Gyedzi Mpaabɔ
Ber a yɛdze gyedzi bɔ mpaa no, yɛbɛyɛ ɔfã a ohia wɔ Ewuradze n’edwuma mu ber a Ɔreyɛ wiadze yi ahoboa ama Ne Mbae a Otsĩa Ebien no.
Elder Maynes ne mpaabɔ wɔ wiadze mfɛndzanan ehyiadzi ne nhyiamu a odzi kan yi ahyɛse no, Wɔrema ho mbuae. Nkenyan edua nsɛm nwanwa na ndwom dɛɛdɛw mu aba hɛn hɔ. President Russell M. Nelson n’anohoba dɛ ehyiadzi yi bɛyɛ soronko na nkaadze no wɔahyɛ ase rehyɛ mã.
President Nelson ahyɛ dɛ afe yi yɛ “mfe ɔha ebien afrenhyia a yɛrehyɛ 200 [ mfe ɔha ebien] fitsi ber a Nyame Egya na No Dɔba, Jesus Christ, puee Joseph Smith do wɔ enyido-adzehu mu no, no ho fa.” President Nelson too nsa frɛɛ hɛn dɛ yɛnyɛ ankorankor nhyehyɛɛ mfa nyɛ ahoboa mma ehyiadzi soronko yi, yɛrehyɛ fa a ɔkãa dɛ ɔbɛyɛ “Asɔr n’abakɔsɛm mu asɛm tsitsir, a w’afamudze hia kɛse.”1
Tse dɛ emi, ibia itsee ne nsɛm na ibisaa woho dɛ “ebɛn kwan mu na m’afã hia kɛse?” Bia ikenkanee na ibɔɔ mpaa wɔ dza osisii wɔ Nsan-ananmu no ho. Bia, ekenkaan dɛm mber nwanwa soronko no a Nyame Egya no daa No Dɔba no edzi ho nsɛm no kyɛn da nyinaa. Bia akenkan mpɛn dodow a dɛm ber no Agyenkwa no nye Ɔsor Egya ne mba no kasae no ho nsɛm. Minyim dɛ meyɛɛ ndzɛmba yinom nyina nye beberee.
Ber a m’akenkan mu no muhun ntõtõho a ɔfa Nyankopɔn n’asofodzi na mberano ne mbuei ho no, ɔbrɛɛ me adze. Mobotowee ber muhun dɛ m’ahoboaboa ma ehyiadzi yi ayɛ mankasa m’abakɔsɛm mu asɛntsitsir. Minyaa nsesã ho atsenkã wɔ m’akoma mu. Minyaa enyisɔ fofor ho atsenkã. Minyaa dɛwdzi mãhyɛ ho atsenkã wɔ ndzinoa dɛ wɔtoo nsa frɛɛ me dɛ menkã Nsan-ananmu a ɔrokɔ do ho fa a wɔrehyɛ no ho.
Mususu dɛ binom, osian hɔn ahoboaboa ahwɛyie mu no ntsi, woenya dɛwdzi, enyisom na enyimpi ara yie ho atsenkã dɛ wɔbosom wɔ beebiara a Ewuradze behia hɔn no.
Ndzɛmba nwanwa a osisii a yɛhyɛ no enyimnyam no yɛ mberano a odzi ewiei a wɔahyɛ ho nkɔm no n’ahyɛse, a Ewuradze reyɛ N’Asɔr na No nkorɔfo, a Ne dzin da hɔn do no ahoboa, dɛ wɔbɛgye No. Dza ɔkã hɛn ahoboaboa ma Ne mbae ho no, Obepegya hɛn mu kor biara ma yɛasoɛr sunsum mu egyina ɔhaw na akwanpa a ɔbɛda hɛn enyim a yennhun ne saso da wɔ wiadze abakɔsɛm mu.
Fankwa 1840 mu no, Nkɔnhyɛnyi Joseph Smith na n’apamfo a wɔwɔ President a Odzi Kan na n’Apamfo mu no paa mu kãa dza odzi do yi: “Ewuradze n’edwuma wɔ nda a odzi ekyir yinom mu no, yɛ adze kukuankoma na ɔbor adasa hɔn ntseasee do. Wonnkotum akyerɛ n’enyimnyam, na no nwanwa bor adzebiara do. Ɔyɛ asɛngyinado a woekenyan nkɔnhyɛfo na atseneneefo hɔn bo mu fitsi wiadze no mbɔe, edua mberano odzidzi do no besi dɛm ber yi; na ɔyɛ mberano ne mãhyɛ ampaara, ber a ndzɛmba nyina a ɔwɔ Christ Jesus mu no, kaansa ɔwɔ sor anaa asaase o, wɔbɔboa ne nyina ano wɔ No mu, na ndzɛmba nyina ahyɛananmu ber no, dɛ mbrɛ wɔnam nkɔnhyɛfo krɔnkrɔn a wɔwɔ hɔ fi tsetse no hɔn anomu kãe no, na ɔno mu na anohoba a wɔdze bɔɔ egyanom no bɛhyɛ mã wɔ enyinyam mu, ber a Ɔsorsor no tum no bɛda edzi kɛse, enyimnyam mu, na ne fɛw mu.’’
Wɔkɔr do kãa dɛ: “Yɛtse nkã dɛ yɛbɔkɔ kan na yɛakã hɛn ahom abɔ mu ma yɛdze atow ahenman no, na yɛakyekyer Asɔfodzi no wɔ hɔn mãhyɛ na enyimnyam mu. Edwuma a ɔsɛ dɛ wɔyɛ no wɔ nda a odzi ekyir yi mu no yɛ adze a ohia tsitsir, na ɔbɛgye hɛn ahom, nsaano dwuma, talent, na Ahotseweefo no hɔn mbɔdzembɔ, ama ɔdze enyimnyam na ahendzi a wɔakyerɛ wɔ nkɔnhyɛnyi [Daniel] mu no epirew akɔ kan [hwɛ Daniel 2:34–35, 44–45]; na ɔbehia Ahotseweefo no hɔn adwen nyina, dze ayɛ adze kɛse a ɔyɛ nwanwa a ɔtse dɛm.”2
Ndzɛmba pɔkyee a yɛbɛyɛ na ber a yɛdze bɛyɛ no wɔ Nsan-ananmu a ɔrokɔ do yi mu no, wonnyii nnkyerɛɛ. Naaso President a Odzi Kan na n’Apamfo wɔ dɛm asɔpɔkan nda no mpo mu no, nna wonyim Ewuradze n’edwuma a Ɔdze ato hɛn enyim no bi ne tɛtɛr na no bun no. Dza yenyim dɛ obesi no mu mfatoho kakra ara nye yi:
Ewuradze bodua N’Ahotseweefo no mu dze N’asɛmpa akyɛdze no ama “ɔman biara, ebusuafo, kasa horow, nye nyimpakuw nyinara.”3 Abaefo mfir na anwanwadze bɔkɔ do ayɛ hɔn fã—nye ankorankor “nyimpa enufo”4 a wɔdze tum na gyedzi mbordo bɔsom.
Hɛn, dɛ yɛyɛ ɔman no yɛbɔbɔ mu ayɛ kor ara yie ber a akõkoekõ retahye no. Wɔbɔboa hɛn ano wɔ sunsum ahoɔdzen mu dɛ ekuw horow na ebusua ebusua a asɛmpa no ne kan no ahyɛ hɛn mã.
Wiadzemba a wɔnngye Nyame nndzi mpo no bohu Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo no na woehu dɛ Nyame no tum wɔ do. Esuafo anokwafo na akokodurfo bɛfa Christ ne dzin ato hɔn do wɔ bagua mu a wonnkosuro na ahobrɛadze mu.
Nkyii, yebesi dɛn, na hɛn mu kor biara dze noho bɛhyɛ edwuma kɛse dɛm a ɔyɛ nwanwa yi mu? President Nelson akyerɛkyerɛ hɛn mbrɛ yebesi benyin wɔ sunsum mu tum mu. Sɛ yɛfa nnuhu dɛ enyigye kwan a yeenya osian hɛn gyedzi a orinyin dɛ Jesus nye Christ no, sɛ yɛtse ase na yɛgye dzi dɛ Ɔsor Egya tse hɛn mpaabɔ biara, sɛ yɛbɔ mbɔdzen dɛ yɛbɛyɛ setsie na yɛdze mbrasɛm no abɔ bra a, yenyin wɔ hɛn tum mu dɛ yenya nyikyerɛ ntoatoado. Yebotum enya Sunsum Krɔnkrɔn no n’anyɛnkoyɛ no aber nyina. Kan ho atsenkã hyerɛn hɛn do ber a wiadze a ɔbɔ hɛn ho aporow rehyɛ sum mpo no.
Joseph Smith yɛ fasusu wɔ mbrɛ ibesi benyin wɔ dɛm sunsum mu tum yi mu. Ɔkyerɛɛ hɛn dɛ gyedzi mpaabɔ nye saafee a wɔdze nya nyikyerɛ fi Nyame hɔ. Ɔdze gyedzi bɔɔ mpaa, a ɔgye dzi dɛ Ɔsor Egya beyi ne mpaabɔ ano. Ɔdze gyedzi bɔɔ mpaa, a ɔgye dzi dɛ ɔnam Jesus Christ nkotoo mu na wobotum agye no efi no bɔn afɔdzi ho. Na ɔdze gyedzi bɔɔ mpaa, a ɔgye dzi dɛ ohia dɛ ohu Jesus Christ no nokwar Asɔr no ama oeenya dɛm bɔnfakyɛ no.
No nkɔnhyɛ som ber mu nyina no, Joseph Smith dze gyedzi mpaa nyaa nyikyerɛ ntoatoado. Ber a yehyia ndɛ taferbanyinmbɔmu nye dza ɔbɛba no, hɛn so yehia dɛ yɛdze nhwɛdo kor noara dzi dwuma. President Brigham Young kãa dɛ, “Minnyim kwan biara bio a ɔwɔ hɔ ma Latter-day Saintfo, gyedɛ hɔn ahomgye biara mu no ɔyɛ mpaabɔ ma Nyame dɛ ɔma no nkorɔfo abamba na kwankyerɛ.”5
Nsɛmfua yinom a ofi sacrament mpaabɔ mu no na ɔwɔ dɛ ɔkyerɛ hɛn daa daa abrabɔ: “[Yɛ]kaa no aber nyina.” Nyew, “No,” no nye Jesus Christ. Nsɛmfua a odzi do no, “na woedzi ne mbrasɛm … do,” no susu kyerɛ hɛn yɛrekaa No no, n’asekyerɛ.6 Ber a daa yɛkaa Jesus Christ no, bia yebotum ebisa wɔ mpaabɔ komm mu, “Ebɛnadze na Ɔbɛpɛ dɛ meyɛ.”
Mpaabɔ a ɔtse dɛm, a wɔbɔɔ no gyedzi wɔ Jesus Christ mu no, na ɔdze mberano a odzi ewiei yi bae. Na ɔbɛyɛ hɛn mu kor biara n’afã a ohia kɛse dza yɛbɛyɛ wɔ ne nsiansianee a ɔrokɔ do no mu. Mehu, dɛ mbrɛ hom so ehu no, dɛm mpaabɔ nwanwa yinom ho fasusu.
Odzi Kan nye Joseph Smith. Ɔdze gyedzi a ɔtse dɛ abofra dze bisaa Ewuradze dza Ɔpɛ no dɛ ɔyɛ. No mbuae no sesãa wiadze abakɔsɛm.
Emi dze, adzesuadze tsitsir fi Joseph no mbuae mu nye Satan hyɛɛ no do ber a nna Joseph robɔ mpaa no.
Minyim fi sũahu mu dɛ Satan na no nkowaa bɔ mbɔdzen dɛ wɔbɛma yebenya atsenkã dɛ onyi dɛ yɛbɔ mpaa. Aber a Joseph Smith dze n’ahoɔdzen nyina bɔɔ mpaa frɛɛ Nyame dɛ Ɔngye no mfi tum a ɔpeer dɛ ɔbɛkyekyer no ne nsa no, onyaa ne mpaabɔ a ɔdze rohwehwɛ mboa ho mbuae na Ɔsor Egya na Jesus Christ puei.
Satan no mbɔdzembɔ dɛ ɔbɛsɛɛ Nsan-ananmu n’ahyɛse no nna ɔyɛ dzen ara yie osiandɛ nna Joseph ne mpaabɔ no ho hia papaapa. Emi na ɔwo yɛwɔ afã krakra a yɛbɛyɛ wɔ Nsan-ananmu a ɔrokɔ do yi mu. Naaso Nsan-ananmu ɔtamfo no bɔbɔ mbɔdzen esianka hɛn dɛ yɛbɔbɔ mpaa. Joseph ne gyedzi na ne enyimpi si botum ahyɛ hɛn dzen wɔ hɛn botae mu. Iyi kã siantsir pii a ndaase ma Ɔsor Egya wɔ Nkɔnhyɛnyi Joseph ho kã me mpaabɔ ho no.
Enos a ɔwɔ Mormon Nwoma no mu no yɛ me gyedzi mpaabɔ ho fasusu kor so ber a mobɔ mbɔdzen dɛ mebɛyɛ m’afã wɔ Nsan-ananmu a ɔrokɔ do no mu. Mbrɛ wo fã bɛyɛ biara no, bia ibotum afa no dɛ w’ankorankor kwankyerɛfo.
Tse dɛ Joseph, Enos dze gyedzi bɔɔ mpaa. Ɔkyerɛɛ no sũahu mu wɔ kwan yi do:
“Na ɔkɔm dzee me kra; na mubuu ntwɛr wɔ me Yɛfo enyim, na medze mpaabɔ a ɔyɛ dzen totɔe serɛɛ no wɔ mara me kra ntsi; na musũi frɛɛ no da no nyina; nyew, na adzesaa no so memaa me ndze do dzendzenndzen ma odur sor.
“Na ndze bi baa mo hɔ see dɛ: Enos wɔdze wo bɔn akyɛ wo, na wobehyira wo.
“Na emi , Enos, minyim dɛ Nyankopɔn nndzi ator; dɛm ntsi, wɔpepaa m’afɔdzi.
“Na mesee dɛ: Ewuradze, ɔyɛ dɛn yɛ?
“Na ɔsee me dɛ: Osian wo gyedzi a ɔwɔ Christ a enntsee ne nkã da na innhun no da no mu ntsi. Na mfe pii botwa mu akɔ ansaana ɔada no ho edzi wɔ honam mu; dɛm ntsi kɔ, wo gyedzi agye wo.”7
Adzesuadze a oehyira m’abrabɔ nye nsɛm yi: “Osian wo gyedzi a ɔwɔ Christ a enntsee ne nkã da na innhun no da no mu ntsi.”
Nna Joseph wɔ gyedzi wɔ Christ mu dɛ ɔbɔkɔ kwã no mu na ɔabɔ mpaa so ma woeyi no efi Satan no tum mu. Nna onnyae nnhun Egya na Ɔba no, naaso ɔdze n’akoma mu ahoɔdzen nyina bɔɔ mpaa wɔ gyedzi mu.
Enos no sũahu no akyerɛkyerɛ me adzesuadze yi ara a ɔsom bo no. Sɛ medze gyedzi bɔ mpaa a, minya Agyenkwa no dɛ me dzimafo wɔ Egya n’enyim na menya atsenkã dɛ me mpaabɔ du sor. Mbuae pii ba. Minya nhyira horow. Asomdwee na enyigye ba wɔ nkõdzen ber mpo mu.
Mekaa ber a, nna meyɛ Asomafo Duebien no hɔn Quorum kuwba fofor koraa no, menye Elder David B. Haight buu nkotodwe wɔ mpaabɔ mu. Nna ne mfe a oedzi yɛ bɛyɛ dɛ sesei medze yi, a ɔwɔ ɔhaw a sesei merefa mu yinom. Mekaa ne ndze ber a ɔrobɔ mpaa no. Mennbue m’enyiwa annhwɛ dze, naaso nna ɔyɛ dɛ mbrɛ ɔayerɛw n’ano. Ɔdze enyigye ndze kasaa kyerɛɛ Ɔsor Egya.
Mutum tse n’enyigye wɔ m’adwen mu ber a ɔkãa dɛ, “Jesus Christ ne dzin mu.” Ɔgyegyee m’asowa mu dɛ ɔyɛ dɛ ma Elder Haight nyaa atsenkã dɛ Agyenkwa no agye asɛm no a ɔbɔɔ ho mpaa dɛm ber noara mu no. Nna minyin no pefee dɛ wɔdze enyimtsewee bɛgye.
Hɛn ahom dɛ yɛbɛyɛ hɛn kyɛfa a ho hia dze aboa Nsan-ananmu nwanwa no a ɔrokɔ do no bɛyɛ kɛse ber a yɛma hɛn gyedzi a ɔwɔ Jesus Christ mu dɛ hɛn Agyenkwa na hɛn Ɔsor Egya dɛ hɛn Egya dɔfo no, nyin. Ber a yɛdze gyedzi bɔ mpaa no, yɛbɛyɛ ɔfã a ohia wɔ Ewuradze n’edwuma mu ber a Ɔreyɛ wiadze yi ahoboa ama Ne Mbae a Otsĩa Ebien no. Mobɔ mpaa dɛ hɛn nyina yebenya enyigye yɛdze ayɛ edwuma no a Ɔato nsa afrɛ hɛn mu kor biara dɛ ɔmbɛyɛ no.
Megye dase dɛ Jesus Christ tse ase. Iyi nye N’Asɔr na ahenman wɔ asaase do. Joseph Smith nye Nsanananmu Nkɔnhyɛnyi no. President Russell M. Nelson nye Ewuradze no nkɔnhyɛnyi wɔ asaase no do ndɛ. Okitsa asɔfodzi nsaafee nyina a ɔwɔ Jesus Christ N’asɔr a ɔwɔ hɔ ma Nda a Odzi Ekyir Ahotseweefo mu no. Jesus Christ ne dzin mu, amen.