1 Ndien idahaemi ami, Jacob, mfiak ntiŋ nnɔ mbufo, ndima nditɔ eka mi iren, mbaŋa edinen ŋkɔk emi ami nketiŋde mbaŋa.

2 Koro sese, mme eŋwɔŋɔ emi nnyin ibɔde edi mme eŋwɔŋɔ ɔnɔde nnyin ke obukidem; ke ntre, nte ekewutde mi ete ke ediwak nditɔ nnyin eyetak ke obukidem ke ntak unana edinim, edi, Abasi eyenyene mbɔm abaŋa ediwak; ndien eyefiak enim nditɔ nnyin ke itie, man mmɔ ekpetiene enye emi edinɔde mmɔ ata akpanikɔ mbaŋa Andifak mmɔ.

3 Ke ntre, nte ami nketiŋde nnɔ mbufo, ɔfɔn ete ke ana Christ—koro ke akpatre okoneyo angel oro ama ɔdɔhɔ mi ete ke emi edidi enyiŋ esie—ana edi ke ufɔt mme Jew, ke ufɔt mme owo ediɔkde ekan ke ererimbot; ndien mmɔ eyewot enye ke cross—koro ntem ɔfɔn Abasi nnyin, ndien idut efen iduhe ke ererimbot emi ediwotde Abasi mmɔ.

4 Koro edieke enamde mme ikpɔ utibe ŋkpɔ emi ke mme idut efen mmɔ eyekabade esit, enyuŋ efiɔk ete ke enye edi Abasi mmɔ.

5 Edi ke ntak mme ifɔt ye mme ukwaŋ-ŋkpɔ, mmɔ emi edude ke Jerusalem eyesɔŋ itɔŋ mmɔ ye enye, man ewot enye.

6 Ke ntre, ke ntak mme ukwaŋ-ŋkpɔ mmɔ, mme nsobo, mme akaŋ, mme udɔŋɔ, ye uduɔk iyip eyesim mmɔ; ndien mmɔ emi owo midisoboke eyesuan mmɔ ke kpukpru mme idut.

7 Edi sese, ntem ke Jehovah ɔdɔhɔ: Ke ini usen oro edide emi mmɔ edibuɔtde idem ye ami, ete ke ami ndi Christ, ndien ke ami nkenam ediomi ye mme ete mmɔ ete ke eyefiak enim mmɔ ke itie ke obukidem, ke ererimbot, ke mme isɔŋ inyene mmɔ.

8 Ndien eyedikem ete ke eyetaŋ mmɔ edi eto ke edisuan emi ekesuande mmɔ ke anyan ini, eto mme isuo inyaŋ, ye ke mme mbaŋ ererimbot inaŋ; ndien mme idut Gentile eyekpon ke enyin mi, Abasi ɔdɔhɔ, ke ndimen mmɔ ŋka mme isɔŋ inyene mmɔ.

9 Iŋ, ndidem mme Gentile eyedi mme ete edibɔkde inɔ mmɔ, ndien mbɔŋ iban mmɔ eyedi mme eka edibɔkde; ke ntre, mme eŋwɔŋɔ Jehovah ekpon enɔ mme Gentile, koro enye ama etiŋ ntre, ndien anie owo ekeme ndineni?

10 Edi sese, isɔŋ emi, Abasi ɔdɔhɔ, eyedi isɔŋ inyene mbufo, ndien eyediɔŋ mme Gentile ke isɔŋ emi.

11 Ndien isɔŋ emi eyedi isɔŋ uwɔrɔ ufin ɔnɔ mme Gentile, ndien edidem ididuhe ke isɔŋ oro, emi edimekde inɔ mme Gentile.

12 Ndien ami nyesɔŋɔ isɔŋ emi mbaŋa kpukpru mme idut efen.

13 Ndien owo emi anwanade ye Zion ayatak, Abasi ɔdɔhɔ.

14 Koro owo emi osiode edidem ete anwana ye ami ayatak, koro ami, edidem heaven, nyedi edidem nnɔ mmɔ, ndien nyedi unwana nnɔ mmɔ ke nsinsi, emi okopde mme ikɔ mi.

15 Ke ntre, ke ntak emi, man mme ediomi mi osu emi ami ŋkanamde nnɔ nditɔ owo, nte ke ami nyenam nnɔ mmɔ ke ini mmɔ edude ke obukidem, ami ana nte mbiat mme utom ekim, ye mme uwot owo, ye mme mbubiam.

16 Ke ntre, owo emi anwanade ye Zion, Jew ye Gentile mbiba, ifin ye eyen isɔŋ mbiba, erenowo ye ŋwan mbiba, eyetak; koro mmɔ edi mmɔ emi edide mme akpara ererimbot; koro mmɔ emi midaha ye ami edi asua mi, Abasi nnyin ɔdɔhɔ.

17 Koro ami nyenam mme eŋwɔŋɔ mi emi ami ŋkanamde nnɔ nditɔ owo, nte ke ami nyenam nnɔ mmɔ ke ini mmɔ edude ke obukidem—

18 Ke ntre, ndima nditɔ eka mi iren, ntem ke Abasi nnyin ɔdɔhɔ: Ami nyenam ukut oto ke ubɔk mme Gentile esim ubon mbufo; edi, ami nyenam esit emem mme Gentile, man mmɔ edi nte ete enɔ mmɔ; ke ntre, eyediɔŋ mme Gentile enyuŋ ebat mmɔ esin ke ufɔk Israel.

19 Ke ntre, ami nyesio isɔŋ emi nnim nnɔ ubon mbufo, ye mmɔ emi edibatde isin ke ubon mbufo, ke nsinsi, nte isɔŋ inyene mmɔ; koro enye edi isɔŋ emi emekde, Abasi ɔdɔhɔ mi, ekan kpukpru mme isɔŋ efen, ke ntre ami nyeyom nte kpukpru owo emi edude do yak mmɔ ekpono mi, Abasi ɔdɔhɔ.

20 Ndien idahaemi, ndima nditɔ eka mi iren, sia ikutde ite ke enyene mbɔm Abasi nnyin ɔnɔ nnyin akamba ifiɔk kabaŋa mme ŋkpɔ emi, yak nnyin iti enye, inyuŋ ikpɔnɔde mme idiɔkŋkpɔ nnyin inim, inyuŋ isukke ibuot nnyin ise isɔŋ, koro owo ibinke nnyin iduɔk; edi, ebin nnyin esio ke isɔŋ inyene nnyin; edi eda nnyin eka isɔŋ emi ɔfɔnde akan, koro Jehovah anam inyaŋ edi usuŋ ɔnɔ nnyin, ndien nnyin idu ke isuo inyaŋ.

21 Edi mme eŋwɔŋɔ Jehovah ekpon ɔnɔ mmɔ emi edude ke mme isuo inyaŋ; ke ntre ke ntak edɔhɔde ete isuo, ana nte okpon akan emi, ndien nditɔ eka iren nnyin ŋko eduŋ ke mmɔ.

22 Koro sese, Jehovah Abasi ada ɔwɔrɔ ke ufɔk Israel ke ini ke ini, nte asaŋade ye uduak ye inemesit esie. Ndien idahaemi sese, Jehovah eti kpukpru mmɔ emi ekebuŋde esio, ke ntre enye eti nnyin ŋko.

23 Ke ntak oro, edaresit mbufo, enyuŋ eti ete ke mbufo emekeme ndinam ŋkpɔ nnɔ idem mbufo—ndimek usuŋ nsinsi mkpa mme usuŋ nsinsi uwem.

24 Ke ntre, ndima nditɔ eka mi iren, mbufo ekpe emem ye uduak Abasi, ekudi ye uduak satan ye obukidem; enyuŋ eti ete, ke ini ema ekekpe emem ye Abasi, ke edi ye ke oto ke mfɔn Abasi ke enyaŋa mbufo.

25 Ke ntre, yak Abasi osio mbufo ke mkpa oto ke odudu eriset ke mkpa, ŋko ye ke nsinsi mkpa ke odudu usio-isop, man ebɔ mbufo esin ke nsinsi obio ubɔŋ Abasi, man mbufo etoro enye ke mfɔn eke Abasi. Amen.