Mormon Nwoma no Tum wɔ Nsakyeree mu

Elder Benjamin M. Z. Tai ne Kasaa

Ɔkã Eduosuon no ho

Mormon Nwoma no ma sunsum mu edziban, ɔkyerɛ nyɛe nhyehyɛɛ, na ɔma yɛnye Sunsum Krɔnkrɔn no nya nkitahodzi.

Meyɛɛ mo honandua mu nhwehwɛmu a ɔnnkyɛree no n’amandzɛɛbɔ mu ekyir no, musũae dɛ ohia dɛ meyɛ abrabɔ suban binom mu nsesa. Ama wɔaboa me no, me datser kyerɛɛw edziban na apɔwmutsentsen nhyehyɛɛ dze maa me a, sɛ mefa dzi do a, ɔbɛsakyer me ayɛ me nyimpa a ɔtse apɔw yie,.

Sɛ hɛn mu kor biara yɛ no sunsum mu nhwehwɛmu a, ebɛnadze na yebosua afa hɛn ho? Ebɛn nsesa na hɛn sunsum mu datser bɛkyerɛw ama hɛn? Ama yɛabɛyɛ nyia a yehia dɛ yɛyɛ no, ohia tsitsir dɛ yehu dza yɛbɛyɛ na yɛyɛ dza yenyim.

Jesus Christ nye Oduyɛfo Wura no.¹ Ɔnam No Werdambɔ do no, Ɔkyekyer hɛn epirakur, ɔfa hɛn ahoɔmberɛw to No do, na ɔsãa hɛn akoma a woebubu no yarba.² Ɔnam N’adom do no hɛn mberɛwyɛ botum abɛhyɛ dzen.³ Ɔto nsa frɛ hɛn dɛ yɛnka No do⁴ ber a yerusũa No ho asɛm, yeretsie Ne nsɛm, na yɛrenantsew ɔdwe mu wɔ No Sunsum mu.⁵ Ɔabɔ hɛn anohoba dɛ ɔbɔboa hɛn⁶ wɔ ɔbra yi nyina mu ne nsakyeree kwan no, a ɔsesã hɛn na ɔdze daapem enyigye ba.⁷

Agyenkwa no dze Mormon Nwoma no ama hɛn dɛ edwindadze a tum wɔ mu dɛ ɔboa wɔ nsakyeree mu. Mormon Nwoma no ma sunsum mu edziban, ɔkyerɛ nyɛe nhyehyɛɛ, na ɔma yɛnye Sunsum Krɔnkrɔn no nya nkitahodzi. Wɔakyerɛw ama hɛn no,⁸ Nyankopɔn n’asɛm wɔ mu⁹ wɔ pefeeyɛ mu na ɔka hɛn awosu, botae, na hyɛbea ho asɛm kyerɛ hɛn.¹⁰ Ɔka Bible ho no, Mormon Nwoma no gye Jesus Christ no ho dase¹¹ na ɔkyerɛkyerɛ mbrɛ yebesi botum ehu nokwar na yɛabɛyɛ tse dɛ Ɔno.

Mfonyin

Onuabanyin Saw Polo

Nna Nuabanyin Saw Polo edzi mfe 58 ber a ohun Jesus Christ n’asɛmpa no a wɔdze asan ananmu aba no. Ber a mihyiaa no no, nna ɔasom dɛ nkorbata president mfe pii, naaso muhun dɛ nna ɔnnkenkan Mormon Nwoma no da osiandɛ nna bi nnyi no kurow mu kasa Burmese mu. Ber a mibisaa no mbrɛ osii hun dɛ buukuu no yɛ nokwar a nna ɔnnkenkanee no, obuaa dɛ oesõa Mormon Nwoma mu Nsɛm mfonyin buukuu dabiara ber a ɔhwɛ mfonyin no a, ɔdze asekyerɛ buukuu dze kyerɛ Borɔfo nkasafua no ase, na ɔkyerɛw dza osũae ho nsɛnsin ahwɛyie mu. Ɔkyerɛkyerɛ mu dɛ, “aber biara mo sũae no, mobɔ mpaa wɔ dza mesũa no ho, na metse asomdwee na enyigye nkã, m’adwen mu da hɔ pefee, na m’akoma gow. Metse Sunsunm Krɔnkrɔn ne nkã no a ɔgye dase kyerɛ me dɛ ɔyɛ nokwar. Minyim dɛ Mormon Nwoma no yɛ Nyankopɔn n’asɛm.’’

Tse dɛ Onuabanyin Saw Polo no, hɛn mu kor biara botum esũa Mormon Nwoma no dɛ mbrɛ hɛn gyinabew tse. Sɛ yenya pɛ gye dzi na yɛdwendwen ne nkyerɛkyerɛ ho wɔ hɛn akoma mu a, yebotum ebisa Nyankopɔn wɔ gyedzi mu sɛ nkyerɛkyerɛ no yɛ nokwar a.¹² Sɛ yedzi nokwar wɔ hɛn pɛ mu dɛ yebohu na yɛpra hɛn akoma mu dze yɛ a, ɔnam Sunsum Krɔnkrɔn no do beyi hɛn ano wɔ hɛn akoma mu. Na ɔnam Sunsum Krɔnkrɔn no tum do, hom botum ehu nokwar a ɔwɔ ndzɛmba nyinara mu.¹³ Sɛ yenya Mormon Nwoma no ho dase krɔnkrɔn a, yɛbɛsan so nam tum kor noara do bohu dɛ Jesus Christ nye wiadze n’Agyenkwa, dɛ Joseph Smith nye No nkɔnhyɛnyi, na dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo nye N’Asɔr a ɔdze asan ananmu aba no.¹⁴

Meyɛ aberantsɛba a merehyɛ m’asɛmpakã som ase no, mofoow wimuhɛn dze kɔr Australia. Maayɛ ankonam, medze ahoper, na moho nnsomu naaso mowɔ enyimpi dze bɔsom no, nna mihia awerɛhyɛmu bio dzendzenndzen dɛ dza megye dzi no yɛ nokwar a. Medze enyiber bɔɔ mpaa na mekenkan me kyerɛwsɛm, naaso ber a nna akwantu no rokɔ kan no, m’ekyingye no yɛɛ dzen na mo honandua gyinabew no kɔr famu. Midzii aper dɔnhwer pii ekyir no, wimuhɛn boafo nantseew ngua no ntamu na ogyinae bɛn m’egua no. Ɔgyee Mormon Nwoma no a nna merekenkan no fii me nsamu. Ɔhwɛɛ n’ekyir no na ɔkãa dɛ, “Ɔyɛ buukuu nwanwa!’’ afei ɔdze buukuu no saan maa me na ɔkɔr do nantsewee. Mennhu no bio da.

Mber a nna ne nsɛm gyegye wɔ m’asowa mu no, metsee pefee na metsee nkã wɔ m’akoma mu dɛ, “ Mowɔ ha, na minyim bea a ewɔ. Yɛ wodze a oye koraa, osiandɛ mobɔhwɛ nkaa no.’’ Dɛm wimuhɛn no mu wɔ Pacific Po do no, menam Mormon Nwoma no sũae do na Sunsum Krɔnkrɔn ne nkenyan ho nyaa mankasa me dase dɛ m’Agyenkwa nyim me nyimpa ban na asɛmpa no yɛ nokwar.

Elder David A. Bednar kyerɛkyerɛɛ dɛ: “Inyim dɛ asɛmpa no yɛ nokwar nye dasegye ho adze tsitsir. Ewɔwdo ayɛ asɛmpa nokwafo nye nsakyeree ho adze tsitsir.’’¹⁵ Nsakyeree hia hɛn dɛ “hom nyɛ asɛm no ayɛfo, na mma hom nnyɛ etsiefo nko.’’¹⁶ Ewuradze ne nyɛe nhyehyɛɛ ma hɛn—Christ ne nkyerɛkyerɛ no—wɔkyerɛkyerɛ no pefee ara yie wɔ Mormon Nwoma no mu.¹⁷ Iyi kã ho:

Odzi kan, yɛdze gyedzi wɔ Jesus Christ mu dzi dwuma ber a yɛrotwer No, yeresie Ne mbrasɛm, na yeruhu dɛ Ɔbɔboa hɛn.¹⁸
Otsĩa ebien, yerunu hɛnho daa daa wɔ hɛn esintɔ ho na yerenya dɛwdzi na asomdwee ber a Ɔdze hɛn bɔn kyɛ hɛn no.¹⁹ Nnuhu hia hɛn ma yɛdze binom hɔn bɔn akyɛ hɔn²⁰ na ɔaboa hɛn ma yɛakɔ kan. Agyenkwa abɔ anohoba dɛ ɔdze hɛn bɔn bɛkyɛ hɛn mpɛn dodow a yenu hɛnho.²¹
Otsĩa ebiasa, yerudua ayɛdze horow do tse dɛ enuma na yɛnye Nyankopɔn ayɛ na yesie ahyɛmudzi horow. Iyi bɛma yɛaka ahyɛmu anamɔn kwan no do a ogya kɔ Ne nkyɛn.²²
Otsĩa anan, yɛregye Sunsum Krɔnkrɔn n’akyɛdze no. Akyɛdze yi ma hɛn nyia a ɔtsew ho, ɔkyekye werɛ, na ɔweɔn hɛn no ne daa daa anyɛnkoyɛ ho kwan.²³
Na otsĩa enum, erosɔw akɔ ewiei ber a ereper kɔ kan pintsinn mu ber a eremee daa daa wɔ Christ n’asɛm mu.²⁴ Yɛremee fi Mormon Nwoma no mu na yerusuo ne nkyerɛkyerɛ mu dzen no, yebotum edzi nsɔhwɛ do konyim na yeenya akwankyerɛ na bambɔ wɔ hɛn abrabɔ nyina mu.²⁵

Ber a yɛrowɔw do dze Christ ne nkyerɛkyerɛ abɔ bra wɔ hɛn abrabɔ mu no, yebedzi dwumadzi a osiw hɛn nsesã na suro kwan a ɔsɛɛ nyɛe do konyim. Yebenya hɛnankasa hɛn nyikyerɛ, osiandɛ Sunsum Krɔnkrɔn no “ bɛkyerɛ ndzɛmba nyinara a ɔsɛ dɛ hom yɛ,’’²⁶ na Christ ne nsɛm no bɛkã ndzɛmba nyinara a ɔsɛ dɛ hom yɛ akyerɛ hom.’’²⁷

Mfe 20 dze, nna Onuabanyin Huang nye nsadzen, sigyarɛt, na nhyɛ dzesɛɛfo dze aper. Ohun Jesus Christ na N’asɛmpa a wɔdze asananan mu aba no, Onuabanyin Huang pɛɛ dɛ osian n’ebusua kakraba no ntsi ɔsesa. Nna ne tafɛrbanyinmbɔmu kɛsenara nye sigyarɛt nom. Nna onntu sigyarɛt nnto famu, ɔabɔ mbɔdzen mber pii dɛ obegyae a oenndzi konyim. Da kor bi, nsɛm yinom fi Mormon Nwoma no no mu tɔɔ n’adwen do: “dze nokwar akoma, pra [n]’akoma mu.’’²⁸ Ɔwɔ mu dɛ nna oedzi nnkogu pii wɔ mbɔdzenbɔ ho dze, ɔtsee dɛ bi a obotum asesã, sɛ onya mboa fi Ɔsor Egya na Jesus Christ hɔ a.

Etuhoakyɛ asɛmpasomafo dze hɔn gyedzi bɔɔ mu kãa ne dze ho na wɔmaa no dza ɔbɛyɛ dze efi ho ne nyɛe nhyehyɛɛ, a mpaabɔ mpɛn pii na Nyame n’asɛm no nsuae kã ho. Ɔdze nokwar akoma na ɔpra n’akoma mu no, Onuabanyin Huang dze nokwar enyimpisi yɛe na ohun dɛ otsim mbordo wɔ suban fofor no a ɔpɛɛ dɛ onya no do, tse dɛ orusũa Mormon Nwoma no, na ɔamma n’adwen annkɔ suban a ɔpɛɛ dɛ obegyae no do pii.

Ɔrekã no sũahu mfe 15 abasen kɔ no, ɔkãa dɛ, “Mennkaa mber pɔkyee a medze gyae sigyerɛt nom, naaso ber a mobɔɔ mbɔdzen papaapa dabiara dɛ mebɛyɛ ndzɛmba a nna minyim dɛ ohia dɛ meyɛ no dze to nsa frɛ Ewuradze no Sunsum ma ɔba m’abrabɔ mu, na mokɔr do yɛe no, sigyarɛt nom annyɛ me akɔndɔ bio na ɔnnyɛe so fitsi aber no.’’ Ɔdze Mormon Nwoma ne nkyerɛkyerɛ no dze bɔ bra no ntsi, Nuabanyin Huang n’abrabɔ asesã, na ɔabɛyɛ okun na egya pa.

Mfonyin

Huang Juncong na n’ebusua

President Russell M. Nelson abɔ anohoba dɛ: “Ber a mpaabɔ mu ara irusũa Mormon Nwoma no dabiara, no ebɔbɔ adwenpɔw apapa—dabiara. Mobɔ anohoba dɛ ber a hom dwendwen dza hom sua ho no, ɔsor ntokura no bobuei, na hom benya homara hom nsɛmbisa ne nyiano na akwankyerɛ ama homara hom abrabɔ. Mobɔ anohoba dɛ sɛ daa daa hom dze homho hyɛ Mormon Nwoma no mu a, hom botum epirim etsia da ne bɔn no, mpo ehuhu mfonyin yardɔm a ɔdze hom na ɔsɛɛ ndzɛmba a okum adwen no.’’²⁹

Adɔfo, Mormon Nwoma no yɛ Nyankopɔn n’asɛm, na sɛ yesua a, yɛbɔtwe abɛn No yie.³⁰ Sɛ yɛsɔ ne nsɛm hwɛ a, yebenya no nokwaryɛ ho dasegye.³¹ Sɛ yɛwɔw do bɔ bra dɛ mbrɛ ne nkyerɛkyerɛ tse a, yerennya pɛ bio dɛ yɛbɛyɛ bɔn.’’³² Hɛn akoma, hɛn enyim, na awosu bɛsesã ma yɛnye Agyenkwa no asɛ.³³ Mekã mo nokwar dase dɛ Jesus nye Christ no, Hɛn Agyenkwa, Pomfo, na Nyɛnko. Jesus Christ ne dzin mu, amen.