Hom Nkɔ Kan wɔ Gyedzi mu
Medze asomdwee na gyedzi mbordo wɔ Ewuradze mu hyira hom.
Mo nuanom na nkyerɛbaa adɔfo, ber a yɛaba ehyiadzi yi a ɔayɛ atsenkã n’ewiei no, yɛdze hɛn ndaase ma Ewuradze. Ndwom no ayɛ soronko na nsɛm no ekenyan.
Ehyiadzi yi mu no, hom enya nkaadze pii ho sũahu. Mfe ahaebien afrɛnhyia yi, yɛdze mpaamukã ma wiadze a ɔrekã Jesus Christ asɛmpa no ne nsanananmu no nokwar no ato gua.
Yɛdze Hosanna Ntsẽamu no hyɛɛ Nsanananmu no ho fa.
Yɛada sɛnkyerɛdze fofor edzi a ɔkyerɛ hɛn gyedzi wɔ Ewuradze Jesus Christ mu na ɔama obiara eehu amandzɛɛbɔ na ndzɛmba ofi Asɔr asoɛe no yie.
Yɛaserɛ wiadze nyina mu akɔnkye na mpaabɔ da, ama sesei nsan yarba a wɔapetse aman nyina mu no ano abrɛ adze, ahwɛfo enya bambɔ, aman sikasɛm egyina dzen, na abrabɔ ayɛ dɛ mbrɛ nna ɔtse noara. Akɔnkye yi wɔbɛyɛ no Good Friday da no, Ebɔbira 10. Ɔbɛyɛ Fida soronko bi!
Kwesida a odzi do yi yɛ Easter Kwesida, ber a yɛbɛhyɛ hɛn Ewuradze Jesus Christ na Werdambɔ no ho fa bio. Osian No Werdambɔ no ntsi, No wusoɛr akyɛdze no bɛba nyimpa nyinara a wɔatsena ase pɛn do. Na No onnyiewiei nkwa akyɛdze no bɛba hɔn nyinara a wodzi nokwar ma ayɛdze na ahyɛmudzi a wɔayɛ no wɔ Ne temple krɔnkrɔn mu no do.
Ebɔbira 2020 wiadze mfɛndzanan ehyiadzi yi mu nkenyan adze pii no—na dapɛn krɔnkrɔn a sesei yɛrehyɛ ase yi—yebotum yɛdze nsɛmfua ebien a ɔsor ahyɛ ho ɔmom dze etwa no tsia: “Tsie No.”1 Yɛbɔ mpaa dɛ hom betsim wɔ Ɔsor Egya a, Ɔkãa dɛm nsɛm no do, na wɔ No Dɔ Ba, Jesus Christ do, a ɔbɛda hom adwendwen do ara yie wɔ dza wɔakɔ do nyinara no. Yɛbɔ mpaa dɛ hom bɛhyɛ ase bio dɛ hom bɛtse no nokwar mu, etsie, na hom ayɛ aso ma Agyenkwa no ne nsɛm no.2 Mobɔ hom anohoba dɛ akomatu bɔkɔ famu na gyedzi mbordo atoa do.
Yɛda hom ase wɔ hom pɛ dɛ hom bɛyɛ hom efiefi gyedzi krɔnkrɔn mbea, bea a Ewuradze no Sunsum botum atsena. Hɛn asɛmpa adzesũa nhyehyɛɛ, Come, Follow Me, no bɔkɔ do ehyira hom abrabɔ. Hom daa daa mbɔdzembɔ wɔ iyi mu no—mber mpo a hom nnya konyimdzi biara ho atsenkã no—bɛsesã hom abrabɔ, hom ebusua dze, na wiadze no. Ber a yɛbɛyɛ Ewuradze n’esuafo a yɛyɛ ndam yie mpo no, yegyina na yɛgye No ho dase, bea biara yɛwɔ no, wɔbɛhyɛ hɛn dzen.
Afei, hom mma yɛnkã temple ho nsɛm. Yɛwɔ temple dodow 168 a woetu ahyɛ Ewuradze nsa wɔ wiadze nyina mu. Binom wɔ nhyehyɛɛ na nsii ho gyinabew ahorow. Ber a temple fofor a wobesi wɔdze no ho nhyehyɛɛ to gua no, ɔbɛyɛ hɛn abakɔsɛm krɔnkrɔn no ne fã bi.
Ɔbɛyɛ nwanwa dɛ yɛbɔbɔ temple afofor horow ho amandzɛɛ ber a wɔatoto hɛn temple nyina mu mber kakra yi.
Mfe bɔbor ɔha abɛsen kɔ no, President Wilford Woodruff hun hɛn gyinabew ndɛ yi, dɛ ma wɔakyerɛw no wɔ ne Salt Lake Temple tu hyɛ Nyame nsa mpaabɔ mu ɔbɔe afe 1893 mu no. Hom mu binom ehu mpaabɔ soronko yi a woetwa no tsia wɔ social media do ndaansa yi mu.
Hom ntsie Nyame no nkɔnhyɛnyi ɔkatakyi no ntotɔserɛ: “Ber a Wo nkorɔfo nnya kwan nhɛn ofi krɔnkrɔn yi mu … na wɔtseetsee hɔn na wɔwɔ ɔhaw mu, a dza ɔyɛ dzen etwa hɔn ho ehyia … na wɔbɛdan hɔn enyi ahwɛ Wo fi krɔnkrɔn yi na wɔbɛserɛ Wo hɔ ngyee, mboa, Wo tum a wɔbɛtsen ama hɔn no, yɛtotɔ serɛ Wo, fa ehumbɔbɔr hwɛ hɔn fi sor fi Wo tsenabew krɔnkrɔn no mu … na tsie hɔn sũfrɛ. Anaa ber Wo nkorɔfo hɔn mba, wɔ mfe a ɔreba no mu, wobeyi hɔn, efi ha no, ɔnam biribi ntsi … na wobosũ afrɛ Wo fi hɔn amandzehu na awerɛhow no bun mu no, dɛ tserɛw mboa na ɔgye ma hɔn no, yɛserɛ Wo ahobrɛadze mu dɛ … tsie hɔn sũfrɛ, na ma hɔn nhyira no a wobisa no.”3
Enuanom na nkyerɛbaa, hɛn atseetsee mber yi mu ber a wɔatoto temple dodow mu no, hom botom akɔ do atwe hom temple ayɛdze na endowment no tum no susuampara dɛ hom dzi hom ahyɛmudzi no nyi no. Yɛserɛ hom mfa mber yi a wɔato temple mu no nkɔ do mbɔ bra a ɔfata temple, anaa hom mbɛfata temple nkɔree.
Hom nye hom ebusua na anyɛnkofo nkã temple ho nsɛm. Osiandɛ Jesus Christ wɔ biribiara a yɛyɛ wɔ temple no ne finimfin no, ber a hom rodwendwen fa temple ho dodow biara no nna hom rodwendwen afa No ho dodow ara so. Hom nsũa na hom mbɔ mpaa mfa nhu tum na nyimdzee akyɛdze a wɔdze ama hom—anaa mbrɛana wɔdze rebɛma hom no, ase yie.
Ɔyɛ hɛn enyigye dɛ yɛbɔ no dawur dɛ yebesisi temple afofor awɔtwe wɔ mbea a odzi do yi: Bahía Blanca, Argentina; Tallahassee, Florida; Lubumbashi, Democratic Republic of the Congo; Pittsburgh, Pennsylvania; Benin City, Nigeria; Syracuse, Utah; Dubai, United Arab Emirates; na Shanghai, People’s Republic of China.
Mbea awɔtwe ne nyina mu no, Asɔr architectfo nye sɔn mu edzibewdzifo bɛyɛ edwuma ama temple no nye sɔn biara adan no asaa na wɔayɛ adze fɛɛfɛw ama sɔn biara.
Dubai temple ho nhyehyɛɛ no yɛ hɔn ebisadze enyidzi mu ara ho mbuae a hɛn so yɛdze enyisɔ gye to mu.
Dza Shanghai ho nhyehyɛɛ no gyina do ho hia papaapa. Mfe eduonu na no mboree no, Republic of China asɔrmba a wɔfata temple no akɔ Hong Kong China Temple. Mbom Ayɛwoho 2019 mu no, wɔato mu rebɛyɛ nsiesie a ohia ara yie a wɔayɛ ho nhyehyɛɛ dɛ ɔbɛkyɛr.
Shanghai hɔ no, asɔrfi a wotum dzi dwuma ahorow wɔ mu no bɛma kwan ma Chinafo asɔrmba no akɔ do dze ayɛ temple ayɛdze horow—wɔ People’s Republic of China—ama hɔnho nye hɔn ewuakɔr.4
Ɔman biara mu no, Asɔr yi kyerɛkyerɛ n’asɔrmba no dɛ wondzi mbra no nyi, yɛyɛ ho setsie, na yedzi do.5 Yɛkyerɛ ebusua no ho hia a ohia, dɛ yɛbɛyɛ awofo pa na amamba pa a yɛda nsew. Osiandɛ yedzi People’s Republic of China hɔn mbra na nhyehyɛɛ do no ntsi, Asɔr no nnsoma asɛmpasomafo hɔ ma wɔnnkekã asɛmpa no; nna yɛrennyɛ dɛm so sesei.
Ahɔho na Chinafo mboanofo no, rommbɔ mu nhyia mu. Asɔr no ne mbra mu gyinabew no nnsesãe. Ahyɛse no, hɔn a wɔayɛ mber ho nhyehyɛɛ nonko na wɔbɛhɛn dan no mu. Ewuradze ne fie a ɔwɔ Shanghai no rennyɛ bea a aserafo wofi amanhorow binom mu no botum akɔ hɔ.
Temple awɔtwe yinom behyira nyimpa pii a wɔwɔ owu ntwamutam n’afã ebien nyina no. Temple yɛ Jesus Christ N’asɛmpa ne mãhyɛ Nsanananmu no n’afã ɔkrɔn. Nyame ne papayɛ na ayamuyie mu no, Ɔdze temple rebɛn Ne mba a wɔwɔ beebiaraara yie.
Ber a Nsanananmu no rokɔ do no, minyim dɛ Nyankopɔn bɔkɔ do ada ndzɛmba a ohia pii a ɔfa N’ahenman wɔ asaase yi do no edzi.6 Ahenman no nye Jesus Christ N’asɔr a ɔwɔ hɔ Ma Nda a Odzi Ekyir Ahotseweefo.
Enuanom na nkyerɛbaa, modɔ hom. Mber yi a no mu ayɛ dzen na yennyim ɔkyena mu nsɛm ntsi, na migyina tumdzi a wɔdze ahyɛ me no do no, mebɛpɛ dɛ medze asomafo nhyira nhyira hom.
Medze asomdwee na gyedzi mbordo wɔ Ewuradze mu hyira hom.7
Mihyira hom dɛ hom benya pɛ dɛ hom bonu homho na dabiara hom abɛyɛ tse dɛ Ɔno ara yie.8
Mihyira hom dɛ hom bohu dɛ Nkɔnhyɛnyi Joseph Smith yɛ Jesus Christ Asɛmpa ne Nsanananmu nkɔnhyɛnyi no.
Sɛ yarba bi bɛba hom anaa hom adɔfo mu a, megya hom ayarsã nhyira a ɔnye Ewuradze ne pɛ saa.
Medze iyinom hyira hom, a medze mo dɔ ma hom mu kor biara bio so, wɔ Jesus Christ Ne dzin krɔnkrɔn no mu, amen.