Kia Hari i te Takoha o ngā Kī o te Pirihitanga

Nā Tumuaki Russell M. Nelson

Tumuaki o Te Hāhi o Ihu Karaiti o te Hunga Tapu i ngā Rā o Muri Nei

E whakahaerehia ana e ngā kī o te pirihitanga me pēhea te pirihitanga o te Atua e whakamahia ai hei whakaputa mai i ngā take o te Ariki, ā, ka manaakitia te hunga katoa e tahuri mai ai ki te rongopai kua whakahokia mai nei.

E aku teina me aku tuāhine, he rangi nui tēnei mō māua ko Tumuaki Dallin H. Oaks. Kua 40 tau ki muri, i te 7 o Āperira, 1984, i whakaaehia māua ki te Kōrama o ngā Āpōtoro Tekau Mā Rua. Kua hari māua i ia huinga whānui o te hāhi mai i taua wā, tae noa mai ki tēnei. Kua manaakitia anōtia tātou ki tētahi riringihanga tapu o te Wairua. E manako ana ahau ka kaha rangahau koutou i ngā karere o tēnei huinga i roto i ngā marama e kainamu mai ana.

I taku whānautanga mai, e ono ngā temepara e mahi ana i te Hāhi—tētahi ki St. George, ki Logan, ki Manti me Salt Lake City, Utah; me tētahi ki Cardston, Alberta, Canada; me tētahi ki Lāʻie, Hawaiʻi. E rua ngā temepara tū poto i Kirtland, Ohio me Nauvoo, Illinois. I te matua nui o te Hāhi e hūnuku whakateuru ana, i meinga te Hunga Tapu kia mahue i a rātou aua temepara e rua rā ki muri.

I tahuna te Temepara o Nauvoo e tētahi kaitahu ahi. I hangaia tuaruatia ake, kātahi ka whakatapua e Tumuaki Gordon B. Hinckley. I tānoanoatia te Temepara o Kirtland e ngā hoariri o te Hāhi. Nō muri iho ka riro te Temepara o Kirtland i a Community of Christ, nō rātou mō ngā tau maha.

I tērā marama, i whakapuakina ake e mātou, nā, kua hokona te Temepara o Kirtland e Te Hāhi o Ihu Karaiti o te Hunga Tapu i ngā Rā o Muri Nei, me ētahi atu wāhi tapu i Nauvoo. He nui ngā whakamānawa e oha atu ana ki ngā rangatira o Community of Christ mō ngā whakawhitinga kōrero pai i hua ake ai tēnei whakaaetanga.

Temepara o Kirtland.

He mana motuhake tō te Temepara o Kirtland i roto i te Whakahokinga mai o te rongopai a Ihu Karaiti. I heipū ake ngā mea maha i reira, ngā mea kua poropititia mō te hia kē nei ngā rautau, ā, he mea nui mō te whakatutukihanga o tā te Ariki Hāhi kua whakahokia mai i tōna mīhana.

Ko te mea nui kē i tū ai i te Rātapu o te Aranga, Āperira 3, 1836. I taua rā, i kite a Hōhepa Mete rāua ko Oriwa Kautere i ētahi toronga mīharo. Tuatahi, i puta mai te Ariki a Ihu Karaiti. I tuhia e te Poropiti, nā, “i rite ngā karu [o te Kaiwhakaora] ki te muramura ahi; ko ngā makawe o tōna māhunga he mā pērā i te huka mā; i nui ake te kānapatanga o tōna āhua i tō te rā; ā, ko tōna reo anō nei ko te harurutanga o ngā wai nunui.”

I roto i tēnei toronga, i whakaatu te Ariki ko wai Ia. I kī Ia, “Ko au te mātāmua me te mātāmuri; ko au te mea e ora ana, ko au te mea i whakamatea; ko au tō koutou kaiwawao ki te Matua.”

Kātahi ka whakapuakina ake e Ihu Karaiti, nā, kua whakaae mai Ia ko te temepara Tana whare kātahi ka meatia tēnei whakaari nui: “Ka whakaaturia Au e Ahau anō ki tōku iwi i runga i te aroha i roto i tēnei whare.”

E hāngai atu ana tēnei whakaari nui ki ia temepara kua whakatapua i tēnei wā. I pōhiri ana au ki a koutou kia āta whakaarohia ake te tikanga o tā te Ariki whakaari mōu.

Whai muri iho i tā te Kaiwhakaora putanga, ka puta mai a Mohi. Nā Mohi ngā kī mō te huinga o Iharaira me te hokinga mai o ngā iwi tekau i whakatau ki runga i a Hōhepa Mete.

I te mutunga o tēnei whakakitenga, “ka puta mai a Eria, kātahi ka whakataua ngā tikanga o te rongopai o Aperahama” ki a Hōhepa.

Kātahi ka puta mai te poropiti Irāia. Nā tana putanga mai tutuki ai tā Maraki whakaari e mea ana, nā, i mua i te Haerenga Tuaruatanga Mai, ka tono a Irāia e te Ariki hei “whakatahuri i te ngākau o ngā tūpuna ki ngā tamariki, me te ngākau o ngā tamariki ki ō rātou tūpuna.” Ka whakataua iho e Irāia ngā kī o te mana hīri ki runga ki a Hōhepa Mete.

He mea nui rawa tēnei whakahokinga o ngā kī ki te whenua e ngā karere tokotoru o te rangi i raro i te whakahaere o te Ariki. Ko ngā kī o te pirihitanga te mana me te kaha o te tumuakitanga. E whakahaerehia ana e ngā kī o te pirihitanga me pēhea te pirihitanga o te Atua e whakamahia ai hei whakaputa mai i ngā take o te Ariki, ā, ka manaakitia te hunga katoa e tahuri mai ai ki te rongopai a Ihu Karaiti.

He mea nui kia mōhio, nā, i mua i te whakaritenga o te Hāhi, nā ngā karere o te rangi i whakatau te Pirihitanga o Arona me te Pirihitanga o Merekihereke ki runga i te Poropiti a Hōhepa, ā, kua hoatu ki a ia ngā kī mō ngā pirihitanga e rua. Nā ēnei kī riro ai i a Hōhepa Mete te mana ki te whakariterite i te Hāhi i te tau 1830.

Nā, i roto i te Temepara o Kirtland i te tau 1836, he mea nui te whakataunga ihotanga o ēnei kī o te pirihitanga—arā, ko ngā kī mō te huinga o Iharaira, ko ngā kī mō te rongopai a Aperahama, me ngā kī mō te mana hīri. Nā ēnei kī i whakamanaia ai a Hōhepa Mete—me ngā Tumuaki katoa o te Hāhi a te Ariki whai muri iho—ki te whakahuihui i a Iharaira i ngā taha e rua o te ārai, ki te manaaki i ngā tamariki kawenata katoa ki ngā manaakitanga o Aperahama, kia whakataua iho tētahi hīri nui ki runga i ngā tikanga tapu o te pirihitanga me ōna kawenata, me te hīri i ngā whānau hei whānau mau tonu. He mea mutunga kore te mana o ēnei kī o te pirihitanga.

Me huri ngā whakaaro ki te āhua o tō oranga mēnā rānei kīhai i whakahokia mai ai ngā kī o te pirihitanga ki te whenua. Me i kore ngā kī o te pirihitanga, kua kore e taea kia whakataua koe ki te mana o te Atua. Me i kore ngā kī o te pirihitanga, kua ai te Hāhi hei mea whakaako, hei mea whakarato tāngata noa iho. Me i kore ngā kī o te pirihitanga, kua kore tētahi o tātou e whai wāhi atu ki ngā tikanga tapu me ngā kawenata e herea tonutia tātou ki ō tātou whānau me te tuku i a tātou kia noho tahi ki te Atua.

Nā ngā kī o te pirihitanga e rerekē ai Te Hāhi o Ihu Karaiti o te Hunga Tapu i ngā Rā o Muri Nei i ērā atu huinga tāngata i runga i te whenua. He maha ngā huinga e taea ana, ā, e pērā ana tā rātou hāpai ake i te āhua o te ora i tēnei oranga. Engari kāore he huinga kē atu e taea ana, ā, e pēnei ana tā rātou āwhina i a koe i tō oranga whai muri i te mate.

Mā ngā kī o te pirihitanga tātou e whakamana ai kia torona atu ngā manaakitanga katoa i whakaaria ai ki a Aperahama ki ia tāne pupuri kawenata, ki ia wahine pupuri kawenata. Mā ngā mahi temepara e wātea ai ēnei manaakitanga ātaahua ki te katoa o ngā tamariki a te Atua, ahakoa nō hea ahakoa rānei nōnāhea rātou i ora ai, e ora ana rānei ināianei. Tukua tātou kia hari kei konei anō ngā kī o te pirihitanga i runga i te whenua!

Kei te pōhiri au i a koutou kia āta whakaaro ki ngā kōrero e toru e whai ake nei:

1. He taunakitanga te huinga o Iharaira mō te aroha o te Atua ki Ana tamariki katoa kei ngā wāhi katoa.

2. He taunakitanga anōte rongopai a Aperahama mō te aroha o te Atua ki Ana tamariki katoa kei ngā wāhi katoa. E tono ana Ia i te katoa kia haere mai ki a Ia—“mangumangu mai, pākehā mai, mauhere mai, herekore mai, tāne mai, wahine mai; … he ōrite te katoa ki te Atua.”

3. He mea atua te mana hīri, nā, he taunakitanga anō mō te aroha o te Atua ki te katoa o Ana tamariki kei ngā wāhi katoa, ā, e hiahia ana ia o rātou ki te kōwhiri kia hoki atu ai ki a Ia.

Nā ngā kī o te pirihitanga i whakahokia mai ai mā roto i te Poropiti a Hōhepa Mete e taea ai mō ia tāne pupuri kawenata, mō ia wahine pupuri kawenata kia rongo ai i ngā tikanga wairua mōna. Anei anō, he nui ngā hītori tapu e wātea ana hei ako mā tātou e pā ana ki te Temepara o Kirtland.

He akoranga tā Hōhepa Mete karakia whakatapu mō te Temepara o Kirtland mō tō te temepara whakamana ā-wairua i a tāua kia aro atu ki ngā wero o te ora i ēnei rā whakamutunga. E akiaki ana au kia huri atu koutou ki te rangahau i taua karakia kua tuhia i Whakaakoranga me ngā Akoranga wāhanga- 109. E whakaako ana taua karakia whakatapu, i whakawhiwhia nei i runga i te whakakitenga,tēnā, ko te temepara “tētahi whare karakia, he whare nohopuku, he whare whakapono, he whare akoranga, he whare korōria, he whare tika, he whare nō te Atua.”

He nui noa atu tēnei rārangi āhua i te whakamāramatanga noa mō tētahi temepara. He whakaari ia mō ngā mea e puta ai ki te hunga e mahi ai, e koropiko ai i roto i te whare o te Ariki. Ka rite rātou ki te whiwhi i ngā whakautu inoi, i ngā whakakitenga mōna ake, te whakapono nui ake, te kaha, te rangimārie, te mātauranga nui ake, me te mana nui ake.

Ka āwhinatia koe e te noho i roto i te temepara kia Tikitiki o Rangi ai ō whakaaro me te whiwhi whakakitenga ko wai tūturu koe, ko wai kē koe a muri ake nei, me te oranga e rapua ai e koe mō āke tonu atu. Mā te mahi putuputu i ngā mahi temepara e whakakaha ake i tō tirohanga ki a koe anō me tō tūranga i roto i te mahere mīharo o te Atua. Koinei taku whakaari ki a koutou.

Kua whakaaria mai nei ki a tātou, nā, ka taea te whiwhi ki “tētahi raneatanga o te Wairua Tapu” i roto i te temepara. Me huri ō whakaari ki te tikanga o taua kupu whakaari e pā ana ki te tuwheratanga ake o ngā rangi ki ngā kairapu pono i ngā mea pono mau tonu.

Kua tohua tātou, nā, ko te hunga katoa e koropiko ai i roto i te temepara te hunga e riro ai i a rātou te mana o te Atua me ngā anahera “e whaimana ana i runga i a rātou.” Ka nui ake tō māia mēnā ka mōhio koe, i te mea he wahine, he tāne rānei kua whiwhi i tōna hoatutanga tapu kua whakamaua ki te mana o te Atua, ehara ko koe anake i tēnei oranga? Ka māia koe i te mōhio ka āwhinatia koe e ngā anahera?

Hei te mutunga, kua whakaaria tātou “e kore tētahi huinga kino” e wikitōria ai ki runga i te hunga e koropiko ana i roto i te whare o te Ariki.

He mea nui te mārama ki ngā tikanga ā-wairua e taea ana i roto i te temepara mō tātou katoa i tēnei wā.

E aku teina me aku tuāhine, anei taku whakaari. Kāore kē tētahi mea e āwhina ai i a koutou ki te pupuri kaha ki te tokotoko rino i tā te koropiko ki roto i te temepara i ngā wā e taea ana. Kāore kē tētahi mea e tiaki ai i a koutou i a koutou e kuhu atu ana ki roto i ngā kohu pōuri o te ao. Kāore tētahi mea kē atu e whakakaha ake i tō koutou whakaaturanga mō te Ariki a Ihu Karaiti me Tana Whakamārietanga, e āwhina ai rānei i a koutou kia mārama akeai ki Tana mahere whakamīharo. Kāore tētahi mea kē atu e whakaaio ake ai i ō koutou wairua i ngā wā mamae. kāore tētahi mea kē atu e whakatūwheratia akengā rangi. Karekau!

Ko te temepara te tomokanga ki ngā manaakitanga nui rawa a te Atua mō tātou, nā te mea ko te temepara anake te wāhi i runga i te whenua e taea ana e tātou te whiwhi ki te katoa o ngā manaakitanga kua whakaaria mai nei ki a Aperahama. Koinā e mahi ana mātou i ngā mea katoa e taea ana i raro i te whakahaeretanga a te Ariki, kia wātea ake ai ngā manaakitanga temepara ki ngā mema o te Hāhi. Pēnei, e hari ana mātou ki te whakapuaki atu, nā, e whakarite ana ki te hanga temepara hou i tēnā, i tēnā o ēnei wāhi 15:

• Uturoa, French Polynesia

• Chihuahua, Mexico

• Florianópolis, Brazil

• Rosario, Argentina

• Edinburgh, Scotland

• Brisbane, Australia south area

• Victoria, British Columbia

• Yuma, Arizona

• Houston, Texas south area

• Des Moines, Iowa

• Cincinnati, Ohio

• Honolulu, Hawaii

• West Jordan, Utah

• Lehi, Utah

• Maracaibo, Venezuela

E aku teina me aku tuāhine, kei te whakaatu atu au ko tēnei Te Hāhi o Ihu Karaiti o te Hunga Tapu i ngā Rā o Muri Nei. E tū ana Ia ki te upoko. Ko mātou Ana apataki.

Tukua tātou kia hari i runga i te whakahokinga mai o Ana kī o te pirihitanga e wātea ai mō tāua kia rongo ai i ia manaakitanga ā-wairua e hiahia ana kia whiwhi ai tātou. E pēnei ana taku whakaaturanga i runga i te ingoa o IHu Karaiti, āmine.

Ngā Taipitopito

1. Nāku i whakakī i te whāwhārua i roto i te Kōrama o te Tekau Mā Rua i mahue iho ai i te 11 o Hānuere, 1983, i te matenga o Erata LeGrand Richards. Nā Erata Oaks taua mea i mahue iho i te 11 o Hānuere, 1984, i te matenga o Mark E. Petersen.

2. Hepetema 9, 1924.

3. I heipū ake te whakatapunga o te hanganga tuaruatanga mai o te Temepara o Nauvoo, Illinois e Tumuaki Gordon B. Hinckley i te 27 o Hune, 2002, te huringa tau 158 o te kōhurutanga o Hōhepa Mete rāua ko Hairama Mete.

4. Kotahi wiki noa whai muri iho i te whakatapunga a te Poropiti a Hōhepa Mete i te Temepara o Kirtland.

5. Whakaakoranga me ngā Kawenata 110:3.

6. Whakaakoranga me ngā Kawenata 110:4.

7. Whakaakoranga me ngā Kawenata 110:7.

8. Tirohia Whakaakoranga me ngā Kawenata 110:11.

9. Whakaakoranga me ngā Kawenata 110:12. Ko te pupuritanga tēnei i te whakaari e meatia ai e te Ariki ki a Aperahama i ngā tau manomano i mua (tirohia Kenehi 18:18; 1 Nīwhai 15:18).

10. Tirohia Maraki 4:5–6.

11. Tirohia Whakaakoranga me ngā Kawenata 110: 13– 16.

12. Tirohia Whakaakoranga me ngā Kawenata 13; 27:7–8, 12.

13. Tirohia Whakaakoranga me ngā Kawenata 20:1–4.

14. I te kōrerotanga atu o te Ariki ki a Hōhepa Mete ko tēnei rautau te wā “e kore tētahi mea e kaiponuhia” (Whakaakoranga me ngā Kawenata 121:28), koia kua whakahokia mai nei ēnei kī o te pirihitanga ki te whenua.

15. Whakaakoranga me ngā Kawenata 95:8; 109:22.

16. Tirohia Whakaakoranga me ngā Kawenata 132:45–46.

17. 2 Nīwhai 26:33; kua tāpiri te whakakaha.

18. Whakaakoranga me ngā Kawenata 109:8.

19. Whakaakoranga me ngā Kawenata 109:15.

20. Whakaakoranga me ngā Kawenata 109:22.

21. Tirohia Whakaakoranga me ngā Kawenata 109:24–26.

22. Ko tōna tikanga ko te kupu a te Atua.

23. Tirohia Whakaakoranga me ngā Kawenata 110:12; 132:29-30.