He Koa Tiketike Ake
Kia rapu katoa tātou ki te kimi i tētahi koa tiketike ake e ahu mai ana i te whakapau i ō tātou oranga ki tō tātou Matua i te Rangi me Tana Tama Arohaina.
Nōku te manaakitanga nui ki te kōrero i te huinga whānui o te Hāhi mō ngā tau toru tekau. I aua wā, kua uia ngā pātai e pā ana ki ēnei karere e te tokomaha huri noa i te ao. Inātata nei, e kaha ahu mai ana tētahi pātai. Ka pēnei i te nuinga o te wā: “E Erata Uchtdorf, i āta whakarongo au ki tō kōrero rā, engari … kāore au i rongo i tētahi mea e pā ana ki te rererangi.“
Nā, hei te mutunga o te rā nei, tērā pea e kore e rangona atu anō taua pātai mō tētahi wā roa.
I runga i “te Manahau Takahuri o ngā Kapua kua Weheruatia e ngā Hīhī o Te Rā ”
Ka uaua te whakapono kua tata 120 tau ki muri i te wā tuatahi i rere ake a Wilbur rāua ko Orville Wright i runga i ngā onepū o Kitty Hawk, North Carolina. Ka panoni te ao nā ngā rerenga poto e whā i taua rā Tīhema, ā, ka tūwheratia te tatau ki tētahi o ngā hanganga nui rawa i te hītōria o te ao.
He mōrearea rawa te rererangi i aua rā tōmua. I mōhio te tokorua ki tēnei. Ā, i mōhio hoki tō rāua matua, a Milton. Ka tika, nā tōna mataku nui kei mate ana tama e rua i tētahi aituā rererangi i whakaari ai rāua ki a ia e kore rawa rāua e rere tahi.
Ā, kīhai rāua i pērā rawa—hāunga tētahi mea. E whitu tau whai muri iho i taua rā hītori nui ki Kitty Hawk, tukuna rawa e Milton Wright tana kupu whakaae kātahi ka mātakitaki i a Wilbur rāua ko Orville e rere tahi ana mō te wā tuatahi. Tau iho rawa rāua ki te papa, ka kukume a Orville i tana matua kia eke ki runga i te wakarererangi mō te wā tuatahi, me te wā kotahi anake kia kite ake mōna anō ka pēhea.
I te wakarererangi e rewa ake ana i te papa, ka kahakina atu ngā whakaaro o Milton te koroua 82 tau te pakeke, nā konei kāore ōna mataku. Ka koa a Orville i te rongonga i tana matua e hāmama koa ana, “Kia tiketike ake, e Orville, kia tiketike ake!“
E rua, e rua māua ko tēnei tangata!
Tērā pea ko te take e kaha kōrero ana au e pā ana ki te rererangi, arā, koia, e mōhio ana au ki ngā kare ā-roto i pā ai ki ngā Wright. Nāku anō i “paheke iho i ngā herenga kaha o te Whenua, ā, kua kanikani i ngā rangi i runga i ngā parirau hiriwā o te kata.“
Ko te rerenga tuatahi o ngā teina, tuakana Wright, i heipū ake i ngā tau 37 noa i mua i tōku whānautanga mai, nā konā tūwhera ai ngā tatau ki te mātātoa, ki te māharo me te koa tūturu ki roto ki tōku oranga.
Heoi, ahakoa te mīharo nui o taua mahi, kei reira tētahi koa tiketike ake. I tēnei rā, i runga i te wairua o tā Milton Wright karanga koa, “Kia tiketike ake, e Orville, kia tiketike ake,“ e hiahia ana au ki te kōrero e pā ana ki tēnei koa tiketike ake—e ahu mai ana i hea, me pēhea e uru ai ki roto ki ō tātou ngākau, ā, me pēhea e nui kē atu tā tātou rongo.
Te Whainga Matua o te Oranga o te Tangata
Kāore e kore e taea te kī kei te hiahia te katoa kia koa. Hei aha koa, e taea anōtia te kī, kāore e koa ana ngā tāngata katoa. E pōuri ana, ko te āhua nei he uaua mō te tokomaha ki te rapu i te koa.
He aha e pērā rawa ai? Mehemea ko te koa te mea kotahi e tino hiahia ana te tangata, he aha tātou e raru nei kia kimihia ai? Kia whakarāpopotohia tētahi waiata kaupoi, tērā pea i te kimi tātou i te koa i roto i ngā wāhi hē.
Ka Rapua te Koa i Hea?
I mua i tā tātou kōrero mō te huarahi e rapu ai i te koa, tukua au kia tūtohi he mea tūturu te mate pōuri me ngā uauatanga o te hinengaro, o ngā kare ā-roto anō hoki, ā, kāore te whakautu i te “Kia kaha kia koa“ noa iho. Ehara i te mea kei te hiahia au ki te whakaiti i ngā mate hinengaro. Mehemea ka huapae mai aua momo wero, kei te tangi tahi au me koutou, ā, e tū tahi ana au me koutou. Ki ētahi tāngata, ko te rapu koa te rapu āwhina i ngā pukenga whakarato mate hinengaro e whakapaua ō rātou oranga ki te whakapakari i taua pukenga whakahirahira rawa. Me whakawhetai tātou mō aua momo āwhina.
Kāore te oranga i te āhuatanga koa mutunga kore. “Nā te mea e tika pū ana anō, kia ai he tauaro i roto i ngā mea katoa.“ Ā, ki te tangi te Atua Ake anō, pērā i tā ngā karaipiture e whakaū e pērā ana Ia, kāore e kore ka tangi anō tātou. Ehara te pōuri i te tohu o te hinganga. I tēnei oranga, tē taea te weherua te koa i te pōuri, he hoa piripono rāua. Pērā i a koutou katoa, kua rongo au i te nanu, te pōuri, te pāmamae me te kaniawhea.
Heoi, kua rongo anō au i te tākiritanga whai korōria e whakakīa ana te wairua ki te koa nui tē taea te kaiponu. Kua kitea mōku ake anō e ahu mai ana tēnei māia rangimārie i te whaiwhai i te Kaiwhakaora me te hīkoi i Tōna Ara.
Kāore e rite ana te rangimārie e homai nei e Ia ki te rangimārie e homai nei e te ao. He pai ake. He tiketike ake, ā, he tapu ake. I kī mai a Ihu, “Kua haere mai Au kia whai oranga rātou, ā, kia ranea ake tō rātou.“
Ko te rongopai a Ihu Karaiti te tino “rongo pai o te koa nui“! He karere tūmanako kāore ōna taurite! He karere pīkau-ioka me te hiki-pīkaunga. O te whakakao-ngāwari. O te makau o te rangi, o te māramatanga tiketike ake, o ngā kawenata tapu ake, te tiaki tapu, me te korōria mutunga kore!
Ko te koa te tino take o te mahere o te Atua mō Ana tamariki. Koia te take i hangaia ai koutou—“kia koa ai [koutou]“! I hangaia ai koutou mō tēnei!
Kīhai tō tātou Matua i te Rangi i huna i te ara ki te koa. Ehara i te mea muna. E wātea ana ki te katoa!
He mea whakaari ki te hunga katoa e hīkoi nei i te ara apataki, e whai nei i ngā akoranga me te tauira o te Kaiwhakaora, e puritia Ana whakahaunga, me te whakahōnore i ngā kawenata e meatia nei e tātou ki te Atua. Kātahi te whakaari mīharo!
Kei te Atua Tētahi Mea Anō Mōu
E mōhio ana tātou katoa ki ētahi e kīa ana kāore he tikanga mō te Atua e koa ai rātou, nā, he koa rawa rātou ahakoa kāore ō rātou whakapono.
E tūtohia ana, ā, e whaiwhakaaro ana ki ēnei whakaaro. E hiahia ana tō tātou Matua i te Rangi kia riro i Ana tamariki katoa te koa nui rawa, nā konei kua whakakīngia e Ia tēnei ao ki ngā āhuareka ātaahua nui, “hei whakakoa i te karu, ā, hei whakakoa i te ngākau.“ Mōku ake, he nui tōku koa i te rererangi. Ka kimihia tērā e ētahi i roto i te waiata, te mahi toi, ngā āhuareka, i te taiao rānei.
Mā te pōhiri i te katoa me te tohatoha atu i te rongopai o te koa nui a te Kaiwhakaora, kāore tātou i te whakakore i ēnei puna koa. Kei te kōrero noa iho mātou, nā, kei te Atua tētahi atu mea mōu. He koa tiketike ake—he koa kei tua noa atu i ngā mea katoa e homai ai e te ao. He koa e mau roa ake ana i te pōuritanga o te ngākau, e whakakorehia ana te mokemoke.
Hei tauaro, kāore e toitū ana te koa o te ao. Tē taea. Koia te āhuatanga o ngā mea katoa i te ao kia kaumātua, kia horokiwa, kia pau te hau, ā, kia hē ngā rā. Engari he mea mau tonu te koa ā-atua, nā te mea he mau tonu te Atua. I haere mai a Ihu Karaiti kia hikina ake tātou i tēnei ao kikokiko, ā, kia panonitia mai i te poke ki te poke kore. Kei a Ia anake taua mana, ā, ko Tōna koa anake te mea mau tonu.
Mehemea e whakaaro ana koutou me nui ake tēnei momo koa i ō koutou oranga, e tono ana au ki a koutou kia kōkiri atu i tō haerenga ki te whaiwhai i a Ihu Karaiti me Tana Huarahi. He haerenga kōtuku rerenga tahi tēnei mō te oranga—ā, mō te oranga kei tua. Tēnā koa tukua au kia whakahua i ētahi arapiki i runga i tēnei haerenga tika o te rapunga koa tūturu.
Whakatata Atu ki te Atua
E mahara ana rānei koutou ki te wahine i te Kawenata Hou i pākia ai ki tētahi mate rerenga toto mō ngā tau 12? I whakapaua ana pūtea katoa ki ngā rata, engari ka kino haere. Kua rongo ia mō Ihu; I mōhiotia whānuitia Tōna mana whakaora tīnana. Engari kua taea e Ia te wahine te whakaora? Ā, me pēhea ia e whakatata atu ai ki a Ia? Nā tana mate i “pokea“ ia i raro i te ture a Mohi, nō reira kua whakataua kia noho tawhiti atu i te tangata.
He mea kore taea te haere atu ki a Ia kia tonoa ai Ia ki te whakaora i a ia.
Heoi, e whakaaro ake ia, “Mēnā ka taea noatia te whakapā atu ki Ana kākahu, ka ora ahau.“
Hei te mutunga, ka taea ōna wehi e tōna whakapono. I māia tana kōkiri atu ki waenganui i te wenerau a te mano kia ū tonu atu ki te Kaiwhakaora.
Kātahi ka tae rawa atu ki Tōna aroaro. ka toro atu ia i tana ringa.
Kātahi ka mahu ia.
He āhua rite tātou katoa ki tēnei wahine?
Tērā pea he maha ngā take he aha tātou e pōturi ki te whakatata atu ki te Kaiwhakaora. Ka pāngia tātou e te taunu me ngā whakahēanga a ētahi atu. I runga i ō tātou whakapehapeha, ka whakakorea atu e tātou te wāriu nui o tētahi mea iti noa. Ka pōhēhē pea tātou nā tō tātou āhuatanga e kore e taea te tono atu ki Tana mana whakaora tīnana—he tawhiti rawa atu, ā, he nui rawa rānei ō tātou hara.
Pērā i tēnei wahine, kua ako au mehemea ka whakatata atu au ki te Atua me te toro atu ki te whakapā atu ki a Ia, ka tino taea e tātou te rapu i te mahutanga, te rangimārie, me te koa.
Kimihia
Nā Ihu i ako; “Rapua, kātahi koe ka kite.“
E whakapono ana au ehara tēnei rerenga ngāwari i te whakaari wairua noa iho; he kōrero tūturu.
Ki te rapu tātou i ngā take kia riri ai, kia rangirua ai, kia kawa ai, kia mokemoke ai rānei, nā, ka rapua ērā take.
Heoi, ki te rapu tātou i te koa—ki te kimi i ngā take kia koa, ā, kia whai hari tātou i te Kaiwhakaora, ka kitea ērā take.
Kāore tātou e tino rapu i tētahi mea kāore nei i te rapua.
Kei te rapu koutou i te koa?
Rapua, kātahi koe ka kite.
Pīkauria ngā Pīkau o Ētahi atu
Nā Ihu i ako, “He nui ake tō te tuku manaakitanga i tō te whiwhi.“
Tērā pea, i ta tātou rapunga ki te koa, ko te huarahi pai ake kia rapua tēnā, koia, ko te kawe koa ki ētahi atu?
E ngā teina me ngā tuāhine, e mōhio ana koutou, ā, e mōhio ana ahau he pono! He rite te koa ki te kāho paraoa, ki te ipu hinu rānei e kore rawa e mimiti. Ka whakarea te koa tūturu ina tohaina atu.
Ehara i te mea me tuku mea nui, tētahi mea uaua rānei.
E taea ana e tātou te mahi i ngā mea ngāwari.
Pērā i te inoi mō tētahi atu i runga i tō ngākau katoa.
Me tuku mihi pono ki tētahi.
Mā te whakatau i te mauri o tētahi, kia rongo ai ia i tō whakaaro nui, tō kaingākau, me tō aroha.
Mā te tuku i tō karaipiture pai rawa ki a koe me tōna tikanga ki a tātou.
Mā te whakarongo noa rānei.
“Ina kei te mahi whakarato tātou ki ō huānga kei te mahi whakarato anake ki tō koutou ki tō Atua,“ ā, ka utua nuitia tō atawhai e te Atua. Ka hoki anō te koa e tukuna atu e koe ki ētahi atu i runga i te “mehua pai, kua pēhia iho, ā, kua harurutia ngātahitia, ā, e pūrena ana.“
“Kātahi Ka Aha Tātou i Reira?“
Hei ngā rā, ngā wiki, me ngā marama e tata mai ana, māku koutou e pōhiri kia:
-
Huri pono atu i runga i te ngākau katoa kia whakatata atu ki te Atua.
-
Rapua māriretia ngā wā tūmanako, rangimārie, me te koa ia te rā, ia te rā.
-
Kawea mai te koa ki ētahi atu i tō taha.
E aku teina me aku tuāhine aroha, ōku hoa aroha, i a koutou e rapua ana te kupu a te Atua kia hohonu ake tō māramatanga mō te mahere mau tonu a te Atua, kia whakaae ki ēnei pōhiritanga, ā, kia ū ki te hīkoi i Tana Huarahi, e hipa atu ana i ngā māramatanga katoa,“ i roto pū anō hoki i ngā pōuritanga. Ka nui ake tō rongo i te mehua o tō te Atua aroha taurite kore e pupuhi ake ana i tō ngākau. Ka ngoto te pūaotanga o te māramatanga Tikitiki o Rangi ki te ātārangi o ō taumahatanga, ā, ka tīmata tō rongo i ngā korōria tē taea te whakahua me ngā whakamāharo o ngā mea tē kitea, ngā mea pai rawa atu, o te rangi. Ka rongo koe i tō wairua e rewa ake ana i te kukumetanga ihotanga o tēnei ao.
Ā, he pērā i te tangata pai a Milton Wright, tērā pea ka whakaara ake i tō reo i runga i te koa me te hāmama, “Kia tiketike ake, Matua, kia tiketike ake!“
Kia rapu katoa tātou ki te kimi i te koa tiketike ake e ahu mai ana i te whakapau i ō tātou oranga ki tō tātou Matua i te Rangi me Tana Tama Arohaina. Koinei tōku inoi pono me tōku manaakitanga i runga i te ingoa tapu o Ihu Karaiti, āmine.