Ko te Tikanga a te Atua Ko Tō Whakahokinga ki te Kāinga
Kua whakaritea mai nei ngā āhuatanga katoa o te mahere o te Matua mō Āna tamariki arohaina, koia, kia whakahokia ngā tāngata katoa ki te kāinga.
Kei te hia tuku mihi mō ā koutou inoi i taku tīmatanga ki te whakarite mō te karangatanga, mā roto i a Tumuaki Nelson, kia tū ai hei Āpōtoro nā te Ariki a Ihu Karaiti. Kāore e kore e taea ana te whakaaro ki te nui o tēnei, ā, kua meinga hei wā panoni nui, ā, hei wā e titiro pū ki ahau anō. Heoi anō, he hōnore nui kē tēnei kia mahi ki te Kaiwhakaora, ahakoa he aha te tūranga, ā, kia mahi tahi me koutou i roto i ngā mahi tuku i ngā rongo hari o Tana rongopai o te manako.
I tua atu i tērā, kua kōrerotia nei kei muri i tētahi Āpōtoro hou e tū ana tētahi hungarei wahine ohorere. kāore au i te tino mōhio mehemea kua kōrerotia tērā, engari kāore e kore e taea te pērā. Ā, e whakapae ana au ahakoa kāore e ora ana tōku hungarei kei te ohorere tonu ia.
I ētahi marama ki muri, i a māua ko taku hoawahine e toro atu ana ki tētahi atu whenua mō ētahi mahi Hāhi, i oho moata ake au i tētahi ata kātahi ka rehurehu taku titiro atu ki waho i taku wini hōtera. Kei raro rā i te tiriti, i kite au i tētahi tūnga rori kua whakaritea me tētahi pirihimana e tū tata ana ki te whakatahuri atu i ngā waka i te wā i tae ai rātou ki te tūnga. I te tīmatanga, he ruarua noa iho ngā waka i reira kātahi ka whakatahuritia atu. Engari nāwai rā, nāwai rā ka nui haere ngā waka, ka tipu haere ngā rārangi waka.
Mai i te wini i runga, i mātaki au i ngā pirihimana e āhuareka ana i tana mana ki te aukati i te rere o ngā waka me tana mana ki te whakatahuri atu i ngā tāngata. Koia, ka āhua peru tana hīkoi me te mea nei ka kanikani, i tana whakatata atu ki tēnā waka, ki tēnā waka. Mehemea ka hōhā tētahi kaitaraiwa nā te tūnga waka, kāore te pirihimana i āwhina, i whai whakaaro noa rānei. Ka kaha ruru noa i tana māhunga kātahi ka tuhia whakamurihia atu tana ringa.
E aku hoa, e aku hoa apataki i runga i te huarahi o te oranga, te mahere ātaahua a tō tātou Matua, arā, ko Tana mahere “tau kē”, he mea whakarite hei whakahokia atu koe ki te kāinga, kaua ki te pei atu i a koe. Kāore tētahi i whakatū ai i tētahi tūnga rori me te whakatū i tētahi i reira kia whakatahuritia atu koe ki muri. Koia, he tauaro kē. Kei te kaha whaiwhai te Atua i a koe. Kei te “hiahia Ia kia kōwhiri Ana tamariki katoa ki te hoki atu ki a Ia,” ā, ka meatia e Ia ngā mea katoa kia whakahokia atu koe.
I whakahaerehia te Hanganga o tēnei ao pū anō e tō tātou Matua aroha mō te take o te whakatūwhera i tētahi huarahi mōu, mōku hoki kia rongo ai i ngā āhuatanga o te oranga e torona mai ana, ā, whakatikahia ana tātou, te āhei ki te whakamahi i tō tātou mana kōwhiringa ki te kōwhiri i a Ia, ki te ako, ki te tipu hoki, ki te hē, ki te rīpenetā, ki te aroha ki te Atua me ō tātou kiritata, ā, kia hoki atu ki a ia a tōna wā.
Nāna nei Tana Tama Arohaina i tono ki tēnei ao taka kia rongo ai i ngā āhuatanga katoa o te oranga, kia whakatakotoria tētahi tauira hei whāinga mō te toenga atu o Ana tamariki, ki te whakamārie me te hoko. Nā te takoha whakamārie o te Karaiti ngā tūnga rori katoa o te matenga o te tīnana rāua ko te wairua e tango e weheruatia ai tātou i tō tātou kāinga mau tonu.
Kua whakaritea mai nei ngā āhuatanga katoa o te mahere o te Matua mō Āna tamariki arohaina, koia, kia whakahokia ngā tāngata katoa ki te kāinga.
He aha tā ngā karere a te Atua, tā Ana poropiti, ingoa mō tēnei mahere i roto i ngā karaipiture kua Whakahokia mai? Kei te karangatia tēnei mahere o te hokonga, e rātou ko te mahere o te aroha, te mahere nui o te harikoa, me te mahere o te whakaoranga, he mea mō te katoa, “mā roto i te toto o tāku Mea Kotahi Anake.”
Ko te take o te mahere nui o te harikoa koia ko tō hari, ki konei, ināianei, ā, i roto i te ao mau tonu. Ehara i te mea ko te ārai atu i tō koa me te whakapāngia koe ki te āwangawanga me te wehi.
Ko te take o te mahere o te hokonga o tō Matua, koia kē ko tō hokonga, ko tō tātou whakaputanga mā roto i ngā mamaetanga me te matenga o Ihu Karaiti, e wetekina ana i te heretanga o te hara me te mate. Ehara i te mea kia mahue koe kia pēnei tonu ana.
Ko te take o te mahere o te aroha koia ko te toro atu i te aroha, i a koe e hoki ana ki a Ia me te whakahōnore i tō kawenata o te pono ki a Ia. Ehara i te mea ko te whakakore atu i te aroha me te whakapā atu i te mamae me te pōuri.
Ko te take o te mahere o te whakaoranga o te Matua, koia kē ko tō whakaoranga i roto i te kīngitanga Tikitiki o Rangi i a koe e whiwhi ana ki te whakaaturanga mō Ihu, me te tāpae atu i tō wairua ki a Ia. Ehara i te mea kia peia koe ki waho.
Ko tōna tikanga e pai ana ngā mea katoa e hāngai ana ki te āhua o ā tātou mahi i ō tātou oranga? Nā, kāore he tikanga tō te whakamahi i tō tātou mana kōwhiringa? Nā, e pai ana kia tiki, kia mahue rānei ngā whakahaunga a te Atua? Kāo, engari mō tēnā. Kāore e kore ko tētahi o ngā pōhiri nui a Ihu me Tana tono i roto i Tana minitatanga, koia, ko tā tātou panoni, tā tātou rīpenetā me tā tātou haere ki a Ia. He mea nui i roto i Ana akoranga katoa kia noho ai i runga i tētahi taumata tiketike o te whanonga koia tētahi karanga ki te ara poutama mōu ake, ki te whakapono panoni i te Karaiti, ki tētahi panoni nui o te ngākau.
Kei te hiahia te Atua kia tino tīni nui i ō tātou hiahia kaiapo me ō tātou hiahia whakahīhī, te peianga o te ira tangata, kia “haere [tātou], ā, kia kore e hara atu anō.”
Ki te whakapono tātou ki te pūtake o te mahere nui a te Matua, koia, ko te whakaora, te hoko, te tuku aroha, me te kawe mai i a tātou ki te harikoa, he aha te pūtake o te Tama mā roto i a Ia pahawa ake tēnei mahere nui?
E kōrero mai ana te Tama Ake anō: “Nā te mea i heke iho au i te rangi, ehara i te mea kia meatia tāku e pai ai, engari tāna nāna nei au i tono.”
He kotahi tonu tā Ihu rāua ko tā te Matua e pai ai! Kei te hiahia Ia kia taea ai e ngā tamariki katoa a Tōna Matua ki te whiwhi i te whāinga whakamutunga o te mahere—arā, ko te oranga tonutanga ki te taha i a Rāua. Kāore tētahi e whakakāhoretia atu i tēnei pitomata tapu.
Mehemea he tangata e kaha āwangawanga ana kāore e taea ana, ka uhia atu ērā atu tāngata katoa e te Whakamārietanga aroha mutunga kore o te Karaiti, engari kaua ko koe, kua pōhēhē koe. Ko tā temutunga kore arā ko te mutunga kore. Mā temutunga korekoutou ko te hunga e aroha nei koe e uhi.
Nā Nīwhai tēnei mea pono ātaahua i whakamārama: “Kāore ia e mea i tētahi mahi hāunga hei painga mō te ao; nā te mea e aroha ana ia ki te ao, nā konā pū anō whakatakotoria iho e ia tōna ake oranga kia kumea ai te tangata kia tata atu ki a ia. Nā reira, kāore āna whakahau e kīa ana kia kaua rātou e kai i tōna whakaoranga.”
Ka haere te Kaiwhakaora, te Hēpara Pai, ki te kimi i Āna hipi kua ngaro tae noa ki te wā e kitea ai rātou e Ia. Kāore e pai ana ki a Ia kia ngaro ētahi.
“Kua torona atu tōku ringa aroha ki a koe, ā, ko te tangata e haere mai ai, māku ia e whakawhiwhi.”
He tūroro kei waenganui i a koutou? Haria mai rātou ki konei. He mea kopa, he matapō rānei, he kokekoke rānei, he tūroro rānei, he mea memenge rānei, he taringa turi rānei, he mea rānei kua pākia ki tētahi mamaetanga kei waenganui i a koutou? Haria mai rātou ki konei, ā, māku rātou e mahu, nā te mea he aroha tōku mō koutou.”
Kīhai Ia i maka atu i te wahine i a ia te mate toto; Kīhai Ia i oma atu i te tangata ngerengere; kīhai Ia i whakaparahako i te wahine pūremu; kīhai Ia i whakakore i te hunga pōuri—ahakoa he aha te hara. Ā, e kore Ia e whakakore atu i a koe, i te hunga rānei e aroha nei koe ina haria mai ai ki a Ia ō koutou ngākau marū me ō koutou wairua iro. Nā, ehara tērā i Tōna take, i Tōna rautaki rānei, Tōna mahere rānei, Tōna pūtake, wawata, manako rānei.
E kāo, kāore Ia e whakatū i ngā tūnga rori me ngā kaupare; Ka tangohia ērā e Ia. Kāore Ia e pei atu i a koutou ki waho; Kei te pōhiritia kētia koutou e Ia. He whakapuakitanga ora Tāna minitatanga katoa mō tēnei take.
Kei reira hoki Tana whakahere whakamārie ake anō, he mea uaua ake kia mārama ai tātou, kei tua noa atu i te āheinga o te tangata kia mārama. Engari, ā, he “engari“ nui tēnei, e mārama ana tātou, e taea te mārama, te tapu, te take whakaora o Tana whakahere whakamārie.
Kua haea te ārai o te temepara ki waenganui i te matenga o Ihu i runga i te rīpeka, he tohu tērā e pā ana ki te haehaetanga o te huarahi e hoki ai ki te Matua kia tūwhera kau ake--ki te hunga katoa e tahuri atu ki a Ia, e whakawhirinaki ki a Ia, e maka i ō rātou pīkaunga ki runga ki a Ia, me te tango i Tana ioka ki runga ki a rātou i te kawenata.
Kia pēnei kē te kupu, kāore te mahere a te Matua e hāngai ana ki ngā tūnga rori. Kīhai rawa i mua; e kore rawa a muri ake nei. He mea anō hei mahi mā tātou, he whakahaunga hei pupuri, he āhuatanga ō tātou hei panoni? Āe. Engari i runga i Tōna aroha, e taea ana ēnā, kāore i tua atu i te toronga o te ringa.
He rongo pai tēnei! E tino nui taku whakawhetai mō ēnei mea pono ngāwari. Tā te Matua rautaki, Tana mahere, Tana pūtake, Tana take, Tana wawata, me Tana manako katoa he mea hei mahu i a koe, hei tuku rangimārie, hei whakahoki i a koutou ko te hunga e aroha nei koe ki te kāinga. He kaiwhakaatu au mō tēnei i runga i te ingoa o Ihu Karaiti, Tana Tama, āmine.