Odudu Edidian-kiet
Odudu edidian-kiet anam owo ɔbɔ erinyaŋa ye edimenede ufɔkemana ke ofuri ererimbot odu ɔnɔ nditɔ Abasi.
Ema etetiŋ prophecy tɔŋɔ ke mme eyo Isaiah1 ete mme ekpere edem usen, mbon ediomo Abasi eke eset, ufɔk Israel, enyene edi “taŋ mmɔ mbok nto ke mme nsuana ebiet mmɔ, nto mme isuɔ akpa-inyaŋ-ibom, ye ebiet mbinaŋ ke isɔŋ”2 ndien edifiak-emen-edi ke “mme isɔŋ inyene mmɔ.”3 President Russell M. Nelson ama esiwak ndisɔŋɔ ntiŋ mbaŋa ntaŋ-mbok emi, okotde oro “ata akpan-ŋkpɔ emi adade itie mfin ke isɔŋ.”4
Nso idi ufɔn editaŋ-mbok emi?
Ke eriyarare ekenɔde Prophet Joseph Smith, Abasi ama asiak ntak kiet nte ke edikpeme mbon ediomo. Enye ete, “Editaŋ-mbok ɔtɔkiet ke isɔŋ Zion, ye ke mme stake esie, [eyedi] ke ntak ukpeme, ye ubɔhɔ ke oyobio, mkpɔŋ iyatesit kini ediŋwaŋade oro eke mibuak-ke iduɔk ke ofuri isɔŋ.”5 Ekeme edifjɔk “Iyatesit” ke ndaha emi nte ata utip otode akpakip nsɔŋ-ibuot ke edinim mme ewuhɔ ye ibet Abasi.
Ata akpan-akpan, editaŋ-mbok eti ntak edade mme edidiɔŋ eke erinyaŋa-ukpɔŋ ye edimenede esɔk ofuri owo emi edibɔde mmɔ. Oro edi usuŋ nte ibɔde mme enwɔŋɔ ediomo emi ekenɔde Abraham. Abasi eketiŋ ɔnɔ Abraham ete ke otode ke ubon ye itie-oku esie ke, ‘kpukpru mme ufɔkemana ke isoŋ [edi-] bɔ edidiɔŋ, kpa ye edidiↄŋ Ikɔ Abasi, emi edide edidiↄŋ erinyaŋa-ukpɔŋ, ye eke uwem nsinsi.”6 President Nelson edime oro owut ke usuŋ ntem ete: “Ini emi nnyin ibↄde ikↄ Abasi ndien enim nnyin baptism, nnyi imida edisana enyiŋ Jesus Christ idori ke idem nnyin. Uduɔk-mmɔŋ edi inua-otop emi adade ekesim ndikabare mbuana nte adia-akpa ke kpukpru mme enwɔŋɔ eke eset emi Abasi ɔkɔnɔde Abraham, Isaac, Jacob, ye ubon mmo.”7
Ke 1836, Moses ama ɔbiɔŋɔre ɔnɔ Prophet Joseph Smith ke Kirtland Temple onyuŋ “ayak … mme ukpɔhɔde editaŋ Israel mbok ke nkaŋ mbinaŋ ererimbot.”8 Ke ukem edinam oro, Elias ama ɔbiɔŋɔde, onyuŋ “ayak akwa-ini ikɔ Abasi Abraham ɔnɔ, ete ke edi-to ke nnyin ye ubon nnyin ke ofuri emana emi edi-dide ke iso edi-bɔ edidiɔŋ.”9 Ye odudu-unen emi, idahaemi nnyin idida ikɔ Abasi Jesus Christ—eti mbuk erifak otode ke Enye—isɔk ofuri ebiet ye mme owo ke isɔŋ ndien itaŋ kpukpru mbon se inyime isin ke ediomo ikɔ Abasi. Mmɔ ekabare edi “ubon Abraham ye ufɔk Abasi ye obio-ubɔŋ, ye ndimek nditɔ Abasi.”10
Ke ukeme edinam oro ke Kirtland Temple ama, odu isuŋutom heaven ɔyɔhɔ ita emi ɔkɔbiɔŋɔde ɔnɔ Joseph Smith ye Oliver Cowdery. Ami ntiŋ mbaŋa prophet Elijah, ndien oro edi unen ye mme ukpɔhɔde emi enye ekefiakde-emen-edi ke ami nyom editiŋ ikɔ mbaŋa mfin emi.11 Odudu edisɔŋɔ ofuri mme edinam itie-oku nyuŋ nam mmɔ ebɔp mbiba ke isɔŋ ye enyɔŋ odudu edidian-kiet edi akpan-ŋkpɔ ɔnɔ edibok ye edibeŋe mbon ediomo nim ke ikpehe nkaŋ mbiba.
Ke mme isua eken, Moroni akanam oro anwaŋa Joseph Smith ete ke Elijah eyeda ata-akpan odudu itie-oku edi ete: “Ami nyeyarare Itie-oku nnɔ fi, nto ubɔk prophet Elijah.”12 Edikem Joseph Smith anam anwaŋa ete: “Nsidi ntak edɔŋde Elijah? Koro enye akamade mme ukpɔhɔde unen-odudu ndinam ofuri mme edinam Itie-oku; ndien [ke] minɔhɔ unen oro, udunamke mme edinam oro ke edinen-ido,”13—oro edi, ke mme edinam oro idifɔn-ke ke ini ye ke nsinsi.14
Ke ukpepŋkpɔ emi esɔŋɔke-enim idahaemi nte ŋwed Abasi ke Doctrine ye Covenants, Prophet ete, “Ekeme ndidi ata ɔkpɔsɔŋ ukpep ke nnyin itiŋ inɔ ubak owo—odudu emi ewetde mme ebɔpde ke isɔŋ ye ebɔpde ke enyɔŋ. Nte ededi, ke ofuri emana ererimbot, ini ekededi emi Abasi ɔnɔde ini-emana eke itie-oku esɔk erenowo ekededi ke ata eriyarare, mme ɔnɔde eboho irenowo ekededi, esinɔ odudu emi ke kpukpru ini. Ntem, se ededi emi irenowo oro enamde ke unen, ke enyiŋ Abasi, enyuŋ enehede enam oro ye mbuɔtidem, ndien enim nnen-nnen ye nti ŋwed ŋkpɔ oro, enye akabare edi ibet ke isɔŋ ye enyɔŋ, ndien owo ikemeke edibiat enye, nte asaŋade ke mme ewuhɔ eke akwa Jehovah.”15
Nnyin imisikere ibaŋa odudu edidian-kiet nte ke edi ɔnɔ ubak mme edinam temple, edi unen oro edi man enam edinam ekededi ɔsɔŋɔ onyuŋ ɔbɔbɔ ebe mkpa.16 Odudu edidian-kiet ɔnɔ nnen-nnen unyime ke baptism fo, nte uwutŋkpɔ, man otodo ediɔŋɔ oro mi ye ke heaven. Ke akpatre, enam kpukpru mme edinam itie-oku kidak ukpɔhɔde eke Adaibut Ufɔk Abasi, ndien nte President Joseph Fielding Smith akanamde anwaŋa ete, “Enye [Adaibuot Ufɔk Abasi] ama ɔnɔ nnyin unen, enye ama esin odudu edidian-kiet ke itie-oku oro, koro enye mme ukpɔhɔde oro.”17
Odu akpan ntak efen ke editaŋ Israel mbok emi enyenede ufɔn kini nnyin itiŋde ibaŋa edidian ke isɔŋ ye ke enyɔŋ—oro edi edibɔp ye edinam-utom eke mme temple. Nte Prophet Joseph Smith anamde anwaŋa ete: “Nsidi ufɔn editaŋ … ikɔt Abasi mbok ke emana ekededi ke ererimbot? Akpa ntak ekedi ndibɔp ufɔk nnɔ Abasi emi Enye ekemede eriyara mme edinam ke ufɔk Esie nnɔ ikɔt Esie ye mme ubɔŋ eke obio-ubɔŋ Esie nyuŋ mkpep mme owo usuŋ erinyaŋa-ukpɔŋ, koro odu me saŋa-saŋa edinam ye ukpep emi, kini ekpepde enyuŋ enamde mmɔ, enyene ndinam ke ebiet mme ufɔk emi ekebɔpde enɔ ke ntak oro.18
Ufɔn emei odudu-edidian-kiet ɔnɔde mme edinam itie-oku esine, nte ededi, mme nda-nnɔ edinam enamde ke ebiet emi Abasi osiode-enim—ke temple Esie. Mi ke nnyin ikut ubɔŋ ye edisana-ndaha eke odudu edidian-kiet—oro anamde erinyaŋa ye edimenede eke owo kiet-kiet ye ufɔkemana ke ofuri ererimbot odu ɔnɔ nditɔ Abasi ke ebiet ye ini ekededi emi mmɔ enyenede ye eduŋde ke isɔŋ. Iduhe ukpepŋkpɔ ikɔ Abasi mme eke mbufiɔk-owo mme odudu ekemede edikan oruk ofuri eti-ifet emi. Odudu edidian-kiet edi mfɔn-ma idiɔŋɔ eke utip-ikpe, mbɔm, ye ima eke Abasi.
Ye edinyene odudu edidian-kiet emi, esit nnyin ɔwɔŋɔre ebine mbon emi ekebede efep. Ekpere-dem usen ntaŋ-mbok emi nsin ke ediomo edisaŋa-ebe ke ikpehe. Ke mfɔn-ma ubono-ŋkpɔ eke Abasi, odu-uwem ikemeke edinyene uyɔhɔ nsinsi uwem ke minamke edibighe ediyire nkesim “mme ete,” mbon ntɔŋɔ ubon nnyin. Ukem oro, nkɔri mbon emi ebemde-iso edun ke nkaŋ oko, mme ekemede edibe ikiduk ikpehe mkpa ke minamke edidian-kiet, idikemke ibɔhɔke nda-nnɔ edinam edibɔp mmɔ adian nnyin, ubon mmɔ, ye nnyin ɔnɔ mmɔ ke edisana ubono-ŋkpɔ.19 Ekeme edikot nsinifik man enwam kiet eken edibe ke ikpehe nte ediomo enwɔŋɔ, ubak ŋkpɔ eke obufa ye nsinsi ediomo. Ke mme ikɔ Joseph Smith, nnyin iyom ete “edian mme akpa-mkpa nnyin man ediwɔrɔ idi [ye nnyin] ke akpa eriset.20
Mkpon-nkan ye nsana-ma idiɔŋɔ eke odudu edidian-kiet edi nsinsi ebuana eke erenowo ye ŋwan ke ndɔ ye ediyiit ubonowo ke oduri mme emana mmɔ. Sia unen man enam mme edinam emi enehede asana, Adaibuot Ufɔk Abasi esinyime edideme utom emi nnɔ mbon efen. President Gordon B. Hinckley eketiŋ ke ndaha kiet ete, “Ami metiŋ ke ediwak ini nte edieke udori efen miduhe oto ke ofuri mfuhɔ ye ukut ye ubiak eke edifiak-men-ndi akan odudu edidian-kiet eke edisana itie-oku emi edibɔpde mme ufɔkemana ɔtɔkiet ke nsinsi, oro eyekem ke ofuri ufen oro.”21
Ke mme edidian-kiet emi enimde nsinsi ufɔkemana ndien eyit mme emana mi ye ebede mi, nnyin ikpiduhe ke nsinsi inana oruŋ ye nkɔk—oro edi, inyeneke ntɔŋɔ ye nsuhɔ-ubon. Edi ukpɔk, ndaha unana-ebuana eke owo kiet-kiet, ke ndaha kiet, mme ediyiri emi abiatde ebuana ndɔ ye ufɔkemana emi Abasi ekenimde,22 ke ndaha eken, ekpedibiat ata ntak emi ekebotde isɔŋ. Nte oro akpakabare edi ido, oro ɔkpɔwɔrɔ ke edimia isɔŋ ye isuŋi mme edidu ke “ata nsobo” kini Jehovah edidide,23
Nnyin imikeme edikut ntak emi Abasi ekenimde “ndɔ ke ufɔŋ erenowo ye ŋwan ye nte ufɔkemana edide akpan-ŋkpɔ ke uduak Andibot ɔnɔ nsinsi akaŋa eke nditɔ Esie.”24 Ke ukem ini oro, nnyin iti ete ke ndaha unana mfɔn-ma ini emi, ke emi idige ntre mme kpa ediwɔrɔ ntre nnɔ ubakowo. Edi nnyin iminyene idorenyin ke Christ. Kini nnyin itiede ibet Abasi, President Russell M. Neldson editi nnyin ete ke “ŋwed Abasi ye mme prophet ekpere-edem usen esɔŋɔ ke kpukpru owo emi enamde enyuŋ enimde ediomi ikɔ Abasi eyenyene ufaŋ edimenede.”25
Ubakowo ekut ndaha unana-inemesit ye unana-emem ke ufɔkemana enyuŋ ekop esisit udɔŋ enɔ edinyene ebuana ufɔkemana. Elder David A. Bednar ɔnɔ ifiɔk emi ete: “Eke mbufo emi ekopde ubiak uwɔrɔ-ndɔ ke ufɔkemana fo mme ekopde ubiak eke mbiara iberedem, mbɔk ti [ke ubono-ŋkpɔ emi Abasi enyenede ɔnɔ mme ufɔkemana] afiak ɔtɔŋɔ ye afo! Ekeme edidi uruk kiet ke ekeyitde mme emana fo ama ekibi, edi mme ndinen uyiri eken ye se isuhɔde ke uruk oro osuk enyenyene ufɔn ke nsinsi. Afo emekeme edidian ɔsɔŋɔ nnɔ uruk mbufo ndien okposuk edi kpa unwam man ediɔŋ mme nkibede uruk oro. Eyenam utom oro kiet-kiet ekure.”26
Ke edinam edibuk eke Sister Pat Holland, ŋwan Elder Jeffrey R. Holland, ke ɔfiɔŋ July emi ekebede, President Russell M. Nelson ekekpep ete: Ke edikem ini, Patricia ye Jeffrey eyefiak ekediana-kiet. Ekem eyedian mmɔ ye nditɔ mmɔ ye mme enim-ediomi ubon mmɔ man enyene ɔyɔhɔ idara ke Abasi enimde ɔnɔ nti nditɔ Esie. Sia idiɔŋɔke oro, nnyin imifiɔk ke ata akpan usen ke uwem Patricia ikidige usen emana mme usen mkpa esie. Ata akpan usen esie ekedi June 7, 1963, kini ekediande enye ye Jeff ke St. George Temple. … Nsidi ntak emi edide ata akpan-ŋkpɔ? Koro ata akpan ntak ekebotde isɔŋ enɔ ekedi man ekeme edinim nyuŋ ndian mme ufɔkemana nnɔ kiet eken. Kini erinyaŋa-ukpɔŋ edide ŋkpɔ idem owo kiet, edimenere ke enyɔŋ edi ŋkpɔ ufɔkemana. Iduhe owo eke edimenede enye ikpɔŋ.”
Ibihike, ami ye ŋwan mi ima ibuana ke edima ufan kiet ke ubet-ufɔk edidian-kiet eke Bountiful Utah Temple. Akpa ini nkekutde ufan emi ekedi kini enye ekedide eyen-ɔwɔŋ ke Córdoba, Argentina. Nsaŋa ukwɔrɔ-ikɔ mi ye ami ikosobo ye mme owo ke mbɔhiduŋ kiet emi okodude ekpere mission office nnyin, ndien enye ekeberede usuŋ kini nnyin ikekade ufɔkiduŋ esie. Ke edikem ini, enye ye eka esie ye nditɔ-eka esie ema eduk Ufɔk Abasi, mmɔ esuk edi-di mbon ufɔk Abasi. Idahaemi enye edi ediye ŋwan, ndien ke usen emi nnyin ikodu ke temple man edian ete ye eka esie emi ekekpade enɔ kiet eken ndien ekem edian enye enɔ mmɔ.
Ebe ye ŋwan emi ke ediwak isua ema ekabare edi nti ufan edade-enɔ ete ye eka mmɔ ke altar. Ekedi inem ŋkpɔ kiet emi akakabare enem kini ekediande ufan Argentina nnyin enɔ ete ye eka esie. Nnyin owo itiokiet kpɔt ikodu ke ndobo uwemeyo emi ikpɔŋde ererimbot, ndien edi kiet kotu ata akpan ŋkpɔ emi akananam akadade itie ke isɔŋ kini eketibede. Esit ama enem mi koro utom ye ebuana mi ama ɔyɔhɔ oto ke edikɔŋ enyin-usuŋ nte ekpri ɔkwɔrɔ-ikɔ edisim idahaoro, ediwak isua emi ekebede, ndinam mme edinam edidian-kiet emi eyitde enye ɔnɔ ete yeka esie ye mme emana emi ekebede.
Emi edi edinam adade-itie kpukpru ini ke ofuri ererimbot ke mme temple. Emi edi akpatre ŋkpɔ ke editaŋ mbon ediomo mbok. Oro edi mkpon-nkan ufaŋ ɔnɔ mbufo edidi mbon Ufɔk Abasi Jesus Christ. Ami ŋwɔŋɔ ke nte afo enehede oyom ufaŋ oro, kini mme ke nsinsi oro eyenehede edi okim.
Ami ntiŋ ikɔ ntiense ke ema edifiak nnɔ odudu edidian-kiet ye unen edi isɔŋ otode ke Joseph Smith edi akpanikɔ, ke ndien se ebɔpde ke isɔŋ ke enehede ebɔp ke heaven. Ami ntiŋ ikɔ ntiense ke President Russell M. Nelson, nte President Ufɔk Abasi, edi owo kiet ke isɔŋ mfin emi otode ke ukpɔhɔde esie eteme usuŋ nte edikamade edisana odudu emi. Ami ntiŋ ikɔ ntiense ke Erisio-isop Jesus Christ anam emem uwem-unana-mkpa odu ye ukeme edimenede ebuana ufɔkemana edi akpanikɔ. Ke enying Jesus Chrst, amen.