Hɛn Akoma no Bun mu.
Ewuradze robɔ mbɔdzen aboa hɛn—hɛn nyinara—ma yɛagye N’asɛmpa no wɔ hɛn akoma no bun mu yie.
Nkyerɛbaa na enuanom, mber nwanwa na yɛtse ase wɔ mu yi. Ber a yɛhyɛ fa wɔ Nsanananmu n’ahyɛse ho no, ɔsan so ye dɛ yɛhyɛ fa wɔ Nsanananmu a ɔrokɔ do a yɛgye ho dase no. Menye hom dzi dɛw dɛ yɛtse ase ndɛ nda yi mu.1 Ewuradze nam N’akɔnhyɛfo do, kɔ do dze dza ohia nyina a ɔbɔboa hɛn ma yɛayɛ ahoboa agye No no, toto n’ananmu.2
Ndzɛmba a ohia no mu kor nye Mbofra na Mbabun mbɔdzembɔ fofor no. Hom mu pii nyim nhyehyɛɛ yi no mu dur wɔ botae ne nkyekyeree, eka ho n’ahyɛnsewdze fofor, na For the Strength of Youth ehyiadzi horow no. Naaso otwar dɛ iyinom no nnkesiw hɛn ma yennhu botae horow a wɔakyekyer nhyehyɛɛ no wɔ do no na ne tsirmpɔw no: dɛ ɔboa ma wɔagye Jesus Christ n’asɛmpa no akɔ hɛn mbofra na mbabun hɔn akoma no bun mu.3
Megye dzi dɛ ber a yɛaba ebohu fapem yinom pefee no, yebohu iyi dɛ ɔbor nhyehyɛɛ ara ma asɔrmba a woedzi mfe 8 dze kesi 18. Yebohu mbrɛ Ewuradze esi robɔ mbɔdzen aboa hɛn—hɛn nyinara—ma yɛagye N’asɛmpa no wɔ hɛn akoma no bun mu ara yie. Meserɛ dɛ Sunsum Krɔnkrɔn no bɔboa hɛn ma yɛabɔ mu esũa.
Nkitahodzi—“Kã Hɔn Ho’’4
Fapem a odzi kan nye nkitahodzi. Osiandɛ wɔtse dɛ wɔyɛ Jesus Christ N’Asɔr ne fã no ntsi, ɔtɔfabi a hɛn werɛfir dɛ nkitahodzi no ho hia wɔ hɛn akwantu a ɔrokɔ do dze kɔ Christ nkyɛn no mu. Enyi nnda hɛn kwan dɛ hɛn nko yebohu anaa yɛbɛnantsew anamɔn kwan no do. Yehia ɔdɔ na mboa fi awofo, na ebusua nkaa no hɔ, anyɛnkofo, na baanodzifo a hɔn so wɔrenantsew anamɔn kwan no do.
Nkitahodzi a ɔtsetse dɛm no gye mber. Mber a wɔdze bɔ mu. Mber a wɔdze serew, dze sũa adze, na wɔdze bɔ mu som. Mber dɛ enyibɔsɔ kor biara n’enyikadze na haw ahorow. Mber a yebedzi nkɔmbɔ na yeedzi nokwar ama hɛn ho ber a yɛper dɛ yɛbɔbɔ mu dze ayɛ yie. Nkitahodzi yinom nye eroboaboa ano dɛ ebusua ebusua, quorumfo, adzesuafo, na mboanofo no botae tsitsir horow no mu kor. Iyinom nye erosom yie ne fapem no.5
Elder Dale G. Renlund maa hɛn adze tsitsir bi a yɛdze botu nkitahodzi yinom mpon ber a ɔkãa dɛ: “Ama asom nkaafo yie no, otwar dɛ … yehu adze dɛ mbrɛ Ɔsor Egya hu no. Dɛm nko na yebotum ahyɛ ase atse ɔkra no no nokwar bo a ɔsom ase. Dɛm nko na yebotum atse ɔdɔ a Ɔsor Egya wɔ ma Ne mba nyinara no ne nkã.’’6
Yeruhu binom dɛ mbrɛ Nyankopɔn hu no yɛ akyɛdze. Moto nsa frɛ obiara dɛ ɔnhwehwɛ akyɛdze yi. Sɛ hɛn enyiwa buei ma yehu a,7 yɛbɛsan so botum aboa nkaafo no ma woehu hɔnho dɛ mbrɛ Nyankopɔn hu hɔn no.8 President Henry B. Eyring tsĩi iyi ho tum mu ber a ɔkãa dɛ: “Dza obehia dodow nye dza [binom] bosũa efi [hom] hɔ wɔ nyimpa bɛn a wɔyɛ na dza wobotum abɛyɛ ndaamba ho. Mo nsusui nye dɛ worunnsua mmfi skuul adzesua bi mu. Wobenya efi nyimpa ban a eyɛ ho atsenkã mu, nyimpa a edwen ho a wɔyɛ, na nyimpa a wobotum abɛyɛ ho.’’9 Yɛroboa binom ma wɔatse hɔn nokwar awosu na botae ase no yɛ akyɛdze no mu dza ɔsõ a yebotum dze ama.10 Yeruhu binom na hɛnho dɛ mbrɛ Nyankopɔn hu hɛn no ka hɛn akoma “bɔ mu wɔ ɔdɔ na koryɛ mu.’’11
Wiadze ndzɛmba a ɔrokɔ do beberee no renya nhyɛdo wɔ hɛn do no, yehia ahoɔdzen a ofi ɔdɔ nkitahodzi mu ba. Dɛm ntsi ber a yɛrehyehyɛ dwumadzi, nhyiamu, na mboano ahorow no, hom mma yɛnkaa dɛ mboano yinom hɔn botae tsitsir nye wɔbɛkyekyer ɔdɔ nkitahodzi a ɔhyɛ dzen a, ɔka hɛn bɔmu, na ɔboa ma Jesus Christ n’asɛmpa no akɔ hɛn akoma no bun mu ara yie.12
Nyikyerɛ, Nyimpa ne Pɛ, na Nnuhu—”Ma Wɔnye Sor Dzi Nkitaho’’13
Nokwar, onnye ara dɛ yɛbɔbɔ mu ayɛ kor. Ekuw, na ekuwekuw pii wɔ hɔ a wɔdze botae asorɔtow nya koryɛ. Naaso, koryɛ a yɛhwehwɛ nye yɛbɛyɛ kor wɔ Christ mu, ma yɛnye No edzi nkitaho.14 Hɛn akoma nye sor benya nkitahodzi no, yehia ankorankor sunsum mu sũahu horow, dɛ mbrɛ Elder Andersen kãa ho asɛm yie mu ara kyerɛɛ hɛn sesei no.15 Sũahu horow no ba ber a Sunsum Krɔnkrɔn no dze asɛmpa na Nyankopɔn ho dɔ hyɛ hɛn adwen na akoma mu.16
Nyikyerɛ yi nam kyerɛwsɛm no do, tsitsir ara Mormon Nwoma no; ɔnam nkɔnhyɛfo atseasefo na esuafo anokwafo nkaa no hɔn nsɛm do, na ɔnam ndze tseabaa, komm no do ba.17 Nsɛm yinom bor ma wɔkyerɛw, ndze ngyegyee wɔ hɛn asowa mu, hɛn adwen mu adwendwen, anaa hɛn akoma mu nkã-tse ara. Nyame n’asɛm yɛ sunsum mu tum.18 Ɔyɛ nokwar na kan.19 Ɔyɛ mbrɛ yesi tsie No! Ɔhyɛ hɛn gyedzi wɔ Christ mu ase na ɔma onyin na okenyan pɛ dɛ yɛbɛyɛ tse dɛ Agyenkwa—ɔno nye dɛ, yebonu hɛnho na yɛananatsew ahyɛmu anamɔn kwan no do.20
Ebɔbira abasen no, President Russell M. Nelson boaa hɛn ma yɛtsee nnuhu n’asɛdze tsitsir ase wɔ nyikyerɛ akwantu yi mu.21 Ɔkãa dɛ: “Sɛ yɛsan mu yi dɛ yebonu hɛnho a, yɛfa dɛ yɛbɛsesã! Yɛma Agyenkwa no kwan ma ɔsesã hɛn ma yɛfa hɛn tam mapã no fura. … Yɛsan mu yi dɛ yɛbɛyɛ tse dɛ Jesus Christ ara yie!”22 Nsesã kwan yi, a Nyankopɔn n’asɛm kenyan no, nye mbrɛ yesi nye sor dzi nkitaho.
Asɛm tsitsir a ɔwɔ President Nelson no ɔfrɛ mu dɛ yennu hɛnho nye nyimpa ne pɛ fapem no. Otwar dɛ hɛnankasa yɛsan mu nya nnuhu. Wonnkotum ahom asɛmpa no do ahyɛ hɛn akoma mu. Elder Renlund kãa dɛ,”Hɛn Ɔsor Egya no botae wɔ baatanyɛ mu nnyɛ dɛ Obenya Ne mba ma wɔayɛ dza oye; ɔno nye Obenya Ne mba ma wɔasan mu eyi dɛ wɔbɛyɛ dza oye.’’23
Nhyehyɛɛ a wɔdze Mbofra na Mbabun ahyɛ ananmu no, nna ehiadze horow bɔbor 500 na ɔwɔ hɔ ma wɔdze yɛ wie ama woeenya abɔdzin ahorow no.24 Ndɛ, tsitsir kor ara na ɔwɔ hɔ. Ɔyɛ ɔfrɛ dɛ yɛsan mu yi dze bɛyɛ tse dɛ Agyenkwa no. Yɛyɛ iyi ber a yerudua Sunsum Krɔnkrɔn no do agye Nyankopɔn n’asɛm na yɛama Christ kwan ma Ɔasesa hɛn ma “yeefura hɛn atam mapã no.’’
Iyi bor dwumadzi dɛ yɛrekyekyer botae anaa wɔ hɛnara hɛn mpontu mu koraa. Botae horow no yɛ edwindadze a odua nyikyerɛ, nyimpa ne pɛ, na nnuhu do dze boa hɛn ma yɛnye sor dzi nkitaho—dze ba Christ nkyɛn na yebenya N’asɛmpa no wɔ hɛn akoma no bun mu yie.
Adzeyɛ na Afɔrbɔ—“Ma Wondzi Baano’’25
Ewiei no, ma Jesus Christ N’asɛmpa no akɔ hɛn akoma no bun mu no ohia dɛ yɛdze hɛnho hyɛ mu—yɛdze hɛn mber na talent horow ma, yegyaa hɛnho mu ma.26 Hɛn nyina yɛpɛ dɛ yɛbɔ bra a mfaso wɔ mu, na iyi yɛ nokwar tsitsir ara ma mbasantsen a wɔreba no. Wɔpɛ botae bi dze hɔnho ahyɛmu
Jesus Christ n’asɛmpa no nye botae a ɔsõ kɛse wɔ wiadze mu. President Ezra Taft Benson kãa dɛ: “Nyankopɔn ahyɛ hɛn mbra dɛ yɛmfa asɛmpa yi nkɔ wiadze nyinara. Dɛm no nye botae a otwar dɛ ɔka hɛn bɔ mu kor ndɛ. Asɛmpa no nko na ɔbɛgye wiadze no efi ɔnoara ne sɛɛe esian mu. Asɛmpa no nko na ɔbɛka mbanyin [na mbaa] a wofi ebusua horow na aman horow nyinara abɔ mu wɔ asomdwee mu. Asɛmpa no nko na ɔdze dɛwdzi, enyigye, na nkwagye bɛbrɛ adasamba.’’27
Elder David A. Bednar bɔɔ anohoba dɛ,”Sɛ yɛma mbabun no tum ber a yɛfrɛ hɔn na yɛma hɔ kwan ma wodzi dwuma a, Asɔr no bɔkɔ kan wɔ akwan nwanwa mu.’’28 Ɔtaa dɛ yɛmmfrɛ hɔn na yɛmma mbabun no kwan ma wɔmbɔ afɔr mma Christ no botae kɛse yi. Elder Neal A. Maxwell hun no dɛ,”Sɛ yɛamma [Nyankopɔn n’edwuma ] no annhyɛ [hɛn] mbabun no do a ɔnnkɛyɛ dzen dɛ wiadze no bɛhyɛ hɔn do.’’29
Mbofra na Mbabun nhyehyɛɛ no gyina wɔrema mbabun no tum do. Hɔnara wɔfa hɔn botae ahorow. Wɔdze quorum na adzesua presidencyfo toto hɔn gyinabew mu yie. Ward mbabun abaguafo, dɛmara dɛ ward abaguafo no, tsim nkwagye na nkwagye ntowdo edwuma no do.30 Na quorumfo na adzesuafo hyɛ hɔn nhyiamu ase ber a wotu hɔnho fo wɔ mbrɛ wobesi bɛyɛ edwuma a Nyankopɔn dze ama hɔn no ho.31
President Nelson kãa kyerɛɛ Asɔr ne mbabun no dɛ: “Na sɛ isan mu yi, sɛ ipɛ a, … ibotum ayɛ adze kɛse, adze nwanwa, adze fɛɛfɛw ne kyɛfa mu kɛse bi! … Hom kã apapafo no a Ewuradze dze hɔn aba wiadze yi mu da no ho. Hom wɔ ahom dɛ hom adwen mu bobuei na hom ehu nyansa na hom enya nsunsunado koraa wɔ wiadze no do kyɛn mbasantsen biara a woedzi kan no!’’32 Mber bi so no, President Nelson kãa kyerɛɛ mbabun no dɛ: “Mowɔ awerɛhyɛmu a odzi mu wɔ hom mu. Modɔ hom, na dɛmara so na Ewuradze dɔ hom. Yɛyɛ No nkorɔfo, yɛabɔ mu wɔ N’edwuma krɔnkrɔn no mu,’’33 Mberantsewaa, ana hom tum tse awerɛhyɛmu a President Nelson wɔ no hom mu no ne nkã, na mbrɛ homho si hia wɔ edwuma yi mu a?
Awofo na baanodzifo mpanyimfo, moto nsa frɛ hom dɛ hom nhu mbabun no dɛ mbrɛ President Nelson si hu hɔn no. Sɛ mbabun no tse hom dɔ na awerɛhyɛmu nkã, ber a hom kyerɛkyerɛ hɔn mbrɛ wosi dzi baano—na afei wɔma hɔn kwan a—wɔdze hɔn nhumu, ahom, na enyimpisi ma asɛmpa no bɛyɛ hom ahobow .34 Wɔbɛtse dɛwdzi no dɛ wɔsaan mu dze hɔnho ahyɛ mu na wɔabɔ afɔr dze ama Christ. N’asɛmpa no bɛhɛn hɔn akoma no bun mu yie, na edwuma no bɔkɔ kan wɔ akwan nwanwa mu.
Anohoba na Dasegye
Mobɔ anohoba, dɛ sɛ yetsim wɔ fapem ahorow yinom do—nkitahodzi, nyikyerɛ, nyimpa ne pɛ, nnuhu, na afɔrbɔ do a—Jesus Christ n’asɛmpa no bɔdɔ hɛn nyinara hɛn akoma no bun mu yie. Yebohu Nsanananmu no dɛ ɔkɔ kan dze ekodu no botae koraa, Israel no mponee na Zion ne nkyekyeree,35 bea a Christ bedzi hen dɛ ahemfo Hen.
Megye dase dɛ Nyankopɔn kɔ do yɛ adze nyinara a ohia dze esiesie No nkorɔfo ama dɛm da no. Hom ma yenhu Ne nsa wɔ edwuma nwanwa yi mu dɛmara dɛ yɛper dze “ba Christ nkyɛn na yedzi mu wɔ no mu.’’35 Jesus Christ ne dzin mu, amen.