Te Māia Kawenata mā roto i a Ihu Karaiti
Ina tomo atu tātou ki roto i te whare o te Ariki, kia tīmata atu i tētahi haerenga tapu e ako ana me pēhea tātou e meinga hei apataki tiketike ake, hei apataki tapu ake nā te Karaiti.
E aku teina me aku tuāhine i te aroha, einoi ana au kia whakahouhia tātou i te taha wairua e ēnei karere i ō tātou rangatira i tēnei wīkene, ā, kia hari anō i te mea e karangahia nei e tātou ko te “māia kawenata mā roto i a Ihu Karaiti.” Ko tēnei māia, he reo iti, engari he mōhio ki te whiwhinga o ngā manaakitanga e whakaaria mai nei e te Atua ki te hunga e pupuri i ō rātou kawenata, ā, he mea nui tonu i roto i ēnei taumahatanga o ēnei rā.
He nui te hari i puta ai i te hanganga o ngā whare hou a te Ariki huri noa i te ao, i raro i te whakahaere ā-wairua o Tumuaki Russell M. Nelson, i waenganui i ngā mema o te Hāhi, ā, he tohu whakahirahira mō te whakawhānuitanga ake o te kīngitanga o te Ariki.
I ahau e whakaaro ana ki ngā mea i pā ai ki ahau i te whakatapunga o te Temepara ki Feather River California i tērā Oketopa, i te whakaaro au mehemea i ētahi wā ka ngaro tātou nā te nui o te hari i ahu mai ai i ngā temepara hou kua hangaia mō tātou i roto i ō tātou pā me ō tātou hapori, ā, kua kore e huri ngā whakaaro ki ngā take tapu mō ngā kawenata tapu e meatia nei i te temepara.
Kua whakairohia ki te taha whakamua o ngā temepara katoa te kōrero: “Tapu ki te Ariki.” He tono mārama ēnei kupu, ina tomo atu tātou ki roto i te whare o te Ariki, kia tīmata atu i tētahi haerenga tapu e ako ana me pēhea tātou e meinga hei apataki tiketike ake, hei apataki tapu ake nā te Karaiti. I a tātou e meatia ana ngā kawenata i runga i te tapu i te aroaro o te Atua, ā, e oati ana ki te whai i te Kaiwhakaora, ka whiwhi mana tātou kia panoni ai i ō tātou ngākau, ki te whakahou i ō tātou wairua, me te whakahōhonu ake i tō tātou hononga ki a Ia. Mā tēnei momo mahi e puta mai ai tētahi whakatapunga ki ō tātou wairua, ā, ka meatia tētahi hononga tapu ki te Atua rāua ko Ihu Karaiti, e whakaaria mai nei e taea ana te whakawhiwhi i te takoha o te oranga tonutanga. Ko te hua o tēnei haerenga tapu koia ko tā tātou hopu i tētahi māia e tapu ake ana, ā, e tiketike ake ana mō te ia rā, ia rā o ō tātou oranga i roto i ngā kawenata kua meatia nei e tātou mā roto i a Ihu Karaiti.
Ko taua māia te kōtihi o tō tātou hononga ā-wairua ki te Atua, ā, mā konā e āwhina ai i a tātou kia nui ake tō tātou ū, me tō tātou whakawhetai mō, Ihu Karaiti me Tana whakahere whakamārie. Ka whakakaha i tō tātou āheinga ki te aroha me te mahi whakarato ki ētahi atu, ā, e whakakaha ana anō i ō tātou wairua kia noho ai i tētahi ao tapu kore e kaha ake ana te pōuri me te pōuritanga. E whakakaha ana i a tātou kia turaki iho ngā iro rangirua, te wehi me te hōhā, te mamae o te ngākau me te tūmanako kore e ngana nei te hoariri ki te whakauru hōhonu nei ki roto ki ō tātou ngākau, i ngā wā pū anō e uaua ana te ora, e roa ana ngā taumahatanga, ā, e uaua ana rānei ngā āhuatanga. He nui te kupu āwhina i roto i ngā whiti paipera ki a tātou katoa i a tātou e tītaha ana whakatehaukaha i roto i ngā wero o te ao: “Kaua e makaia atu i reira tō māia.”
Kei aku teina me aku tuāhine aroha, ko te hunga e riro pū ai i a rātou te tino māia i roto i te kawenata e meatia nei i roto i te whare o te Ariki mā roto i a Ihu Karaiti, ā, kei a rātou tētahi o ngā mea kaha rawa e riro ai i a tātou i tēnei ao.
I tā tātou rangahau i te Pukapuka a Moromona i Haere Mai, Whai Mai i Ahau i tēnei tau, kua kitea e tātou tā Nīwhai whakanui i te mana o tēnei momo māia kawenata mā roto i tana ū i roto i ana uauatanga me ana taumahatanga pērā i te tiki i ngā papa i whakahaua ai e te Ariki. Ko Nīwhai, ahakoa tana pōuri nui nā te wehi me te whakapono kore o Rāmana rāua ko Remuere, i māia tonu ia me tana mōhio mā te Ariki ngā papa e tuku ki a rātou. I kī atu ia ki ōna tuākana, “E ora ana te Ariki, ā, e ora ana tātou, e kore tātou e haere iho ki tō tātou matua i te koraha kia whakatutukihia rā anō e tātou te mea kua whakahaua tātou e te Ariki.” Nā tō Nīwhai māia me tana whakapono ki ngā whakaari a te Ariki, i tutuki anō i a ia tāna i whakataua ai hei mahi. Nō muri mai, i tana kitenga, i kite a Nīwhai i ngā hua o tēnei māia, e tuhia ana, “I kite au, a Nīwhai, i te mana o te Reme a te Atua, i heke iho ai ki runga i te hunga tapu o te hāhi o te Reme, ā, i runga i te iwi kawenata o te Ariki, … ā, i whakamaua rātou ki te tika me te mana o te Atua i runga i te korōria nui.”
Kua kite ā-kanohi au i ngā whakaari aroha o te Ariki me tana mana e rere ana ki roto i ngā oranga o ngā tamariki a te Atua, e whakakaha ana i a rātou kia taea ai te aro atu ki ngā āhuatanga o te ora. I tērā rā i hoki mai taku hoa wahine whai muri iho i tana mahi koropiko i te temepara, ā, ka kōrero mai ki ahau e pā ana ki ngā mea i ngotoa rawatia tōna ngākau i reira. I a ia e kuhu atu ana i te whare o te Ariki, i kite ia i tētahi tangata i runga tūru wīra e pōturi haere ana me tētahi wahine e hīkoi ana i runga i te uaua nui e mau tokotoko ana, e haere māia mai ana te tokorua rā ki te koropiko ki te Ariki i Tōna whare. I taku hoa wahine e hīkoi ana ki roto ki te wāhi kōkiri hoatutanga tapu, i kite ia i tētahi wahine pai, kotahi noa tōna ringa—haurua noa tētahi atu ringa—e mahi ana i ngā mahi i tukuna ai ki a ia i runga i te ātaahua i runga hoki i te wairua Tikitiki o Rangi.
I a māua ko taku hoa wahine e kōrero ana mō tēnei āhuatanga, i te mutunga iho i whakatau māua mā te māia tūturu me te ngākau titikaha ki ngā whakaari mau tonu a te Atua e riro mai ai i roto i ngā kawenata tapu ki a Ia i roto i Tōna whare e hua ake ai ngā mahi a aua apataki mīharo a te Karaiti kia puta ai i ō rātou kāinga i taua rā makariri rawa, ahakoa ngā taumahatanga kua pā nei ki a rātou.
E ōku hoa aroha, mehemea kotahi noa te mea e taea te mau—mehemea kotahi noa te mea e taea te tuku ki ā tātou tamariki mokopuna e āwhina ai i a rātou katoa i roto i ā rātou whakamātautau e kainamu mai ana—koia ko te māia me te whakapono ki ngā kawenata e meatia ai mā roto i a Ihu Karaiti. Mā te rapu i tētahi mea ā-atua e āwhina nei i a rātou kia hīkoi i tēnei oranga pērā i tā te Ariki i whakaari ai ki Ana apataki pono: “Ka tū aku apataki i roto i ngā wāhi tapu, ā, e kore e whakanukuhia.”
Mā hea riro ai i a tātou taua momo māia mā roto i a Ihu Karaiti? Mā roto i te whakaiti, e aro katoa ana ō rātou oranga ki te Kaiwhakaora, e ū ana ki ngā tikanga o te rongopai a Ihu Karaiti, e whiwhi ana i ngā tikanga tapu o te whakaoranga me te whakateiteitanga, me te whakahōnore i ngā kawenata e meatia nei e tātou ki te Atua i roto i Tana whare tapu.
I roto i ana kōrero whakakapi i te huinga whānui o te hāhi i Oketopa 2019, i whakamaharatia tātou e tō tātou poropiti aroha nui e pā ana ki te hōkai whakahirahira o te rapu i te māia kawenata, e mea ana: “Me nui te whakatakatū ā-wairua kia tika tā tētahi tangata ki te kuhu ki roto ki te whare o te Ariki. … Me tino whakatahuri kē te hinengaro me te ngākau o te tangata kia eke ki te taumata o te tika, ā, kia rite ake ki te Ariki, kia tū ai hei tangata pono, hei tauira pai ake, ā, hei tangata tapu ake.” Nō reira, mehemea ka tīni te āhua o tā tātou whakatakatū ki te kuhu atu ki roto i te temepara, ka tīni ana ngā āhuatanga e pā ai ki a tātou i roto i te temepara, mā konā tīni anō ai ō tātou oranga i waho atu i te temepara. “Kātahi ka pakari haere tō koutou māia i te aroaro o te Atua; ā, ka rewa ake te whakaakoranga o te pirihitanga ki runga i tō wairua anō nei ko te tōmairangi o te rangi.”
I kīa ana e tētahi o ngā pīhopa e mōhio nei au ko te karaehe Paraimere tuakana, ehara i te mea he karaehe “Paraimere” engari he karaehe “whakatakatū temepara” kē. I te Hānuere, ka tonoa ngā mema o te karaehe me ō rātou kaiako e te pīhopa kia haere ai ki tana tari i reira kōrero tahi ai rātou e pā ana ki tā rātou ū mō te roanga o te tau ki te whakatakatū kia kuhu ai i te temepara. Ka aro atu te pīhopa ki ngā pātai mō te whakaaetanga temepara, kātahi ka whakaurua atu aua pātai ki roto i ngā akoranga Paraimere. Ka tono ia i ngā tamariki kia whakatakatū ai e hoki mai ai rātou ki tana tari i te paunga ake o te tau kotahi, hei reira māia ai rātou, māia kawenata ai, e rite ana ki te whiwhi i tētahi whakaaetanga temepara me te kuhu atu ki roto i te whare o te Ariki. I tēnei tau i reira ētahi kōhine tokowhā e tino hīkaka ana, e tino rite ana, ā, e tino māia ana ki te haere ki te temepara, nā konei i te hiahia rātou kia pūreretāngia e te pīhopa ō rātou whakaaetanga temepara i te Rā Tau Hou i te 12:01 o te ata pō.
Ehara i te mea mā te hunga anake e haere atu ana ki te temepara tēnei mea te whakatakatū. Me matua whakatakatū tonu tātou kia haere atu ai ki te whare o te Ariki. Kua tīkina e tētahi o ngā pou ā-rohe te kara: “Kāinga Pūtahi, Hāhi tautoko, ā, aronga temepara.” He momo kupu te kupuBound i te mea ko tōna tikanga he hāngai i tō titiro ki tētahi huarahi, engari ko tōna tikanga anō e pēnei ana, kua herea ki tētahi mea, kua tautokona e tētahi mea, kua pūmau, ā, kua manawanui, kua tōtika. Nō reira ko te aronga temepara e mea ana kua herea tātou ki te Kaiwhakaora, ka mōhio tātou ki te huarahi tika, ā, ka toka tū moana i a tātou e ū ana kia mau i te māia kawenata mā roto i a Ihu Karaiti. Nō reira, me whakakaha anō e tātou i runga i te whaiwhakaaro ō tātou herenga mā te whakarite he rā anō ki te Ariki i roto i Tana whare tapu, ahakoa mēnā kei tata, kei tawhiti rānei.
E whakamahara ana tō tātou poropiti aroha, a Tumuaki Russell M. Nelson, i a tātou e pā ana ki ēnei tikanga hirahira nā tana kōrero: “Kei te pokapū te temepara noho ana hei mea whakakaha i ō tātou whakapono me ō tātou kaha wairua nā te mea ko te Kaiwhakaora me Tana akoranga te poutokomanawa o te temepara. E whakanuia ana ō tātou māramatanga ki a Ihu Karaiti e ngā mea katoa e whakaakona ana i te temepara, mā runga i ngā tohutohu, ā, mā roto hoki i te Wairua. Mā Ana tikanga tapu e tika ana, e herea ai tātou ki a Ia mā roto i ngā kawenata o te pirihitanga. Kātahi, i a tātou e pupuri ana i ngā kawenata, ka whakataua tātou e Ia ki Tana mana whakaora, mana whakakaha. Anō te nui o tā tātou hapa i Tōna mana i ngā rā e takoto ana ki mua.“
E hiahia ana te Kaiwhakaora kia meinga tātou hei mea e rite ana kia mārama, i runga i te mārama tino nui, me pēhea tātou e mahi i a tātou e mea ana i ngā kawenata ki tō tātou Matua i te Rangi i runga i Tōna ingoa. Kei te hiahia ia kia rite ai tātou ki te whiwhi i ngā tika, i ngā whakaari, me ngā haepapa; kia rite ai ki te whiwhi i ngā tirohanga wairua me ngā whakaohotanga e tika ana mō tātou i tēnei oranga. E mōhio ana au ina kite te Ariki i tētahi kora noa o te hiahia, i tētahi mura rānei o te mahi tika i roto i tā tātou pai ki te whakapūtahi ō tātou oranga ki runga ki a Ia, i runga hoki i ngā tikanga tapu me ngā kawenata e meatia nei e tātou i Tōna whare, Māna tātou e manaaki, i Tōna āhua tika rawa, i runga i te meatanga o ngā merekara me ngā mea aroha e tika ana mō tātou.
Ko te whare o te Ariki te wāhi e panonitia ai tātou i ngā āhuatanga tiketike ake, i ngā āhuatanga tapu ake. Nō reira, ina puta tātou i te temepara, kua panonitia e tō tātou manako ki ngā whakaari o ngā kawenata, e whakamaua ki te mana nō runga, ka kawea te temepara e tātou ki roto i ō tātou kāinga me ō tātou oranga. E mōhio ana au ka panonitia katoatia tātou e te mau ki te wairua o te whare o te Ariki.
E mōhio ana anō hoki tātou nā te temepara, ki te hiahia tātou i te Wairua o te Ariki kua ranea ai i ō tātou oranga, me kaua rawa tātou e pupuri ki ngā whakaaro kino ki tētahi atu. Mā te te tuku wāhi i ō tātou ngākau, ō tātou hinengaro rānei mō ngā whakaaro kino e hua ake ai ngā kupu kino me ngā mahi kino, ahakoa i runga i te ipurangi, i roto rānei i ō tātou kāinga, mā konā tawhiti atu ai te Wairua o te Ariki i ō tātou ngākau. Nō reira, kaua e makaia atu rā tō koutou māia, engari kē, tukua kia pakari kē tō koutou māia.
Ko te mahi hanga temepara e haere tonu ana, e kaha tonu ana, mā konā e whakahihiko ai, e whakaaweawe ai, ā, e manaaki ai i a tātou. Heoi ko te mea nui kē, i a tātou e panoni ana i tā tātou mahi whakatakatū kia tomo atu ai i te temepara, ka panoni tātou i te āhua o ngā mea e pā ai ki a tātou i te temepara, mā konā panonitia ai ō tātou oranga i waho atu i te temepara. E inoi ana au mā tēnei panonitanga e ngākau titikaha ai tātou ki ngā kawenata tapu kua meatia nei e tātou ki te Atua mā roto i a Ihu Karaiti. E ora ana te Atua, ko Ihu tō tātou Kaiwhakaora, ā, koinei tana Hāhi kua whakahokia mai nei ki runga i te whenua. E whakapuaki māhaki atu ana au i ēnei mea pono i runga i te ingoa o tō tātou Kaiwhakaora, a Ihu Karaiti, āmine.