Yɛrekyɛ Nsanananmu na Owusoɛr ho Asɛm no
Nsanananmu no yɛ wiadze dze, na ne nsɛm no hia tsitsir ara ndɛ.
Wiadze mfɛndzanan ehyiadze yi nyinara mu no yɛakã ho asɛm na yɛdze dɛwdzi atow ne mãhyɛ ho ndwom a wɔhyɛɛ ho nkɔm mbertsentsen no “ndzɛmba nyina ahyɛananmu,’’1 wɔ “wɔbɛkã ndzɛmba nyina abɔ mu kor wɔ Christ mu,’’2 aba, wɔ asɛmpa ne mãhyɛ nsanananmu, asɔfodzi, na Jesus Christ N’Asɔr aba asaase do, a wɔakyerɛ mu yie ara wɔ dzin “Nsanananmu no” mu.
Mbom Nsanananmu no nnyɛ hɛn a yeridzi ehurusi wɔ mu ndɛ nko no dze. Nna Enyido-Adzehu a Odzi Kan ne nyikyerɛ horow no nnyɛ Joesph Smith nkotsee dze na wɔdze mae dɛ kan na nokwar ma obiara a “ohia nyansa.’’3 Mormon Nwoma no yɛ adasamba hɔn dze. Wosiesiee asɔfodzi ayɛdze horow ma nkwagye na nkwagye ntowdo ma ankorankor biara, a hɔn a wɔnnda ho wɔ ɔnnkyebo abrabɔ mu no ka ho. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo na ne nhyira horow no wɔ hɔ ma obiara a ɔpɛ no. Sunsum Krɔnkrɔn no n’akyɛdze no wɔ hɔ ma obiara. Nsanananmu no yɛ wiadze dze, na ne nsɛm no hia tsitsir ara ndɛ.
“Dɛm ntsi, mbrɛ osi hia dɛ wɔda dɛm ndzɛmba yi edzi kyerɛ hɔn a wɔtse asaase do, ama woeehu dɛ honandua biara runntum nntsena Nyankopɔn n’enyim, gyedɛ ɔnam Messiah Krɔnkrɔn ne ndwuma pa, n’ehumbɔbɔr na n’adom do, ɔno a ɔnam honam afamu dze no nkwa too hɔ, na ɔnam Sunsum no tum do sanee faa bio, dɛ ɔdze ewufomusoɛr robɔbɔ adze, na ɔnoara so yɛ owusoɛr mu abakan.’’4
Ofi dɛm da no a Nkɔnhyɛnyi no no nuabanyin Samuel Smith dze Mormon Nwoma a woetsintsim no amonmu hyɛɛ no bɔtɔ mã na ɔnam daadze sii mu dɛ ɔrekɛkyɛ kyerɛwsɛm fofor no, Ahotseweefo no ayɛ edwuma a wɔnngyee hɔn ahom “dɛ wɔbɛma asaasedo mba ehu ndzɛmba yinom.’’
1920 mu no, dɛm mber Elder David O. McKay a nna ɔkã Asomafo Duebien no hɔn Quorum no ho, hyɛɛ afrenhyia n’ase dze kyiin Asɔr n’asɛmpakã mbew do. Esusow Aketseaba,1921 mu no, nna ogyina esiei kakraba bi ho wɔ Fagali‘i, Samoa, wɔ mbofra nkakraba baasa, Thomas na Sarah Hilton hɔn babasia na mbanyin beenu, hɔn nda enyim. Mbofra nkakraba yinom—nna panyin no edzi mfe ebien—wowui mber a nna Thomas na Sarah rosom dɛ awarfo nkakramba asɛmpasomafo wɔ mfe 1800 n’ewiei no.
Ansaana oribefi Utah no, Elder McKay bɔɔ Sarah, sesei ɔyɛ kunafo, anohoba dɛ ɔbɔkɔ ne mba hɔn nda do wɔ Samoa ber a nna Sarah oenntum annsan hɔ bio no. Elder McKay kyerɛɛw kɛmaa no dɛ, “Wo mba nkakraba baasa, Akyerɛbaa Hilton, wɔ kommyɛ a ɔyɛ ɔgyegye dodow mu … kɔ do yɛ w’asɛmpasomafo enyimnyam edwuma no a ihyɛɛ ase mfe eduosa a abasen kɔ no.’’ Afei ɔnoara dze n’asɛm kaa ho dɛ:
Hɔn wu mu no, ɔdɔ nsa do na hɔn enyiwa muae,
Ɔdɔ nsa do na wɔdze hɔn nsa na anan nkakraba no guguu yie.
Ɔnam ananabenfo nsa do na wosiesie hɔn nda do.
Ɔnam ahɔho do na wodzii hɔn nyi, na ahɔho na wosuu hɔn.5
Asɛm yi yɛ mpempem, ɔha ɔha mpempem mu kor a, ɔkã mber, egyapadze, na nkwa a wɔdze bɔɔ afɔr mfe 200 a abasen kɔ no a wɔdze kyɛɛ Nsanananmu asɛm no Hɛn enyidado dɛ yɛbɔkɔ ɔman, ebusuakuw, na kasa, na nyimpa biara hɔ no, no do nntsewee ndɛ, ber a mberantsɛ, mbabaawa, na awarfo ɔpedu ɔpedu na seseiara wɔrosom wɔ etuhoakyɛ asɛmpakã ɔfrɛ; gye ho dase, na Asɔrmba a wɔsan si Philip no ɔfrɛ dɛ bra na bɔhwɛ do;6 na sika dɔla ɔpepe a afe biara no wɔdze boa mbɔdzembɔ yi wɔ wiadze nyina no.
Ber a nnhyɛ biara nnyi hɛn ɔfrɛ mu no, yɛwɔ enyidado dɛ nkorɔfo bohu dɛ ɔyɛ ɔsɛ dɛ wɔyɛ. Ma dɛm no ayɛ hɔ no, megye dzi dɛ annyɛ yie koraa no ndzɛmba ebiasa na ohia: odzi kan, wo dɔ; otsĩa ebien, wo fasusu; na otsĩa ebiasa, Mormon Nwoma no a edze dzi dwuma.
Hɛn ɔfrɛ no nnkotum ayɛ dɛ hɛn enyikadze; mbom, otwar dɛ ɔkyerɛ ɔdɔ a ɔnnyɛ pɛsɛankonya.7 Ɔdɔ yi, a yenyim dɛ ɔyɛ Christ mu dɔ mapã no, yɛ hɛn dze dɛ yebisa. Wɔto nsa frɛ hɛn, mpo wɔahyɛ hɛn mbra dɛ, “,hom mfa hom akoma mu ahoɔdzen nyina mbɔ mpaa mma Egya no, ama ɔdze dɛm ɔdɔ yi aahyɛ hom mã.’’8
Mfatoho, menye hom bɛkyɛ sũahu bi a Akyerɛbaa Lanette Ho Ching, a seseiara ɔnye no kun, President Francis Ho Ching, a ɔhwɛ Samoa Apia Mission do rosom, kãa ho asɛm no. Akyerɛbaa Ho Ching kãa dɛ:
“Mfe pii abasen kɔ no, hɛn ebusua kakraba no tuii kɛtsena fie ketseketse bi mu wɔ Laie, Hawaii. Nna wɔadan bea a yɛdze hɛn si no ayɛ pia kor, bea a banyin bi a wɔfrɛ no Jonathan tse. Nna Jonathan atse abɛn hɛn wɔ beebi pɛn. Metsee nkã dɛ ɔnnyɛ nhyia ara kɛkɛ na Ewuradze dze hɛn abɛtsena bea kor do no, yɛbɔɔ hɛn adwen pɔw dɛ yebobuei hɛn mu edzi nkɔmbɔ dɛ yɛyɛ Asɔrmba na wɔ no mu dwumadzi horow ho. Jonathan n’enyi gyee hɛn anyɛnkoyɛ na mber a ɔnye hɛn ebusua dzii ho. Nna ɔpɛ dɛ osua asɛmpa no, mbom nna n’enyi nngye dɛ ɔbɛyɛ Asɔrba.
“Ɔannkyɛr, na hɛn mbofra frɛɛ no “Wɔfa Jonathan.’ Ber a nna hɛn ebusua rinyin no, dɛmara na nna Jonathan n’enyi regye dza orisisi wɔ mu no ho. Yɛto nsa frɛ no wɔ aponto, awoda ehyiadzi, dza osisi wɔ skuul, na Asɔr dwumadzi horow ase a ebusua ewimbir fie nhyiamu na mbofra no hɔn enuma kekã ho.
Da kor bi menyaa tɛlɛfoon ɔfrɛ fii Jonathan hɔ. Nna ohia mboa. Na ɔyar esikyire yarba na oetu kur kɛse wɔ ne nan ho a ohia dɛ wotwa nan no. Hɛn ebusua nye sɔnmufo asɔrmba no nye no dzii no nsɔhwɛ ber no. Yɛkyekyɛɛ hɛn mu dzii akɔnaba wɔ asopitsi, na wɔmaaa no asɔfodzi nhyira horow. Ber a nna Jonathan wɔ ayarhwɛ ase no, Relief Society nkyerɛbaa hɔn mboa kã ho no, yekesiesie ne pia mu hɔ. Asɔfodzi enuanom no sii mfowee dze kɔr n’abowano na dza wɔdze nsa susuo mu wɔ eguaree dan mu. Ber a Jonathan sanee fie no, ahobow tɔɔ no do.
“Jonathan hyɛɛ ase dɛ ɔregye asɛmpasomafo adzesua no bio. Dapɛn kor ma Afe Fofor aba no, ɔfrɛɛ na obisaa dɛ, “Ebɛnadze na ebɛyɛ no wɔ Afe Fofor ne pe si no?’ Mobɔɔ no hɛn afrenhyia aponto no ho nkaa. Mbom n’ananmu no, obuaa dɛ, “Mepɛ dɛ eba m’enuma ase! Mepɛ dɛ mehyɛ afe fofor yi ase yie.’ ‘Bra na bɔhwɛ,’ ‘bra na bɔboa,’ na ‘bra na bɛtsena,’ mfe 20 years ekyir no, ɔkra a ɔsom bo yi ayɛ krado dɛ wonuma no.
“2018 mu, ber a wɔfrɛɛ hɛn dɛ asɛmpakã president na ho ɔkafo no, nna Jonathan n’apɔwmudzen rokɔ famu. Yɛserɛɛ no dɛ onnya ahoɔdzen ntweɔn ma yɛnkɔ nsan. Ɔtweɔnee bɛyɛ afe, naaso nna Ewuradze resiesie no ma ɔaba fie. Asomdwee mu ara na ɔdze fii mu wɔ Ebɔbira 2019, mu. Me mba mbasiamba na wɔkɔr hɔn ‘Wɔfa Jonathan ne funsie ase na wɔtoow ndwom kor noara a yɛtoow no wɔ n’enuma ase no.’’
Medze asɛmbisa yi: ebɛnadze na ɔbɛma wo frɛ ayɛ akɔndɔ ama obi? Dze da ehiadze a otsĩa ebien a ɔma ekyɛ Nsanananmu asɛm no konyimdzi mu no edzi. Ana ɔnnyɛ ɔwo, w’abrabɔ ne fasusu a?. Beberee a wɔatse na wɔagye Nsanananmu n’asɛm no ahyɛse no ara dza wohun wɔ Jesus Christ n’asɔrba anaa asɔrmba no hɔn ho na ɔtwee hɔn. Obotum ayɛ kwan a wɔnye binom nya nkitahodzi, ndzɛmba a wɔkãe anaa wɔannkã, pintsinnyɛ a wɔkyerɛe no wɔ nkodzen gyinabew horow mu, anaa ne tsiabaa hɔn enyim no.9
Ma ɔtse biara no, yennkotum efi nokwar no ho dɛ yehia dɛ yɛtse asɛmpa a wɔdze asanananmu no ase na yɛdze fapem horow no bɔbra ne papa mu dɛ yebotum ma hɛn ɔfrɛ no ayɛ akɔndɔ. Ɔyɛ adze bi a ndɛ wɔtaa frɛ no dɛ ne papa mu. Sɛ Christ no dɔ tse hɛn mu a, nkaafo no bohu dɛ hɛn dɔ ma hɔn no yɛ nokwar. Sɛ Sunsum Krɔnkrɔn ne kan no dzɛw wɔ hɛn mu a, ɔbɛsan ekenyan Christ ne Kan a ɔhyɛ hɛn mu no.10 Wo nyimpa ban a eyɛ no kyerɛ wo nokwar papa mu ɔfrɛ no dɛ bra na benya Jesus Christ N’asɛmpa ne mãhyɛ ne dɛwdzi no.
Ehiadze a otsĩa ebiasa no yɛ nsakyeree edwindadze a wɔdze dzi dwuma nokwar mu a Nyankopɔn wenee ma asɛmpa ne mberano yi a odzi ewiei no, Mormon Nwoma no. Ɔyɛ dase a wɔtse ne nkã wɔ Joseph Smith no nkɔnhyɛsɛm ɔfrɛ no ho na dase a osi pi wɔ Jesus Christ no Owusoɛr no krɔnkrɔnyɛ ho. Ne nkyerɛkyerɛmu wɔ hɛn Ɔsor Egya no ɔpon ho nhyehyɛɛ ne saso nnyi hɔ. Sɛ ikyɛ Mormon Nwoma no a, ikyɛ Nsanananmu no.
Ber a nna Jasonm Olson yɛ abasirba no, n’ebusuafo sii do bɔɔ no kɔkɔ dze tsĩaa dɛ ɔbɛyɛ Christiannyi. Naaso, nna ɔwɔ anyɛnkofo beenu, a wɔyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no asɔrmba na nna wɔtaa pɛnsapɛnsa nyamesɛm mu. N’anyɛkofo, Shea na Dave, enyidzi mu ara tsentsenn ekyingye a binom dze ama Jason dze etsia gyedzi wɔ Jesus Christ mu. Ewiei no, wɔmaa no Mormon Nwoma no kor, a wɔkãa dɛ, ‘’Nwoma yi beyi wo nsɛmbisa ano. Yɛserɛ kenkan.’’ Ɔdze ahotwetwe dze gyee nwoma no na ɔdze hyɛɛ ne bag a ɔsan n’ekyir no mu, a ɔhyɛɛ hɔ abosom pii. Ɔammpɛ dɛ obegya no wɔ fie a, n’ebusuafo botum ehu, na ɔammpɛ dɛ obugura Shea na Dave hɔn abaw dɛ ɔdze bɛsan. Ewiei no, ɔyɛɛ dɛ no mbuae ara nye dɛ ɔbɛhyew nwoma no.
Anafua bi, ɔdze gyasɔdze wɔ ne nsa kor mu na Mormon Nwoma no wɔ kor so mu no, nkyɛ ɔrobɔsɔ gya ato nwoma no mu no ɔtsee ndze wɔ n’adwen mu a ɔkãa dɛ, “Mma nnhyew mo nwoma.’’ Ahopopo mu no, ogyinae. Afei, nna ɔdwen dɛ gyama osusuu ndze no, ɔyɛɛ dɛ ɔbɔsɔ gya no bio. Ndze no baa n’adwen mu bio dɛ: “Kɔ wo dan mu na kenkan mo nwoma no.’’ Jason dze gyasɔdze no too hɔ, nantsewee kɔr ne pia mu, bueii Mormon Nwoma no, na ɔhyɛɛ ase kenkanee. Ɔkɔɔr do da biara a, ɔtaa mpo dze kesi ahamanakye. Ber a Jason baa n’ewiei na ɔbɔɔ mpaa no, ɔkyerɛɛw dɛ, “Sunsum no hyɛɛ me mã fi m’apampamu dze kesi m’ananadze. … Metsee dɛ kan ahyɛ me mã. … Nna ɔyɛ dɛwdzi dodow sũahu a meenya no wɔ m’abrabɔ mu da.’’ Ɔgyee enuma na ekyir no ɔnoara bɛyɛɛ asɛmpakãsomafo
Ebia ɔda edzi dɛ hɛn papa mu ɔdɔ na nokwardzi no mmfa ho no, hɛn ɔfrɛ dze dɛ yɛbɛkyɛ Nsanananmu n’asɛm no mu pii no, sɛ annyɛ dodow a, na wɔbɔpow. Mbom kaa iyi dɛ: obiara fata dɛ onya ɔfrɛ a ɔtse dɛm—“hɔn nyinara yɛ adze kor ma Nyame’’;11 Ewuradze n’enyisɔ mbɔdzembɔ biara a yɛyɛ no, a ma no nsunsuando bɛyɛ biara no; ɔfrɛ a wɔapow no nnkyerɛ dɛ hɛn nkitahodzi do etwa; enyikãdze a onnyi hɔ ndɛ no botum adan enyikãdze ɔkyena. Mbrɛ ɔtse biara no, hɛn dɔ nnsesã.
Hom mma hɛn werɛ mmfir dɛ Nsanananmu no epuei efi ahohia dzendzen na afɔrbɔ mu aba. Dɛm no yɛ asɛm a wɔbɛkã no da bi. Ndɛ yedzi ehurusi wɔ Nsanananmu n’aba no ho, na kor a ɔbor do dodow nye tum no bio a wɔdze kyekyer wɔ asaase do na wɔ sor.12 Dɛ mbrɛ President Gordon B. Hinckley kyerɛɛ mfe pii abasen no, “Sɛ biribiara emmfi nsanananmu n’awerɛhow, ne berɛ na ne yaw mu emmpuei kã asɔfodzi krɔnkrɔn no nsɔwano tum a wɔdze kyekyer ebusua ebusua bɔmu afebɔɔ a nna nkyɛ ɔfata dza odua mu nyina.’’13
Nsanananmu n’anohoba a ɔkrɔn koraa nye ɔpon wɔ Jesus Christ mu. Jesus Christ no Owusoɛr no si no pi dɛ, nokwar, Ɔno wɔ tum dɛ ɔgye obiara a wɔbɛba No hɔ no—ɔgye hɔn fi awerɛhow, nsisi, mfehoekyir, bɔn, na mpo owu mu. Ndɛ yɛ Menakɔnson Kwesida; no dapɛn da yɛ Easter. Yɛkaa, yɛkaa aber nyina, Christ n’amandzehu na no wu a ɔdze bɔɔ werdam ma hɛn bɔn, na yɛhyɛ Kwesida nwanwa nyina no ho fa, Ewuradze ne da, a Ɔsoɛree fi owu mu. Osian Jesus Christ no Owusoɛr no ntsi, Nsanananmu no wɔ mfaso, hɛn ɔnnkyebo abrabɔ wɔ mfaso, na no koraa koraa yɛtse ase yi ankasa wɔ mfaso.
Joseph Smith Nsanananmu nkɔnhyɛnyi okunyin no, ma dasegye a ɔkrɔn tsitsir no wɔ hɛn mber mu wɔ Christ a ɔasoɛr efi owu mu ho dɛ: “Ɔtse ase! Osiandɛ yehun no, dɛ ɔwɔ Nyame n’abanyimfa.’’14 Ahobrɛadze mu ara medze me dase kã Joseph ne dze na asomafo na nkɔnhyɛfo a nna wodzi n’enyim na asomafo na nkɔnhyɛfo a woedzi n’ekyir no hɔn dze ho, dɛ Jesus Nazarethnyi no nye Messiah a wɔbɔɔ noho anohoba no, Nyankopɔn ne Ba Kortonoo, na adasamba nyinara Pomfo a ɔasoɛr efi owu mu no.
“Yɛgye dase dɛ hɔn a mpaabɔ mu ara wosũa Nsanananmu ho asɛm na wɔdze gyedzi yɛ asɛm no, wobehyira hɔn ma woenya ne krɔnkrɔnyɛ na no botae dɛ obesiesie wiadze no ama hɛn Ewuradze na hɛn Agyenkwa, Jesus Christ ne Mbae a Otsĩa Ebien a wɔabɔ ho anohoba ho dase.’’15 Christ no Owusoɛr no ma N’anohoba horow no yɛ nokwar. Jesus Christ ne dzin mu, amen.