Hom mbra Christ hɔ—Hom Robɔ Bra dɛ Nda a Odzi Ekyir Ahotseweefo
Yebotum ayɛ ndzɛmba a ɔyɛ dzen na yɛaboa binom ma wɔayɛ dɛmara, osiandɛ yenyim nyia yebotum dze hɛn werɛ atwer no.
Elder Soares, yɛda wo ase, wɔ wo tum nkɔnhyɛsɛm dasegye wɔ Mormon Nwoma no ho. Ɔnnkyɛree no, menyaa kwan soronko kitsaa tsetse Mormon Nwoma ne krataafa kor. Krataafa tsitsir yi do no, mberano a odzi kan yi mu no, wɔakyerɛw Nephi ne nsɛm pɔkyee yinom: “Mobɔkɔ akɛyɛ ndzɛmba a Ewuradze ahyɛ no, osiandɛ minyim dɛ Ewuradze mmfa mbrasɛm biara mma adasamba, gyedɛ oesiesie kwan ama hɔn a wɔnam do botum ayɛ dza ɔahyɛ hɔn dɛ wɔnyɛ no.’’1
Ber a musuoo krataafa yi mu no, enyisɔ a no mu dɔ hyɛɛ me mã dze maa Joseph Smith ne mfe 23 mbɔdzembɔ no, ɔno a ɔdze Nyankopɔn no tum na n’akyɛdze kyerɛɛ Mormon Nwoma no ase.’’2 M’enyi so sanee sɔɔ akokɔwaba Nephi ne nsɛm, ɔno a wɔsee no dɛ ɔnyɛ edwuma a ɔyɛ dzen papaapa dɛ ɔrekɛgye ayewa mprɛtse no efi Laban hɔ.
Nna Nephi nyim dɛ sɛ ɔkɔdo tsim Ewuradze do a, mbra a Ewuradze dze hyɛɛ no no obedzi konyim dze ahyɛ no mã. Ɔwɔwdo tsiim Agyenkwa no do wɔ n’abrabɔ nyina mu mpo ohyia nsɔhwɛ, honandua nsɔhwɛ, na mpo n’ebusuafo ankasa binom yii no mae.
Nna Nephi nyim Onyia a obotum dze no werɛ ahyɛ no mu.3 Ɔtsea mu ekyir tsiabaa. “O werɛhownyi a ɔtse dɛ emi! Nyew m’akoma dzi awerɛhow osian mo honam ntsi,’’4 Nephi kãa dɛ, “Me Nyame na ɔayɛ me boafo; na ɔagye me wɔ m’amandzehu mu wɔ sar no do; na ɔakora mo do wɔ esu no bun kɛse no mu.’’5
Dɛ Christ n’akadofo no, taferbanyinmbɔmu na nsɔhwɛ mmpa hɛnho wɔ hɛn abrabɔ mu. Wɔtaa hia hɛn dɛ yɛbɛyɛ ndzɛmba a ɔyɛ dzen dɛ, sɛ hɛn nkotsee yɛyɛ a ɔbɛhyɛ hɛn dzen na ebi a ɔnnkɛyɛ yie. Sɛ yɛgye Agyenkwa ne ɔfrɛ do dɛ “hom mbra mo hɔ,”6 a Ɔbɛma hɛn mboa, awerɛkyekyer, na asomdwee a ohia, dɛmara dɛ Ɔyɛe ma Nephi na Joseph. Mpo wɔ hɛn nsɔhwɛ no bun papaapa mu no, yebotum atse Ne ahomka ɔdɔ ber a yɛtwer No na yɛgye Ne pɛ to mu. Yebotum enya dɛwdzi no a wɔdze ato hɔ ama N’esuafo anokwafo no, osiandɛ “Christ nye dɛwdzi.”7
2014 mu no, ber a nna morosom etuhoakyɛ asɛmpakã dwumadzi no, hɛn ebusua nyaa esian bi a ɔma ndzɛmba sesaae. Ber a nna hɛn babanyin kakrabaa ritsi papatser no dze risian koko bi a osian yie no, ɔhwee famu ma opirae wɔ n’adwen mu. Ber a nna ne gyinabew resɛɛe no, ayarhwɛfo dze no too mbirika kɔr opirahyɛn dan mu.
Hɛn ebusua buu ntwɛr wɔ ɔyɛ dɛ asopitsi dan pan mu ne daadze hɔ, na yehueii hɛn akoma maa Nyankopɔn. Basaayɛ na yaw mber mu no, Ɔsor Egya no dɔ na asomdwee hyɛɛ hɛn mã.
Nna yennyim dza ɔda hɛn enyim anaa sɛ yɛbɛsan ehu hɛn babanyin no dɛ ɔtse ase bio a. Nna yenyim pefee dodow dɛ no nkwa wɔ Nyankopɔn ne nsa mu no nsunsuando no, fi onnyiewiei nhumu mu no, bɛyɛ yie ama hɛn na ɔno ne yieyɛ. Ɔnam Sunsum n’akyɛdze do no, nna yɛayɛ krado dɛ yɛbɛgye nsunsuando biara ato mu.
Nna ɔnnda famu! Akwanhyia no ma odzii abosom ebien wɔ asopitsi ber a nna yɛrohwɛ etuhoakyɛ asɛmpasomafo bɔbor 400 hɔn do. Hɛn babanyin bɛyewee nkaa adze tsitsir nara. Nna honandua, kasa, na nduryɛ tsentsen na ɔyɛ dzen kã n’ayarsa no ho. Tafɛrbanyinmbɔmu da ho wɔ hɔ, naaso mber resen no yeehu anwanwadze.
Yɛtse ase pefee dɛ nnyɛ nsɔhwɛ biara a yehyia na yebenya nsunsuando a yɛpɛ. Naaso, sɛ yetsim wɔ Christ do a, yɛbɛtse asomdwee nkã na yeehu Nyankopɔn n’anwanwadze, ma ɔtsebiara no, wɔ Ne mber na No kwan mu.
Mber bi bɛba a yennkotum ehu kwan a gyinabew a yɛwɔ mu no bowie na yebotum akyerɛ mpo tse dɛ Nephi kyerɛ dɛ, “M’akoma dzi yaw osian mo honam ntsi.’’7 Mber bi bɛba dɛ hɛn enyidado nko a yɛbenya no bɔwɔ Jesus Christ mu. Ebɛn nhyira na ɔyɛ dɛ yebenya enyidado na awerɛhyɛmu wɔ No mu. Christ nye nyia obedzi N’anohoba do aber nyina. N’ahomgye wɔ hɔ ma obiara a wɔba No hɔ.9
Hɛn baanodzifo apɛdze kɛse nye dɛ obiara bɛtse asomdwee na awerɛkyekyer nkã a ɔnam yɛrotwer na yeritsim wɔ Agyenkwa Jesus Christ mu do dze ba no do.
Hɛn nkɔnhyɛnyi tseasefo, President Russell M. Nelson, dze Ewuradze n’enyido-adzehu ma wiadze na Christ n’Asɔrmba no ato gua dɛ: “Hɛn asɛm yɛ nokwar na tsiabaa: yɛto nsa frɛ Nyankopɔn ne mba wɔ ntwamutam n’afã ebien no dɛ wɔmbra hɔn Agyenkwa hɔ, wɔmbɛgye temple krɔnkrɔn ne nhyira, wonya dɛwdzi a ɔmmbɔadze, na wɔmmfata onnyiewiei nkwa.’’10
Ɔfrɛ yi “Hom mbra Christ hɔ’’ wɔ nsunsuando tsitsir ma Nda a Odzi Ekyir Ahotseweefo.11 Yɛyɛ Agyenkwa no n’Asɔrmba, no yɛnye No edzi ahyɛmu horow na yɛabɛyɛ No sunsum mu mbambanyin na mbabaa a wɔawo hɛn.12 Wɔasan so ama hɛn kwan dɛ yɛnye no nyɛ Edwuma mfa mfrɛ binom ma wɔmbra No hɔ.
Ber a yɛnye Christ yɛ edwuma no, hɛn ntsimii mbɔdzembɔ kɛsenara wɔdɛ ɔyɛ hɛnara hɛn efiefi. Mber bi bɛba a ebusuafo na anyɛnkofo mapã behyia taferbanyinmbɔmu. Wiadze ne nhyɛdo horow, na ebia hɔnara hɔn akɔndɔdze, botum ama woenya nokwar ho ekyingye. Ɔwɔ dɛ yɛyɛ biribiara a yebotum ayɛ no dze boa hɔn ma wɔtse Agyenkwa no dɔ na hɛn dɔ ebien no nkã. Mekaa kyerɛwsɛm nyiyimu no a wɔabɛyɛ asɔr ndwom a yɛdɔ paa “Love One Another’’ a ɔkyerɛkyerɛ hɛn no dɛ “By this shall … men know … ye are my disciples, if ye have love one to another.’’13
Hɛn dɔ ma hɔn a wɔwɔ nokwar ho ekyingye no, dɛwdzi nyina ne tamfo no bɔbɔ mbɔdzen ama yɛayɛ dɛ yeeyi hɔn a yɛdɔ hɔn no ama sɛ hɛn hɛnankasa yɛkɔdo dze asɛmpa ne mãhyɛ no bɔbra na yɛkyerɛkyerɛ no nokwar no a.
Hɛn ahom dze bɔboa binom ma wɔaba Christ hɔ anaa wɔbɛsan akɔ Christ hɔ ne kɛsenara begyina hɛnara ankasa hɛn enyimpi dɛ yebetsim wɔ ahyɛmu anamɔn kwan no do.
Sɛ hɛn nokwar apɛdze nye dɛ yɛbɛgye hɔn a yɛdɔ no a, otwar dɛ hɛn ankasa yenye Christ tsena dzendzenndzen ber yɛregye N’Asɔr na N’asɛmpa ne mãhyɛ ato mu.
Yɛresan akã Nephi n’asɛm no bi a, yenyim dɛ Nephi a ɔdze no werɛ hyɛ Ewuradze mu no yɛ n’awofo hɔn suban dɛ wɔdze hɔn werɛ hyɛ Ewuradze mu na wɔ hɔn ahyɛmudzi a wosie fasusu no do. Iyi ne mfatoho fɛfɛɛfɛw wɔ Lehi ne nkwadua enyido-adzehu no mu. Odzii edua n’eduaba no a ɔyɛ dɛw na enyigye ekyir no, Lehi “ dze [ne] enyiwa kɔr aprɔw, dɛ ebia [obotum] ehu [ne] ebusua so.’’14 Ohun Sariah, Sam, na Nephi na wogyinagyina “hɔ dɛ gyama wonnyim bea a wɔrokɔ.’’15 Afei Lehi kãa dɛ, “Ɔbaa dɛ motoo hɔn nsa; na medze ndze kɛse kãa kyerɛɛ hɔn dɛ wɔmbra me nkyɛn, na wombedzi eduaba no bi.’’16 Meserɛ hom nhyɛ no nsew dɛ Lehi emmfi nkwadua no ho. Sunsum mu no Ɔnye Ewuradze tsenae na ɔtoo nsa frɛ n’ebusuafo dɛ wɔmbra bea a ɔno wɔ no na wombedzi eduaba no.
Ɔbɔnfo no bɛdaadaa binom ma woegya asɛmpa ne dɛw no ber a wɔpaa Christ ne nkyerɛkyerɛ no fi N’Asɔr no ho. Ɔbɛma yɛagye edzi dɛ hɛnara, yɛnam hɛnara sunsum mu ahoɔdzen do, a yɛnndan Asɔr no botum aka dzendzenndzen wɔ ahyɛmu anamɔn kwan no do.
Nda a odzi ekyir yinom mu no, wɔdze Christ n’Asɔr saan ananmu ama ɔaboa Christ n’ahyɛmudzi mba no ma wɔaka N’ahyɛmu anamɔn kwan no do.
Yɛkenkan wɔ Nkyerɛkyerɛ na Ahyɛmudzi mu dɛ, “Hwɛ, iyi nye me nkyerɛkyerɛ—obiara a onu noho na ɔba mo hɔ no, onyia no yɛ m’asɔrba.”17
Ɔnam Christ n’Asɔr do no, wɔnam Ahotseweefo kuw sũahu horow do hyɛ hɛn dzen. Yɛnam No nkɔnhyɛfo, adzehufo, nye nyikyerɛfo do tse Ne ndze. Ma ohia dodow no, wɔnam N’Asɔr do ma hɛn Christ no Werdambɔ ho nhyira horow etsitsir nyinara a yɛdze hɛnho hyɛ ayɛdze krɔnkrɔn horow nko mu do a yebotum enya.
Jesus Christ N’asɔr a ɔwɔ hɔ Nda a Odzi Ekyir Ahotseweefo nye Christ n’Asɔr wɔ asaase do, wɔdze asan ananmu wɔ nda a odzi ekyir yinom mu ma Nyankopɔn ne mba nyina enya ho mfaso.
Megye dase dɛ sɛ yɛba Christ hɔ’ na yɛbɔ bra dɛ Nda a Odzi Ekyir Ahotseweefo a, wɔdze No dɔ, N’enyigye, na N’asomdwee bi bɛka ho ehyira hɛn. Tse dɛ Nephi no, yebotum ayɛ ndzɛmba a ɔyɛ dzen na yɛaboa binom ma wɔayɛ dɛmara, osiandɛ yenyim nyia yebotum dze hɛn werɛ atwer no.18 Christ nye hɛn kan, hɛn nkwa, na hɛn nkwagye.19 Jesus Christ ne dzin mu, amen.