Հիսուս Քրիստոսը ծնողների ուժն է

Երեց Դիտեր Ֆ. Ուխդորֆ

Տասներկու Առաքյալների Քվորումից

Օգնեք ձեր երեխաներին կառուցել հավատք առ Հիսուս Քրիստոս, սիրել Նրա ավետարանը և Նրա Եկեղեցին, պատրաստվել ողջ կյանքում կատարելու արդար ընտրություններ:

Մի անգամ մի հայր պատրաստվում էր երեկոյան գնալ եպիսկոպոսության ժողովի: Նրա չորսամյա դուստրը կանգնեց նրա առջև՝ գիշերազգեստը հագին և Մորմոնի Գրքի Պատմությունների օրինակը ձեռքին:

«Դու ինչո՞ւ պետք է գնաս հանդիպման»,- հարցրեց նա:

«Որովհետև ես եպիսկոպոսության խորհրդական եմ», - պատասխանեց հայրը:

«Բայց չէ որ դու ի՛մ հայրն ես», - բողոքեց դուստրը:

Նա ծնկի իջավ դստեր առաջ։ «Սիրելիս,- ասաց նա,- ես գիտեմ` դու ուզում ես, որ քեզ համար ընթերցեմ և օգնեմ քեզ քնել, բայց այս երեկո ես պետք է օգնեմ եպիսկոպոսին»:

Դուստրը պատասխանեց. «Մի՞թե եպիսկոպոսը հայր չունի, որ օգնի նրան քնել»:

Մենք հավերժ երախտապարտ ենք անթիվ անդամների համար, որոնք ամեն օր ջանասիրաբար ծառայում են Հիսուս Քրիստոսի Եկեղեցում: Ձեր զոհաբերությունը իսկապես սուրբ է:

Բայց, ինչպես այս աղջիկը կարծես հասկացավ, կա նույնքան սուրբ և անփոխարինելի մի բան այն ծնողի մեջ, որը երեխա է դաստիարակում: Երկնքում տիրում է նույն օրինաչափությունը։¹ Մեր Երկնային Հայրը՝ մեր Աստվածային Ծնողը, անկասկած, ուրախանում է, երբ Իր զավակներին ուսուցանում և դաստիարակում են իրենց երկրային ծնողները:²

Ծնողնե՛ր, շնորհակալություն այն ամենի համար, ինչ անում եք ձեր երեխաներին մեծացնելու համար: Եվ երեխանե՛ր, շնորհակալություն այն ամենի համար, ինչ անում եք ձեր ծնողներին մեծացնելու համար, քանի որ ինչպես յուրաքանչյուր ծնող գիտի, մենք հաճախ մեր երեխաներից սովորում ենք նույնքան բան հավատքի, հույսի և գթության մասին, որքան նրա՛նք են սովորում մեզանից:³

Ծնողները ունեն սուրբ պարտականություն

Երբևէ մտածե՞լ եք, թե մեր Երկնային Հայրն ինչ հսկայական վտանգի է ենթարկում, երբ երեխա է ուղարկում երկիր: Նրանք Նրա հոգևոր որդիներն ու դուստրերն են: Նրանք անսահման ներուժ ունեն։ Նրանց վիճակված է դառնալ բարության, շնորհի և ճշմարտության փառավոր էակներ: Եվ այնուամենայնիվ, նրանք գալիս են երկիր բոլորովին անօգնական և հազիվ թե կարողանում ինչ-որ բան անել, բացի օգնություն աղաղակելուց: Աստծո ներկայության մեջ իրենց կյանքի հիշողությունը քողարկված է, ինչպես նաև իմացությունը, թե ովքեր են իրենք իրականում, և ինչ կարող են դառնալ: Նրանք ձևավորում են կյանքի, սիրո, Աստծո և Նրա ծրագրի մասին իրենց հասկացողությունը՝ հիմնվելով այն ամենի վրա, ինչ նկատում են իրենց շրջապատող մարդկանց, հատկապես ծնողների մեջ, որոնք, անկեղծ ասած, դեռ փորձում են ամեն ինչ ինքնուրույն պարզել իրենց համար:

Աստված ծնողներին տվել է «սուրբ պարտականություն դաստիարակել երեխաներին սիրո և առաքինության մթնոլորտում, ապահովել նրանց նյութական և հոգևոր կարիքները և ուսուցանել նրանց … պահպանել Աստծո պատվիրանները»:⁴

Դա բավական է նույնիսկ լավագույն ծնողներին գիշերը արթուն պահելու համար:

Իմ ուղերձը բոլոր ծնողներին հետևյալն է.

Տերը սիրում է ձեզ:

Նա ձեզ հետ է:

Նա կանգնած է ձեր կողքին:

Նա ձեր ուժն է, երբ առաջնորդում եք ձեր երեխաներին արդար ընտրություններ կատարելիս:

Ընդունեք այս արտոնությունն ու պատասխանատվությունը խիզախորեն և ուրախությամբ: Երկնային օրհնությունների այս աղբյուրը որևէ մեկին մի պատվիրակեք: Ավետարանի արժեքների և սկզբունքների շրջանակներում դուք եք առաջնորդելու ձեր երեխային ամենօրյա որոշումների մանրամասների հարցում: Օգնեք ձեր երեխաներին կառուցել հավատք առ Հիսուս Քրիստոս, սիրել Նրա ավետարանը և Նրա Եկեղեցին, պատրաստվել ողջ կյանքում կատարելու արդար ընտրություններ: Իրականում, դա է Աստծո ծրագիրը ծնողների համար:

Սատանան կհակառակվի ձեզ, կշեղի ձեր ուշադրությունը, կփորձի հուսահատեցնել ձեզ:

Բայց յուրաքանչյուր երեխա ստացել է Քրիստոսի լույսը, և դա թույլ է տալիս նրան զգալ երկնային ազդեցությունը: Եվ Փրկիչը կօգնի ձեզ, կառաջնորդի ձեզ և կխրախուսի ձեզ: Փնտրեք Նրա օգնությունը: Հարցրե՛ք Տիրոջը:

Այնպես, ինչպես Հիսուս Քրիստոսը երիտասարդության ուժն է, Հիսուս Քրիստոսը նաև ծնողների ուժն է:

Նա մեծացնում և խորացնում է սերը

Երբեմն մենք կարող ենք մտածել՝ արդյոք մեկ ուրիշը կարող է ավելի լավ որակավորում ունենալ՝ առաջնորդելու և ուսուցանելու մեր երեխաներին: Բայց անկախ նրանից, թե որքան անհամարժեք կարող եք զգալ, դուք ունեք մի բան, որը եզակիորեն որակավորում է ձեզ. դա ձեր սերն է ձեր երեխայի հանդեպ:

Երեխայի հանդեպ ծնողի սերը տիեզերքի ամենից զորավոր ուժերից մեկն է: Դա այն քիչ բաներից մեկն է այս երկրի վրա, որը, հիրավի, կարող է հավերժ լինել:

Այժմ, գուցե, զգում եք, որ ձեր հարաբերությունները ձեր երեխայի հետ այնքան էլ կատարյալ չեն: Այստեղ է, որ Փրկչի զորությունը սկսում է գործել: Նա բժշկում է հիվանդներին, Նա նաև կարող է բժշկել հարաբերությունները: Նա բազմապատկում է հացն ու ձուկը, և Նա կարող է բազմապատկել սերն ու ուրախությունը ձեր ընտանիքում:

Ձեր սերը ձեր երեխաների հանդեպ ստեղծում է հարուստ միջավայր՝ ճշմարտությունն ուսուցանելու և հավատք կառուցելու համար: Ձեր տունը դարձրեք՝ աղոթքի, ուսման և հավատքի տուն, ուրախ ապրումների տուն, պատկանելության վայր, Աստծո տուն:⁵ Եվ «աղոթեք Հորը սրտի ողջ կորովով, որ [դուք] կարողանաք լցված լինել [Նրա] սիրով, որը նա [շնորհում է] … իր Որդու՝ Հիսուս Քրիստոսի հետևորդներին»:⁶

Նա մեծացնում է փոքր և հասարակ ջանքերը

Մեկ այլ ուժ, որը դուք ունեք՝ որպես ծնող, ամենօրյա, շարունակական ազդեցության հնարավորությունն է: Հասակակիցների, ուսուցիչների և մեդիայի ազդեցությունը փոփոխական է: Բայց դուք կարող եք մշտական և կայուն ազդեցություն թողնել ձեր երեխայի կյանքում:

Ձեր ջանքերը կարող են փոքր թվալ՝ համեմատած այն բարձր ձայների հետ, որոնք ձեր երեխաները լսում են աշխարհում: Երբեմն գուցե ձեր ջանքերը աննշան թվան: Բայց հիշեք, որ «փոքր միջոցներով Տերը կարող է առաջ բերել մեծ բաներ»:⁷ Ընտանեկան մեկ երեկո, մեկ ավետարանական զրույց կամ մեկ լավ օրինակ գուցե չփոխի ձեր երեխայի կյանքը մեկ ակնթարթում, սակայն անձրևի մեկ կաթիլից անգամ բույսն անմիջապես աճում է: Բայց փոքր և պարզ բաների հետևողականությունը օրեցօր շատ ավելի լավ է սնուցում ձեր երեխաներին, քան հազվադեպ ջրհեղեղը:⁸

Դա է Տիրոջ ուղին: Նա ձեր և ձեր երեխայի հետ խոսում է մեղմ, հանդարտ ձայնով, ոչ թե որոտի ձայնով:⁹ Նա բժշկեց Նեեմանին ոչ թե «մի մեծ բանի» միջոցով, այլ պարզ, կրկնվող լվացման միջոցով:¹⁰ Իսրայելի զավակները վայելում էին լորամարգիների խնջույքը անապատում, բայց այն, ինչը նրանց կենդանի պահեց, մանանայի փոքրիկ և պարզ հրաշքն էր՝ նրանց հանապազօրյա հացը:¹¹

Եղբայրնե՛ր և քույրե՛ր, հանապազօրյա հացը լավագույնս պատրաստվում և մատուցվում է տանը։ Հավատքն ու վկայությունը լավագույնս զարգանում են սովորական և բնական ձևերով, քայլ առ քայլ, կարճ ու սովորական պահերին՝ առօրյա կյանքի մշտական հոսքի մեջ:¹²

Ցանկացած պահ կարող է ուսուցման պահ լինել: Ձեր յուրաքանչյուր խոսքն ու գործողությունը կարող է ընտրություն կատարելու ուղեցույց դառնալ:¹³

Դուք կարող եք չտեսնել ձեր ջանքերի անմիջական ազդեցությունը: Բայց մի հանձնվեք։ «Բոլոր բաները պետք է լինեն իրենց ժամանակին», - ասել է Տերը։ «Ուստի, մի ձանձրացեք բարին գործելուց, քանզի դուք դնում եք հիմքը մի մեծ գործի»:¹⁴ Ո՞ր աշխատանքը կարող է ավելի մեծ լինել, քան այն, որ օգնենք Աստծո թանկագին զավակներին սովորել, թե ովքեր են իրենք իրականում, և օգնենք կառուցել իրենց հավատքը առ Հիսուս Քրիստոսը, Նրա ավետարանը և Նրա Եկեղեցին: Հիսուս Քրիստոսը կօրհնի և կմեծացնի ձեր հետևողական ջանքերը:

Նա Հայտնություն է տալիս ծնողներին

Գոյություն ունի մեկ այլ հզոր եղանակ, որով Տերն աջակցում է ծնողներին: Այն իրականացվում է անձնական հայտնության անզուգական պարգևի միջոցով: Աստված ցանկանում է «դուրս թափել Իր Հոգին»՝ ծնողներին առաջնորդելու համար:

Քանի որ դուք աղոթասեր և զգայուն եք Հոգու հանդեպ, Նա կզգուշացնի ձեզ թաքնված վտանգների մասին:¹⁵ Նա կբացահայտի ձեր երեխաների պարգևները, ուժեղ կողմերը և չասված մտահոգությունները:¹⁶ Աստված կօգնի ձեզ տեսնել ձեր երեխաներին այնպես, ինչպես Ինքն է տեսնում. Նա ոչ թե արտաքին տեսքին, այլ նրանց սրտին է նայում:¹⁷

Աստծո օգնությամբ դուք կսովորեք ճանաչել ձեր երեխաներին մաքուր և երկնային ձևով: Ես հրավիրում եմ ձեզ ընդունել ձեր ընտանիքին անձնական հայտնությամբ առաջնորդելու Աստծո առաջարկը: Ձեր աղոթքներում փնտրեք Նրա առաջնորդությունը:¹⁸

Մի զորեղ փոփոխություն

Թերևս ամենակարևոր օգնությունը, որ Հիսուս Քրիստոսը առաջարկում է ծնողներին, «հզոր փոփոխությունն» է ձեր սրտում:¹⁹ Սա հրաշք է, որի կարիքը յուրաքանչյուրս ունենք:

Մի պահ պատկերացրեք այս իրավիճակը. դուք եկեղեցում եք և լսում եք ելույթ ընտանիքների մասին: Խոսնակը նկարագրում է մի կատարյալ տուն և ավելի կատարյալ ընտանիք: Ամուսինն ու կինը երբեք չեն վիճում: Երեխաները դադարում են կարդալ իրենց սուրբ գրությունները միայն տնային աշխատանքները կատարելու ժամանակ: Իսկ հետին պլանում հնչում է «Սիրեք բոլորին»²⁰ երգի երաժշտությունը։ Մինչ խոսնակը հասնում է այն կետին, որ բոլորն ուրախությամբ միանում են լոգարանը մաքրելու համար, դուք արդեն մտածում եք. «Իմ ընտանիքը անհույս է»:

Սիրելի եղբայրնե՛ր և քույրե՛ր, հանգստացեք: Ժողովում բոլորը նույն բանն են մտածում։ Փաստն այն է, որ բոլոր ծնողներն անհանգստանում են, թե իրենք բավականաչափ լավը չեն:

Բարեբախտաբար, ծնողների համար աստվածային օգնության աղբյուր կա՝ Հիսուս Քրիստոսը: Նա է մեր սրտի հզոր փոփոխության աղբյուրը:

Երբ դուք բացեք ձեր սիրտը Փրկչի և Նրա ուսմունքների առաջ, Նա ցույց կտա ձեզ ձեր թուլությունը: Եթե դուք խոնարհ սրտով վստահեք Հիսուս Քրիստոսին, Նա ձեր թույլ կողմերը ուժեղ կդարձնի:²¹ Նա հրաշքների Աստված է:

Արդյո՞ք դա նշանակում է, որ դուք և ձեր ընտանիքը անթերի կլինեք: Ոչ: Բայց դուք ավելի լավը կդառնաք: Փրկչի շնորհով դուք կամաց-կամաց կզարգացնեք այն հատկանիշները, որոնց կարիքն ունեն ծնողները՝ սեր Աստծո և Նրա զավակների հանդեպ, համբերություն, անձնուրացություն, հեզություն և ճիշտ քայլեր կատարելու քաջություն:

Հիսուս Քրիստոսը աջակցում է Իր Եկեղեցու միջոցով

Հիսուս Քրիստոսի հանդեպ հավատք կառուցելու մեր ջանքերը տնակենտրոն են և կենտրոնացած են անհատի վրա: Եվ դա աջակցվում է Եկեղեցու կողմից: Բացի սուրբ գրություններից և մարգարեների խոսքերից՝ Փրկչի Եկեղեցին առաջարկում է բազմաթիվ նյութեր՝ օգնելով ծնողներին և երեխաներին կատարել արդար ընտրություններ:

• Երիտասարդներին զորացնելու համար. Ընտրություն կատարելու ուղեցույցը ձեզ չի տալիս այն քայլերի ցանկը, որոնք պետք է կատարել կամ չի կարելի կատարել: Այն ուսուցանում է հավերժական ճշմարտություններ, որոնք կօգնեն ձեզ ընտրություն կատարել՝ ձեր կյանքը Հիսուս Քրիստոսի կյանքի և ուսմունքների վրա կենտրոնացնելու համար: Կարդացեք այն ձեր երեխաների հետ: Թող նրանք խոսեն այդ մասին։ Օգնեք նրանց, որ այս հավերժական և աստվածային ճշմարտությունները ուղղորդեն նրանց ընտրությունները:²²

• ԵԶՀ համաժողովները ևս մեկ հրաշալի աղբյուր են: Հուսով եմ, որ յուրաքանչյուր երիտասարդ կմասնակցի: Ես հրավիրում եմ երիտասարդ ամուրիներին միանալ այդ համաժողովներին՝ որպես դաստիարակներ և խորհրդատուներ: Ես հրավիրում եմ ծնողներին հիմնվել այն հոգևոր ուժի վրա, որ երիտասարդները իրենց հետ բերում են ԵԶՀ համաժողովներից:

• Երեխաները և երիտասարդները Հիսուս Քրիստոսի Վերջին Օրերի Սրբերի Եկեղեցում ունեն ուսուցիչներ, խորհրդատուներ և դաստիարակներ: Դուք հաճախ մուտք եք գործում երիտասարդի կյանք վճռորոշ պահին՝ հավատք և վկայություն կառուցելու և աջակցելու համար: Ձեզանից ոմանք չափահաս ամուրիներ են: Ձեզանից ոմանք երբեք սեփական երեխաներ չեն ունեցել: Աստծո զավակներին մատուցած ձեր ուրախ ծառայությունը սուրբ է Աստծո աչքում:²³

Երբեք մի հրաժարվեք հրաշքից

Իմ սիրելի ընկերնե՛ր, իմ սիրելի եղբայրներ և քույրեր, երեխայի մեջ հավատի կառուցումը որոշ չափով նման է ծաղկի աճին օգնելուն: Դուք չեք կարող քաշել ցողունը, որպեսզի այն ավելի երկար լինի: Դուք չեք կարող բացել բողբոջը, որպեսզի այն ավելի շուտ ծաղկի: Եվ դուք չեք կարող անուշադրության մատնել ծաղկին և ակնկալել, որ այն կաճի կամ կծաղկի ինքնաբուխ:

Այն, ինչ դուք կարող եք և պետք է անեք աճող սերնդի համար՝ հարուստ, սնուցող հող ապահովելն է՝ հոսող երկնային ջրի հասանելիությամբ: Հեռացրեք մոլախոտերը և այն ամենը, ինչը կարող է փակել երկնային ճառագայթը: Աճի համար ստեղծեք հնարավոր լավագույն պայմանները: Համբերությամբ թույլ տվեք աճող սերնդին կատարել ոգեշնչված ընտրություններ և թույլ տվեք, որ Աստված գործի Իր հրաշքը: Արդյունքը կլինի ավելի գեղեցիկ, ավելի ապշեցուցիչ և ավելի հաճելի, քան այն ամենը, ինչ դուք կարող եք ինքնուրույն ստեղծել:

Երկնային Հոր ծրագրում ընտանիքների հարաբերությունները պետք է լինեն հավերժական: Ահա ինչու, որպես ծնող, դուք երբեք չեք հանձնվում, նույնիսկ եթե չեք կարող հպարտանալ անցյալի իրադարձություններով:

Հիսուս Քրիստոսի, Վարդապետ Բժշկի և Փրկչի հետ գալիս է նոր սկիզբը․ Նա միշտ հույս է տալիս:

Հիսուս Քրիստոսն ընտանիքների ուժն է:

Հիսուս Քրիստոսը երիտասարդների ուժն է:

Հիսուս Քրիստոսը ծնողների ուժն է:

Այդ մասին ես վկայում եմ Հիսուս Քրիստոսի անունով, ամեն:

Հղումներ

1. «Գրեթե ամեն մի ծնողի բնատուր ցանկությունն է՝ բարոյական արժեքներ սովորեցնել իր երեխաներին: Սա Երկնային Հոր ծրագրի հրաշքի մի մասն է: Նա ցանկանում է, որ Իր զավակները գան երկիր, հետևելով ընտանիքների հավերժական օրինակին, որը գոյություն ունի երկնքում: Ընտանիքը հավերժության թագավորությունների հիմնական կազմակերպչական միավորն է, ուստի Հոր մտադրությունն է, որ այն հիմնական միավոր լինի նաև երկրի վրա: Թեև երկրային ընտանիքները հեռու են կատարյալ լինելուց, նրանք երկրի վրա Աստծո զավակներին ընդունելու լավագույն հնարավորությունն են ապահովում, որտեղ կա երկնքում զգացած սիրուն ամենամոտ ծնողական սերը: Ընտանիքները նաև բարոյական արժեքներ ու ճշմարիտ սկզբունքներ պահպանելու ու փոխանցելու լավագույն միջոցն են, որոնք, ամենայն հավանականությամբ, կվերադարձնեն մեզ Աստծո ներկայություն:» (Հենրի Բ. Այրինգ, Աստծո ընտանիքի հավաքումը, Լիահոնա, մայիս 2017, 20):

2. Իհարկե, մենք գիտենք, որ Աստծո կամքը միշտ չէ, որ կատարվում է «ինչպես երկնքում, այնպես էլ երկրի վրա» (Մատթեոս 6.10): Մահկանացու ծնողավարությունը, անշուշտ, խամրում է Աստծո կատարյալ ծնող լինելու կողքին: Նա, անշուշտ, տեսնում է դա։ Նա պետք է որ արտասվում է ընտանեկան հարաբերություններում առկա բոլոր վշտերի և տառապանքների համար: Եվ այնուամենայնիվ, Նա չի հրաժարվել ընտանիքից: Քանի որ Աստված փառահեղ ծրագիր ունի Իր զավակների հավերժական ճակատագրի համար: Ընտանիքը այդ ծրագրի կենտրոնական մասն է:

3. Տես Մատթեոս 18․1-5, Մարկոս 3.19։

4. «Ընտանիք․ Հայտարարություն աշխարհին», տես նաև Վարդապետություն և Ուխտեր 68.25–28:

5. Տես «Տնային ուսումնառությունը հիմնված է հարաբերությունների վրա», Ուսուցանել Փրկչի ձևով. բոլորի համար, ովքեր ուսուցանում են տանը և եկեղեցում (2022), 30–31, տես նաև Վարդապետություն և Ուխտեր 109.8:

6. Մորոնի 7.48:

7. 1 Նեփի 16.29, տես նաև Ալմա 37.6-7:

8. Տես «Տնային ուսումնառությունը բաղկացած է փոքր, պարզ, հետևողական ջանքերից», Ուսուցանել Փրկչի ձևով, 31: Նախագահ Դեյվիդ Օ. Մակքեյն ուսուցանել է. «Եկեք չմտածենք, որ, քանի որ որոշ [բաներ] … թվացյալ փոքր և չնչին են, [ուրեմն] անկարևոր են: Կյանքն, ի վերջո, կազմված է մանրուքներից։ Մեր կյանքը, մեր էությունը ֆիզիկապես կազմված է սրտի փոքրիկ զարկերից: Թող այդ փոքրիկ սիրտը դադարի բաբախել, և կյանքը այս աշխարհում կդադարի: Մեծ արևը հզոր ուժ է տիեզերքում, բայց մենք ստանում ենք [նրա] ճառագայթների օրհնությունները, քանի որ դրանք գալիս են մեզ որպես փոքրիկ ճառագայթներ, որոնք, ընդհանուր առմամբ, ողջ աշխարհը լցնում են արևի լույսով: Մութ գիշերը հաճելի է դարձնում փոքրիկ աստղերի փայլը և այսպիսով, ճշմարիտ քրիստոնեական կյանքը բաղկացած է փոքրիկ Քրիստոսանման արարքներից, որոնք կատարվում են այս ժամին, այս րոպեին՝ տանը» (Teachings of Presidents of the Church: David O. McKay [2003], 219):

9. Տես Հելաման 5․30։

10. Տես Դ Թագավորաց 5․9-14։

11. Տես Ելից 16:

12. Տես «Պատրաստել ձեր երեխաներին Աստծո ուխտի ճանապարհին ողջ կյանքի համար», Եկ, հետևիր ինձ. Անհատների և ընտանիքների համար. Նոր Կտակարան. 2023, հավելված (թվային):

13. Տես «Տնային ուսուցումը կարելի է ծրագրել, բայց կարող է նաև ինքնաբուխ լինել», Ուսուցանել Փրկչի ձևով, 31; Ա Պետրոս 3.15:

14. Վարդապետություն և Ուխտեր 64․32-33։

15. Տես Մատթեոս 2.13։

16. Տես Ալմա 40․1, 41.1, 42.1:

17. Տես Ա Թագավորաց 16․7։

18. Տես 1 Նեփի 15․8։

19. Ալմա 5.13:

20. See “Love One Another,” Hymns, no. 308.

21. Sես Եթեր 12.27:

22. «Երեխաների դեպքում բարոյական առաջնորդություն տալու պատասխանատվությունը դրված է ծնողների վրա։ Նրանք գիտեն յուրաքանչյուր երեխայի տրամադրվածությունը, հասկացողությունը և խելքը: Ծնողները մի ամբողջ կյանք են ծախսում` ձգտելով լավ կապեր հաստատել և պահպանել իրենց երեխաներից յուրաքանչյուրի հետ: Նրանք լավագույն դիրքում են՝ իրենց սերունդների բարօրության և բարեկեցության վերաբերյալ վերջնական բարոյական որոշումներ կայացնելու համար» (James E. Faust, “The Weightier Matters of the Law: Judgment, Mercy, and Faith,” Ensign, Nov. 1997, 54):

23. Երկու այլ նյութեր, որոնք արժե հիշատակել. այս տարվա Եկ, հետևիր ինձ ձեռնարկի թվային տարբերակը ներառում է նոր բաժին, որը վերնագրված է «Պատրաստել ձեր երեխաներին Աստծո ուխտի ճանապարհին ողջ կյանքի համար»: Այն առաջարկում է պարզ, տնակենտրոն գաղափարներ՝ օգնելու երեխաներին պատրաստվել մկրտությանը և այլ ուխտերին ու արարողություններին: Իսկ Ուսուցանել Փրկչի ձևով ձեռնարկը ունի «Տուն և ընտանիք» վերնագրով նոր վերանայված բաժինը, որը նկարագրում է, թե ինչպես են Քրիստոսանման ուսուցման սկզբունքները կիրառվում տանը (տես էջեր 30–31):