Mbrɛ Asɔfodzi no si Hyira Mbabun
Wɔama hɛn kwan dɛ yɛnsom tse dɛ sor abɔfo, mbɔ asɛmpa no dawur wɔ asaase n’asaasetɔw nyina do, na yɛmboa akra ma wɔmbra Christ hɔ.
Enuanom na nkyerɛbaa, nokwar ara ɔyɛ me enyisɔ dɛ mekasa kyerɛ hom ewimbir yi a wɔayɛ atsenkã fa asɔfodzi akyɛdze krɔnkrɔn na tum nwanwa a ɔwɔ dze hyira mbabun wɔ mberano yi mu ho asɛm. Mobɔ mpaa dɛ m’esintɔ ekyir no, Sunsum no bɔboa me ma m’akyerɛkyerɛ nokwar no.
President a Odzi Kan na n’Apamfo abɔ hɔn a wokitsa Aaron Asɔfodzi no nkaa dɛ “hom tsena akwan horow akɛse na taferbanyinmbɔmu da mu—da a wɔdze asɔfodzi no asan ananmu aba no. Hom wɔ tumdzi no dɛ hom yɛ Aaron Asɔfodzi n’ayɛdze horow no. Ber a mpaabɔ mu ara na hom fata dɛ wɔdze dɛm tumdzi no dzi dwuma no, hom behyira hɔn a woetwa ehyia homho no kɛsenara.’’1 Osiandɛ yɛyɛ Asɔr no ne mberantsɛmba no ntsi, wɔsan so kaa hɛn dɛ yɛyɛ “Nyankopɔn ne [mbabanyin] a ɔdɔ hɛn, na Ɔwɔ edwuma ma [hɛn] ma yɛyɛ’’2 na yɛboa wɔ N’edwumayɛ mu “dɛ yɛdze nyimpa ne bɛkyebo na onnyiewiei nkwa bɔbɔ adze’’ (Moses 1:39
Asɔfodzi no nye tumdzi dɛ wɔdze Agyenkwa n’asɛmpa ayɛdze na ahyɛmudzi horow no bɛma hɔn a wɔfata dɛ wɔgye. Ɔnam asɔfodzi ayɛdze na ahyɛmudzi horow yinom do na Agyenkwa no Werdambɔ ho nhyira ne mãhyɛ no nyina ba, a ɔboa hɛn ma yenya hɛn hyɛbea krɔnkrɔn.
Nna Joseph Smith yɛ akɔkowaba a Nyankopɔn frɛɛ no dɛ ɔmfa Jesus Christ n’asɛmpa no nsan ananmu mbra na, dɛm botae no ntsi, wɔdze asɔfodzi no maa no, a ɔdze hyiraa adasa nyina. Nkyerɛkyerɛ na Ahyɛmudzi 135 mu no, John Taylor da nhyira beberee edzi a Joseph dze ama mberano yi ne mbabun no. Yɛkenkan dɛ: “Joseph Smith, … sɛ iyi Jesus nko si nkyɛn a, ɔayɛ adze pii ama adasa a wɔwɔ wiadze yi mu dze ama hɔn nkwagye, sen nyimpa biara a ɔatsena ase mu pɛn. Ɔdze Mormon Nwoma no aba … ; dze onnyiewiei asɛmpa ne mãhyɛ … no akɔ asaase ne mfɛndzanan nyina; ɔdze nyikyerɛ na mbrasɛm a ɔyɛ dɛm Nkyerɛkyerɛ na Ahyɛmudzi [no] … ; ɔaboaboa Nda a Odzi Ekyir Ahotseweefo mpempem ano, … na ɔbɛyɛɛ atsenkã na oegya dzin a wonnkotum apepa da’’ (Nkyerɛkyerɛ na Ahyɛmudzi 135:3).
Ama yɛaasom yie mu ara tse dɛ Joseph yɛe no, otwar dɛ yɛfata emudzi mu ara dɛ yɛdze Ewuradze n’asɔfodzi tum no bedzi dwuma. Mber a nna wɔrekyerɛ Mormon Nwoma no ase no, nna Joseph na Oliver pɛ dɛ wonuma hɔn, naaso nna wonnyi tumdzi a ɔfata no. Esusow Aketseaba 15, 1829 da no, wobuu ntwɛr wɔ mpaabɔ mu na John Onumanyi no bɛseraa hɔn, ɔno a ɔdze Aaron Asɔfodzi nsaafee na tumdzi maa hɔn, see dɛ, “Me mfɛfo asomfo, wɔ Messiah ne dzin krɔnkrɔn mu medze Aaron Asɔfodzi no ma hom, dza okitsa abɔfo hɔn som, nye nnuho asɛmpa no, na nsumuhyɛ enuma a wɔdze kɔ bɔnfakyɛ mu no nsaafee’’ (Nkyerɛkyer na Ahyɛmudzi 13:1).
Wɔama hɛn kwan dɛ yɛnsom tse dɛ sor abɔfo, mbɔ asɛmpa no dawur wɔ asaase n’asaasetɔw nyina do, na yɛmboa akra ma wɔmbra Christ hɔ. Som yi ma yɛnye John Onumanyi, Moroni, Joseph Smith, President Russell M. Nelson, na Ewuradze n’asomfo enyimiafo no bɔmu yɛ edwuma.
Yɛdze N’asɔfodzi na hɛn som no yɛdze hɔn a woetu hɔnho esi hɔ dɛ woridzi Ewuradze ne nkyerɛkyerɛ do pɛpɛɛpɛr na wɔdze robɔ bra no bɔmu, a mankasa minyim dɛ obotum ayɛ dzen ber a yehyia mbabun hɛn haw ahorow no. Naaso yɛnye Ewuradze ne mfɛfo asomfo yinom robɔmu ayɛ kor ma Ewuradze N’edwuma aba mu no bɔboa ahyɛ hɛn dzen dze etsĩa ɔbɔnfo no nsɔhwɛ na ndaadaa. Hom botum ayɛ fasusu papa ama hɔn a wɔnngye hɔnankasa hɔnho nndzi no. Kan no a ɔwɔ hom mu no botum ahyerɛn ara ma dɛ wobehyira obiara a hom nye no benya nkitahodzi anaa ɔbɔwɔ hom nkyɛn ara no. Ɔyɛ a ɔbɛyɛ dzen mber bi dɛ hom bɛgye ato mu dɛ hom benya sunsum mu anyɛnkofo, mbom ɔyɛ me enyisɔ dɛ minyim dɛ meyɛ asɔfodzi quorum nokwafo kuwba a mubotum nye hɔn ayɛ edwuma atwe abɛn Christ.
Yɛwɔ hɛn anyɛnkofo na ebusua no, Sunsum Krɔnkrɔn no nye hɛn anyɛnkofo mu nokwardzifo na damfo dodow mu kor. Naaso ama yeenya Ne daa daa anyɛnkoyɛ no, otwar dɛ yegyina gyinabew horow na mbea mbea a Ɔbɛpɛ dɛ ɔwɔ hɔ. Iyi botum ahyɛ ase wɔ hɛn efiefi, ber a yɛyɛ edwuma ma hɔ yɛ mbea krɔnkrɔn ber a yɛdze hɛnho hyɛ daa daa kyerɛwsɛm nsũae na mpaabɔ mu dɛ ebusua na, ohia dodow no, ber a hɛnankasa yesũa kyerɛwsɛm no na yɛbɔ hɛnara hɛn mpaa.
Afe yi ahyɛse no, menyaa enyigye naaso wɔ ahobrɛadze kwan do dɛ moboa m’akyerɛbaa kakraba, Oceane, ma ɔkɔr kan wɔ ahyɛmu anamɔn kwan no do ber a ɔgyee ɔfrɛɛ do dɛ wonnuma no na ɔnhyɛ ehiadze kor mã a ohia dze ahɛn celestial ahenman mu. Otuu n’enuma hyɛɛ da abosom kor, kɛpem dɛ wɔhyɛɛ me sɔfo, ma ɔayɛ me adom ma maayɛ ayɛdze no, ber a ɔyɛɛ hɛn nkyerɛbaa binom so adom ma wɔyɛ edwuma wɔ asɔfodzi dwumadzi ase na wogyinae dɛ adasefo. Ber a yegyinae hwɛɛ hɛnho enyim na enyim wɔ enuma nsubura ho no, na yɛyɛɛ ahoboa dze rebɛhɛn nsu no mu no, muhun n’enyigye, osiandɛ nna ɔnye medze pɛr. Na metsee koryɛ ho nkã wɔ hɛn ntamu ber a muhun dɛ ɔrobɔ adwenpɔw a ɔtsen. Kwan yi dɛ medze asɔfodzi no dzi dwuma no hia dɛ meyɛ ahwɛyie mbordo na mennkɛyɛ biribiara ɔmmfata wɔ m’asɛmpa abrabɔ mu. Ama maayɛ ahoboa no, mokɔr temple dabiara wɔ dɛm dapɛn no mu, a me maame, me nana, na m’akyerɛbaa boaa me ma meyɛɛ enuma maa ewufo.
Sũahu yi kyerɛɛ me asɔfodzi ho nsɛm pii na mbrɛ mibesi botum dzi edzi dwuma emudzi mu. Minyim dɛ hɔn a wokitsa asɔfodzi nyina tum tse ndzɛmba kor noara nkã a metsee sɛ yedzi Nephi ne fasusu do dɛ “mobɔkɔ akɛyɛ’’ (hwɛ 1 Nephi 3:7). Yennkotum atsena hɔ dɛmara na hɛn enyi ada Ewuradze kwan dɛ ɔdze hɛn bɛyɛ edwuma wɔ N’edwuma kɛse no mu. Onnyi dɛ yɛtweɔn hɔn a wohia hɛn mboa no ma wɔhwehwɛ hɛn; ɔyɛ hɛn asɛdze dɛ hɔn a wokitsa asɔfodzi no dɛ wɔyɛ fasusu na wogyina dɛ Nyankopɔn n’adasefo. Sɛ yɛrobɔ adwenpɔw a obesiw hɛn kwan efi hɛn onnyiewiei kankɔ ho a, otwar dɛ yɛsesã sesie. Satan bɔbɔ mbɔdzen ara yie ma yegyina hɛn nyimpa su mu dɛ yɛhwehwɛ akɔndɔdze ara. Naaso minyim dɛ sɛ yɛdze ahoɔdzen hyɛ mu, hwehwɛ hɔn a wɔbɔboa hɛn, na yenu hɛnho da biara a, nhyira nsunsuando no bɛyɛ nwanwa na hɛn abrabɔ bɛsesã afebɔɔ ber a yɛper kɔ kan wɔ ahyɛmu anamɔn kwan no do no.
Minyim dɛ iyi nye Jesus Christ No nokwar Asɔr no, nyia a ɔyɛ hɛn Agyenkwa na ɔdze asɔfodzi nsaafee na ama N’Asomafo, hɔn a wɔdze dzi dwuma tsitsir ara wɔ ɔhaw nda yinom mu, na wɔdze esiesie wiadze no ama Ne nsanee.
Minyim dɛ Joseph Smith yɛ Nsanananmu no no nkɔnhyɛnyi, na dɛ President Nelson nye hɛn nkɔnhyɛnyi tseasefo ndɛ. Moto nsa frɛ hɛn nyina dɛ yensũa ekunyin yinom a wokitsa asɔfodzi no na yɛnhwehwɛ nntu hɛnho mpon daa daa ama yeetum ayɛ krado dze ehyia hɛn Bɔfo. Jesus Christ ne dzin mu, amen.