Yerubue Ɔsor dze enya Mboa
Hom ma yɛmfa hɛn gyedzi wɔ Ewuradze Jesus Christ mu no nyɛ adze!
Ebɛn nhyiamu soronko na nwanwa na iyi ayɛ! Meda hom ase, adɔfo Laudy na Enzo. Hom gyinaa hɔ maa Asɔr no ne young women na young men anwanwafo no yie dodow.
Mo nuanom na nkyerɛbaa adɔfo, yɛatse Asɔr no ne Nsanananmu no ho asɛm dodow ndɛ—Asɔr kor noara a hɛn Agyenkwa, Jesus Christ kyekyeree wɔ Ne asaase som dwuma ber mu no. Dɛm Nsanananmu no hyɛɛ ase mfe 200 abasen kɔ no fefɛw ber yi ber Nyame Egya no na Ne ba, Jesus Chriat, puei akokɔwaba Joseph Smith do.
Mfe du wɔ enyido-adzehu soronko ekyir no, wɔfrɛɛ Nkɔnhyɛnyi Joseph Smith na beenum bi so dɛ Ewuradze n’Asɔr a ɔdze asananamu no n’abɔasefo.
Fi kuw kakrabaa a wohyiae wɔ Ebɔbira 6, 1830 mu no, wiadze nyina mu kuw ɔaba a no mu mba bor ɔpepe 16. Papa a Asɔr yi yɛ wɔ wiadze nyina dze boa adasa hɔn amandzehu na opegya adasamba no ayɛ atsenkã. Mbom no botae tsitsir nye dɛ ɔboa mbanyin, mbaa, na ebusua ebusua ma wodzi Ewuradze Jesus Christ n’ekyir, wosie Ne mbrasɛm, na wɔfata nhyira nyina no mu dza ɔsõ no—dɛm onnyiewiei nkwa a yɛnye Nyankopɔn na hɛn adɔfo.
Ber a yɛhyɛ dza osii no a wɔhyɛɛ ase afe 1820 ho fa no, ohia dɛ yɛkaa dɛ ber a yedzi Joseph Smith nyi dɛ Nyankopɔn no nkɔnhyɛnyi no, iyi nnyɛ Joseph Smith n’asɔr, anaa dɛ ɔyɛ Mormon n’asɔr. Iyi nye Jesus Christ N’Asɔr no. Ɔnoara na ɔhyɛɛ ɔmon wɔ dzin a wɔdze bɛfrɛ N’Asɔr dɛ: “Na dɛm na wɔbɛfrɛ m’asɔr wɔ nda a odzi ekyir no mu, Jesus Christ N’asɔr a ɔwɔ hɔ ma Nda a Odzi Ekyir Ahotseweefo no mpo.”
Maakasa dada wɔ ntsentsenee kwan a ohia wɔ kwan a yɛdze Asɔr no ne dzin frɛ no ho. Ofitsi dɛm ber no, beberee na ɔayɛ dze ayɛ ntsentsenee yi no. M’enyisɔ President M. Russell Ballard na Asomafo Duebien no hɔn Quorum no nyina, a wɔyɛ beberee dze edzi mbɔdzembɔ yinom enyim dɛmara dɛ hɔn a wɔka dza yɛrebɛhyɛase no a medze bɔto gua ewimbir yi no.
Asɔr banodzifo na ekuwekuw, hɔn a wɔkã ho no, asɔrmba ɔpepe—na binom so—afei hom dze Asɔr no ne dzin tsen no dzi dwuma. Wɔasesã Asɔr no ne style guide a nna wɔgye to mu no. Sesei no Asɔr no ne website tsitsir yɛ ChurchofJesusChrist.org. Oepetuw ɔkyerɛkwan ma email, domain edzin, na social media akwanhorow no. Sesei hɛn adwontokuw a yɛdɔ no yɛ “Tabernacle Adwontokuw a wɔwɔ Temple Square.’’
Yɛabɔ mbɔdzembɔ soronko yinom osiandɛ sɛ yeyi Ewuradze ne dzin fi N’Asɔr ne dzin mu, a yɛnngye enyim yi No fi mu dɛ hɛn som na hɛn abrabɔ no kutuw-do tsim. Sɛ yɛdze Agyenkwa no ne dzin to hɛn do wɔ enuma ber a, yɛgye to hɛn do dɛ yɛdze hɛn adwendwen na hɛn ndzeyɛɛ bɛgye dase dɛ, Jesus nye Christ no.
Dada no, mobɔɔ hom anohoba dɛ sɛ “yɛbɔ hɛn mbɔdzen ara yie dze Ewuradze N’Asɔr ne dzin a ɔtsen no san ba a,’’ Ɔno a Asɔr yi yɛ Nedze no “bohue No tum na nhyira egu Nda a Odzi Ekyir Ahotseweefo no hɔn etsir do a wonnhun ne nsaso pɛn.” Mesan kã dɛm anohoba no fofor ndɛ.
Dza ɔbɔboa hɛn ma yɛakaa No na yeehu Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no dɛ Ewuradze N’Asɔr, no, ɔyɛ hɛn enyigye dɛ yɛdze sɛnkyerɛdze bi bɔto gua a ɔbɛkyerɛ Jesus Christ ne bea tsitsir wɔ N’Asɔr mu.
Asɔr no ne dzin hyɛ kutuwdo-bo mu a ɔkã sɛnkyerɛdze yi ho. Jesus Christ nye kutuwdo-bo tsitsir no.
Sɛnkyerɛdze no ne finimfin no yɛ Thorvaldsen ne marble ɔbo Christus no honyi ngyinahɔmadze. Ɔkyerɛ Ewuradze a ɔasoɛr, tseasefo no retsen ne nsamu dze efua obiara a ɔbɛba No hɔ no.
Sɛnkyerɛdze mu ara, Jesus Christ gyina Aatse n’ase. Aatse no kaa hɛn Agyenkwa no a ɔasoɛr efi owumaa mu rupuei no wɔ nda a otsĩa ebiasa wɔ Ne Mbeamuduabɔ ekyir no.
Ɔwɔ dɛ hɛn mu pii hu sɛnkyerɛdze yi, dɛ mber tsentsen no yɛdze asɛmpa a wɔdze asan ananmu no abata Christ ɔtseasefo, a ɔasoɛr no ho.
Afei yɛdze sɛnkyerɛdze no bedzi dwuma dɛ enyiwa do ahyɛnsewdze ama Asɔr no mbuukuu, amandzɛɛbɔ, na dza osisi wɔ mu. Ɔbɔbɔ hɛn nyina nkaa dɛ iyi nye Agyenkwa N’Asɔr na dza hɛn nyina yɛyɛ, dɛ N’Asɔrmba no, tsim Christ na N’Asɛmpa no do.
Afei, mo nuanom na nkyerɛbaa adɔfo, ɔkyena yɛ Menakɔnson Kwesida, dɛ mbrɛ Elder Gong akyerɛkyerɛ mu yie no. Nkyii yɛbɛhɛn dapɛn soronko mu a ɔdze kesi Easter do. Dɛ Jesus Christ n’edziekyirfo no, a yɛtse nda a COVID-19, wɔ beebiara no ama wiadze nyina no ayɛ begyabegya no, ma mma yɛnnkã Christ ho asɛm anaa yɛmmbɔ ho asɛmpa dawur anaa yɛmmfa sɛnkyerɛdze nndzi dwuma a ogyina hɔ ma Christ ara.
Hom ma yɛmfa hɛn gyedzi wɔ Ewuradze Jesus Christ mu no nyɛ adze!
Dɛ mbrɛ hom nyim no, Asɔrmba sie da kor wɔ bosom biara mu akɔnkye da no.
Akɔnkye ho nkyerɛkyerɛ no yɛ tsetse asɛm. Bible mu ekunyin fi tsetse no dze dzii dwuma. Moses, David, Ezra, Nehemiah, Esther, Isaiah, Daniel, Joel, na dodowara kyeer kɔm na wɔkãa akɔnkye ho nsɛm. Isaiah ne nkyerɛwee mu no, Ewuradze kãa dɛ: “Ana nnyɛ iyi nye mbuadadzi a masan mu eyi? dɛ hom bɛsansan emumuyɛ apɔw no, wɔapopor kɔndua nhoma no, na wɔama hɔn a wɔatseetsee hɔn no, wɔafaa hɔnho edzi akɔ?’’
Ɔsomafo Paul tuu Ahotseweefo a wɔwɔ Corinth no fo dɛ “wongyaa hɔnho mu mma akɔnkye na mpaabɔ.’’ Agyenkwa Nankasa paa mu kãa dɛ ndzɛmba bi wɔ hɔ a “mmfir edzi gyedɛ ɔnam asɔr ɔnye mbuada do.’’
Ɔnnkyɛree na mekãa no wɔ social media video mu dɛ “dɛ meyɛ oduryɛfo na datser no, mowɔ enyisɔ kɛse ma adatserfo a wɔawea, abɔdze enyansafo, na hɔn nyina a wogudo reyɛ edwuma dze esiw COVID-19 n’ano ma ɔnntserɛw no.’’
Afei, dɛ Jesus Christ N’Asɔr a ɔwɔ hɔ Nda a Odzi Ekyir Ahotseweefo ne President na Jesus Christ ne Ɔsomafo no, minyim dɛ Nyankopɔn “wɔ tum nyina, nye nyansa nyina, nye adze nyina mu ntseasee; onyim adze nyina, na Ɔyɛ mbɔbɔrhunyi, na ɔma hɔn a wonu hɔnho na wɔgye ne dzin dzi no nya nkwagye mpo.’’
Ntsi no, wɔ atseetsee ber no bun mu, dɛ sɛ yarba tra kɔ beebiara a, dza oye ara ma hɛn dɛ yɛyɛ nye dɛ yɛfrɛ hɛn Ɔsor Egya na Ne Ba—Ayarsã Wura no—ma wɔkyerɛ Hɔn tum nwanwa no nhyira asaase do nyimpa.
Me video asɛm mu no, motoo nsa frɛ obiara dɛ wɔmbɔ mu ma yɛndzi mbuada wɔ Kwesida, Ebɔw 29, 2020. Ebia hɔn mu dodow hun video no na wodzi mbuada no. Ebia binom annyɛ. Yɛda ho hia mboa fi sor sesei.
Ntsi anafua yi, mo nuanom na nkyerɛbaa adɔfo, dɛ mbrɛ Mosiah ne mbambanyin yɛe no, hɔn a wɔdze hɔnho ma akɔnkye na mpaabɔ no, na dɛ yɛdze akã hɛn Ebɔbira 2020 wiadze mfɛndzanan ehyiadzi ho no, mereserɛ wiadze mfɛndzanan akɔnkye bio so. Hɔn a hɔn apɔwmudzen bɛma ho kwan no, hom ma yɛnkyer kɔm, yɛmbɔ mpaa, na yɛmfa hɛn gyedzi mbɔmu kor so bio. Mpaabɔ mu ara hom mma yɛntotɔ nserɛ mboa mmfi wiadze mfɛndzanan yardɔm yi ho.
Moto nsa frɛ obiara, hɔn a wɔnnyɛ hɛn asɔrmba kã ho, dɛ wɔnkyer kɔm na wɔmbɔ mpaa Good Friday, Ebɔbira 10, ama dɛm yardɔm a ɔwɔ hɔ sesei no akɔ famu, ayarhwɛfo no enya bambɔ, sikasɛm ahyɛ dzen, na abrabɔ akɔdo.
Yesi dɛn dzi mbuada? Edziban ebien anaa mber dɔnhwer 24 yɛ ntɔyɛe. Naaso ɔwɔ dɛ isusu dza ɔbɛyɛ afɔrbɔ ama wo, ber a ekaa afɔrbɔ a ɔkrɔn no a Agyenkwa no yɛe ma wo. Hom mma yɛmbɔ mu wɔ ntotɔserɛ na ayarsa mma wiadze nyina.
Good Friday bɛyɛ da a odzi mu no dɛ yebenya hɛn Ɔsor Egya na Ne Ba ma woetsie hɛn!
Enuanom na nkyerɛbaa adɔfo, mekyerɛ mo dɔ no bun mu dɔ, a me dase wɔ edwuma a yɛreyɛ no krɔnkrɔnyɛ kã ho no ma hom. Iyi nye Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo Ogyina ne tsir na Ɔkyerɛ biribiara a yɛyɛ no. Minyim dɛ Obobua No nkorɔfo hɔn ntotɔserɛ. Megye ho dase wɔ Jesus Christ ne dzin krɔnkrɔn no mu, amen.