Wiadze Mfɛndzanan Ehyiadzi
Christ Ɔtseasefo no ho Dasefo Tseasefo
Ebɔbira 2020 wiadze mfɛndzanan ehyiadzi

Christ Ɔtseasefo no ho Dasefo Tseasefo

Bishop Gérald Caussé ne Kasaa

Bishopfo Banodzifo

Mormon Nwoma n’asɛm tsitsir nye dɛ ɔbɛsan dze Jesus Christ n’asɛdze tsitsir wɔ dasanyi no nkwagye na nkwagye ntowdo ho nokwar nyimdzee no aba.

Ewiaber fefɛw da bi wɔ 2017 mu no, ber a wogu do reyɛ Paris France Temple ne ofi mbuei ma wɔakɔ kan koraa no, banyin bi a nna awerɛhow da n’enyim kɔɔr hɛn ahohɔ kwankyerɛfo no kor hɔ. Ɔkãa dɛ ɔtse bɛn temple no na ɔgyee too mu dɛ ɔakõ etsĩa ne nsii no. Ɔkãa dɛ da kor bi ber nna ɔrohwɛ pɛɛn wɔ ne dan tokura mu no, ɔhwɛɛ ahoɔdzen-mensah kɛse bi dɛ ɔdze Jesus no honyi fi sor na ɔatɔbo ara dze esi temple n’asaase no do. Banyin no kãa dɛ sũahu yi sesãa ne nkãtse koraa a nna ɔwɔ no wɔ hɛn Asɔr no ho. Ohun no dɛ yɛyɛ Jesus Christ n’akadofo na ɔserɛɛ hɛn bɔnfakyɛ wɔ ɔhaw a bia ɔdze ahaw hɛn dada no.

Wɔdze honyi risi Paris France Temple hɔ

Christus honyi no a ɔma Paris Temple asaase na Asɔr egyapadze nkaa no yɛ fɛw no, gye hɛn dɔ ma Agyenkwa no ho dase. Tsetse marble abo honyi no yɛ Danish adrɔnyi Bertel Thorvaldsen n’edwuma, a ɔsen no wɔ afe 1820 mu—afe kor noara dɛ Enyido-Adzehu Odzi Kan no. Honyi no da edzi koraa kyɛn dɛm mber no mu nsaano ndwuma no, a ne kɛse noara ɔkyerɛ Christ a Oruhu amandze wɔ mbeamudua no do. Thorvaldsen n’edwuma kyerɛ Christ ɔtseasefo no, a odzii owu do konyim na, n’abasa a ɔatserɛw mu, a ɔto nsa frɛ obiara dɛ ɔmbra No hɔ. Mprɛgow n’ananmu wɔ Ne nsa mu nye n’anan ho na Ne mfemu epirakur no nko na wɔgye Ne yaw a wonnkotum akã ho asɛm ho dase, a Ɔsɔwee dze gye adasa nyina.

Agyenkwa no ne nsa dɛ mbrɛ ɔkyerɛ wɔ Christus mu no

Ebia siantsir kor a hɛn Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba dɔ honyi yi nye dɛ ɔkaa hɛn Agyenkwa no mpuei wɔ America Asaasetɔw no do ho asɛm a ɔwɔ Mormon Nwoma mu no:

Jesus Christ kɛsera America mantaw no

“Na hwɛ, wohun dɛ Ɔbarimba bi fi sor risian; na ɔhyɛ atar fitaa; na ɔbaa famu na obegyina hɔn finimfin. …

“Na ɔbaa dɛ ɔtseen ne nsa na ɔkasaa kyerɛɛ nkorɔfo no, see dɛ:

“Hwɛ, Emi nye Jesus Christ, …

“… Maanom kuraba wenwen no a Egya no dze maa me no ano, na mahyɛ Egya no enyimnyam dɛ mefaa wiadze bɔn too mo do.’’1

Afei Ɔtoo nsa frɛɛ banyin, ɔbaa, na abofra kor biara dɛ wɔmbra na wɔmfa hɔn nsa nka Ne mfemu na wonhu mprɛgow n’ananmu wɔ Ne nsa nye n’anan ho, ama woenya hɔankasa hɔn dase dɛ nokwar Ɔno nye Messiah no a wɔatweɔn no mbertsentsen no.2

Nkenyan asɛm yi ai osii nye Mormon Nwoma ne abɔsõ dze. Asɛmpa ne “nsɛm pa’’ nyina wɔ Agyenkwa no su yi mu a ɔatsen “N’ehumbɔbɔr abasa”3 ɔdwe mu ara no mu dze roto nsa frɛ annkorankor biara dɛ ɔmbra No hɔ na ombenya No Werdambɔ no ho nhyira.

Mormon Nwoma n’asɛm tsitsir nye dɛ ɔbɛsan dze Jesus Christ n’asɛdze tsitsir wɔ dasanyi no nkwagye na nkwagye ntowdo ho nokwar nyimdzee no aba. Wohu ngyinado yi fi mbueienyi krataafa no dze kesi nsɛm a odzi eiwei koraa wɔ tsir a odzi ewiei no mu. Mfe ɔha ɔha nyina mu a, sunsum mu gyedzi ho asehwe na sunsum mu basabasayɛ rokɔ do no, dza Christ yɛɛ no wɔ Gethsemane na wɔ Golgotha do n’asekyerɛ ankasa no yewee anaa wɔdandaan no. Mbrɛ Joseph n’enyigye besi bɛyɛ ber a, nna ɔrekyerɛ 1 Nephi ase no, ohun anohoba nwanwa yi dɛ: “Dɛm kyerɛwsɛm a odzi ewiei [Mormon Nwoma no] … bɛda nokwar a ɔwɔ dza odzi kan [Bible] no edzi … na ɔbɛda ndzɛmba no a ɔsom bo no so a woeyiyi efi mu no edzi pefee; na wɔbɛda no edzi akyerɛ ebusuafo nyinara, kasa horow, na nyimpa nyinara, dɛ Nyame Eguambaa no nye Onnyiewiei Egya ne Ba no; na otwar dɛ nyimpa nyinara ba no hɔ, annyɛ dɛm a ɔno wɔrenngye hɔn nkwa.’’4

Nokwar a ɔsom bo na ɔda edzi wɔ Agyenkwa no Werdambɔ ho no gyegye wɔ Mormon Nwoma no mu nyina. Ber a mobobɔ nokwar yinom mu pii no, moto nsa frɛ hom dɛ hom ndwendwen mbrɛ hom besi asesã anaa wobotum asesã hom abrabɔ ho.

  1. Jesus Christ no Werdambɔ no yɛ akyɛdze kwa a wɔdze ma obiara a ɔatsena ase, a sesei ɔtse ase, na ɔbɛtsena ase wɔ asaase do.5

  2. Dza ɔka hɛn bɔn adzesoa a ɔsoae ho no, Christ Noara Ankasa faa hɛn awerɛhow, mberɛwyɛ, amandzehu, na yarba na atseetsee a ɔkã nyimpa no ɔnnkyebo gyinabew no mu too no do. Ahohia, yaw, anaa awerɛhow biara nnyi hɔ a Oennhu ho amandze amma hɛn.5

  3. Agyenkwa no werdam afɔrbɔ no ma hɛn kwan ma yedzi Adam n’Asehwe no nsunsuando bɔn no do konyim, a honandua owu kã ho. Osian Christ ntsi, Nyankopɔn ne mba nyina a wɔwo hɔn wɔ asaase yi do no, a hɔn tseneneeyɛ mmfa ho no, wɔnam Owusoɛr7 no tum do benya hɔn esunsum na honandua nkabɔmu na wɔasan akɔ No hɔ ma “oebu hɔn tsɛn … dɛ mbrɛ [hɔn] ndwuma tse.’’8

  4. Dza ɔbɔ ebira no, yerenya Agyenkwa no Werdambɔ ho nhyira nyiara gyina hɛn enyimpisi do9 dɛ yɛdze “Christ ne nkyerɛkyerɛ’’ no robɔ bra.10 N’adaa sõ mu no, Lehi hun “kwan tseaba a no mu yɛ nkekãnkekã’’ no11 a ogya kɔ nkwadua noho no. N’eduba, a ogyina hɔ ma Nyankopɔn no dɔ a ɔnam Christ no Werdambɔ ho nhyira fɛɛfɛw do wɔakyerɛ no, “som bo na ɔyɛ akɔndɔ dodow … [na] ɔyɛ Nyankopɔn n’akyɛdze nyinara no mu dza ɔsõ.’’12 Ama hɛn nsa aka eduaba yi no, otwar dɛ yesie gyedzi wɔ Jesus Christ mu, yenu hɛnho, “yetsie Nyame n’asɛm,’’13 yenya ayɛdze horow a ohia tsitsir, na yesie ahyɛmudzi krɔnkrɔn horow kɛpem hɛn abrabɔ n’ewiei.14

  5. Ɔnam No Werdambɔ no do, Jesus Christ annhohor hɛn bɔn nko, mbom Ɔsan so ma tum mboa a N’esuafo dze “[pɔr] nyimpa su no gu nkyɛn,’’15 kan “nsensaneeba tsĩa nsensaneeba,’’16 na wonyin wɔ krɔnkrɔnyɛ mu17 ama da bi woeetum abɛyɛ nyimpa a wodzi mu wɔ Christ no su mu,18 a wɔfata dɛ wɔnye no tsena bio19 na woenya sor ahenman ne nhyira nyinara edzi.20

Nokwar awerɛkyekyer kor so a ɔwɔ Mormon Nwoma no mu nye dɛ, Ewradze no Werdambɔ no yɛ ankorankor ne koakoamu akyɛdze soronko dze, ɔwɔ hɔ daapem na onya nhyɛdo wɔ wiadze do, a ɔfata hɛn mu kor biara dɛ ankorankor.21 Dɛmara dɛ Jesus frɛɛ Nephi esuafo no kor biara ma ɔdze ne nsa ka N’epirakur no, Owui ma hɛn mu kor biara, ankorankor, dɛ mbrɛ emi anaa ɔwo nko nye nyimpa a yɛwɔ asaase do. Ɔatsen ankorankor ɔfrɛ mu dze ama hɛn dɛ yɛmbra No hɔ na yenbenya No Werdambɔ ho nhyira nwanwa no.22

Christ no Werdambɔ no mpo bɛyɛ nokwar mbordo wɔ nyimpa su mu ber a yɛhwɛ mbanyin na mbaa awanwafo hɔn fasusu wɔ Mormon Nwoma no mu. Hɔn a wɔka ho bi nye Enos, Alma, Zeezrom, Ɔhen Lamoni na ne yer, na Ɔhen Benjamin no nkorɔfo. Hɔn nsakyeree nsɛm na tum dasegye no ma atseasefo dase wɔ mbrɛ hɛn akoma botum esi asesã na hɛn abrabɔ asakyer ho a ɔnam Ewuradze ne papayɛ na n’ehumbɔbɔr a ɔmmbɔadze do no do.23

Nkɔnhyɛnyi Alma bisaa no nkorɔfo no asɛmbisa yi a ɔyɛ ndam yi. Ɔkãa dɛ, “Sɛ hom enya nsakyer wɔ hom akoma mu pɛn, na sɛ hom atse nkã dɛ hom atow ɔpon ho ɔdɔ ndwom pɛn a, mepɛ dɛ mibisa dɛ, ana hom tse dɛm nkã no sesei?’’24 Asɛmbisa yi hia tsitsir ndɛ, osiandɛ yɛyɛ Ewuradze n’esuafo no, ɔwɔ dɛ No ɔpon tum no ka hɛnho, okenyan hɛn, ɔsesã hɛn dabiara.

Yebotum so asan etwa Alma n’asɛmbisa no sin dze ebisa dɛ, mber a odzi ekyir a itsee Agyenkwa no Werdambɔ ne nhyɛdo dɛɛdɛw ne nkã wɔ w’abrabɔ mu nye ebɛn? Iyi si ber a itse enyigye bi a ɔyɛ “dɛw kɛse’’25 ahyɛ wo do a ɔgye dase kyerɛ wo kra dɛ enya wo bɔn ho bɔnfakyɛ; anaa ber a nsɔhwɛ yayaw yɛ har amonmu ma itum soa; anaa ber a w’akoma gow na itum dze obi a ɔahaw wo ne bɔn kyɛ no. Anaa ɔbɛyɛ dɛ ber biara no ihu dɛ w’ahom a edze dɔ na isom binom no enyin, anaa dɛ ahotsew kwan no reyɛ wo nyimpa soronko, a ɔyɛ Agyenkwa no fasusu nhwɛdo.26

Megye dase dɛ suahu yinom nyina yɛ nokwar na wɔgye dase dɛ ɔnam gyedzi wɔ Jesus Christ No Werdambɔ do no abrabɔ botum asesã. Mormon Nwoma no da no edzi pefee na ɔtserɛw hɛn nyimdzee wɔ ɔsor akyɛdze yi ho. Ber a hom sũa buukuu yi no, hom bɛtse Christ ɔtseasefo ne ndze a ɔroto nsa frɛ hom dɛ hom mbra No hɔ. Mobɔ anohoba dɛ sɛ hom gye ɔfrɛ yi do na wɔdze Ne fasusu yɛ hom ɔbra no nhwɛdo a, No ɔpon no nsunsuando no bɛba hom abrabɔ mu. Ɔnam Sunsum Krɔnkrɔn no tum do no, Agyenkwa no bɛsakyer hom da biara “kɛpem da a odzi mu no’’27 dɛ mbrɛ Ɔpaa mu kãe no “Hom bohu me na hom ehu dɛ ɔyɛ Emi mara.’’28 Jesus Christ ne dzin mu, amen.