgya no bɔ werdam ma’’ mbofra nkakraba hɔn bɔn.²¹

Kyerɛwsɛm yinom kyerɛkyerɛ enyimnyam nkyerɛkyerɛ dɛ: Agyenkwa no werdam afɔrbɔ no sã yarba, ɔyɛ akyɛdze kwa, ma hɔn a wonnyim na wɔyɛ bɔn—ma hɔn a, dɛ mbrɛ Jacob kãe no, “bea a mbra nnyi no.’’²² Bɔn ho nkontaabu gyina kan a wɔdze ama hɛn no do na ogyina hɛn ahom dɛ yɛdze hɛn pɛ bedzi dwuma do.²³ Yenyim ayarsã na nokwar awerɛkyekyer yi osian Mormon Nwoma na Nsanananmu kyerɛwsɛm nko bi so ntsi.²⁴

Nokwar, bea a mbra wɔ no, bea a yenyim Nyankopɔn n’apɛdze no, yebobu ho nkontaa. Dɛ mbrɛ Ɔhen Benjamin tsĩi mu dɛ: “Mbom ondue, ondue onyia onyim dɛ ɔretsew Nyankopɔn do etua! Osiandɛ nkwagye mmba obiara a ɔtse dɛm do gyedɛ dza oenya nnuho, na ɔwɔ gyedzi wɔ Ewuradze Jesus Christ mu.’’²⁵

Iyi so yɛ Christ ne nkyerɛkyerɛ ho dɛwdzi kɛse. Agyenkwa no nnsa hɔn a wɔyar no yarba na ɔma hɔn a wɔyɛ bɔn a wonnyim no ahom nko, mbom so, hɔn a wɔyɛ bɔn tsia kan no, Agyenkwa no ma ayarsã a ogyina nnuhu na gyedzi wɔ No mu do pɛ.²⁶

Alma “nyaa nokwar’’ ebien yinom nyina ho nyimdzee. Ɔyɛ nokwar dɛ nkyɛ Alma bɛtse dza ɔkãa ho asɛm dɛ “dɛw … kɛse’’²⁷ sɛ nna ɔdwen dɛ Christ gyee no na ɔannyɛ hɔn a ogyaa hɔn fi nokwar no ho hwee a? Ɔnnkotum enya. Ama Alma atse asomdwee mu nkã no, hɔn a opira hɔn no so hia kwan dɛ wodzi mu.

Naaso wobesi dɛn bɛyɛ no pɛpɛɛpɛ—anaa hɔn a ebia yepira hɔn no—bedzi mu? Ɔwɔ mu dɛ yɛnntse kwan krɔnkrɔn no a Agyenkwa no werdam afɔrbɔ no dua do dze sa yarba na ɔma ahom, naaso yenyim dɛ ama oebu atsɛmbu tsenenee no, Agyenkwa no besiesie sunsum mu yaw na mberɛwyɛ a binom dze tsia hɛn efi hɔ.²⁸ Iyi do no Ɔhwɛ no pefee dɛ ɔbɛma Nyankopɔn ne mba nyinara kwan, a wɔdze enyido-adzehu a wonnsiw no onndumii no, bɛsan mu eyi dɛ wobedzi N’ekyir na wɔagye enyigye nhyehyɛɛ kɛse no ato mu.²⁹

Agyenkwa No Besiesie Dza Yeebubu Ne Nyinara

Ɔyɛ nokwar yinom na wɔdze asomdwee bɛbrɛ Alma. Na nokwar yinom na ɔwɔ dɛ wɔdze asomdwee kɛse brɛ hɛn dɛmara. Osiandɛ yɛyɛ honamufo mbanyin na mbaa no ntsi, hɛn nyina yɛpem, anaa ɔtɔfabi a yɛhwe hɛnho, na yepira. Dɛ mbrɛ baatan biara botum agye dase no, yaw no a ɔka hɛn mfomdo ho no nnyɛ tsiabaa dɛ hɛnara hɛn ntsẽa ho suro, mbom suro dɛ yɛbɛtsew hɛn mbofra hɔn enyigye do, anaa kwan bi do no yebesiw hɔn kwan ma wonnhu nokwar no na wɔnntse ase. Agyenkwa no werdam afɔrbɔ ho enyimnyam anohoba nye dɛ, mber dodow dɛ yɛyɛ abaatan no hɛn mfomdo fa ho no, Ɔmmfa afɔdzi mma hɛn mbofra na ɔbɔ ayarsa ho anohoba dze ma hɔn.³⁰ Na mpo sɛ wɔyɛ bɔn tsia kan no—dɛ ma yɛyɛ no a—Ɔatsen n’ehumbɔbɔr abasa no mu³¹ na Ɔbɔpon hɔn sɛ wɔbɔhwɛ No na wɔatsena ase a.³²

Ɔwɔ mu dɛ Agyenkwa no wɔ tum dɛ osiesie dza yennkotum esisie no, Ɔhyɛ hɛn mbra dɛ yɛnyɛ dza yebotum ayɛ nyina ma nhyɛananmudze aka hɛn nnuhu ho.³³ Hɛn bɔn na mfomdo mmfa hɛn nye Nyankopɔn nkitahodzi nkotsee nnto nkyɛn, mbom yɛnye binom so hɔn nkitahodzi. Ɔtɔfabia hɛn mbɔdzenmbɔ dɛ yɛdze bɛsã yarba na yɛahyɛ ananmu no bɛyɛ tsiabaa dɛ mepa wo kyɛw ara, naaso mber bi no nhyɛananmudze no behia mfe pii ahobrɛadze mbɔdzenmbɔ.³⁴ Mbom, hɛn bɔn na mfomdo dodow noara no, yenntum nnsã hɔn a yepira hɔn no yie. Mormon Nwoma no na asɛmpa a wɔdze asanananmu no hɔn asomdwee anohoba fɛɛfɛw no nye dɛ Agyenkwa no besiesie dza yebubu no nyina.³⁵ Na Obesiesie hɛn so sɛ yɛdze gyedzi dan kɔ No hɔ na yenu hɛn ho wɔ ɔsɛe a yɛayɛ no ho a.³⁶ Ɔdze akyɛdze ebien yinom nyina ma osiandɛ Ɔdze ɔdɔ a odzi mu dɔ hɛn nyina³⁷ na osiandɛ Oesi enyimpi dɛ Ɔbɛma atsɛmbu tsenenee a odzi pɛrpɛrdzi na ehumbɔbɔr ebien no nyina yi. Megye dase dɛ ɔyɛ nokwar wɔ Jesus Christ dzin mu, amen.