Melchizedek Asɔfodzi na Nsaafee no
Asɔr no mu no asɔfodzi tumdzi no wɔdze dzi dwuma wɔ asɔfodzi baanodzinyi, a okitsa dɛm asɔfodzi nsaafee no no kwankyerɛ ase.
Masan mu eyi dɛ mebɛkã bi akã Nyankopɔn asɔfodzi no ho, asɛngyinado a akasafo baasa edzi kan akã ho asɛm a wɔkyerɛkyerɛɛ hɛn faa mbrɛ asɔfodzi no si hyira mbaa, nkataasia, na mberantsɛ ho
Asɔfodzi no yɛ ɔsor tum na tumdzi a yekita dɛ yɛdze bɛyɛ Nyame n’edwuma ama Ne mba nyina enya ho mfaso. Asɔfodzi nnyɛ hɔn a wɔahyɛ hɔn asɔfo akɔ asɔfodzi dzibew bi mu anaa hɔn a wɔdze no tumdzi no dzi dwuma no. Mbanyin a wokitsa asɔfodzi no nnyɛ asɔfodzi no. Ber a onnyi dɛ yɛfrɛ mbanyin a wɔahyɛ hɔn asɔfo no dɛ asɔfodzi no, ɔfata dɛ yɛfrɛ hɔn dɛ hɔn a wokitsa asɔfodzi no.
Asɔfodzi tum no wɔ Asɔr na ebusua kuw nyina mu. Mbom ɔson asɔfodzi tum na asɔfodzi tumdzi no dwuma a odzi wɔ Asɔr no na ebusua no mu. Iyinom nyina kɔ do tse dɛ nhyehyɛɛ a Ewuradze akyekyer no. Nyame no botae nye dɛ Obegya Ne mba akɔ onnyiewiei nkwa mu. Ɔnnkyebo ebusua ebusua hia kɛse wɔ dɛm nhyehyɛɛ no mu. Asɔr no wɔ hɔ dɛ ɔma nkyerɛkyerɛ no, tumdzi no, na ayɛdze a ohia ma ebusua nkitahodzi akɔ do daapem. Dɛm ntsi, ebusua kuw na Jesus Christ N’Asɔr no wɔ nkitahodzi a wɔdze hyɛ hɔnho dzen. Asɔfodzi nhyira no—tse dɛ asɛmpa ne mãhyɛ no na ayɛdze tse dɛ enuma, pisi na eregye Sunsum Krɔnkrɔn akyɛdze no, temple endowment no, na onnyiewiei awar—a mbanyin na mbaa nyina hɔn nsa botum akã.1
Asɔfodzi a yɛkã ho asɛm wɔ ha nye Melchizedek Asɔfodzi no, a wɔsaan ananmu dze bae wɔ asɛmpa Nsan-ananmu ahyɛse no. Peter, James na John a, wɔdaa hɔn ho edzi dɛ “wokura ahenman no ne nsaafee nye mberano ne mãhyɛ” no na wɔhyɛɛ Joseph Smith na Oliver Cowdery asɔfo. (Nkyerɛkyerɛ na Ahyɛmudzi 128:20). Asomafo mpanyin yinom no gyee tumdzi no fii Agyenkwa no Nankasa hɔ. Tumdzi nye dzibewdzi nkaa no nyina a ɔwɔ asɔfodzi no mu no fam Melchizedek Asɔfodzi no ho (hwɛ Nkyerɛkyerɛ na Ahyɛmudzi 107:5), osiandɛ “[ɔ]wɔ tum dɛ ɔyɛ asɔr no ne president na n’apamfo no, na ɔwɔ tum na tumdzi dɛ ɔhwɛ asɔr no mu dzibewdzi nyina do wɔ mber biara mu wɔ wiadze yi mu” (Nkyerɛkyerɛ na Ahyɛmudzi 107:8).
Asɔr no mu no asɔfodzi a ɔkrɔn no, Melchizedek Asɔfodzi no tumdzi no, na kuma no anaa Aaron Asɔfodzi no, wɔdze dzi dwuma wɔ asɔfodzi baanodzinyi, tse dɛ bishop anaa president, a okitsa dɛm asɔfodzi nsaafee no no kwankyerɛ ase. Otwar dɛ yɛtse asɔfodzi nsaafee ho nhyehyɛɛ ase ama yɛaatse asɔfodzi tumdzi no dwuma a odzi wɔ Asɔr no mu no ase.
Ahenman no ne Melchizedek Asɔfodzi nsaafee no Peter, James, na John na wɔdze hyɛe, mbom ɔno ennwie asɔfodzi nsaafee nsan-ananmu. Nsaafee no mu binom baa ekyir no. Wotuu temple a odzi kan wɔ berano yi mu hyɛɛ Nyame nsa wɔ Kirtland, Ohio, ekyir no, nkɔnhyɛfo baasa—Moses, Elias, na Elijah—dze “berano yi ne nsaafee” san ananmu bae, a nsaafee a wɔdze bɔboaboa Israel ano na Ewuradze ne temple horow mu edwuma kã ho. (hwɛ Nkyerɛkyerɛ na Ahyɛmudzi 110), tse dɛ ma President Eyring akyerɛ mu ara yie yi.
Nsaafe no dwumadzi a yenyim yie nye wɔdze reyɛ asɔfodzi ayɛdze horow. Ayɛdze yɛ ndzeyɛɛ krɔnkrɔn a ɔkyerɛ dɛ iridzi ahyɛmu na nhyira a wɔdze bɔ anohoba. Asɔr no mu no wɔyɛ ayɛdze nyina wɔ asɔfodzi baanodzinyi a okitsa asɔfodzi nsaafee no wɔ dɛm ayɛdze no ho no kwanma ase.
Nyimpa a wohyira ayɛdze do no nye hɔn a wɔahyɛ hɔn asɔfo akɔ dzibew bi mu wɔ asɔfodzi no mu a oridzi dwuma no wɔ nyia okitsa asɔfodzi nsaafee no no kwankyerɛ ase. Mfatoho, hɔn a wokitsa dzibew horow wɔ Aaron Asɔfodzi mu no dzi dwuma wɔ sacrament ayɛdze no mu wɔ bishop a, okitsa Aaron Asɔfodzi nsaafee no, ne nsaafee na no kwankyerɛ ase. Nkyerɛkyerɛ kor yi ara so dzi dwuma wɔ asɔfodzi ayɛdze a mbaa hyira wɔ temple mu no. Mbaa nnyi dzibew wɔ asɔfodzi mu dze, naaso wɔyɛ temple ayɛdze krɔnkrɔn horow wɔ temple no ne president a, okitsa temple ayɛdze nsaafee no, no kwankyerɛ ase.
Asɔfodzi tumdzi wɔ onyia okitsa nsaafee no kwankyerɛ ase mfatoho kor nye nkyerɛkyerɛ a mbanyin na mbaa wɔafrɛ hɔn dɛ wɔnkyerɛkyerɛ asɛmpa no, wɔ adzesũa mbea wɔ hɔn ara hɔn ward mu anaa wɔ asɛmpakã dwuma mbew mu. Mfatoho binom nye hɔn a wokitsa baanodzi dzibew wɔ ward mu na wɔdze hɔn asɔfodzi tumdzi no dzi dwuma wɔ hɔn baanodzi mu osian hɔn frɛ ntsi na wɔ asɔfodzi baanodzinyi a, okitsa asɔfodzi nsaafee wɔ ward no anaa stake no oeyi hɔn esi hɔ na no kwankyerɛ ase. Iyi nye mbrɛ asɔfodzi no no tumdzi na tum no wɔdze dzi dwuma na wonya mu enyigye wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no mu.2
Asɔfodzi tumdzi no so wɔdze dzi dwuma na ne nhyira horow no nsa kã wɔ Latter-day Saintfo ebusua ebusua mu. Mekã ebusua ebusua a mekyerɛ ɔbarimba a okitsa asɔfodzi na ɔbaa a wɔawar na hɔn mba. Medze nsonsonee a ofi gyinabew a odzi mu no so kã ho tse dɛ ma owu anaa awargyaa dze aba.
Nkyerɛkyerɛ no dɛ asɔfodzi tumdzi no wobotum dze edzi dwuma nko wɔ onyia okitsa asɔfodzi nsaafee ma dɛm dwumadzi no kwankyerɛ ase no yɛ fapem nhyehyɛɛ wɔ Asɔr no mu, mbom onndzi dwuma wɔ ebusua mu. Mfatoho, egya na ɔhwɛ n’ebusua do na ɔdze asɔfodzi no dzi dwuma wɔ n’asɔfodzi tumdzi a okitsa no mu. Onnhia dɛ obenya kwankyerɛ anaa kwanma efi onyia a okitsa asɔfodzi nsaafee ana wɔayɛ n’ebusua dwumadzi horow no. Iyinom kã ho, ɔrema n’ebusua mu mba afotu, wɔreyɛ ebusua nhyiamu horow, ɔdze asɔfodzi nhyira rema ne yer na ne mba, anaa ɔrema ayarsã nhyira ama n’ebusua mu mba anaa binom so no.3 Asɔr etumdzifo kyerɛkyerɛ ebusua mu mba, mbom wɔmma asɔfodzi tumdzi a wɔdze dzi dwuma wɔ ebusua mu no ho kwankyerɛ.
Nkyerɛkyerɛ kor yi ara dzi dwuma ber a egya no nnyi fie na enã no nye ebusua no baanodzinyi no. Ɔhwɛ no fie no do na ɔyɛ edwindze dze asɔfodzi tumdzi na nhyira dua n’endowment na nsɔwano mu dze ba n’ebusua mu. Wɔmma no kwan dɛ ɔma asɔfodzi nhyira no a obi a okitsa asɔfodzi dzibew bi nko na obotum dze ama no, naaso obotum ayɛ ebusua baanodzi dwumadzi nkaa no nyina. Ɔreyɛ dɛm no, ɔdze asɔfodzi no tum no dzi dwuma ma ne mba a ɔhwɛ hɔn do no wonya mfaso wɔ ne baanodzi dzibew wɔ ebusua no mu.4
Sɛ nkyɛ egyanom bɔkrɔn hɔn asɔfodzi wɔ hɔnankasa hɔn ebusua mu a, nkyɛ ɔbɛma Asɔr no botae no akɔ kan tse dɛ biribiara a nkyɛ wobotum ayɛ so. Egyanom a wokitsa Melchizedek Asɔfodzi no ɔsɛ dɛ wɔdze hɔn tumdzi no dzi dwuma wɔ “ndzɛfɛdzɛfɛw, nye penkyɛr, nye botooyɛ, nye ɔdwe mu, nye ɔdɔ mapã kwan do”(Nkyerɛkyerɛ na Ahyɛmudzi 121:41). Dɛm gyinapɛn a ɔkrɔn a wɔdze asɔfodzi tumdzi no dzi dwuma no hia tsitsir wɔ ebusua no mu. Hɔn a wokitsa asɔfodzi no wɔdɛ wosie mbrasɛm no so ama woeenya asɔfodzi no tum ma wɔdze ehyira hɔn ebusua mu mba. Ɔsɛ dɛ wɔma ebusua nkitahodzi wɔ ɔdɔ mu no tahye ama ebusua mu mba aapɛ dɛ wobebisa hɔn nsa mu nhyira. Na awofo wɔdɛ wɔhyɛ nkuran ma wɔayɛ asɔfodzi nhyira ara yie wɔ ebusua no mu.5
Ehyiadzi nhyiamu horow yinom mu no, ber a yɛhwehwɛ sumabew mber kakra fi hɛn ɔnnkyebo akãdadwen ho a nsan yarba resɛɛ wiadzemba yi, wɔakyerɛ hɛn daapem nkyerɛkyerɛ kɛse. Mehyɛ hɛn mu kor biara nkuran dɛ hɛn enyiwa bɛyɛ “kor” dze agye daapem nokwar yinom ama hɛn honandua “[a]bɛyɛ kann” (3 Nephi 13:22 )
N’asɛmpa a Ɔdze maa dɔmtutuw a wɔakyerɛw no wɔ Bible na Mormon Nwoma mu no, Agyenkwa no kyerɛkyerɛɛ dɛ nyimpadua a ɔnnkyebo botum ayɛ kann anaa sunkamm. Nyew, yɛpɛ dɛ yɛyɛ kann, na hɛn Agyenkwa akyerɛkyerɛ hɛn mbrɛ yebesi botum ma iyi esi. Ɔsɛ dɛ yetsie nsɛm a ɔfa daapem nokwar ho. Ɔdze hɛn enyiwa a, yɛdze kandzea ba hɛn nyimpadua mu no yɛɛ mfatoho. Sɛ hɛn “enyiwa yɛ kor”—anaa dɛ, sɛ yɛdze hɛn adwen ritsim yɛregye onnyiewiei kan na ntseasee a,—Ɔkyerɛkyerɛɛ mu dɛ, wo nyimpadua nyina bɛyɛ kann”(Matthew 6:22; 3 Nephi 13:22). Mbom sɛ hɛn “enyiwa muo a”—ɔno nye dɛ, sɛ yɛhwehwɛ dza omuo na yɛdze dɛm kɔ hɛn nyimpadua mu a—Ɔbɔɔ kɔkɔ dɛ, “wo nyimpadua nyina bɛyɛ kusuww“ (nyiyimu 23). Anaa dɛ, kan anaa sum a ɔwɔ hɛn nyimpadua mu no gyina mbrɛ yesi hu—anaa yɛgye—onnyiewiei nokwar no a wɔkyerɛkyerɛ hɛn no.
Ɔwɔ dɛ yedzi Agyenkwa no ne nsato dɛ yɛnhwehwɛ na yɛmbisa onnyiewiei nokwar ho ntseasee. Ɔbɔɔ anohoba dɛ hɛn Egya a ɔwɔ Sor wɔ pɛ dɛ Ɔbɛkyerɛkyerɛ obiara nokwar no a wɔrohwehwɛ no (hwɛ 3 Nephi 14:8). Sɛ yɛpɛ iyi na yɛma hɛn enyiwa yɛ kor dze gye iyinom a, Agyenkwa no bɔ anohoba dɛ daapem nokwar no “wobobue” ama hɛn (hwɛ 3 Nephi 14:7–8
Edze to ho a, Satan n’enyi aber dɛ ɔbɛma hɛn adwendwen ayɛ ntanta anaa ɔbɛma yɛafom kwan wɔ ndzɛmba a ohia kɛse dɛ Nyame n’asɔfodzi no dwumadzi ho. Agyenkwa no bɔɔ hɛn kɔkɔ wɔ dɛm “nkɔnhyɛfo atorfo ho, na wɔba hom nkyɛn wɔ nguannwoma akataho mu, na hɔn mu dze, wɔyɛ mpataku edzifodzipɛfo” (3 Nephi 14:15). Ɔmaa hɛn dza wɔdze sɔ hwɛ yi ama ɔdze aboa hɛn ma yɛasan mu eyi nokwar efi nkyerɛkyerɛ nsonsonee a obotum ama hɛn adwen ntanta no, Ɔkyerɛkyerɛɛ dɛ: “Hɔn aba na hom dze bohu hɔn” (3 Nephi 14:16). “Dua pa nntum nnsow aba bɔn, na eso dua a wɔaprɔw [nntum] nnsow aba pa” (verse 18 Dɛm ntsi ɔsɛ dɛ yɛhwɛ nsunsuando no, nkyerɛkyerɛ na nkorɔfo no a wɔkyerɛkyerɛ dɛm no hɔn—”aba no.” Ɔno nye nyiano a oye koraa ma kasatsia dodow a yɛtse dɛ wɔdze tsia Asɔr no na ne nkyerɛkyerɛ na nhyehyɛɛ na ne baanodzi. Dzi dza wɔdze sɔ hwɛ no a Agyenkwa no kyerɛkyerɛɛ no. Hwɛ aba no—no nsunsuando no.
Sɛ yɛdwen asɛmpa no n’aba na Jesus Christ N’Asɔr a wɔdze asan ananmu aba no ho a, yedzi dɛw wɔ mbrɛ Asɔr no, wɔ n’asɔrmba atseasefo hɔn nkwa ber mu no, wɔatserɛw efi Anee Mbepɔw Ntamu sɔn mu mboanofo ekodu bea a asɔrmba ɔpepe bɔbor 16 [duesia] a hɔn mu kɛse noara fi aman binom mu a ɔnnyɛ United States mu. Ɔnam dɛm nyinii do no, yɛatse Asɔr no tum a otum dze boa asɔrmba no reyɛ kɛse. Yɛboa wɔ mbrasɛm ne nsie mu, asodzi dɛ wɔbɛkã asɛmpa nsan-ananmu no ho nsɛm, wɔ Israel mboaboa ano, na temple ne nsisii wɔ wiadze nyina mu.
Nkɔnhyɛnyi na odzi hɛn kan, President Russell M. Nelson, a Ewuradze dze ne baanodzi edzi dwuma enya mpontu a yɛatse wɔ ne baanodzi mu mfe ebien na no mboree no. Sesei ɔbɛyɛ hɛn nhyira dɛ yebetsie efi President Nelson hɔ, ɔno na ɔbɛkyerɛkyerɛ hɛn mbrɛ yebesi botu hɛn mpontu no akɔ kan wɔ Jesus Christ N’Asɔr a wɔdze asan ananmu aba no wɔ ɔhaw mber yinom mu.
Megye dase wɔ ndzɛmba yinom nokwar ho na mekã hom ho ma yɛabɔ mpaa ama hɛn nkɔnhyɛnyi, a odzi do a hom bɛtse ne ndze, wɔ Jesus Christ ne dzin mu, amen.