Kere banga Celestial!

Etop otode President Russell M. Nelson

President eke Ufok Abasi Jesus Christ eke mme Latter-day Saint.

Mbumek mbufo edibiere ebiet emi afo ediduŋde ke nsinsi, utɔ idem emi afo edidade iset, ye mbon emi afo edidude kiet ke nsinsi.

Ndima nditɔ-eka iren ye iban, esit enem mi eti eti nditiŋ ikɔ ye mbufo mfin emi. Ke isua emi ami ndide, usen kiet kiet ada ndiye ye mme utibe ŋkpɔ edi. Ke udua ita emi ebede, ami mma nda-unan ke edem. Ke ntre, ke ini edide ke medada ntiŋ mme ikɔ ewakde ekan mme etop mbono Ikie, mfin ami nditetie. Ami mbenge nte yak Spirit edida ikɔ mi esin ke esit mbufo mfin.

Ibiheke ami mma ndara isua 99 tɔŋɔ nkamana ndien mɔtɔŋɔ isua 100 nte odu uwem. Esiwak ndibup mi ndibe ŋkpɔ emi ɔnɔde anyan uwem. Eti mbume ekpedi “Nso ke ami mkpep ke isua uwem ikie?”

Mfin emi ini iyakke mi mbɔrɔ mbume emi ɔyɔhɔ ɔyɔhɔ, edi nyabuana ata akpan ifiɔk kiet emi ami mkpepde.

Ami mekpep nte ke uduak Ete ke Heaven ɔnɔ nnyin ɔsɔŋ ndinim, nte ke se nnyin inamde ke uwem emi edi akpan, ndien ke Mkpa Usio-isop Andinyaŋa edi se inamde uduak Ete etibe.¹

Nte ami nwanade ye ɔkpɔsɔŋ ubiak emi otode unan mi ke usen ifaŋ emi, ami menyene ntɔtuŋɔ ekɔm nnɔ Jesus Christ ye anana ifiɔk enɔ Mkpa Usio-isop Esie. Kere banga oro! Andinyaŋa ama okop “ubiak ye mme ukut ye mme idomo ke utɔ ke utɔ”² man Enye ɔdɔŋ nnyin esit, ɔkɔk nnyin, anyaŋa nnyin ke mme ini unwam.³ Jesus Christ ama etiŋ abaŋa ifiɔk Esie ke Gethsemane ye Calvary: “Ufen emi akanamde mi, kpa Akpa, emi okponde akan kpukpru, enyek idem ke ntak ubiak, onyuŋ ɔwɔrɔ iyip ke ofuri ndudu.”⁴ Unan mi anam mi mfiak nkere mbaŋa “edikpon nkan eke Edisana Owo Israel.”⁵ Ke ini edisɔbɔ mi, Jehovah owut edisana odudu Esie ke mme usuŋ emem ye emi owo mikemeke ndidue.

Ke ntak anana utit Mkpa Usio-isop Jesus Christ, uduak Ete nnyin ke Heaven edi uduak emi ɔfɔnde ama. Ndifiɔk uduak Abasi emi ɔsɔŋde ndinim osio ndedebe ŋkpɔ ke uwem ye unana idorenyin ke ini iso nnyin efep. Enye ayak nnyin kiet kiet imek nte nnyin ididude uwem mi ke isɔŋ ye ebiet emi nnyin ididude ke nsi nsi. Ekikere emi minyeneke iwuk ete yak nnyin “idia, iŋwɔŋ, inyuŋ idara, koro mkpɔŋ nnyin iyikpa; ndien ke eyefɔn ye nnyin”⁶ edi ndisime ekikere kiet emi okponde akan ke ererimbot.

Se akwa etop eke uduak Abasi mi: mme ata ŋkpɔ emi edinamde uwem mkpa fo edi eti uwem emi enye ekemede ndidi edi ata ukem ukem mme ŋkpɔ emi edinamde uwem fo ke ofuri nsi nsi edi eti uwem emi enye ekemede ndidi! Mfin, ndinwam fi man odot ndibɔ mme nti enɔ emi Ete ke Heaven enyenede ɔnɔ fi, ami mokot fi nte anam ido “ekerede abaŋa celestial”!⁷ Ekerede abaŋa celestial ɔwɔrɔ ndikere ke spirit. Nnyin imikpep ito prophet kiet ke Ŋwed Mormon Jacob ite “ke ndidu ke spirit edi uwem nsi nsi.”⁸

Uwem mkpa emi edi akpan ini ndikpep ndimek mme ŋkpɔ emi enyenede nsi nsi ufɔn. Mme ata ediwak owo edu uwem nte ke uwem emi edi ofuri ŋkpɔ. Edi, se afo emekde mfin edida ŋkpɔ ita idi: ebiet emi afo ediduŋde ke ofuri nsinsi, utɔ idem emi afo edidade iset, ye mbon emi afo edidude kiet ke nsinsi. Ke ntre kere banga celestial.

Ke akpa ikɔ mi nte President Ufɔk Abasi, mma mbeŋe mbufo nte yak etɔŋɔ ye utit ke esit. Emi ɔwɔrɔ ndinam obio ubɔŋ celestial edi nsi nsi ekikere mbufo ndien etim ekere ebiet emi edimek mbufo kiet kiet ke ini osuk odude mi ke isɔŋ edidade mbufo ika ke ererimbot emi idikade.⁹

Jehovah etim ekpep aŋwaŋa ete ke edi iren ye iban emi ediande ndɔ nte ebe ye ŋwan ke temple, ye emi enimde mme ediomi mmɔ, edidu kiet ke nsi nsi. Enye ete, “Kpukpru mme ediomi, mme mbubehe, mme edidiana kiet, mme utom, mme eŋwɔŋɔ, mme mkpe-mbiere, mme edinam, mme edidi kiet, mme ebuana, ye mme ekikere, emi midihe emi enamde enyuŋ edukde ke esit ndien edian eto Edisan Spirit eŋwɔŋɔ … enyene utit ke ini mme owo ekpade.”¹⁰

Ke ntre, edieke nnyin ke unana ifiɔk imekde ndinim mme mbet telestial idahaemi, nnyin imek ndidemede ye idem telestial . Nnyin imek nditre ndidu ye mme ufɔk emana nnyin ke nsi nsi.

Ke ntre, ndima nditɔ eka mi iren ye iban, didie ye ke mmɔŋ ŋko ye anie ke mbufo eyom ndidu kiet ke nsi nsi? Ana nte mbufo emek.¹¹

Ke ini mbufo emekde, ami mokot mbufo nte ese ke anyan—nsi nsi edise. Enim Jesus Christ nte akpa, koro uwem nsi nsi mbufo ɔkɔŋɔ ke mbuɔtidem mbufo ke Enye ye Mkpa Usio-isop Esie.¹² Enye ŋko ɔkɔŋɔ ke nkop-item mbufo nnɔ mme mbet Esie. Nkop-item asiak usuŋ ɔnɔ uwem idara mbufo mfin ye akamba, nsi nsi utip mkpɔŋ.

Ke ini mbufo osobode ye nnan-enyin, ekere ebaŋa celestial! Ke ini idomo odomode,ekere celestial! Ke ini uwem mme mbon ima esinde mbufo, ekere ebaŋa celestial! Ke ini owo akpade ke ini mikemke, ekere ebaŋa celestial. Ke ini owo ɔdɔŋɔde ɔkpɔsɔŋ udɔŋɔ emi mimaha nikure,ekere ebaŋa celestial. Ke ini mme mfinam ke uwem eyɔhɔde mbufo idem, ekere celestial! Nte mbufo ebɔhɔde unɔmɔ eke mbuat mme unan, ekere celestial!

Nte mbufo etiŋde enyin ekere ebaŋa celestial, efiɔk ete ke eyekut ubiɔŋɔ.¹³ Ediwak isua emi ekebede, owo itie utom mi kiet ama afaŋa ye ami ke ntak ndinyene “temple awakde akaha” ke idem mi, ndien mme ikpɔ-owo itie utom ema emia mi ufen ke ntak mbuɔtidem mi. Ami mɔfiɔk, nte ke ndikere celestial anwam mi ke utom.

Nte mbufo ekerede ebaŋa celestial, esit mbufo eyekpuhɔ. Mbufo eyeyom ndibɔŋ akam ediwak ini ye ke akpanikɔ. Mbɔk ekuyak mme akam mbufo etie nte ŋwed urua. Usuŋ Jehovah okpon akan ifiɔk ererimbot mbufo. Ibɔrɔ Esie ke mme akam mbufo eyekpa mbufo idem ndien eyenwam mbufo ndikere celestial.

Kere mbaŋa ibɔrɔ Jehovah ɔkɔnɔde Joseph Smith ke ini enye okoyomde uwam ke Liberty Jail. Jehovah ama ekpep Prophet ete ke idiɔk ukama emi enɔde enye eyenɔ enye ifiɔk onyuŋ edi ke ufɔn esie.¹⁴ “Edieke afo ɔyɔde ɔfɔn tutu esim utit,” Jehovah ama ɔŋwɔŋɔ, “Abasi eyemenere fi ke enyɔŋ.”¹⁵ Jehovah ekekpep Joseph ndikere mbaŋa celestial ye ndida nkut nsi nsi utip idihe ndise mme ata mfina eke eyo mfin. Mme akam nnyin ekeme ndidi—ana onyuŋ edi—mme nneme uwem ye Ete nnyin ke Heaven.

Nte mbufo ekerede celestial, mbufo eyekut nte mbufo efepde ŋkpɔ ndomo kiet emi ediyipde ufaŋ ndimek mbufo. Se ekpededi emi emade ekaha—me edi mbre, umia ata ke okuk, isɔn, ibɔk, mmin, iyaresit, use idiɔk ndise, uma owo, mme udia—ayat Abasi esit. Ntak? Koro se emade ekaha akabare edi abasi mbufo. Mbufo ese enye edi idihe Enye eyom emem. Edieke enwanade ye se emade ekaha, eyom unwam eto spirit ye mbon emi efiɔkde. Mbɔk ekuyak se emade ekaha ebɔ mbufo ifet mbufo nditiene uduak Abasi emi ɔsɔŋde ndinim.

Ndikere mbaŋa celestial ŋko ayanam mbufo enim mbet mfara-kidem. Ŋkpɔ ifaŋ edisɔp iifina uwem mbufo ikan ndibiat edisana mbet emi. Kabaŋa mbon emi enamde mme ediomi ye Abasi, idiɔk uwem edi usuŋ emi ekemede ndisɔp nnana ikɔ ntiense mbufo.

Ediwak anana utit idomo andidiɔk edike ndibiat mbet edisana ido. Odudu ndibot uwem edi ifet kiet eke Abasi emi Ete ke Heaven ayakde nditɔ Esie ke ikpɔk-idem ete enam. Ke ntre, Abasi ɔn̄ɔ nnen nnen usuŋ ndikama edisana odu-uwem, odudu emi. Ebuana obukidem edi ɔnɔ eren ye nwan ikpɔŋ emi edɔde ndɔ ye kiet eken.

Ediwak owo ke ererimbot inimke emi ke akpanikɔ, edi se ekerede ke obio idihe akama akpanikɔ. Jehovah ama ɔdɔhɔ ete ke ndedehe owo ndomo kiet ididukke obio ubɔŋ celestial. Ke ntre ke ini anamde mkpe-miere abaŋade edu mfara-kidem, mbɔk kere banga Celestial. Ndien edieke edide ke mbufo isanake, mebeŋe nte yak ekabare esit. Edi etiene Christ enyuŋ ebɔ eŋwɔŋɔ Esie eke ofuri ofuri mfennɔ nte mbufo ekabare esit ke mme idiɔk ŋkpɔ mbufo.¹⁶

Nte mbufo ekerede celestial, mbufo eyekut nte mbufo efepde ŋkpɔ ndomo kiet emi ediyipde ufaŋ ndimek mbufo. Ke ini owo emi mbufo emade awanade ye akpanikɔ, ekere ebanga celestial, ekunyuŋ ukere ubaŋa ikɔ ntiense mbufo . Paul Apostle ama etiŋ nte prophet ete “ke mme ukperedem usen usuk eyewɔrɔ ekpɔŋ mbuɔtidem, ekpaŋ utɔŋ enɔ mme spirit emi etabide ewɔrɔ ekpɔŋ usuŋ, ye mme ukpep-ŋkpɔ mme andidiɔk.”¹⁷

Utit idihe ke mme ŋkari andidiɔk. Mbɔk ebenge idem. Ekubɔ item eto mbon emi mibuɔtke idem. Ebɔ item eto mme uyo emi mbufo efiɔkde—eto mme prophet, mme okut ŋkukut, mme andiyarare ye odu eke Edisana Spirit, emi “ediwutde mbufo kpukpru mme ŋkpɔ emi anade nte mbufo enam.”¹⁸ Mbɔk enam utom spirit man ekɔri ukeme mbufo ndibɔ ediyarare nnɔ idem mbufo.¹⁹

Nte mbufo ekerede ebaŋa celestial, mbuɔtidem mbufo eyekɔri. Ke ini ami nkedide ekpri ekpep-utom, okuk ɔfiɔŋ mi ekedi $15 ke ɔfiɔŋ. Okoneyo kiet, nwan mi Dantzel ama obup mme nyekpe tithe ke ekpri okuk oro. Ami nkekpehe. Ami mma nsɔp nkabare esit nyuŋ ntɔŋɔ ndikpe udiana $1.50 ke tithe ke ɔfiɔŋ.

Ndi Ufɔk Abasi ama ɔkpuhɔ ke ntak emi tithe nnyin okokponde? Iŋ iŋ. Edi, ndikpe tithe ɔyɔhɔ ɔyɔhɔ ama ɔkpuhɔre mi. Ke ini oro ke nkɔfiɔ ke ndikpe tithe abaŋa mbuɔtidem, idihe okuk. Nte ami nkabare ndi ekpe ɔyɔhɔ tithe, mme window heaven ema etɔŋɔ ndiberede nnɔ mi. Ami mbat ediwak edimenere ke itie utom nnɔ nnyin ndikpe tithe ke akpanikɔ.²⁰

Ndikpe tithe oyom mbuɔtidem, ndien enye ŋko ɔsɔŋɔ mbuɔtidem ke Abasi ye Edima Eyen Esie.

Ndimek ndidu edisana uwem ke ererimbot emi enamde uma owo, emi enamde mbre ukara ɔsɔŋɔ mbuɔtidem.

Ndibiat ini ndu ke temple ɔsɔŋɔ mbuɔtidem. Ndien utom mbufo ye edikpono mbufo ke temple eyenwam mbufo ekere ebaŋa celestial. Temple edi ebiet eriyarare. Do ewut mbufo nte edikɔride ika uwem celestial. Do ke edida mbufo esik ekpere Andinyaŋa enyuŋ enɔ akamba usuŋ ndinyene odudu Esie. Do eda mbufo usuŋ ke nte ediyɔde mme mfina ke uwem mbufo, kpa mme mfina emi ekponde ekan.

Mme edinam ye mme ediomi eke temple enyene nsi nsi ufɔn. Nnyin ika iso ibɔp mme temple man enam mme ndisana ufaŋ emi ewɔrɔ eda enɔ uwem nnyin kiet kiet. Nnyin iminem esit ndisian uduak nnyin ndibɔp temple kiet kiet ke mme itie Edip emi:

• Savai’i, Samoa

• Cancún, Mexico

• Piura, Peru

• Huancayo, Peru

• Viña del Mar, Chile

• Goiânia, Brazil

• João Pessoa, Brazil

• Calabar, Nigeria

• Cape Coast, Ghana

• Luanda, Angola

• Mbuji-Mayi, Democratic Republic of the Congo

• Laoag, Philippines

• Osaka, Japan

• Kahulul, Maui, Hawaii

• Fairbanks, Alaska

• Vancouver Washington

• Colorado Springs, Colorado

• Tulsa, Oklahoma

• Roanoke, Virginia

• Ulaanbaatar, Mongolia

Jehovah ada nnyin usuŋ ke ndibɔp mme temple emi man enwam nnyin ikere ibaŋa celestial. Abasi odu uwem. Jesus edi Christ. Efiak emen Ufɔk Abasi Esie edi man edidiɔŋ nditɔ Abasi. Ami ntiŋ ikɔ ntiense emi ke edisana enyiŋ Jesus Christ, amen.

Mkpri nwed

1. Se John 6:38.

2. Alma 7:11.

3. Se Alma 7:12.

4. Ukpep-ŋkpɔ ye mme Ediomi 19:18.

5. 2 Nephi 9:40.

6. 2 Nephi 28:7.

7. Ekeme ndimem ndikabare esit nyuŋ ŋkɔri ke spirit mi, ke ini spirit nnyin odude ye idem nnyin, akan ke ererimbot efen ke ufɔt ini emi nnyin ikpade inyuŋ isetde. Nte Amulek ekekpepde mme Zoramite emi ekewɔrɔde ekpɔŋ usuŋ, “Uwen emi edi ini … ndibeŋe idem ndisobo ye Abasi” (se Alma 34:32–35).

8. 2 Nephi 9:39.

9. See Mosiah 4:30, where King Benjamin admonishes his people, “If ye do not watch yourselves, and your thoughts, and your words, and your deeds, and observe the commandments of God, and continue in the faith … , ye must perish.”

10. Ukpep-ŋkpɔ ye mme Ediomi 14:7; edian mme ikɔ.

11. Ke akpanikɔ, edimek mbufo ikemeke ndikpon nkan edimek owo efen ye se ediwɔrɔde idi. Ami nnehede nyom nte ekpediande mi ye ete ye eka mi. However, I had to wait until they chose to be endowed, when they were more than 80 years of age. Ndien ema edian mmɔ nte ebe nwan, ndien edian nnyin nditɔ enɔ mmɔ.

12. The scriptures repeatedly testify that the gift of eternal life is only possible through the merits, mercy, and grace of the Savior Jesus Christ (see, for example, Moroni 7:41; see also 2 Nephi 2:6–8, 27).

13. Se 2 Nephi 2:11.

14. Se Ukpep-ŋkpɔ ye mme Ediomi 122:7.

15. Ukpep-ŋkpɔ ye mme Ediomi 121:8.

16. Se Isaiah 1:16–18; Ukpep-ŋkpɔ ye mme Ediomi 58:42–43.

17. Udiana Nwed Timothy 4:1. The next verse continues, “Speaking lies in hypocrisy; having their conscience seared with a hot iron” (verse 2). Paul ŋko ama ɔdɔhɔ ete ke owo emi “lodude uwem Abasi ke Christ Jesus eyebɔ ufen ukɔbɔ” (2 Timothy 3:12).

18. 2 Nephi 32:5; edian ikɔ. “Edieke nnyin edibupde, nnyin imikeme “ndibɔ eriyarare ke eriyarare, ifiɔk ke ifiɔk” (Ukpep-ŋkpɔ ye mme Ediomi 42:61).

19. See Russell M. Nelson, “Revelation for the Church, Revelation for Our Lives,” Liahona, May 2018, 96.

20. Emi idihe ndidɔhɔ ke edi ebuana edinam-enyene-se-itienede. Usuk mbon emi mikpehe tithe ekɔri ke itie utom, ke ini usuk mbon mikpehe ikɔrike. Eŋwɔŋɔ edi ete ke mme window heaven eye berede enɔ owo emi ekpede tithe. Mme utɔ edidiɔŋ eyekpuhɔre.