Ka Pai ngā Mea Katoa Nā ngā Kawenata Temepara
Kāore he mea i tua atu i te whakahōnore i ō kawenata kua meatia nei, e meatia ana rānei e koe i roto i te temepara.
E aku teina me aku tuāhine aroha, he wā tapu tēnei wāhanga o te huinga whānui mōku. E whakawhetai ana au mō tēnei karanga ki te kōrero atu ki ngā Hunga Tapu e hia miriona me ō tātou hoa huri noa i te ao. E aroha ana au ki a koutou, ā, e mōhio ana au e aroha ana te Ariki ki a koutou.
E 50 tau ki muri, i riro i ahau te waimarie ki te mahi hei tumuaki mō Ricks College i Rexburg, Idaho. I te ata o te 5 o Hune, 1976, i taraiwa māua ko taku hoa wahine a Kathy, mai i Rexburg ki te Temepara o Idaho Falls, Idaho, ki te hīritanga o tētahi hoa tata. Āe rā, me ngā taitamatāne tokowhā i tō mātou kāinga i taua wā, kua taea tā māua haerenga temepara i runga i te āwhina a tētahi kaitiaki tamariki māia! I mahue i a māua ā māua tamariki māna hei tiaki kātahi ka haere i te haerenga poto, 30 miniti noa te roa.
He pai rawa atu ngā mea i pā ai ki a māua i te temepara i taua rā. Heoi, hei te mutunga o te hīritanga temepara—ā, i a māua e whakarite ana kia hoki ake ki te kāinga—i kite māua i ngā kaimahi temepara maha, me ngā kaiuru e kōrero āmaimai ana i te wāhi noho o te temepara. Kāore i roa, ka mea mai tētahi o ngā kaimahi temepara, nā, kātahi anō ka tanuku iho te Teton Dam i taha rāwhiti o Idaho! Nui ake i te 80 piriona karona (300 miriona mita pūtoru) o te wai e rere iho ana i roto i te pāpuni ki roto ki ngā maero pūrua e 300 (775 kiromita pūrua) o ngā raorao tata. Kei raro i te wai te nuinga o Rexburg, i kahakina atu ētahi kāinga me ngā waka e ngā waipuke. Kua kāinga kore ngā tāngata 9,000 i taua wā tonu.
E tika ana, ka huri ō māua whakaaro ki ā māua tamariki, ki ngā tauira whare wānanga e hia rau me ngā kaiako, me te hapori e arohaina nei e māua. Kua iti iho i te 30 māero (50 km) i te kāinga, heoi, i tēnei rā, i mua noa atu i ngā waea pūkoro me ngā karere pātuhi, kāore he huarahi ki te whakawhiti kōrero i taua wā tonu ki ā māua tamariki, kīhai i taea hoki te taraiwa atu i Idaho Falls ki Rexburg, i te katinga o ngā rori.
Ko tā māua mahi anake i taea ai, arā, ko te noho ki tētahi mōtēra mō te pō i Idaho Falls. Ka tūturi iho māua ko Kathy i tō māua ruma mōtera kātahi ka inoi ake i runga i te whakaiti ki te Matua i te Rangi hei haumarutanga mō ā māua tamariki me te hunga manomano hoki kua pāngia e tēnei aituā. E mahara ana au ki a Kathy e hīkoikoi haere ana i ngā hāora moata o te atapō i runga i te āwangawanga ki ana tamariki. Ahakoa ōku ake āwangawanga, i tau ōku whakaaro, ā, ka moe.
Kāore i roa ka whakaohokia ake au e taku hoa mau tonu me tana kī, “E Hal, me pēhea koe e moe i tēnei wā?“
Ka tau mārama mai ēnei kupu ki tōku ngākau me tōku hinengaro. I kī atu au ki taku hoa wahine: “E Kathy, ahakoa he aha te otinga, ka pai ngā mea katoa nā te temepara. Kua meatia nei e tāua ngā kawenata ki te Atua, ā, kua hīria hei whānau mō āke tonu.“
I taua wā tonu, anō nei kua whakaūngia e te Wairua o te Ariki i roto i ō māua ngākau me ō māua hinengaro ngā mea i mōhio kē māua he pono: ko ngā tikanga tapu o te hīritanga, e kitea anake ai i roto i te whare o te Ariki, ā, e whakahaerehia ana e te mana o te pirihitanga tika, nāna nei mātou i here tahi hei hoa tāne, ā hei hoa wahine, ā, kua hīria hoki ā māua tamariki ki a māua. Kāore kē nei he take kia wehi, ā, i nui te whakawhetai i muri iho kia rongo kua haumaru ā māua tama.
Tērā pea he pai rawa tēnei kōrero a Tumuaki Thomas S. Monson hei whakamārama ake he aha ngā mea i rongo nei māua ko Kathy i taua pō tē warewarehia. “I a tātou e haere atu ana ki te temepara, ka tau mai ki a tātou tētahi āhuatanga o te wairuatanga me tētahi tū rongo o te rangimārie. … Ka mau i a tātou te tikanga tūturu o ngā kupu a te Kaiwhakaora i te wā i kōrero ai Ia: ʻKa mahue i a Au te rangimārie ki a koutou, ko tōku rangimārie e hoatu nei e au ki a koutou. … Kaua e tukuna tō ngākau kia raru, kaua rānei e tukuna kia wehi [Hōani 14:27].’”
Kua manaakitia au kia rongo ai i taua rangimārie ia te wā e kuhu ai au ki roto i te temepara tapu. E mahara ana au ki te rā tuatahi i hīkoi atu au ki roto i te Temepara o Pā Tote. He taitama tāne au i taua wā.
I titiro whakarunga au ki tētahi tuanui teitei e mā ana te tae, nā konā mārama rawa ai te ruma anō nei kua tūwhera nei ki te rangi. Ā, i taua wā tonu, ka uru mai te whakaaro ki roto i tōku hinengaro ngā kupu mārama: “Kua uru kē au ki roto ki tēnei wāhi mārama i mua.“ Engari i taua wā anō uru mai tētahi whakaaro ki roto i tōku hinengaro, ehara i tōku ake reo, ēnei kupu: “Kāo, kāore anō koe kia uru mai ki konei. Kei te mahara koe ki tētahi wā i mua i tō whānautanga mai. I tētahi wāhi tapu koe pēnei i tēnei e haere mai ai te Ariki.“
E ngā teina me ngā tuāhine, kei te whakaatu whakaiti atu au, nā, i a tātou e haere atu ai ki te temepara, ka whakamaharatia tātou ki te āhuatanga mau tonu o ō tātou wairua, ō tātou hononga ki te Matua me Tana Tama tapu, me tō tātou hiahia nui ki te hoki atu ki tō tātou kāinga i te rangi.
I ētahi kōrero i ngā huinga inātata nei, i whakaakona e Tumuaki Russell M. Nelson:
“Ko te wāhi tino haumaru rawa ā-wairua ko te noho ki roto i ō kawenata temepara!“
“Ko ngā mea katoa e whakapono nei tātou me ia whakaari kua meatia nei e te Atua ki Tana iwi kawenata, ka kōtuia mai nei i te temepara.“
“Ko ngā tāngata katoa e meatia nei ngā kawenata … i roto i ngā temepara—ā, ka puritia aua mea—kua wātea ake te āheinga ki te mana o Ihu Karaiti.“
Nāna hoki i ako, nā, “ina meatia e tātou tētahi kawenata ki te Atua, ka wehe atu i te whenua noa mō āke tonu atu. E kore te Atua e whakarere nei i Tana hononga ki te hunga nā rātou i tuitui i te taura here ki a Ia. Koia, kei te hunga katoa kua meatia e rātou tētahi kawenata ki te Atua te āheinga ki tētahi momo aroha motuhake.“
I raro i te whakahaere a Tumuaki Nelson, kua tere ake te Ariki, ā, ka tere tonu ake, te hangahanga temepara puta noa i te ao. Ka āhei i tēnei ki ngā tamariki katoa a te Atua kia taea ai te whiwhi i ngā tikanga tapu o te whakaoranga me te whakateiteitanga, ā, kia meatia, ā, kia puritia ngā kawenata tapu. Ehara i te mea ko te ū ki ngā kawenata tapu i tētahi mahi kotahi anake, engari he mahi e haere tonu i tō oranga katoa. Kua kī mai te Ariki mā ō tātou ngākau, kaha, whakaaro, mārohirohi katoa anō.
Mā te kaha mahi i ngā tikanga tapu o te temepara e whakatakoto iho ai tētahi tauira aroha ki te Ariki. Ina puritia ō kawenata temepara me te mahara ki aua mea, ka tonoa e koe te piritanga tahitanga o te Wairua Tapu hei whakakaha, ā, hei whakatapu i a koe.
Kātahi koe ka rongo i te māramatanga me te tūmanako e whakaaturia ana he pono ēnei whakaari. Ka eke koe ki te mātauranga he huarahi ngā kawenata katoa e meatia ana ki te Atua kia whakatata atu ai ki a Ia, mā konā hangaia ai tētahi kōingo i tō ngākau kia puritia ai ngā kawenata temepara.
Kua whakaaria mai nei ki a tātou, “Nā tō kawenata ki te Atua, e kore Ia e ngenge i Tana mahi āwhina i a tātou, ā, e kore e pau i a tātou Tana manawanui ki a tātou.“
Ka meatia i roto i ngā kawenata hīri i roto i te temepara e whiwhi ai tātou ki te whakaūnga i ngā hononga whānau e hono tonu ana ki tua atu i te mate, ā, ka mau tonu āke, ake, ake. Mā te whakahōnore i ngā kawenata mārena me ngā kawenata whānau e meatia nei i roto i ngā temepara o te Atua e tiaki i a koutou i te kino o te matapiko me te whakapehapeha.
Ka puta anake te atawhai tonutanga mō ngā teina me ngā tuāhine tētahi ki tētahi i roto i ngā mahi kaha ki te ārahi i tō whānau i runga i te huarahi o te Ariki. Whakaritea he huarahi mō āu tamariki kia inoi ai rātou tētahi mō tētahi. Me whakatau wawe ngā tutūnga puehu, kātahi ka tohua paitia ngā mahinga matapiko kore tētahi ki tētahi. Ina inoi te tuakana mō te teina me te teina mō te tuakana me te mahi rātou ki a rātou anō, ka whakangāwarihia ō rātou ngākau, ā, ka tahuri atu tētahi ki tētahi, ā, ki ō rātou mātua anō.
Koia tā Maraki i whakamāramahia ai i a ia e kōrero matakite ana mō te haerenga mai a Irāia: “Māna e whakatō ki ngā ngākau o ngā tamariki ngā whakaari i meatia ai ki ngā tūpuna, ā, ka tahuri ngā ngākau o ngā tamariki ki ō rātou tūpuna. Mehemea kāore i pērā, kua whakamōtītia te ao katoa i tana haerenga mai.“
Kāore e kore ka tau mai ngā taumahatanga, ngā wero, me ngā mamaetanga o te ngākau ki a tātou katoa. Kāore tētahi o tātou i te wātea i ngā “tātarāmoa o te kikokiko.“ Heoi, i a tātou e haere atu ana ki te temepara me te mahara ki ō tātou kawenata, ka taea e tātou te whakarite kia whiwhi ki ngā tohutohu i te Ariki.
I te wā i mārena ai, ā, i hīria ai māua ko Kathy i te Temepara o Logan, Utah, i taua wā, na Tumuaki Spencer W. Kimball te hīritanga i whakahaere. I ngā kupu ruarua nāna nei i whakahua, nāna ēnei kupu tohutohu i kī: “E Hal kōrua ko Kathy, me hāngai tō oranga kia māmā tā kōrua hīkoi atu ina tae mai te karanga.“
I te tuatahi, kīhai māua i mārama ki ngā kupu tohutohu rā ki a māua, engari i tino ngana māua kia hāngai rawa ō māua oranga i tētahi āhuatanga e rite ai māua ki te mahi ki te Ariki ina puta mai te karanga. Ka pau ngā tau mārena 10, i puta ohorere mai tētahi karanga mai i te Kaikōmihana o te Mātauranga Hāhi, a Neal A. Maxwell.
Ka whakatīnanahia taua tohutohu aroha i tukuna mai nei e Tumuaki Kimball i te temepara kia “māmā te hīkoi atu“. Ka whiwhi māua ko Kathy i tētahi karanga kia whakarērea e māua tētahi āhuatanga papai rawa mō te whānau i California kia haere ki te mahi ki tētahi wāhi kāore i paku mōhiotia. Heoi, i rite tō mātou whānau kia haere nā te mea i matakitea e tētahi poropiti, i roto i tētahi temepara tapu, ko tētahi wāhi whakakitenga, i tētahi āhuatanga anamata.
E aku teina me aku tuāhine aroha, kei te whakaatu atu au, nā, kāore i reira tētahi mea whakahirahira ake i te whakahōnore i ngā kawenata kua meatia nei e koutou, e meatia ana rānei i te temepara. Ahakoa kei hea koutou i runga i te ara kawenata, kei te akiaki au i a koutou kia whaia te taumata e tika ai tō koutou uru ki roto i te temepara. Me haere putuputu e rite ana ki tāu e taea ana. Meatia, ā, puritia ngā kawenata tapu ki te Atua. Māku e whakaū i taua mea pono i kōrerohia atu ki a Kathy i te weheruatanga o te pō rima tekau tau ki muri i tētahi ruma mōtera i Idaho Falls: “Ahakoa te otinga, ka pai ngā mea katoa nā ngā kawenata temepara.“
Kei te tuku atu au i tōku whakaaturanga ū, nā, ko Ihu te Karaiti. Kei te ora Ia, ā, kei te ārahina e Ia Tana Hāhi. Ko ngā temepara ngā whare o te Ariki. Ko Tumuaki Russell M. Nelson te poropiti ora a te Atua i runga i te whenua. E aroha ana au ki a ia, ā, e aroha ana te au ki a koutou katoa. I runga i te ingoa tapu o Ihu Karaiti, āmine.