Dwen Nyankopɔn ne Papayɛ na ne Kɛseyɛ ho
Moto nsa frɛ hom dɛ dabiara hom nkaa Ɔsor Egya na Jesus Chirst Hɔn kɛseyɛ nye dza Wɔayɛ ama hom no.
Ofi tsetse no, nkankara wɔ nkõdzen ber mu no, nkɔnhyɛfo ahyɛ hɛn nkuran dɛ yɛnkaa Nyame ne kɛseyɛ na yɛndwen dza Ɔayɛ ama hɛn ankorankor, dɛ ebusua ebusua, na dɛ ɔman ho.1 Wohu kwankyerɛ yi wɔ kyerɛwsɛm no nyina mu mbom ɔda edzi yie wɔ Mormon Nwoma no mu. Mormon Nwoma no ne dzin krataafa no kyerɛkyerɛ no botae no mu dɛ “ama wɔdze aakyerɛ Israelfifo nkaa ma woehu ndzɛmba akɛse a Ewuradze yɛe maa hɔn egyanom”2 Moroni no ntotɔserɛ no kã Mormon Nwoma no ne nsɛm ɔdze ba ewiei ho: “Hwɛ, mutu hom fo, dɛ sɛ hom kenkan dɛm ndzɛmba yi … hom nkaa mbrɛ Ewuradze n’ehumbɔbɔr a ɔwɔ ma adasamba no tse … na hom adwendwen ho wɔ hom akoma mu.”3
Ɔyɛ nwanwa dɛ nkɔnhyɛfo hɔn ano yɛ kor wɔ ntotɔserɛ dɛ yɛdwendwen Nyame ne papayɛ ho.4 Hɛn Ɔsor Egya pɛ dɛ yɛkaa Ɔno na No Dɔba Hɔn papayɛ, nnyɛ wɔ Hɔnankasa Hɔn enyigyedze ho ntsi, mbom ama ho nkaa no enya nhyɛdo pa wɔ hɛn do. Yɛrodwen Hɔn ayamuyie ho no, ma hɛn nhumu na ntseasee mu tra. Yɛrodwendwen Hɔn ayamuhyehye ho no, ma yebenya ahobrɛadze, na yɛbɔ mpaa ara yie, na yegyina pintsinn.
Asɛm bi a osii ayarfo a nna mohwɛ hɔn no mu kor a ɔkã akoma ara yie no kyerɛ mbrɛ ayamuyie na ayamuhyehye ho enyisɔ botum asesã hɛn. Afe 1987 mu no, mubohun Thomas Nielson yie, ɔbarimba soronko bi a ohia dɛ wɔma no akoma fofor no. Nna oedzi mfe 63 na ɔtse Logan, Utah, wɔ United States. Ɔsomee dɛ sordaanyi wɔ Wiadze Ɔsatu II mu wie no, ɔwaar Donna Wilkes wɔ Logan Utah Temple mu. Ɔbɛyɛɛ berekyɛrnyi ahoɔdzenfo ɔdzefo. Ne mpanyinyɛ mu no nna n’enyi gye dɛ ɔnye ne nana babanyin panyin, Jonathan reyɛ edwuma, wɔ skuul akwanma ber mu. Beenu no benyaa nkitahodzi mapã, osiandɛ nna Tom hu dɛ Jonathan afa ɔnoara ankasa.
Tom rotweɔn obi ma ɔabɛkyɛ no akoma no yɛɛ atseetsee dodow maa no. Nna ɔnnyɛ obi a ɔwɔ abotar koraa. Nna aber biara otum ɔdze botae bi si n’enyi do na odua edwumadzen na enyimpi mu dze nya. N’akoma a ɔrodwe ho aperdzi, na n’abrabɔ a ɔreba ewiei no, nna ɔtɔfabi a Tom bisa me dza mereyɛ ma wɔayɛ ntsɛntsɛm. Afɛdzi mu ara no, ɔkyerɛɛ akwan horow a mubotum ama oenya obi a ɔbɛkyɛ no akoma ntsɛmpara.
Dakor, enyigye da naaso awerɛhow da bi, Tom nyaa obi mapã a ɔbɛkyɛ no akoma. Ne kɛse no na no bɔgyaa no su no yɛ pɛr, na onyia ɔdze rekyɛ no yɛ aberantsɛba, mfe 16 ara. Akoma no a wɔdze rekyɛ no yɛ Jonathan, Tom ne nana banyin dɔfo no ne dze. Dɛm anapa no, Jonathan nyaa kaar akwanhyia a keteke a ɔresen bɔhwee no mu ma opiraa kɛse.
Ber a mekɛseraa Tom na Donna wɔ asopitsi no, nna wɔayɛ basaa. Nna ɔyɛ dzen dɛ ibotum esusu dza wɔrefa mu, a wonyim dɛ wobotum dze ne nanabanyin n’akoma ama no nkwa ntoado. Ahyɛse no, wɔpoow dɛ wɔbɔgye akoma no a Jonathan n’awofo, hɔn babaa na asew, a woridzi yaw no, dze rema no. Nna Tom na Donna nyim dɛ, kaansa Jonathan remmba nkwa mu bio dze, na nnyɛ hɔn mpaabɔ a wɔdze rohwehwɛ obi ma ɔakyɛ akoma no na ɔmaa Jonathan nyaa akwanhyia no. Oho, Jonathan n’akoma no yɛ akyɛdze a obotum aboa Tom wɔ ber yi a ohia no mu. Wohun dɛ adze papa botum efi esian yi mu aba na wosii adwen ngyinae dɛ wɔbɔkɔ do.
Nsesã eduryɛ nhyehyɛɛ no kɔr do yie. N’ekyir no, Tom bɛyɛɛ nyimpa fofor. Nsakyer no traa apɔwmudzen a onyae anaa n’enyisɔ no mpo. Ɔkãa kyerɛɛ me dɛ anapa biara ɔdwen Jonathan, ne babaa na n’asew no hɔn ho, ɔdwen akyɛdze a oenya, na dza akyɛdze no dua do bae ho. Nna mutum hu dɛ n’enyikã na enyimpi su da ho wɔ hɔ dze, naaso mehyɛɛ no nsew dɛ Tom ayɛ dzinndzinn, ɔdwen adze ho yie, na oenya akoma pa.
Nsesã ɔperehian ekyir no, Tom tsenaa ase mfe 13 kãa ho, mfe dodow a nkyɛ onnkenya. N’enyiadze ho nsɛm no wɔkyerɛw dɛ dɛm mfe yinom boaa no maa ɔkyerɛɛ ayamuyie na ɔdɔ ma ɔkãa n’ebusua na binom hɔn abrabɔ. Ɔyɛɛ adɔyɛ kokoa mu na ɔyɛɛ enyisom na enyimpi ho fasusu.
Hɛn mu kor biara, tse dɛ Tom, yeenya akyɛdze horow a nkyɛ yennkotum enya ama hɛnho efi hɛn Ɔsor Egya na No Dɔ Ba hɔ, a ɔpon a oduaa Jesus Christ no werdam afɔrbɔ no mu no kã ho.5 Yeenya nkwa wɔ wiadze yi mu; yebenya honandua mu nkwa daakye, na onnyiewiei nkwa na nkwagye ntowdo—sɛ yɛsan mu yi a—ne nyina osian Ɔsor Egya na Jesus Christ ntsi.
Ber biara a yɛdze akyɛdze yinom bedzi dwuma no, yebenya mu mfaso, anaa yɛbɔdwen ho mpo no, ɔsɛ dɛ yɛdwen hɔn a wɔdze mae no hɔn afɔrbɔ, ayamuyie, na tsema ho. Yɛkyerɛ obu ma hɔn a wɔdze ma no ma hɛn dza ɔbor enyisɔ ara do. Yɛrodwendwen Hɔn akyɛdze horow no ho no botum na ɔwɔ dɛ ɔsakyer hɛn.
Nsakyeree kor a ɔyɛɛ nwanwa nye Alma Kakraba ne dze no. Aber a Alma “ogu do retsew Nyankopɔn do etua no,”6 ɔbɔfo bi puei. Ɔdze “ndze a ɔtse dɛ wimu ɔbobɔmu no,”7 ɔbɔfo no twuuw Alma n’enyim dɛ ɔretseetsee asɔr no na “ɔkyer dɔm no hɔn akoma.”8 Ɔbɔfo no dze kɔkɔbɔ sɔɔw do: “Kɔ, na kaa w’egyanom hɔn ndɔmmum … na kaa ndzɛmba akɛse a [Nyame] ɔayɛ ama hɔn.”9 Afotusɛm nyina nkyɛ obotum akã no, dɛm na ɔbɔfo no tsĩĩ mu kãe.
Alma nuu noho na ɔkaae. Ekyir no ɔnye ne babanyin Helaman kyɛɛ ɔbɔfo no kɔkɔbɔ no. Alma tuu fo dɛ, “Mepɛ dɛ eyɛ dza meyɛɛ na ekaa hɛn egyanom hɔn ndɔmmum no; osiandɛ wɔkɔr nkowaasom mu, na obiara enntum anngye hɔn gyedɛ Abraham ne Nyankopɔn, nye Isaac ne Nyankopɔn, nye Jacob ne Nyankopɔn no nko; na nokwar, ɔgyee hɔn fii hɔn amandzehu mu.”10 Alma kãa no tsiabaa ara dɛ, “ medze mo werɛ ahyɛ no mu.”11 Alma tsee ase dɛ yɛrekaa ɔgye fi ndɔmmum mu na bambɔ wɔ “nsɔhwɛ nye ɔhaw biara,” mu no yɛba bohu Nyame na N’anohoba a ɔyɛ nokwar no.12
Hɛn mu kumabaa na yenya sũahu a ɔyɛ soronko dɛ Alma dze no, naaso hɛn nsakyeree botum ayɛ nwanwa dɛmara. Agyenkwa no bɔɔ anohoba tsetse ber bi dɛ:
“Mebɛma hom akoma fofor so, na medze sunsum fofor ahyɛ hom mu: na mibeyi ɔbo akoma efi hom honam mu … , na mama hom honam akoma.
“Na medze mo sunsum bɛhyɛ hom mu. …
“… Na hom bɛyɛ me man, na emi so mayɛ hom Nyankopɔn.’’13
Agyenkwa no a Ɔasoɛr no kãa mbrɛ nsakyeree yi besi ahyɛ ase kyerɛɛ Nephifo no. Ɔkyerɛɛ Ɔsor Egya ne nhyehyɛɛ mu fapem tsitsir ber a Ɔkãa dɛ:
“Na M’Egya somaa me ama wɔaama mo do asɛn mbeamudua no do wɔ sor; na wɔaama mo do wɔ mbeamudua no do wɔ sor ekyir no, ɔbɛma maatwe adasa nyinara ama moho. …
Na iyi ho ntsi na wɔmaa mo do sɛɛn sor; dɛm ntsi, ɔnam Egya no tum do mobɔtwe adasa nyina ama moho.”14
Ebɛnadze na obegya wo ama ɔaatwe wo aakɔ Agyenkwa no hɔ? Dwen Jesus Christ a Ogyaa Noho maa N’Egya ne pɛ, No konyimdzi wɔ owu do, Ɔfaa wo bɔn na mfomdo too Nankasa no do, Ɔgyee tum fii Egya no hɔ dɛ Ɔbɛyɛ ntamugyinafo ama wo, na No mponee a ɔkrɔn a Ɔyɛɛ maa wo no ho.15 Ana iyinom ndɔɔ sõ dɛ ɔtwe wo kɔ No hɔ? Oye ma me. Jesus Christ “Oebue N’abasa mu gyina hɔ, Ɔdze enyidado na pɛ dɛ Ɔbɛsã yarba, dze bɔn akyɛ, atsew [hɛnho], ahyɛ dzen, na Ɔasan [emi na ɔwo] ho.”16
Nokwar iyinom wɔdɛ ɔma hɛn akoma fofor na okenyan hɛn ma yɛsan mu yi dɛ yɛbɛkã Ɔsor Egya na Jesus Christ do. Naaso yɛwɔ akoma fofor mpo no bia “ɔnntɔ kã dɛ yekyinkyin, ɔnntɔ kã dɛ yefi Nyame a [yɛdɔ] No ne nkyɛn.”17 Ama yɛakõ etsĩa su yi no, yehia dɛ dabiara yɛdwendwen akyɛdze horow a yenya no nna mbrɛ woduae bae ho. Ɔhen Benjamin tuu fo dɛ: “Mebɛpɛ dɛ hom kaa, na hom kaa daa Nyame ne kɛseyɛ … nye ne papayɛ na ne penkyɛr wɔ … [hom] do.”18 Sɛ yɛyɛ dɛm a yɛfata ɔsor nhyira nwanwa horow no.
Yɛrodwendwen Nyame ne papayɛ na ehumbɔbɔr ho no bɔboa hɛn ma hɛn sunsum mu nkã-tse epegya. Nkyii, sunsum mu nkãtse a ɔakɔ sor no bɛma hɛn kwan ma ɔnam Sunsum Krɔnkrɔn no tum do yeehu nokwar a ɔwɔ adze nyina mu.19 Mormon Nwoma no nokwar ho dase; yeruhu dɛ Jesus Christ, nye hɛn ankorankor Agyenkwa na Pomfo; na yɛregye ato mu dɛ N’asɛmpa no wɔdze asan ananmu aba wɔ nda a odzi ekyir yinom mu no kã ho.16
Sɛ yɛkaa hɛn Ɔsor Egya na Jesus Christ Hɔn kɛseyɛ na dza Wɔayɛ ama hɛn a, yerummbu Hɔn adze biara kwa, dɛ mbrɛ Tom emmbu Jonathan n’akoma no adze biara kwa no. Enyigye na obu kwan do no, Tom kaa dabiara esian no a ɔdze nkwa ntoado brɛɛ no no. Hɛn enyigye mbordo mu dɛ yeehu dɛ wobotum agye hɛn nkwa ma yenya nkwagye ntowdo no, ohia dɛ yɛkaa dɛ nkwagye na nkwagye ntowdo no oduaa aboɔdzen kɛse do bae.21 Yebotum enya enyigye obu mu ara ber a yehu dɛ sɛ nkyɛ Jesus Christ nnkã ho a nkyɛ wɔdoom hɛn, mbom Ɔno ma yetum gye akyɛdze a ɔsõ sen Ɔsor Egya n’akyɛdze nyina no.22 Nokwar, obu yi ma hɛn kwan ma yenya “onnyiewiei nkwasɛm wɔ wiadze yi mu” na ewiei no yeenya “onnyiewiei nkwa … bɛkyebo enyimnyam no mpo” wɔ wiadze no a ɔreba no mu.23
Sɛ yɛdwen hɛn Ɔsor Egya na Jesus Christ Hɔn papayɛ ho a, hɛn awerɛhyɛmu wɔ Hɔn mu no yɛ kɛse. Hɛn mpaabɔ sesã osiandɛ yenyim dɛ Nyankopɔn nye hɛn Egya na yɛyɛ Ne mba. Nnyɛ Ne pɛ na yɛrohwehwɛ asesã, mbom dɛ yɛdze hɛn pɛ bata Ne dze ho na yenya nhyira a Ɔpɛ dɛ Ɔdze ma a ogyina dɛ yebebisa ama hɛnho do.24 Yɛpɛ dɛ yɛyɛ ahobrɛadze ara yie, yɛtsen ara yie, yegyina pintsinn ara yie, yɛyɛ dɛ Christ ara yie.25 Nsesã yinom ma yɛfata ɔsor nhyira binom so kã ho.
Ber a yehu dɛ ndzepa ho nyimdzee nyina fi Jesus Christ hɔ no , yɛdze hɛn gyedzi bedzi ndwuma pa wɔ binom do ara yie.26 Yebenya akokodur ber a yehyia ndwuma nye gyinabew horow a ɔyɛ dzen ara yie no.27 Yɛbɛhyɛ hɛn botae dzen dɛ yebesie ahyɛmudzi a yɛayɛ dɛ yɛbɛkã Agyenkwa no do no.28 Nyankopɔn no dɔ bɛhyɛ hɛn mã, yɛbɛpɛ dɛ yɛboa hɔn a wohia a yerummbua hɔn atsɛn, yɛbɔdɔ hɛn mba na yɛatsetse hɔn wɔ tseneneeyɛ mu, yebenya bɔnfakyɛ, na yeedzi dɛw daa.29 Iyinom nye yɛrekaa Nyame ne papayɛ na n’ehumbɔbɔr ho eduaba nwanwa no.
Naaso Agyenkwa no bɔɔ kɔkɔ dɛ, “Na biribiara nnyi hɔ a nyimpa nam do fom Nyankopɔn, anaa obiara nnyi hɔ a n’ebufuhyew dzɛw no do, kã hɔn a wɔnngye nnto mu dɛ ne nsa wɔ biribiara mu, na wonndzi ne mbrasɛm do.”30 Minngye nndzi dɛ yɛhorahora Nyame sɛ hɛn werɛ fir No a. Mbom, megye dzi dɛ No werɛ how papaapa. Onyim dɛ, ber a yɛrekaa No na Ne papayɛ no, kwan a yebodua do dze atwe abɛn No no, yɛdze akam hɛnho. Nkyii yennya No ma Ɔnntwe mmbɛn hɛn na nhyira horow pɔkyee no a Ɔdze abɔ anohoba no.31
Moto nsa frɛ hom dɛ dabiara hom nkaa Ɔsor Egya na Jesus Chirst Hɔn kɛseyɛ nye dza Wɔayɛ ama hom no. Hom mma Hɔn papayɛ ho adwen no ntakyer hom akoma a ɔrotɔ gon no mfam Hɔn.32 Hom ndwendwen Hɔn ayamuhyehye ho, na wɔdze sunsum mu nkã-tse mbordo behyira hom ma hom abɛyɛ tse dɛ Christ yie. Hom rodwen Hɔn tsema ho no bɔboa hom ma hom “[e]suo nokwar no mu dze [a]kɔ ewiei” kesi dɛ “wɔbɛgye hom akɔ sor” ma “wɔnye Nyankopɔn akɛtsena wɔ enyigye a onnyi ewiei da tsebea no mu.”33
Hɛn Ɔsor Egya, Ɔrekyerɛ No Dɔba no, see dɛ, “Tsie No!”34 Ber a idzi dɛm nsɛm yi do na etsie No no, kaa, enyigye na obu mu ara, dɛ Jesus dɔ dɛ Ɔdze dza wonnkotum dze asan aba no san ba; Ɔdɔ dɛ Ɔsã pirakur a innkotum asã; Ɔdɔ dɛ Osiesie dza woebubu no posoposo no;35 Osiesie nsisi biara a wɔdze edzi wo,36 na Ɔdɔ dɛ ɔsã hɔn a hɔn akoma ebubu yarba korakora.37
Ber a madwendwen akyɛdze horow a ofi hɛn Ɔsor Egya na Jesus Christ hɔ ba ho no, meebohu Hɔn dɔ a onnyikabea na hɔn ayamuhyehye a ɔbor ntseasee do no ma Ɔsor Egya ne mba nyinara no.38 Nyimdzee yi asakyer me, na ɔbɛsakyer ɔwo so. Jesus Christ ne dzin mu, amen.