Enyimnyam Ɔfrɛ Tsitsir Bi

Joy D. Jones ne Kasaa

Wiadze Mfɛndzanan Primary President

Dɛ mbaa agyedzifo no, yebotum enya nokwar ho fapem efi Nkɔnhyɛnyi Joseph Smith no suahu ahorow no mu a ɔma hɛn nhumu wɔ yerinya hɛnara hɛn nyikyerɛ mu.

Ɔyɛ me enyisɔ dɛ ndɛ medze m’asɛm begyina mbaa hɔn asɛdze a ɔkɔ do wɔ Nsaananmu no mu do. Ɔyɛ pefee dɛ abakɔsɛm nyina mu no mbaa ekitsa dzibew a ɔda edzi yie wɔ hɛn Ɔsor Egya ne nhyehyɛɛ mu. President Russell M. Nelson kyerɛkyerɛɛ dɛ, “Yennkotum esusu nhyɛdo a … mbaa wɔ, nnyɛ wɔ hɔn ebusua ebusua nko do mbom ɔsan so wɔ Ewuradze N’Asɔr do dɛ, nyernom, enãnom, nanaanom; dɛ nkyerɛmbaa na auntfo; dɛ akyerɛkyerɛfo na baanodzifo; na tsitsir ara dɛ gyedzi ho bambɔfo anokwafo.’’¹

Tsetse Relief Society no wɔ Nauvoo, mfe 178 abasen kɔ no, Nkɔnhyɛnyi Joseph Smith tuu nkyerɛbaa no fo dɛ “wɔmbɔ bra ma ɔmfata [hɔn] ndzinoa horow.’’² Hɔn fasusu kyerɛkyerɛ hɛn adze ndɛ. Wɔyɛɛ kor dzii nkɔnhyɛnyi ne ndze do na wɔdze gyedzi pintsinn wɔ Jesus Christ mu tsenaa ase ber a wɔboae ma wɔtow fapem no a sesei yegyina do no. Nkyerɛbaa, woedu hɛn do. Yɛwɔ ɔsoma krɔnkrɔn fi Ewuradze hɔ, na hɛn nokwar mboa soronko no hia tsitsir.

President Spencer W. Kimball kyerɛkyerɛɛ mu dɛ: “Ebɛyɛ ɔbaa tseneneenyi wɔ mber a odzi ekyir wɔ asaase yi do, ansaana hɛn Agyenkwa ne mbae a otsĩa ebien no, yɛ ɔfrɛ tsitsir bi. Ɔbaa tseneenyi n’ahoɔdzen na nhyɛdo ndɛ no botum ayɛ mbɔho du wɔ ma nkyɛ obotum ayɛ wɔ ahotɔ mber mu.’’³

Tse dɛmara na President Nelson aserɛ dɛ: “Mototɔ serɛ me nkyerɛbaa wɔ Asɔr [no] mu … dɛ hom ntu anamɔn mbra kan! Hom ngyina hom sibew a ɔfata no wɔ hom fie, hɔn sɔn mu, na Nyankopɔn ahenman mu—nkyɛn dza hom ayɛ no dadaw no.’’⁴

Ɔnnkyɛree no, ɔyɛɛ me adom, a Primary mbofra kuw kã ho no, ma yɛnye President Russell M. Nelson hyiae wɔ Smith ebusua fie ne nsɛdo no wɔ Palmyra, New York. Hom ntsie ber a hɛn nkɔnhyɛnyi kyerɛkyerɛ mbofra no dza wobotum ayɛ dze etu anamɔn akɔ kan.

Akyerɛbaa Jones “mereper ehu sɛ ewɔ asɛmbisa bi a epɛ a ibotum ebisa President Nelson a. Enye nkɔnhyɛnyi no tsena ha. Ana biribi wɔ hɔ a nna aber nyina no apɛ dɛ ibisa nkɔnhyɛnyi a? Nyew, Pearl.’’

Pearl: “Ana ɔyɛ dzen dɛ ebɛyɛ nkɔnhyɛnyi a? Ana ɔtse dɛ. nnyi, adagyer koraa?’’

President Nelson: “Nyew ɔyɛ dzen. Adzebiara a ɔfa ho dɛ ebɛyɛ tse dɛ Agyenkwa no yɛ dzen. Mfatoho, mber a nna Nyankopɔn pɛ dɛ ɔdze Mbra Du no ma Moses no, henfa na Ɔkãa kyerɛ Moses dɛ ɔnkɔ? Bepɔw bi no sor, Bepɔw Sinai do. Ntsi no Moses nantsewee kɔr dɛm bepɔw no sor kɛgyee Mbra Du no. Afei, nkyɛ Ɔsor Egya botum akã dɛ,” Moses, ɔwo hyɛ ase wɔ hɔ no, na Mebɛhyɛ ase wɔ ha, na Mebehyia wo kwan ne finimfin.’’ Oho, Ewuradze dɔ mbɔdzembɔ, osiandɛ mbɔdzembɔ dze akatua ba a sɛ ɔnnkã ho a, onntum mmba. Mfatoho, ana hom esũa sianku bɔ da?’’

Mbofra: “Nyew.’’

Pearl: “Musũa violin bɔ.’’

President Nelson: “Na hom kɔ do sua a?’’

Mbofra: “Nyew.’’

President Nelson: “Sɛ hom annkɔ do ennsũa a ebɛnadze besi?’’

Pearl: “Wo werɛ fir.’’

President Nelson: “Nyew, nnkɔ kan, anaa? Ntsi nyiano no yɛ nyew, Pearl. Ɔgye mbɔdzembɔ, edwumadzen, adzesũa beberee, na onnwie da. Dɛm no ye! Dɛm no ye, osiandɛ, aber nyina na yɛrokɔ kan. Abrabɔ no mpo a ɔtoa do mu no yɛrokɔ kan.’’

President Nelson no mbuae ma mbofra yinom a wɔsom bo no kɔ ma hɛn mu kor biara. Ewuradze dɔ mbɔdzembɔ, na mbɔdzembɔ dze akatua ba. Yɛwɔw do sũa yɛ. Aber nyina na yɛrokɔ kan wɔ mber dodow a yɛreper dɛ yebɛkã Agyenkwa no do.⁵ N’enyi nnda emudziyɛ do ndɛ. Yɛwɔw do fow hɛn ankorankor Bepɔw Sinai. Dɛ mber a woetwa mu no, nokwar dɛ, hɛn akwantu no gye mbɔdzembɔ, edwuma dzen, na adzesũa, naaso hɛn kankɔ ho enyimpisi no dze onnyiewiei akatua ba.⁶

Ebɛnadze bio na yesũa fi Nkɔnhyɛnyi Joseph Smith na Enyido-adzehu a Odzi Kan na no mu a ɔfa mbɔdzembɔ, edwuma dzen, na adzesũa ho? Enyido-Adzehu a Odzi Kan no ma hɛn akwankyerɛ wɔ hɛn asɛdze soronko a ɔkɔ do no mu. Dɛ mbaa agyedzifo no, yebotum enya nokwar ho fapem efi Nkɔnhyɛnyi Joseph Smith no suahu ahorow no mu a ɔma hɛn nhumu wɔ yerinya hɛnara hɛn nyikyerɛ mu. Mfatoho:

• Yɛyɛ edwuma wɔ nkõdzen horow ase.

• Yɛkɔ kyerɛwsɛm no mu dze nya nyansa dzi dwuma

• Yɛkyerɛ hɛn gyedzi na awerɛhyɛmu wɔ Nyankopɔn mu.

• Yemia hɛn tum mu dze totɔ serɛ Nyankopɔn dɛ Ɔmboa hɛn ma yɛnsɛe abɔnsam ne nhyɛdo bɔn no.

• Yɛdze hɛn akoma n’apɛdze ma Nyankopɔn.

• Yetsim wɔ Ne kan no a ɔweɔn hɛn abrabɔ nsanmuyi no do na ɔma hɛn ahomgye sɛ yɛkɔ No hɔ a.

• Yehu dɛ Onyim hɛn mu kor biara ne dzin na Ɔwɔ ankorankor asɛdze ma hɛn dɛ yɛbɛhyɛ no mã.⁷

Dza ɔkã ho no, Joseph Smith dze nyimdzee dɛ yɛwɔ ndaamba krɔnkrɔn na onnyiewiei bo yɛsom no saan ananmu bae. Osiandɛ yɛnye hɛn Ɔsor Egya wɔ dɛm nkitahodzi no ntsi, megye dzi dɛ N’enyi da kwan dɛ yebenya nyikyerɛ efi No hɔ.

Ewuradze kyerɛkyerɛɛ Emma Smith dɛ “gye Sunsum Krɔnkrɔn no,’’ sũa pii, “fa wiadze ndzɛmba to nkyɛn, … hwehwɛ ndzɛmba a ofir bea pa,” na “suo ahyɛmu a [nye] Nyame edzi no mu dzen.⁸ Adzesua hia tsitsir ma kankɔ, tsitsir ara dɛ Sunsum Krɔnkrɔn ne daa daa anyɛnkoyɛ no kyerɛkyerɛ hɛn dza ohia ma hɛn mu kor biara dze ato nkyɛn—n’asekyerɛ nye dɛ dza ɔbɛdan hɛn enyi anaa obesianka hɛn kankɔ.

President Nelson kãa dɛ, “Mototɔ serɛ hom dɛ hom ntu hom sunsum mu ahom mu mpon mfa nnya nyikyerɛ.’’⁹ Mekaa hɛn nkɔnhyɛnyi ne nsɛm no daa ber a modwen mbaa hɔn ahom a wɔdze botu ananmɔn dze akɔ kan ho. Ɔtotɔ serɛ hɛn, a ɔkyerɛ adzehia ara yie. Ɔrekyerɛ hɛn mbrɛ yebesi bɛtsena ase wɔ wiadze a bɔn ahyɛ mu mã ber a yerenya nyikyerɛ na yeridzi do.¹⁰ Ber a yɛyɛ dɛm no, na yeridzi Ewuradze ne mbrasɛm nyi na yɛdze robɔ bra no, wɔdze “tsenenee ahenkyɛw’’ bɔ hɛn anohoba, mpo tse dɛ Emma Smith.¹¹ Nkɔnhyɛnyi Joseph kyerɛkyerɛɛ eruhu dɛ Nyankopɔn gye anamɔn kwan a yedzi ekyir wɔ hɛn nkwa mber mu to mu no, ho hia. Dɛm nyimdzee no nnyi hɔ a, “yɛbɛbrɛ wɔ [hɛn] adwen mu na yɛatɔ bitsi.’’¹²

Ehyiadzi yi mu no, yɛbɛtse nokwar a okenyan hɛn ma yɛsesã, yetu mpon, na yɛtsew hɛn abrabɔ ho. Ɔnam hɛn ankorankor nyikyerɛ do no, yebotum esiw dza binom frɛ no “wiadze mfɛndzanan ehyiadzi nhyɛdo mbordo’’ kwan—sɛ yɛdze enyimpi si hɔ dɛ yɛbɛyɛ ne nyinara sesei a. Mbaa soa akyɛw pii, naaso ɔnnkɛyɛ yie, na onnhia so, dɛ wɔbɛhyɛ ne nyinara prɛko pɛr. Sunsum no boa hɛn ma yehu edwuma a ɔwɔ dɛ yetsim wɔ do ndɛ.¹³

Ewuradze no dɔ nhyɛdo a Ɔnam Sunsum Krɔnkrɔn do no boa hɛn ma yehu N’ ehiadze ma hɛn kankɔ. Yɛreyɛ aso ama ankorankor nyikyerɛ dze ankorankor kankɔ ba.¹⁴ Yetsie na yɛyɛ.¹⁵ Ewuradze kãa dɛ: “Hom mbisa Egya no wɔ me dzin mu, hom ngye ndzi dɛ hom nsa bɛkã, na hom benya Sunsum Krɔnkrɔn no a ɔda ndzɛmba nyina a no ho hia edzi.’’¹⁶ Hɛn asɛdze a ɔkɔ do nye yerenya nyikyerɛ ɔkɔ do ba.

Ber a yɛyɛ ndam kɛsenara wɔ ho yɛ yie no, yebotum enya tum mbordo wɔ hɛn ankorankor asɛdze horow mu dze asom na yɛayɛ nkwagye na nkwagye ntowdo edwuma no—dɛ nokwar ara yɛdze “wiadze ndzɛmba to nkyɛn, na yɛhwehwɛ ndzɛmba a ofir bea pa.’’¹⁷ Afei yebotum ekenyan hɛn mbasantsen a wɔreba no yie ma wɔayɛ dɛmara.

Enuanom na nkyerɛbaa, hɛn nyina yɛhwehwɛ Nyankopɔn no tum wɔ hɛn abrabɔ mu.¹⁸ Nkabɔmu fɛfɛɛfɛw da mbaa na mbanyin ntamu wɔ Nyankopɔn n’edwuma ne nyɛe mu ndɛ. Yɛnam ahyɛmudzi a yedzii kan yɛɛ no wɔ enuma nsubura no mu na nkyii wɔ temple krɔnkrɔn n’adan mu no do, yenya kwan wɔ asɔfodzi tum no ho.¹⁹ President Nelson kyerɛkyerɛɛ hɛn dɛ, “Ɔbaa biara na barimba biara a ɔnye Nyame dzi ahyɛmu na osie dɛm ahyɛmudzi no, na ɔdze noho hyɛ asɔfodzi ayɛdze emudzi mu no, wɔ kwan tɔɔtsen wɔ Nyankopɔn no tum no ho.’’²⁰

Mankasa megye to mu ndɛ yi dɛ meyɛ ɔbaa no mennhu no ntsɛm wɔ m’abrabɔ mu dɛ ɔnam m’ahyɛmudzi horow do no mowɔ kwan wɔ asɔfodzi no tum no ho.²¹ Nkyerɛbaa, mobɔ mpaa dɛ yebohu na yɛakamfo asɔfodzi tum no ber a “yɛtakyer [hɛn] ahyɛmudzi horow,’’²² yɛgye kyerɛwsɛm no nokwar no to mu, na yetsie hɛn nkɔnhyɛfo atseasefo no hɔn nsɛm.

Hom mma yɛmfa akokodur mpaa mu nkã hɛn nokwarsom mma hɛn Ɔsor Egya na hɛn Agyenkwa, “dze gyedzi a onnhihim, dze [hɛn]ho nyinara twer nyia otum gye nkwa.’’²³ Hom mma yɛmfa dɛwdzi nsɔw akwantu yi do nkɔ hɛn sunsum mu ndaamba gyinabew a ɔkrɔn koraa ho na yendua, baanodzi dwuma, ɔdɔ, ɔsom, na ayamuhyehye do yɛmboa hɔn a woetwa hɛnho ehyia no.

Elder James E. Talmage kaa hɛn awɔse mu dɛ, “Wiadze no ne ɔbaa na ɔbaayɛ ne nkonyimdzifo kɛsenara nye Jesus Christ no.’’²⁴ Nhwehwɛmu a odzi ewiei no, wɔ mbaa hɔn asɛdze a ɔkɔ do wɔ Nsananamu mu, na ma hɛn nyinara no, asɛdze hendze na odzi kan? Megye dase dɛ ɔwɔ dɛ yetsie No,²⁵ dze kã No do,²⁶ dze nya awerɛhyɛmu wɔ No mu,²⁷ na yɛbɛyɛ No dɔ no ntserɛwmu.²⁸ Minyim dɛ Ɔtse ase.²⁹ Wɔ Jesus Christ ne dzin krɔnkrɔn no mu, amen.

Nsɛnsin

1. Russell M. Nelson, “A Plea to My Sisters,” Liahona, Ɔberɛfɛw 2015, 95-96.

2. Joseph Smith, in “Nauvoo Relief Society Minute Book,” 38, josephsmithpapers.org.

3. Teachings of Presidents of the Church: Spencer W. Kimball (2006), 217.

4. Russell M. Nelson, “A Plea to My Sisters,” 97.

5. Hwɛ Nkyerɛkyerɛ na Ahyɛmudzi 58:26-28.

6. Hwɛ Nkyerɛkyerɛ na Ahyɛmudzi 6:33.

7. Hwɛ Joseph Smith—Abakɔsɛm 1:11–17.

8. Nkyerɛkyerɛ na Ahyɛmudzi 25:8, 10, 13.

9. Russell M. Nelson, “Revelation for the Church, Revelation for Our Lives,’’ Liahona, Esusow Aketseaba 2018, 96.

10. Hwɛ 2 Nephi 9:39.

11. Nkyerɛkyerɛ na Ahyɛmudzi 25:15.

12. Lectures on Faith (1985), 68.

13. Hwɛ Nkyerɛkyerɛ na Ahyɛmudzi 42:61.

14. President Henry B. Eyring kãã dɛ:

    “Afei, sɛ menye wonko na yɛtsena hɔ a (mepɛ dɛ nnkyɛ yebotum ayɛ), a w’ahom bɛka woho dze ebisa adzebiara a ipɛ dɛ ibisa a, mutum hu dɛ erekã biribi tse dɛ iyi: ‘O, Nuabanyin Erying, matse ndzɛmba a aka ho asɛm no nkã. Sunsum Krɔnkrɔn no kaa m’akoma na m’adwen ofi mber to mber. Mbom mibehia daa daa sɛ woenndzi mo do nyim anaa wɔanndaadaa me a. Dɛm bɛyɛ yie a? Ɔbɛyɛ yie a, na, sɛ ɔbɛyɛ a, ebɛnadze na yɛbɛyɛ dze enya dɛm nhyira no?’

    “Oye, hom mma yɛmfa hom asɛmbisa n’afã a odzi kan no nhyɛ ase. Nyew, ɔbɛyɛ yie. Ber biara a mihia dɛm awerɛhyɛmu bio no—na mihia no fi mber to mber so—mekaa enuanom mbanyin beenu. Nephi na Lehi, na Ewuradze no nkowaa bi so a nna wɔnye hɔn reyɛ edwuma no, hyiaa etsĩadze dzendzenndzen. Nna wɔrosom wɔ wiadze a emumuyɛ rinyin wɔ mu ankasa. Nna ɔwɔ dɛ wɔhwɛ siesie ndaadaasɛm huhu no. Ntsi medze akokodur—na hom so botum—fi nsɛm mu wɔ Helaman nyiyimu kor yi mu. Ahyɛmu a wɔasan dze ama no hyɛ asɛm nyinara a osii wɔ afe mu nyina mu no, a ma kyerɛwfo no dze nna ɔyɛ dɛ ɔnnyɛ nwanwa. Tsie:

    “Na afe a ɔtɔ do eduosuon akron no mu no aperdzi pii hyɛɛ ase. Na ɔbaa dɛ Nephi na Lehi, nye hɔn enuanom mu pii a wonyim a ɔfa no nkyerɛkyerɛ ho nokwar botae no nyaa nyikyerɛ da biara, dɛm ntsi wɔkãa nsɛmpa no kyerɛɛ dɔm no araa ma wogyaa hɔn aperdzi no wɔ dɛm afe noara mu.‘ [Helaman 11:23]

    “Wonyaa nyikyerɛ bebree daa daa.’’ Ntsi, emi na ɔwo no, dɛm no yi hom asɛmbisa a odzi kan no nyiano. Nyew, ɔbɛyɛ yie dɛ yebenya Sunsum Krɔnkrɔn n’anyɛnkoyɛ no yie dodow ma yeenya nyikyerɛ beberee daa daa. Ɔrennyɛ mberɛw. Naaso ɔbɛyɛ yie. Dza obehia no bɛyɛ soronko ama nyimpa kor biara osiandɛ yɛhyɛ ase fi bea a yɛyɛ wɔ hɛn abrabɔ sũahu horow soronko mu’’ (“Gifts of the Spirit for Hard Times” [Brigham Young University fireside, Fankwa 10, 2006], 3–4, speeches.byu.edu).

15. Hwɛ 2 Nephi 2:16.

16. Nkyerɛkyerɛ na Ahyɛmudzi 18:18

17. Nkyerɛkyerɛ na Ahyɛmudzi 25:10.

18. Hwɛ Nkyerɛkyerɛ na Ahyɛmudzi 121:26, 33, 41, 45–46.

19. Hwɛ Nkyerɛkyerɛ na Ahyɛmudzi 84:19–21.

20. Russell M. Nelson, “Spiritual Treasures,” Liahona, Ɔberɛfɛw 2019, 77.

21. Hwɛ Russell M. Nelson, “Spiritual Treasures,” 76–79; Dallin H. Oaks, “The Keys and Authority of the Priesthood,” Liahona, Esusow Aketseaba 2014, 49–52; Henry B. Eyring, “Women and Gospel Learning in the Home,” Liahona, Ɔberɛfɛw 2018, 58–60.

22. Nkyerɛkyerɛ na Ahyɛmudzi 25:13.

23. 2 Nephi 31:19

24. James E. Talmage, Jesus the Christ Nwoma a otsĩa 3, (1916),475.

25. Hwɛ Joseph Smith—Abakɔsɛm 1:17.

26. Hwɛ Matthew 4:19–20.

27. Hwɛ Mbɛbusɛm 3:5–6; Nkyerɛkyerɛ na Ahyɛmudzi 11:12.

28. Hwɛ John 13:34; Moroni 7:47.

29. Hwɛ 2 Nephi 33:6; Doctrine and Covenants 76:22.