Nyikyerɛ a Nkɔnhyɛfo Kɔ Do Nya ho Nhyira na Ankorankor Nyikyerɛ a ɔma Hɛn Abrabɔ Akwankyerɛ.
Yeenya nyikyerɛ a wɔkɔ do nya no na yegu do renya dua akwan horow no a Ewuradze ahyehyɛ ato hɔ no.
Ndɛ merebɛkasa afa nyikyerɛ a ɔkɔ do a nkɔnhyɛfo nya na ankorankor nyikyerɛ a yɛkɔ do nya dze ma hɛn abrabɔ kwankyerɛ ho.
Ɔtɔfabi a yenya nyikyerɛ a yennyim Ewuradze no botae mpo. Ɔkã mber kakra ara ma Jeffrey R. Holland wɔafrɛ no ma ɔabɛyɛ Ɔsomafo wɔ Obiradzi afe 1994 mu no, menyaa nyikyerɛ sũahu dɛɛdɛw bi dɛ wɔbɛfrɛ no. Nna meyɛ mantɔw mu ananmusinyi na munntum nnhu siantsir a wɔbɛma dɛm nyimdzee no. Mbom nna yɛyɛ adamfo ber a yɛyɛ mberantsɛ asɛmpasomafo wɔ Ngyeresi Aborɔkyir wɔ mfe 1960 ahyɛse mu no, na nna mowɔ ɔdɔ kɛse ma no. Musuu dɛ mo sũahu no yɛ adɔyɛ mbɔbɔrhu ma me. Ndaansa yi mu no, madwen ho dɛ nna Ewuradze resiesie me ma mabɛyɛ Duebien no hɔn mu kakraba ama asɛmpasomafo adamfo soronko bi a nna ɔyɛ m’adamfo kakraba ber yɛyɛ mberantsɛ asɛmpasomafo no.1 Ɔtɔfabi a, mobɔ asɛmpasomafo mberantsɛ no kɔkɔ dɛ wɔnyɛ ayamuyie nkyerɛ hɔn adamfo nkakraba no na wonnyim dabiarada ber a wɔbɛyɛ hɔn adamfo mpanyin.
Mowɔ dasegye a osi pi dɛ Asɔr yi a wɔdze asan ananmu aba no hɛn Agyenkwa, Jesus Christ na Odzi ne kan. Onyim nyia Ɔbɛfrɛ no No Somafo na mber a Ɔdze bɛfrɛ hɔn. Onyim mbrɛ Obesi besiesie No Somafo panyin no ma wɔabɛyɛ nkɔnhyɛnyi na Asɔr no ne President.
Wɔayɛ hɛn nhyira dɛ anapa yi yɛatse hɛn nkɔnhyɛnyi dɔfo, President Russell M. Nelson, a ɔrema ne mfe ahaebien dawurbɔ nwanwa ma wiadze a ɔfa Jesus Christ asɛmpa no ne mãhyɛ ne Nsan-ananmu ho.2 Dawurbɔ abɔsõ yi President Nelson dze ato gua yi ama wɔayɛ pefee dɛ asɔr yi dan ne farbaa, asetsena, na kwankyerɛ ma ndaamba no wɔ nyikyerɛ a wɔkɔ do nya ho nhyehyɛɛ do. Dawurbɔ fofor yi kyerɛ Egya dɔfo Ne mba nye ne nkitahodzi.
Mber a abɛsen mu no, President Spencer W. Kimball kãa me nkã-tse a mowɔ no ndɛ yi. Ɔsee dɛ, “Ndzɛmba nyina a, dɛ … otwar dɛ yenya [ho] enyisɔ kɛse nye dɛ ɔsorsor ebue na dɛ Jesus Christ N’asɔr a wɔdze asan ananmu aba no wɔatow no wɔ nyikyerɛ botan fapem do. Nyikyerɛ a wɔkɔ do nya no nye Ewuradze tseasefo na hɛn Agyenkwa Jesus Christ n’asɛmpa no no nkwa-ahoma ankasa no.”3
Nkɔnhyɛnyi Enoch hun hɛn nda a yɛtse mu yi mu. Ewuradze daa no edzi kyerɛɛ Enoch emumuyɛdze kɛse a ɔbɛtahye ho na ɔhyɛɛ nkɔm wɔ “amandzehu kɛse” a ɔbɛba ho. Naaso, Ewuradze bɔɔ ho anohoba dɛ, “Mbom mo nkorɔfo no dze mobɔkora hɔn do.”4 Na tseneneeyɛ na mebɛma efi sor aba famu; nokwar na mebɛma efi asaase mu epue, ma wɔagye dase wɔ nyia me Woo no Kortoo no noho.”5
President Ezra Taft Benson dze tum kɛse kyerɛkyerɛɛ dɛ Mormon Nwoma no, hɛn nyamesom ho botantsim no, fii asaase mu puei dze ahyɛ dza Ewuradze kãa kyerɛkyerɛɛ Enoch no mã. Egya na Ne Ba na abɔfo na nkɔnhyɛfo a wopuei Nkɔnhyɛnyi Joseph Smith do no “ɔsor na ɔsomaa hɔn dɛ wɔmfa tum no a ohia ma wɔdze ahenman no bɛsan ananmu aba no mbra.”6
Nkɔnhyɛnyi Joseph Smith nyaa nyikyerɛ ntoatoado. No mu binom wɔakã ho asɛm wɔ ehyiadzi yi mu. Nyikyerɛ dodowara Nkɔnhyɛnyi Joseph nyae no wɔakora do wɔ Nkyerɛkyerɛ na Ahyɛmudzi mu ama hɛn. Asɔr no n’asɛmpa gyinapɛn nyina no Ewuradze n’adwen na ne pɛ a Ɔdze ma hɛn no wɔ berano a odzi ewiei no wɔ mu.7
Dza ɔkã kyerɛwsɛm fapem kɛse yinom ho nye dɛ, wɔdze nyikyerɛ a nkɔnhyɛfo atseasefo kɔ do nya no ehyira hɛn. Nkɔnhyɛfo yɛ “Ewuradze ananmusifo a, wɔwɔ tumdzi dɛ wɔkasa ma No,”8
Nyikyerɛ mu binom ho hia paapapaa, na binom so tow hɛn ntseasee wɔ nokwar krɔnkrɔn a ohia tsitsir ho na wɔma hɛn kwankyerɛ ma hɛn nda yi mu.9
Yɛwɔ enyisɔ kɛse ma President Spencer W. Kimball dɛ ɔtraa asɔfodzi na temple nhyira horow mu maa Asɔr no mu asɔrmba mbanyin nyina a wodzi mu no wɔ Ɔbiradzi, afe 1978 mu.10
Menye Duebien no a nna wɔwɔ hɔ na wɔkã ho ber a wonyaa dɛm nyikyerɛ a ɔsom bo no asom. Hɔn mu kor biara, wɔ ankorankor nkɔmbɔ dzi mu, esi no pi dɛm koryɛ sunsum mu kwankyerɛ ndamyɛ mu na President Kimball nye hɔn nyae. Hɔn mu pii kãa dɛ ɔno nye nyikyerɛ a ɔyɛ ndam ara yie a nna woenya no pɛn anaa dɛm ofi ber no.11
Hɛn a sesei yɛrosom wɔ Asomafo Duebien no hɔn Quorum no woehyira hɛn dɛ nyikyerɛ horow a ohia ara yie edua ndaasa yi mu nkɔnhyɛfo no mu.12 President Russell M. Nelson ayɛ Ewuradze n’ananmusinyi a wɔama no tum nkankara ɔfa nyikyerɛ horow a ɔbɔboa ebusua ebusua ma wɔakyekyer gyedzi krɔnkrɔn bea wɔ hɔn efiefi mu, wɔboaboa Israel wɔabɔ apetse wɔ ntwamutam n’afã ebien no, na woehyira asɔrmba a woenya hɔn endowment no wɔ temple krɔnkrɔn ayɛdze ho.
Ber a nsesã a ohia ara yie a ɔbɔboa hɛn efiefi no wɔbɔɔ ho dawur wɔ Ɔbɛsɛ wiadze mfɛndzanan ehyiadzi mu no, me gyee dase “dɛ President a Odzi Kan na n’Apamfo na Asomafo Duebien no hɔn Quorum Abaguafo hɔn mpɛnsampɛnsam mu wɔ temple mu no, … hɛn nkɔnhyɛnyi dɔfo totɔe serɛɛ Ewuradze wɔ nyikyerɛ ho no … , obiara nyaa pisi a ɔyɛ ndam.”13
Dɛm ber no, nyikyerɛ binom a ɔfa temple krɔnkrɔn ho no nna nsa akã naaso yɛammbɔ ho dawur anaa yɛammfa edzi dwuma.14 Kwankyerɛ yi hyɛɛ ase dɛ ankorankor nkɔnhyɛ nyikyerɛ a President Russell M. Nelson nyae na awɔse pisi ndamyɛ mu ma hɔn a wɔkã dwumadzi no ho. President Nelson nye nkyerɛbaa yinom a wɔhwɛ Relief Society do, Young Women, na Primary ekuw do no kãa ho. Temple mu no, kwankyerɛ a odzi ewiei a ɔbaa President a Odzi Kan na n’Apamfo na Asomafo Duebien no hɔn Quorum do no nna ɔyɛ sunsum mu adze kɛse a ɔyɛ ndam. Hɛn nyina yehunii dɛ yenya Ewuradze N’adwen, Ne pɛ, na yɛatse Ne ndze.15
Mekã no ahobrɛadze mu dɛ yeenya nyikyerɛ a wɔkɔ do nya no na yegu do renya dua akwan horow no a Ewuradze ahyehyɛ ato hɔ no. Megye dase dɛ dawurbɔ fofor no a President Nelson maa no anapa yi yɛ nyikyerɛ a obehyira nkorɔfo nyina.
Yɛtsen Nsato mu ma Obiara dɛ Ɔbɛmee wɔ Ewuradze n’Edzidzi Pon ho
Yɛpaa mu kã hɛn akoma mu pɛ dɛ yɛnye hɔn a hɔn dasegye nye hɔn ridzi aper no, hɔn a wɔnntaa mmba asɔr, anaa woyii hɔn edzi fii Asɔr nkyerɛwee mu no bɛsan akã abɔ mu. Yɛpɛ dɛ yɛnye hom mmee “wɔ Christ ne nsɛm” wɔ Ewuradze n’edzidzipon ho, dze esũa ndzɛmba nyina a ɔsɛ dɛ yɛyɛ.16 Yehia hom! Asɔr no hia hom! Ewuradze hia hom! Hɛn akoma mu mpaabɔ nye dɛ hom bɛkã hɛnho ma yɛasɔr wiadze Agyenkwa no. Yenyim dɛ wɔafom hom mu binom, wɔabɔ hom etsirmɔdzen, anaa wɔakyerɛ hom suban bi a ɔnnyɛ Christ su. Yenyim so dɛ hom mu binom enya hom gyedzi ho ɔhaw a yennkohu, yɛnnkɛtse ase, anaa yennkotum esiesie.
Hɛn asɔrmba anokwafo akwabran mu binom hɔn gyedzi ahaw hɔn mber kakra. Modɔ W. W. Phelps a, ɔpoow Asɔr no na ɔgyee dase tsiaa Nkɔnhyɛnyi no, Joseph Smith wɔ Missouri asɛndzibea no ho nsɛm nokwar a osii no. Onuu noho ekyir no, ɔkyerɛɛw Joseph, “Minyim me gyinabew, inyim, na Nyame nyim, na mepɛ dɛ wɔgye me nkwa sɛ m’anyɛnkofo bɔboa me a.”17 Joseph dze kyɛɛ no, dze no sanee too edwuma no mu, na ɔdɔ mu ara ɔkyerɛɛw dɛ, “Anyɛnkofo ahyɛse no ayɛ anyɛnkofo bio ekyir no.”18
Enuanom na nkyerɛbaa, mbrɛ wo gyinabew tse biara no, yɛserɛ hu dɛ Asɔr no na asɔrmba no bɛyɛ wo etuu!
Ankorankor Nyikyerɛ a ɔbɛma Hɛn Abrabɔ Kwankyerɛ
Akorankor nyikyerɛ wɔ hɔ ma hɔn nyina a wɔhwehwɛ kwankyerɛ fi Ewuradze hɔ ahobrɛadze mu no. Ohia tse dɛ nkɔnhyɛ nyikyerɛ ara pɛr. Ankorankor, sunsum mu nyikyerɛ a ofi Sunsum Krɔnkrɔn no hɔ no nsunsuando ama ɔpepe renya dasegye a ohia dɛ wɔdze numa hɔn na wosi hɔn pi dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrmba.
Ankorankor nyikyerɛ yɛ nhyira kɛse a yenya no hɛn enuma ekyir ber no “Sunsum Krɔnkrɔn no a [ye]benya no aatsew [hɛn]ho.”19 Mekaa sunsum mu nyikyerɛ soronko bi a minyae a nna medzi mfe 15 no. Mo nuabanyin a ɔsombo no nna ɔrohwehwɛ kwankyerɛ efi Ewuradze hɔ wɔ mbrɛ obesi ebua hɛn egya dɔfo, a nna ɔmmpɛ dɛ mo nua no bɔkɔ asɛmpakã. Medze nokwar apɛdze bɔɔ mpaa na menyaa asɛmpa no nokwar ho ankorankor nyikyerɛ.
Sunsum Krɔnkrɔn no n’Asɛdze
Ankorankor nyikyerɛ ne fapem nye sunsum mu nokwar horow a yenya fi Sunsum Krɔnkrɔn no hɔ.20 Sunsum Krɔnkrɔn no yɛ oyikyerɛfo na ɔgye nokwar nyina ho dase, nkankara dza ɔfa Agyenkwa noho. Sunsum Krɔnkrɔn no nnkã ho a, nkyɛ yennkotum ehu dɛ Jesus nye Christ no. N’asɛdze a ohia papaapa nye Ɔbɛgye Egya no na Ɔba no na Hɔn abɔdzin na Hɔn enyimnyam ho dase.
Sunsum Krɔnkrɔn no botum enya nhyɛdo kɛse wɔ obiara do.21 Nhyɛdo yi mmba aber biara gyedɛ woenuma onyia no na ɔagye Sunsum Krɔnkrɔn akyɛdze no. Sunsum Krɔnkrɔn no som so dɛ ananmusinyi a ɔtsew ho wɔ nnuho na bɔnfakyɛ anamɔn kwan no do.
Sunsum no dua akwan nwanwa do dzi nkitaho. Ewuradze kyerɛɛ mu dɛɛdɛw dɛ:
“Na, hwɛ, mubodua Sunsum Krɔnkrɔn no a ɔbɛba wo do na ɔabɛtsena w’akoma mu no do akã akyerɛ wo wɔ w’adwen nye w’akoma.”
“Afei, hwɛ, iyi nye nyikyerɛ sunsum no.”22
Ne nhyɛdo no botum aba ahoɔdzen nwanwa mu dze, naaso ɔtaa dɛ ɔba dzinn dɛ ndze tseabaa bɔkɔɔ.23 Mfatoho pii wɔ kyerɛwsɛm no mu a ɔfa mbrɛ Sunsum no nya nhyɛdo wɔ hɛn adwen mu, a ɔdze asomdwee ho nsɛm hyɛ hɛn adwen mu,24 ɔhyɛ hɛn adwen do,25 obobue hɛn adwen mu,26 na ɔsoma ndze a ɔba hɛn adwen mu mpo.27
Iyinom kã nkyerɛkyerɛ a osiesie hɛn ma yɛgye nyikyerɛ ho:
-
Yɛrobɔ mpaa enya sunsum mu kwankyerɛ. Obu na ahobrɛadze mu ara no ohia dɛ yɛhwehwɛ na yebisa28 na yenya abotar na yegyaa hɛnho mu ma.29
-
Ereyɛ Nkenyan ho Ahosiesie Iyi hwehwɛ dɛ hɛn ndzeyɛɛ nye Ewuradze ne nkyerɛkyerɛ saa na yedzi Ne mbrasɛm do.
-
Yeridzi sacrament no emudzi mu. Ber a yɛreyɛ dɛm no, yɛgye dase na yɛnye Nyankopɔn dzi ahyɛmu dɛ yɛbɛfa Ne Ba krɔnkrɔn ne dzin ato hɛn do na yɛakaa No na yedzi Ne mbrasɛm do.
Nhyehyɛɛ yinom siesie hɛn ma yɛgye, yehu, na yedzi Sunsum Krɔnkrɔn no ne nkenyan na no kwankyerɛ do. Iyi kã ho “asomdwee ndzɛmba … ɔdze enyigye ba, [na] … onnyiewiei nkwa ba.”30
Sɛ yɛtaa sũa hɛn kyerɛwsɛm na asɛmpa no nokwar na yɛdwendwen ho wɔ hɛn adwen mu no, ɔboa hɛn sunsum mu ahoboaboa ara yie wɔ kwankyerɛ no a yɛhwehwɛ no. Hom nkaa dɛ hom benya abotar na woenya awerɛhyɛmu wɔ Nyame ne mber pa mu. Ewuradze a Onyim adze nyina na Ɔma hɛn kwankyerɛ ber a “Ɔgye enyim san mu yi dɛ ɔbɛkyerɛ hɛn adze.”31
Nyikyerɛ wɔ hɛn Ɔfrɛ na Dwumadzi ahorow mu
Sunsum Krɔnkrɔn no so bɛma nyikyerɛ wɔ hɛn ɔfrɛ na dwumadzi horow mu. Meehu dɛ, sunsum mu kwankyerɛ dodowara ba ber a wɔ hɛn asɛdze ne nyɛe mu no, yɛrobɔ mbɔdzen ehyira binom no.
Mutum kaa dɛ meyɛ bishop kumabaa no menyaa ɔfrɛ a no mu yɛ dzen fi awarfo binom hɔ a nna aka mber kakra ara ma makɔfow wimuhɛn akɛyɛ edwuma bi. Mototɔe serɛɛ Ewuradze ansaana worubodu no mbrɛ mebesi botum ehyira hɔn. Woyii nsɛnhia no no su na mbuae a ɔsɛ dɛ medze ma no dze kyerɛɛ me. Dɛm nyikyerɛ kwankyerɛ no maa mo kwan ma meyɛɛ me ɔfrɛ dɛ bishop asodzi krɔnkrɔn no wɔ kansa mber kakraba a aka no mpo. Bishopfo a wɔwɔ wiadze nyina no nye kyɛ sũaho kor yi ara. Meyɛ stake president no, mennya nyikyerɛ a ohia kɛse nko, mbom menyaa ankorankor nyikyerɛ ntsentsenee a nna ohia ma Ewuradze no botae aba mu.
Mehyɛ hom nkuran dɛ hɛn mu kor biara botum enya nyikyerɛ kwankyerɛ ber a yedzi dwuma ahobrɛadze mu wɔ Ewuradze no wenyin ture no mu. Kwankyerɛ ne kɛse noara fi Sunsum Krɔnkrɔn hɔ ba. Ɔtɔfabi a na wɔ botae horow bi ho ntsi, ofi Ewuradze hɔ akɔntsen ba. Mankasa megye dase dɛ iyi yɛ nokwar. Kwankyerɛ ma Asɔr no, ne nyina no, Asɔr no ne President na nkɔnhyɛnyi hɔ ba.
Hɛn, dɛ yɛyɛ ndɛ mber yi mu Asomafo no, enya ndzinoa dɛ yɛnye hɛn sesei nkɔnhyɛnyi, President Nelson yɛ edwuma na yɛnye no tu kwan. Mekã dza Wilford Woodruff kãa faa Nkɔnhyɛnyi Joseph Smith ho no; yɛ nokwar pɛpɛɛpɛ fa President Nelson ho. Mehu “Nyame no Sunsum Ɔnye no ridzi dwuma, na Jesus Christ nyikyerɛ a ɔba no hɔ na dɛm nyikyerɛ horow no ɔreba mu no.”32
M’ahobrɛadze ntotɔserɛ mu ndɛ nye dɛ hɛn mu kor biara bɔhwehwɛ nyikyerɛ a ɔkɔ do ba dze ama hɛn abrabɔ mu akwankyerɛ na yedzi Sunsum no do ber a yɛsom Nyame Egya no wɔ hɛn Agyenkwa Jesus Christ, ɔno a megye no ho dase wɔ Jesus Christ ne dzin no mu, amen.