Ada Nsaŋa Nnyin Kpukpru Ini
Ami ye afo iminyene ufaŋ ndinyene Edisana Spirit nte nsaŋa nnyin ke kpukpru ini.
Ndima nditɔ eka iren ye iban, ke mbono emi edidiɔŋ nnyin ye ɔyɔhɔ ɔyɔhɔ ediyarede. Mme isuŋ-utom Ɔbɔŋ Jesus Christ etiŋ mme ikɔ ndien eyetiŋ mme ikɔ akpanikɔ, ikɔ ndɔŋ-esit, ye nda-usuŋ.
Ami mekop inem oto ke mme ikɔ ntiense enɔde ke mbono emi ete ke Abasi esitiŋ ikɔ ɔnɔ nnyin oto ke Edisana Spirit. Nte nnyin ibɔŋde-akam ndien ekem inam ŋkpɔ oto mme ntuuk eke Spirit, nnyin imibɔ akamba ifiɔk ye edidiɔŋ ndikpeme nnyin ke mme mkpɔsɔŋ usen emi odude kiso.
Nnyin imifiak ikop President Russell M. Nelson akpande nnyin ete “ke mme usen edidide, idimemke ndidu uwem ke spirit ke ukpeme, ndausung, ndiwut, ndɔŋ-esit, ye ada nsaŋa kpukpru ini eke Edisana Spirit miduhe.”1
Ikpan eke prophet oro anam mi nkere mbaŋa se ami ndikpepde nditɔ, nditɔ-nditɔ, ye nditɔ-eyeyen mi kabaŋa nte edinyenede akpan ndausuŋ ke mkpɔsɔŋ usen emi edide kiso mmɔ.
Ntre emi edi ekpri leta nnɔde esɔk nsuhɔ-ubon miemi ekemede edinwam mmɔ kini ami miduhe ye mmɔ ke mme inem usen emi edide kiso. Ami nyom mmɔ ediɔŋɔ se ami nkedidiɔŋɔ emi ekemede ndinwam mmɔ.
Ami meditim mfiɔk se ediyomde mmɔ ndinyene ntuk eke Edisana Spirit kpukpru ini ke mme usen emi mmɔ edidude mi. Ndien ami moyom nditiŋ mfin emi mbaŋa ifiɔk mi ke ndikot Edisana Spirit, ke nte Ami nkemede, ete edi ada nsaŋa mi kpukpru ini. Akam mi edi yak ami nkeme edinɔ mmɔ nsɔŋɔ-idem.
Ami nyedɔŋ mmɔ nte ekere enyuŋ ebɔŋ-akam ebaŋa mme nditɔ iren Helaman, Nephi ye Lehi, ye mme isuŋ-utom Jehovah efen emi enamde utom ye mmɔ. Mmɔ ema ekut ɔkpɔsɔŋ eŋwan. Mmɔ ekenam utom ke ebiet ibak ndien akana nte mmɔ eyɔ mme ata idiɔk nkari. Ami mokop nsɔŋɔ, afo nko emekeme ndikop, nto ufaŋ kiet emi ke mbuk Helaman:
“Ndien ke ɔyɔhɔ isua Ata ye duop ye usukkiet ɔkpɔsɔŋ eŋwan ɔtɔŋɔ ndidu. Edi edikem ete ke Nephi ye Lehi, ye ediwak nditɔ eka mmɔ iren emi ekefiɔkde ebaŋa mme akpanikɔ ke ukpep-ŋkpɔ, ke ekebɔde ediwak ediyarare ke usen ke usen, ke ntak oro mmɔ ema ekwɔrɔ ikɔ enɔ mme owo, tutu ete ke mmɔ ema etre eŋwan mmɔ kpa ke isua oro.”2
Mbuk emi ɔnɔ mi nsɔŋidem, afo nko emekeme ndikop nsɔŋidem. Edi ediwak ebuana ye Edisana Spirit ekekpep enyuŋ eda nditɔ iren Helaman usuŋ. Emi anam mi mfiɔk nte ke imikeme ndikpep nto Spirit udim ke udim, ibɔ se iyomde, ndien ke ini nnyin ibeŋede idem, nnyin iyibɔ se iwakde ikan oro.
Ami mɔbɔ nsɔŋɔ ke ukem usuŋ oro nto mbuk Nephi emi ekedɔhɔ ete afiak aka Jerusalem ɔkɔbɔ mme usan Laban. Afo emeti mbumek emi enye akanamde. Enye ama odoho ete, “Ami nyaka nkanam mme nkpɔ emi Jehovah ɔnɔde uyo.”3
Ifiɔk Nephi ye Edisana Spirit ke utom oro ɔnɔ mi nsɔŋɔ ediwak ini ke ini nyomde ndinam mme utom emi ami mfiɔkde ke eto Jehovah edi emi ekponde ekan ifiɔk mi ke edem ye se ami mfiɔkde nte ukeme mi.
Emeti se Nephi eketiŋde abaŋa ifiɔk oro: “Ndien ekedi ke okoneyo; ndien ami nnam [nditɔ eka mi iren] edibe ke edem ibibene. Ndien ke ini mmɔ ema ekedibe, ami, Nephi, nyɔni nduk obio oro nyuŋ nka nnen nnen ke ufɔk Laban.”
Enye aka iso ɔdɔhɔ ete, “Ndien edi Spirit akada mi usuŋ, ke me nkɔfiɔkke mme ŋkpɔ emi anade nte nnam.”4
Ami menyene nsɔŋɔ ke mfiɔkde nte ke edi Spirit akada Nephi usuŋ ke minute ke minute ke okoneyo oro ke utom Jehovah.
Nnyin imiyom, afo nko eyeyom, ada nsaŋa eke Edisana Spirit kpukpru ini. Idahaemi nnyin imiyom enye, edi nnyin imifiɔk ito ebuana nnyin ite ke imemke ndinyene. Nnyin kiet kiet imekere inyuŋ iting inyuŋ inam mme ŋkpɔ ke mme uwem nnyin emi ekemede ndidue Spirit.
Ke ini oro etibede, nte editibede, nnyin imikeme ndikop ke Jehovah inyimeke. Ndien nnyin imikeme ndikere ke nnyin idu ikpɔŋ. Edi akpan-ŋkpɔ nditi akpan eŋwɔŋɔ emi nnyin ibɔde ke udua ke udua nte nnyin ikabarede esit inyuŋ idia udia Ɔbɔŋ, “Man mmɔ ekpenyene Spirit esie edidu ye mmɔ.”5
Edieke mbufo ekopde odudu Edisana Spirit mfin emi, mbufo eyeda oro nte inem idiɔŋɔ ke Erisio-isop anam utom ke uwem mbufo.
Nte Elder Jeffrey R. Holland etiŋde: “Ini kiet ekededi emi mme ɔkpɔsɔŋ ini emi edide, inaha nte nnyin iyak idem inɔ ndik ite ke Abasi adaha ɔkpɔŋ nnyin mme ke Enye ikopke mme akam nnyin. Enye ke akpanikɔ okop nnyin. Enye ke akpanikɔ okut nnyin. Enye ke akpanikɔ ama nnyin.”6
Nsɔŋɔ oro aŋwam mi. Ke ini nkerede ke mediaŋare mkpɔŋ Abasi, ke ini mme ibɔrɔ akam mi ebiet isɔpke idi, ami mekpep nditiene item President Nelson ke ndiduŋɔre uwem mi mbaŋa mme ufaŋ ndikabare esit. Enye eti nnyin ete ke, “Ndikabare esit ke usen ke usen edi usuŋ edisana, ndien edisana ada odudu edi.”7
Edieke okutde idem fo nte enyenede mfina ndikop ntuk eke Edisana Spirit, afo emekeme ndikere mbaŋa me odu ŋkpɔ ndomo kiet emi afo ekemede edikabare esit abaŋa man ɔbɔ erifen nnɔ.8 Afo emekeme ndibɔŋ akam ye mbuɔtidem man ɔfiɔk se anade nte anam man asana ndien etim odot ndinyene ada nsaŋa Edisana Spirit oro kpukpru ini.
Edieke afo oyomde ndinyene ada-nsaŋ eke Edisana Spirit, ana nte oyom enye ɔnɔ mme eti ntak. Mme ntak fo ana edi mme ntak Jehovah. Edieke mme ntak fo edide eke unyim, eyesɔŋ fi idem ndibɔ nyuŋ ŋkop mme ntuk eke Edisana Spirit.
Akpan usuŋ okim ye okuu edi ndiyom se Andinyaŋa oyomde. Ana nte mme ntak edi eto edisana ima Christ. Mme akam nnyin ana nte edi “Kpukpru se ami nyomde edi se afo oyomde. Yak edi nte uduak fo edide.”
Ami modomo nditi uwa Andinyaŋa ye ima Esie ye ami. Ndien, ke ini mbɔŋde akam nnɔ Ete ke Heaven ndinɔ ekɔm, ami nkop ima ye ndɔŋ-esit nte ke ekop mme akam mi ndien ke nyebɔ se ifɔnde ikan inɔ mi ye mbon eke ami mmade. Enye ɔsɔŋɔ ikɔ ntiense mi.
Kabaŋa kpukpru mme ŋkpɔ emi Edisana Spirit etiede ntiense, enye emi ɔfɔnde akan ɔnɔ nnyin edi ke Jesus edi Christ, odu uwem Eyen Abasi. Andinyaŋa ama ɔŋwɔŋɔ ete, “Ke ini Iberedem edide, emi ami ndinɔde mbufo nto Ete, kpa Spirit akpanikɔ, emi otode ke Ete ɔwɔrɔ, enye eyedi ntiense ɔnɔ mi.”9
Ke mme ediwak isua emi ekebede ami mma mbɔ ikot ke phone nto eka emi ekenyenede mfina. Enye ama ɔdɔhɔ mi ete ke eyen aŋwan esie ama aka anyan ɔkpɔŋ ufɔk. Enye ama ekere oto ekpri ebuana emi enye ekenyenede ye eyen esie ete ke akamba idiɔk ŋkpɔ ama etibe. Enye ama ebeŋe ete yak ami mwam.
Ami mma nyom mfiɔk owo emi ekedide andikpep ke ufɔk eyen esie. Afo emekeme editiŋ ke enyiŋ oro ete ke ekedi ke anyan ini ko. Ami mmakot enye. Enye ekedi eyen-ɔwɔŋ. Edi enye ama ɔdɔhɔ mi ete ke enye ye ada nsaŋa esie mbiba ema edemede ke okoneyo ebaŋa eyen aŋwan oro enyuŋ enyene ntuk ete ke enye okoyom ndinam edimek emi edidade mfuhɔ ye ukut idi. Ye ntuk Spirit kiet oro, mmɔ ema eka ndikise enye.
Ke akpa enye ikiyomke ndidɔhɔ mmɔ mbaŋa idaha esie. Otode ntuuk-spirit, mmɔ ema ekpe enye ubɔk ete akabare esit onyuŋ emek usuŋ emi Jehovah enyenede ɔnɔ enye. Enye okut ndien, mekere oto ke Spirit, ete ke nkukure usuŋ emi mmɔ ekefiɔkde se mmɔ ekefiɔkde ebaŋa uwem esie okoto Abasi. Eka eyen ama ɔŋwɔŋɔre mme ima ekikere esie ɔnɔ Ete ke Heaven ye Andinyaŋa. Ema enɔ Edisana Spirit esɔk mme andikpep ke ufɔk oro koro mmɔ ema eyom ndinam utom nnɔ Abasi. Mmɔ ema ekop item ye eŋwɔŋɔ emi ekutde ke Doctrine ye mme Covenant:
“Eyak esit mbufo ŋko ɔyɔhɔ ye ata-ima ɔnɔ ofuri owo, ye mbon ufɔk mbuɔtidem, ndien yak nti-ido eyɔhɔ ekikere mbufo kpukpru ini; do ke uko mbufo edisɔngɔ ke iso Abasi; ndien ukpep-ŋkpɔ idaha itie oku eyeduhɔre ke ukpɔŋ mbufo nte mme mbara otode heaven.
“Edisana Spirit eyedi ada nsaŋa mbufo kpukpru ini, ndien esaŋ mbufo edi esaŋ nnen nnen ido ye akpanikɔ emi mikpuhɔke; ndien ubɔŋ mbufo eyedi ubɔŋ ke nsi nsi, ndien idihe ke edikpak enye etiene mbufo ke nsi nsi ye ke nsi nsi.”10
Ami metie ntiense nte ke Jehovah anam eŋwɔŋɔ Esie. Enɔ Edisana Spirit esɔk mbon enamde akpanikɔ eke Ufɔk Abasi Jesus Christ. Idahaemi mme ifiɔk mbufo eyedi saŋa saŋa, ndien Spirit ayada usuŋ ke usuŋ emi ɔfɔnde ye mbuɔtidem ye ukeme mbufo ndibɔ ediyarare nnɔ mbufo ye mbon emi mbufo emade enyuŋ enamde ŋkpɔ enɔ. Ami mbɔŋ akam ye ofuri esit mi nte yak idorenyin mbufo ɔkɔri.
Ami metie ntiense nte ke Abasi Ete odu uwem. Enye ama mbufo. Enye okop kpukpru akam mbufo. Jesus Christ ama ɔbɔŋ akam ɔnɔ Ete ete ɔnɔ Edisana Spirit nte ada usuŋ, iberedem, ndien etie ntiense abaŋa akpanikɔ ɔnɔ nnyin. Ete ye Edima Eyen Esie ema ewut Joseph Smith idem ke iŋwaŋ eto. Prophet Joseph Smith akakabare Ŋwed Mormon oto ke enɔ ye odudu Abasi.
Mme isuŋ-utom Heaven ema efiak emen mme ukpɔhɔre itie oku edi. President Russell M. Nelson edi prophet Abasi ɔnɔ ofuri ererimbot.
Nte ntiense Jesus Christ, ami mɔfiɔk ke Enye odu uwem ndien Enye ada Ufɔk Abasi Esie usuŋ. Ami ye mbufo iminyene ufaŋ ndinyene Edisana Spirit nte ada nsaŋa nnyin kpukpru ini ye ndinyene mme akpanikɔ oro emi esɔŋɔde enɔ nnyin nte nnyin itide inyuŋ imade Andinyaŋa, ikabare esit, inyuŋ ibeŋe ima Esie ndidu ke mme esit nnyin. Ami mbeŋe yak nnyin idinyene edidiɔŋ oro ye ada-nsaŋa Edisana Spirit mfin emi ye ke ofuri usen uwem nnyin. Ami mema mbufo. Ke edisana enyiŋ Jesus Christ, amen.