Ama Woeehu
Hwɛ na bɔ mpaa nya akwanhorow mma wo kan nhyerɛn ama binom eehu kwan no dze aba Jesus Christ nkyɛn.
Enuanom na nkyerɛbaa, Sunsum a yɛatse nkã no ehyira hɛn akoma na oekenyan hɛn wɔ ehyiadzi yi mu.
Mfe ahaebien a abasen kɔ no, kan fadum bi tɔɔ aberantsɛ ba bi do wɔ ndua kwaa bi mu. Dɛm kan mu no, Joseph Smith hun Nyame Egya na Ne Ba, Jesus Christ. Hɔn kan no piaa sunsum mu sum a nna wɔahata asaase do no kɔr ekyir na ɔkyerɛɛ enyim kwan no maa Joseph Smith—na hɛn nyinara. Osian kan a woyii kyerɛɛ dɛm da no ntsi, yebotum enya nhyira horow ne mãhyɛ no a ɔnam hɛn Agyenkwa, Jesus Christ no Werdambɔ do nsa botum akã no.
Ɔnam N’asɛmpa ne Nsanananmu ne papayɛ do no, hɛn Agyenkwa ne kan no botum ahyɛ hɛn mã. Mbom, dɛm kan no nnyi hɔ mma emi na ɔwo nko. Jesus Christ afrɛ hɛn dɛ “hom mma hom kan nhyerɛn wɔ nkorɔfo yi enyim, ama woeehu hom ndwuma pa na wɔahyɛ hom Egya a ɔwɔ sor enyimnyam.’’1 Maapɛ asɛnsin “ama woeehu,’’ no. Ɔyɛ ɔfrɛ enyiberdo fi Ewuradze hɔ dɛ yɛngyen hɛn enyiwa wɔ yɛroboa binom ho ma woehu anamɔn kwan no na efii wɔaba Christ nkyɛn.
Mber a nna medzi mfe 10 no, ɔyɛɛ enyimnyamhyɛ maa m’ebusua dɛ Elder L. Tom Perry a ɔkã Asomafo Duebien no hɔn Quorum ho no a, nna oridzi dwuma wɔ mo kurow mu no, bɔsoɛɛ hɛn fie.
Ewimbir no, hɛn ebusua na Perryfo no tsenaa hɛn asado hɔ na wodzii apple pie dɛɛdɛw no a me maame yɛe no, ber a nna Elder Perry rekã Ahotseweefo a wɔabɔ wiadze aprɔw no hɔnho nsɛm. M’enyi gyee dodow.
Nna adze resã no na me maame frɛɛ me gyaadze hɔ na obisaa me asɛmbisa tisabaa dɛ: “Bonnie, emaa nkokɔ no edziban a?’’
M’akoma tuii; nna mennyɛe. Nna memmpɛ dɛ mebefi Ewuradze no Ɔsomafo no nkyɛn ntsi, mususui dɛ nkokɔ no botum akye kɔm kɛpem anapa.
Me maama dze ne nan sii famu buae dɛ “oho.’’ Hɔ ara, Elder Perry dze ne ndze a ɔgyegye enyigye mu ara no hɛɛn gyaadze hɔ bisaa dɛ, “Ana metse dɛ obi hia dɛ ɔkɛma nkokɔ no edziban a? Ana mobotum nye me babanyin akã woho a?’’
O, ebɛn nokwar enyigye na ɔbɛyɛe dɛ mema nkokɔ no edziban! Mutuu mbirika kɛfaa hɛn tɔkyelight akoangua kɛse no. Enyigye mu no, midzii kan puei, dze ehuruhuru faa anamɔn kwan a yɛafa do mpɛn pii no do, a ɔdze kɔ nkokɔ buw no mu. Morototow tɔkyelight wɔ me nsamu no, yetwaa eburow kwa do na yeduaa ewifua sa no do.
Mudur nsuka kakraba, a wɔdze gugu nduadzewa do no a otwa anamɔn kwan no, medze nketse huruii trae dɛ mbrɛ mayɛ no dada anafua biara no. Nna Elder Perry no mbɔdzenmbɔ dɛ ɔbɛnantsew anamɔn kwan a no do yɛ sum no nnkã m’adwen ho. Me kandzea a nna ɔrokɔ sor ba ase no ammboa no ma oennhu ɔka no. Onnyi kandzea a ogyina fakor no, otsiaa nsu no mu pɛɛ na ɔkaa mu kɛsenara. Akomatu mu no, medanee hwɛɛ me nyɛnko fofor no dɛ oriyi ne nan fi ɔka no mu na ɔropopo nsu efi ne nwoma asopaatse duudur no mu.
Ɔhyɛ asopaatse a ɔamemen na nsu wɔ mu no, Elder Perry boaa me ma memaa nkokɔ no edziban. Yewiei no, ɔdɔ mu ara ɔkyerɛkyerɛɛ me dɛ, “Bonnie, ohia dɛ mohu anamɔn kwan no. Mihia kandzea no ma ɔahyerɛn bea a merenantsew no.’’
Nna merehyerɛn me kandzea no naaso nnyɛ kwan a ɔbɔboa Elder Perry bi a. Afei, muhun dɛ ohia me kandzea ne kan no dze ehu anamɔn kwan mu dwudwoodwo no, medze me tɔkyelight no dzii n’anamɔn no enyim na yɛdze awerɛhyɛmu tumii sanee kɔr fie.
Mo nuanom adɔfo, medze mfe pii adwendwen fapem a musuae fi Elder Perry hɔ no. Ewuradze ne frɛ dɛ yɛmma hɛn kan nhyerɛn no nnyɛ dɛ yɛbɔtotow kan bi basabasa na yɛama wiadze ahyerɛn ara. Ɔyɛ yɛrema hɛn kan no egyina tɔɔtsen ama binom etum ehu kwan akɔ Christ hɔ. Ɔyɛ Israel mboano wɔ ntwamutam afã ebien no—yɛroboa binom ma woehu anamɔn a odzi do kɔ kan wɔ yɛnye Nyankopɔn reyɛ ahyɛmudzi krɔnkrɔn horow na yɛresie.2
Agyenkwa no gyee dase dɛ, “Hwɛ Emi nye kan no; mayɛ fasusu ama hom.’’3 Hom mma yɛnhwɛ Ne fasusu ahorow no mu kor.
Nna ɔbaa no a ɔwɔ nsubura ho no yɛ Samarianyi a onnyim Jesus Christ na nna dodowara apow no wɔ ne man. Jesus hyiaa no na ɔhyɛɛ nkɔmbɔdzi ase. Ɔkãa nsu ho asɛm kyerɛɛ no. Afei ogyaa no kɔr kan mbordo ho mu ber a Ɔdaa Ɔnoara no ho edzi dɛ Ɔyɛ “nkwa nsu’’ no.4
Ayamuhyehye mu ara nna Christ nyim no na n’ehiadze. Ɔkãa dza ɔbaa no bɛtse ase na ɔhyɛɛ ase dɛ ɔnye no rekã biribi a onyim na ɔnnyɛ nã ho asɛm. Sɛ Ogyinaa hɔ ara a, nkyɛ ɔbɛyɛɛ nhyiamu a ɔyɛ mfaso. Naaso nkyɛ no nsunsuando no annyɛ dɛ ɔkɔr kurow mu kɔbɔɔ dawur dɛ, “Hom mbra, mbɔhwɛ … : nnyɛ oyi nye Christ no anaa?’’5 Nkakrakakra no, ɔnam nkɔmbɔdzi do no, ohun Jesus Christ, na n’abrabɔ dadaw mmfa ho no, ɔyɛɛ kan ho edwindadze, a ɔhyerɛn ma binom hun adze.6
Afei hom mma yɛnhwɛ nyimpa beenu a wodzii Agyenkwa no ne kan fasusu do Ɔnnkyɛree na nna me nyɛnko Kevin tsena edwumayɛnyi panyin bi nkyɛn wɔ edzidzi ase. Nna onnhu dza wɔbɛkasa ho bɛyɛ dɔnhwer ebien no, haw no. Odzii nkenyan do no, Kevin bisaa dɛ, “Kã w’ebusua ho asɛm kyerɛ me. Henfa na wofi?’’
Nna kraakye no nnyim n’ekyirfo hɔnho nsɛm pii, ntsi Kevin twee no foon, kãa dɛ, “ Mowɔ app a ɔma nkorɔfo nye hɔn ebusua ebusua nya nkitahodzi. Ma yɛnhwɛ dza yebotum ehu.’’
Nkɔmbɔdzi tsentsen n’ekyir no, Kevin ne nyɛnko fofor no bisaa dɛ, “Ebɛnadze ntsi na ebusua hia dodow ma w’asɔr?’’
Kevin yii ano tsiabaa dɛ, “Yɛgye dzi dɛ yɛkɔ do tsena ase wɔ hɛn wu ekyir. Sɛ yehu hɛn ewuakɔr na yɛdze hɔn edzin kɔ bea krɔnkrɔn a wɔfrɛ no temple a, yebotum ayɛ awar ayɛdze horow a wɔbɛkã hɛn ebusua ebusua no aboa ano mpo wɔ owu ekyir.’’7
Kevin dze biribi a ɔno na ne nyɛnko fofor no nyim dze hyɛɛ ase. Afei onyaa kwan bi dze gyee Agyenkwa ne kan na no dɔ ho dase.
Asɛm a otsĩa ebien no fa Ella ho, esuapɔn mu baskɛtbɔɔl agodzinyi. Ne fasusu no hyɛɛ ase mber a onyaa n’asɛmpakã ɔfrɛ ber a nna ɔwɔ skuul. Ɔpɛɛ dɛ obuei no ɔfrɛ krataa no wɔ n’agodzifo no enyim. Nna wonnyim hwee fa Jesus Christ N’Asɔr ho na wɔnntse Ella ne pɛ dɛ ɔsom no ase. Ɔwɔw do bɔ mpaa dɛ obohu mbrɛ obesi bɛkyerɛkyerɛ n’asɛmpakã ɔfrɛ no mu wɔ kwan a n’agodzifo no botum atse Sumsum ne nkã. Ne nyiano ɛɛ?
Ella kãa dɛ, “Meyɛɛ PowerPoint’’, “osiandɛ mowɔ do.’’ Ɔkãa som a ndaamba obotum asom wɔ asɛmpakã mbea 400 na no mboree no kor mu, na annyɛ a obosua kasa fofor bi ho asɛm kyerɛɛ hɔn. Ɔkãa asɛmpasomafo mpempem a wɔrosom dada no ho asɛm. Ella dze Agyenkwa no mfonyin na ne dasegye tsiabaa dze wiei dɛ: “Baskɛtbɔɔl yɛ ndzɛmba a ohia dodow no mu kor wɔ m’abrabɔ mu. Mikyiin ɔman no mu na migyaa m’ebusua a mobɔe maa kookye yi na ɔnye kuw yi. Ndzɛmba ebien a ohia mbordo ma me sen baskɛtbɔɔl nye me gyedzi na m’ebusua.’’8
Afei, sɛ erodwen dɛ, “Iyinom yɛ 1,000-watt mfatoho, naaso meyɛ 20-watt kandzea ara a,’’ kaa dɛ Agyenkwa no gyee dase dɛ, “Hwɛ Emi nye kandzea a hom bɛma do no.’’9 Ɔbɔ hɛn nkaa dɛ sɛ yɛbɛtsen binom wɔ No do a Ɔdze kan no bɛbrɛ hɛn.
Emi na ɔwo wɔ kan a oye dɛ yɛkyɛ no mpirempire. Yebotum ahyerɛn anamɔn a odzi do no dze aboa obi ma ɔatwe abɛn Jesus Christ, na nkyii anamɔn a odzidzi do no so mu.
Bisa woho dɛ, “Woana na ohia kan a mowɔ no ma woehu anamɔn kwan a wohia naaso wonntum nnhu?’’
M’adɔfo, ebɛnadze ntsi na yɛrehyerɛn hɛn kandzea no hia dodow? Ewuradze aka akyerɛ hɛn dɛ “dodowara da ho wɔ asaase do a … wɔdze nokwar no ehuntsa hɔn osiandɛ wonnyim bea a wobohu nokwar no efi.’’10 Yebotum aboa. Yebotum agye enyim ahyerɛn hɛn kan ma binom ehu. Yebotum ato nsa dze afrɛ.11 Yebotum nye hɔn a worutu anamɔn akɔ Agyenkwa ne nkyɛn no anantsew kwan no, mbrɛ wosi taataa no mmfa ho. Yebotum aboa Israel ano.
Megye dase dɛ Ewuradze bɔkrɔn mbɔdzembɔ kakraba biara. Sunsum Krɔnkrɔn no bɛkenyan hɛn ma yeehu dza yɛbɛkã na yɛbɛyɛ. Mbɔdzembɔ a ɔtsetse dɛm no behia dɛ yefi hɛn ahotɔ bea, naaso yebotum enya awerɛhyɛmu dɛ Ewuradze bɔboa ma hɛn kan ahyerɛn.
Mbrɛ m’enyi si sɔ Agyenkwa ne kandzea no a, ɔkɔdo dua nyikyerɛ do dzi Asɔr yi kan.
Moto nsa frɛ hɛn nyinara dɛ yendzi Jesus Christ no fasusu do na ayamuhyehye mu ara yenhu hɔn a woetwa hɛnho ehyia no. Hwɛ na bɔ mpaa nya akwanhorow mma wo kan nhyerɛn ama binom eehu kwan no dze aba Jesus Christ nkyɛn. N’anohoba yɛ kɛse: “Nyia a odzi m’ekyir no rennantsew sum mu, na obenya nkwa kan no.’’12 Megye dase dɛ hɛn Agyenkwa, Jesus Christ, nye kwan no, nokwar no, nkwa no, kan, na wiadze ɔdɔ no. Jesus Christ ne dzin mu, amen.