Ke Usuŋ Utom Mmɔ
Mbufo eke mfin emi eke esinde-ifik eka iso ke usuŋ utom mbufo edi ɔsɔŋɔ enɔ mfiak-men-ndi Ufɔk Abasi Andinyaŋa.
Ami menehede mbeŋe unwam eke Edisana Spirit ke nte ami nwutde ima, itoro, ye ekɔm mi nnɔ mbon Ufɔk Abasi Jesus Christ eke Latter-day Saints ke ofuri ererimbot.
Mbon eke Akpatre Wagon oro
Isua 1947 ekedi edinam-usɔrɔ isua Ikie eke akpa mme ebe-iso Latter-day Saint ekedisim Unaisiɔŋ Salt Lake. Ema enam ediwak usɔrɔ editi ke isua oro, ye anana-ibat ediwut ekɔm nnɔ mme nti mbet Jesus Christ emi ekesiakde afaŋ-usuŋ, ebɔp ufɔk, etɔ inwaŋ ke ukpɔk desert, enyuŋ eduŋ ke mme obio.
President J. Reuben Clark. Akpa Ɔnɔitem ke First Presidency, ama ɔnɔ kiet kotu ata inem ye enyene-mbɔm ikɔ editi abaŋa nti mme ebe-iso emi ke akwa mbono Ɔfiɔŋ Duop 1947.
Ke etop esie, President Clark ada esisit ini nditi mme nwɔrɔ-nda adausuŋ emi ekedude ke edika edem-usop-utin oro, oruk nte Brigham Young, Heber C. Kimball, Wilford Woodruff, Parley P. Pratt ye ediwak mbon eken. Nte ededi, akpan ntak esie ikidihe ndibat nam-nkure eke nti owo emi. Edi, enye eketiŋ etop esie abaŋa ɔsɔŋidem mbon emi eke owo mifiɔkke mme edinehede ŋwet enyiŋ mmɔ nim ke mbuk eke Ufɔk Abaisi. Item eke ibuot-ikɔ esie edi “Mbon eke Akpatre Wagon oro.”1
President Clark editiŋ ke akwa mbuk mme ido ye afanikɔŋ emi mbon emi ekesaŋade ke akpatre wagon oro ekekutde ke mme nnyan udim wagon emi akasaŋade ebe ke unaisɔŋ oro. Enye ama otoro mme anana-enyiŋ ye nti mbon-uko emi, ke kpukpru usen, kpukpru udua, ye ke kpukpru ɔfiɔŋ, enwekde ntɔŋ eke ofuri mme wagon eme ekebede ke iso isaŋ mmɔ—ye mbon emi ekekande ediwak ubiɔŋɔ emi mmɔ ekekutde ke usuŋ-isaŋ oro.
President Clark edifiori ete, “Mbon eke akpatre wagon oro ema esin-ifik eka iso, ekopde mmemidem ye ekaha, enyenede unan-ke ukot, ke ubakini ekapde-mba, enyene mbuɔtidem ke Abasi ama mmɔ, ke ikɔ Abasi edi akpanikɔ, ndien ke Abasi ada-usuŋ onyuŋ eteme Ndito-ete emi edude kiso.”2
Enye eketre etop esie ye inem ikɔ itoro emi ete: “Eke mme nti owo emi, ekponde ke mbuɔtidem, utom, ye edidu nnen-nnen uwem, ekpon ke edisiak anan-ekɔm urua inyene nnyin, ami mmeyak ima ukpono, ye ubɔŋ mi nnɔ mmɔ.”3
Iduhe Utom-unwam eke Mifɔnkke
Ke 1990, President Howard W. Hunter, President eke Eboho mme Apostle Duopeba kini oro, ɔkɔnɔ etop abaŋa anana-adaŋa etibe eke ediwak mbon ufɔk Abasi emi etiŋde-enyin ke mbuɔtidem enam utom ye mbon emi ebɔde ekpri mme ye mibɔhɔ editi mme itoro.
President Hunter anam anwanga ete:
“Ema etiŋ ebaŋa ekpri ye ɔsɔŋidem Etubom Moroni ete]:
“‘Edieke kpukpru owo ekpedide, ye ekedide, ye eidide, nte Moroni, sese, ata odudu eke hell ekpekenyek ke nsinsi; ihn, andidiɔk ikpinyeneke odudu ke esit nditɔ owo.’ (Alma 48:17).
“Se oruk ikɔ-itoro emi enɔde ɔwɔrɔ-iso ye enyene odudu erenowo. … Ufaŋ iba efen edi ikɔ abaŋade Helaman ye nditɔ-ete esie, emi ekenamde esisit anwa-anwa utom ekan Moroni, oro okot ete:
“‘Idahaemi sese, Helaman ye nditɔ-ete esie ekanam nti utom-unwam enɔ mme owo ekan nte Moroni akanamde’ (Alma 48:19).”
President Hunter aka iso ete, “Ke ikɔ efen, okposuk nte owo mikwe Helaman inyuŋ ifiɔkke nte anamde anwa-anwa nte Moroni, enye ama enyene-ufɔn, oro edi, enye ɔkɔnɔ unwam onyuŋ enyene-ufɔn ukem nte Moroni.”5
Ekem President Hunter ama eteme kpukpru nnyin ete inyene ufɔn. Enye ete: Edieke afo esede ete ediwak se afo anamde ke isua emi mme ke mme isua eke edidide inamke fi ɔwɔrɔ-etop, bɔ emem. Ata ediwak owo emi ekedude ke uwem emi ikidige mme ata ɔwɔrɔ-etop nko. Nam-utom yuŋ kɔri, ke mbuɔtidem ye ndobo.”6
Ke Usuŋ Utom Mmɔ
Ami menem-esit ye ata ediwak mbon Ufɔk Abasi mfin emi edide etiene Andinyaŋa6 ndien esɔŋɔ eda ke usuŋ ediomi ke akpatre mme wagon eke ata mme usuŋ wagon idahaemi—enyuŋ enehede enyene ata ufɔn. Ɔsɔŋɔ mbuɔtidem mbufo ke Ete Heaven ye ke Ɔbɔŋ Jesus Christ ye ke eti, nsinifik uwem mbufo anwam mi ndidi eti owo ye mbet.
Ami mmema mbufo. Ami mmedara mbufo. Ami mmekɔm mbufo. Ndiem ami mmetoro mbufo.
Ikɔ kiet odude ke Nwed Mormon otode Samuel owo Lamnanite enehede owut ekikere mi abaŋa mbufo.
“Ese ete ke ubak mmɔ edu ke usuŋ utom mmɔ, ndien mmɔ enyuŋ esaŋa nte ɔfɔnde kiso Abasi, enyuŋ enim mbet esie ye mme ewuhɔ mmɔ. …
“Edi ntre, ami ndɔhɔ mbufo nte, ediwak ubak mmɔ enam ntem, ndien mmɔ edomo ndisin ifik man mmɔ ekeme ndida nyɔhɔ nsuhɔ nditɔ ete mmɔ nnɔ enyene ifiɔk akpanikɔ.”7
Ami mmenim udim ikɔ oro “ke usuŋ utom mmɔ” owut nti nditɔ-eka iren ye iban emi eyomde enyuŋ etiede ekpere mme owo emi edude ikpɔŋ ke mme esop Ufɔk Abasi ye ke nsio-nsio ndaha efen. Mmɔ ke-esuk edomo “ndidɔŋ mmɔ eke efuhɔde esit,”8 ke miyomke editi mme itoro.
Udim-ikɔ oro “ke usuŋ utom mmɔ” owut mme ebe ye ŋwan ye nditɔ emi enwamde nsaŋa mmɔ, ete ye eka, mme eyen emi anamde-utom ke ndaha ndausuŋ ke mfiak-men-ndi Ufɔk Abasi Christ. Suŋ-suŋ, ndobo, ye ata odudu iberedem eke owo mitihe edida edidiɔŋ ɔsɔk ediwak mbon owo ye ufɔkemana ke mme usuŋ emi edinehede idiɔŋɔ kpɔt ke nsinsi.
Udim-ikɔ oro “ke usuŋ utom mmɔ” owut mme owo emi, ke ema ekekpɔŋ Abasi, ke esuhɔre-idem edi-fiak etiene Enye inikiet efen,9 ekabare-esit ke idiɔkŋkpɔ mmɔ, enyuŋ eyom odudu eriyet ye erikɔk eke Erisio-isop Andinyaŋa. Editiene Christ10 ke edifiak-ntiene usuŋ ediomo mkpɔŋ usuŋ idiɔk-ido nkeduk fusuŋ emi ekesinde”11 edi ata akpan-ŋkpɔ spirit ye enyene-iwuk edinen-ido. Nte mmɔ eyiride ekade iso ke mbuɔtidem inyuŋ ikpaha-mba ke edinam sifɔn, mmɔ ke-etum adaha akwa utom ke uwem idem mmɔ,12 “enɔ ofuri emana ye eke nsinsi.”13
Udim-ikɔ oro “ke usuŋ utom mmɔ” owut ndinen owo emi eyomde ndikabare mbuana ye Andinyaŋa oto ke nnen-nnen ediomi ye edinam ikɔ Abasi Esie—edi ekeme edikpan mmɔ edi-nam ntre oto ke ntak emi akande odudu mmɔ. Ami meŋwɔŋɔ nte ke nta-edet mbufo eyesuhɔre ndien nkopitem ye mbuɔtidem ke edime-me nyak uduak mbufo nsin ke uduak Abasi eyenyene udoro “ke edikem ini Abasi.”14 “Ntua-eyet eyedaŋ ke okoneyo, ndien idara edi ke usenubɔk.”15
Udim-ikɔ oro ke usuŋ utom mmɔ” owut nti andikabare ye andikot ke ofuri ererimbot emi enamde-utom enɔ Abasi ke ndinwam mme ufan ye mbon ufɔk Abasi “man ekop uyɔhɔ ikɔ Abasi ke edeme-ikɔ [mmɔ], ye ke usem [mmɔ].”16 Mme uyo, usem efikde-esin, ye ŋwed emi mmɔ ekabare eyenɔ nsinsi akpanikɔ, edi esisit nnyin idiɔŋɔ enyiŋ mmɔ mme ndinyuŋ nwut ekɔm. Otode ke enɔ edinyene edeme-usem emi mmɔ enyenede, mme andikabare ye andikot etiŋ-enyin enam-utom, ke mfɔn, ndien, ata ediwak ini, enana-enyiŋ man enwam mme owo edibɔ eno eke spirit ke mbuɔtidem eto erikot ye erikop ikɔ Abasi.17
Udim-ikɔ oro “ke usuŋ utom mmɔ” owut nti mme ɔdɔ-ndɔ irenowo ye iban emi ekponode ubiɔŋ ediomo mmɔ ke ndiwak nyuŋ ntɔt nyɔhɔ isɔŋ, ye emi enyenede ukeme ye ɔsɔŋɔ ndikpeme nditɔ mmɔ ke mme esop udia-ɔbɔŋ. Ke ererimbot emi ɔyɔhɔde ye ndutime eke ndiɔi ŋkpɔ-ntibe ye ndikpɔŋ se idide akpan-ŋkpɔ, mme nti owo itieneke edima idem mmɔ ikpɔŋ, mmɔ ekpono nsana-ma ye ufɔn uwem emi odude ke uduak eke Ete Heaven abaŋade inemesit eke nditɔ Esie.
Ediwak mme ɔdɔ-ndɔ nko enim Abasi ke akpanikɔ kini mikwe nti udɔŋ mmɔ nte ɔwɔrɔde-osu ke usuŋ mme kini emi mmɔ ekedoride-enyin enyuŋ eyomde. Mmɔ “enyene mbuɔtidem ke Abasi”18 inyuŋ idɔhɔke ete ya Enye anam nte udɔŋ obukidem mmɔ edide. “Koro tɔŋɔ ke eritɔŋɔ ererimbot nte idukke ke utɔŋ, mme inyeneke enyin ndikut, O Abasi, ke-ebede Fi, adaŋa ikpɔ ŋkpɔ emi Afo enimde ɔnɔ [mmɔ] eketiede ebet Fi.”119
Udim-ikɔ oro “ke usuŋ utom mmɔ” owut ata ediwak mme adausuŋ ke nursery ye andikpep primary emi emade enyuŋ ekpepde nditɔ-ŋwɔŋ eke Ufɔk Abasi ke Usen Sabbath kiet-kiet.
Kere-baŋa nsinsi ufɔn eke utom-unwam emi nti mbet emi enɔde—ye inem edidiɔŋ ekeŋwɔŋɔde enɔ mbon emi enwamde nditɔ-ɔŋwɔŋ.
“Ndien [Jesus ada ekpri eyen ɔwɔŋ onim ke ufɔt mmɔ; onyuŋ emen enye akama ke ubɔk Esie.
“Owo ekededi eke adarade kiet kotu mkpri nditɔwɔŋ emi ke enyiŋ Mi adara Mi: ndien owo ekededi eke adarade Mi, idige Ami ke adadara, edi Enye emi ɔkɔdɔŋde Mi.”20
Udim-ikɔ oro “ke usuŋ utom mmɔ” owut nti nditɔwɔŋ emi enehde ekpeme mme ikpɔ ete ye eka mmɔ, ataba-idap eka-nditɔ emi ebemde okop-ndik ekpri eyen kini adade ekpeme nte “uman-ekpe odude ke inua-otop” ufɔkiduŋ esie.21 Mbon Ufɔk Abasi emi ebakde edi ndien edu ebighe ndibono nyuŋ ntum mme ŋkpɔ-itie, ye nti owo emi ekotde ufɔkemana, mme ufan ye nsaŋa ete edi edikut, edi edinwam, enyuŋ edi edidu.22
Ami mmewut mme esisit ememek uwutŋkpɔ eke edinim ediomo ye nti mbet Jesus Christ ukem nte mbufo emi esinde-ifik eka iso “ke usuŋ utom [mbufo].” Ata ediwak ndadian uwutŋkpɔ eke mbon ufɔk Abasi nnyin emi eyakde “ofuri esit mmɔ”23 enɔ Abasi edikut ke ufɔkiduŋ emi Christ odude-ke-esit ye ke mme nkɔk Ufɔk Abasi ke ofuri ererimbot.
Afo emema onyuŋ anwam, okop onyuŋ ɔbɔ-ukpep, ekpeme onyuŋ ɔdɔŋesit, ndien ekpep onyuŋ ɔnɔ ikɔ ntiense oto ke odudu Edisana Spirit. Afo emewak editre-udia onyuŋ ɔbɔŋ-akam, enyene iwuk ke nsuhɔre-idem, atuak-ada ke mbuɔtidem ke Christ, “ekesim ediyɔhɔ ukpɔŋ [fo] ye idara ye idorenyin, edi ntre, kpa ekesim eriyet ye erinam-esit [mbufo] asana, erinam-asana otode ke ediyak esit [mbufo] nnɔ Abasi.”24
Enwɔŋɔ ye Ikɔ-ntiense
Mbon eke akpatre wagon oro, kpukpru mbon emi enyenede ufɔn, ye mbufo eke mfin emi eke esinde-ifik eka iso ke usuŋ utom mbufo edi ɔsɔŋɔ enɔ mfiak-men-ndi Ufɔk Abasi Andinyaŋa. Ndien nte Abasi ɔkɔŋwɔŋɔke, “eyeyarare enyuŋ ebono kpukpru mme ebekpo ye ukara, ubɔŋ ye odudu enɔŋ mbon emi esɔŋɔke eda ke ikɔ Abasi Jesus Christ.”25
Ami medara ndi ntiense nte ke Ete Heaven ye Edima Eyen edu uwem ndien eŋwɔŋɔ Mmɔ edi akpanikɔ, ke edisana enyiŋ Ɔbɔŋ Jesus Christ, amen.