Ko ngā Mea Katoa Hei Painga Mōu
I ngā wā mau tonu, ko te pūtake o te hanganga o te ao me te āhuatanga o te Atua Ake anō koia ko te whakakotahi i ngā mea katoa hei painga mō tātou.
Ko te rā nei te tuaono o Āperira—ko te huringa tau o tā Ihu Karaiti whakahoki i Tana Hāhi i ngā rā o muri nei, ā, he wāhanga anō nō te kaupeka o te Aranga e whakaatu hari atu ai tātou i te oranga hē kore, te whakahere whakamārie, me te Aranga whaikorōria o Ihu Karaiti.
Ka tīmata tētahi pakiwaitara Hainamana i te kitenga o te tama a tētahi tangata i tētahi hōiho ātaahua.
“Anō te waimarie,“ tā ngā kiritata.
“ka kite tātou,” tā te tangata.
Kātahi ka taka iho te tama i te hōiho, ā, ka whara mau roa ia.
“Auē te mate,“ tā ngā kiritata.
“ka kite tātou,“ tā te tangata.
Ka haere mai tētahi tauā rēhita tangata engari kīhai i rēhitatia te tama kua whara nei.
“Anō te waimarie,“ tā ngā kiritata.
“ka kite tātou,“ tā te tangata.
Ko te āhua nei he tino tikoki tēnei ao whaiwhai taonga, he nui ngā piki me ngā heke, he waimārie i ētahi wā, ā—i te nuinga o te wā—kāore e waimārie ana. Heoi, i roto i tēnei ao matemate nei, “e mōhio ana tātou e mahi tahi ana ngā mea katoa ki te hunga e aroha ana ki te Atua.“ E tika ana, i a tātou e hīkoi totika ana, ā, e maumahara ana ki ō tātou kawenata, “ka mahi tahi ngā mea katoa hei painga mōu.“
Ko ngā mea katoa hei painga mō tātou.
He whakaari mīharo! He kupu whakaaio pū anō nā te Atua Ake anō! I tētahi āhuatanga mīharo, ko te pūtake o te hanganga o te ao me te āhua o te Atua, arā, ko te mōhio ki te tīmatanga me te whakamutunga; kia whakaputaina mai ai ngā mea katoa kua ai hei painga mō tātou; me te āwhina i a tātou kia whakatapua ai mā roto i te aroha o Ihu Karaiti me Tana Whakamārietanga.
Ka whakaputaina, ā, ka hokona tātou i ō tātou hara e te Whakamārietanga o Ihu Karaiti. Engari e tino mārama ana a Ihu Karaiti ki ō tātou mamae katoa, whakamamaetanga katoa, mate katoa, pōuritanga katoa, weheruatanga katoa. Hei roto i ngā wā mau tonu, ka whakatikaina ngā mea katoa e Tana wikitōria i runga i te mate me te ao rēwera. Kei te āwhina Ia ki te mahu i ngā mea kua pakaru me ngā mea kua marū, ka houhia te rongo i waenganui i te hunga riri kua weheruatia, ka whakaaiotia te hunga mokemoke me te hunga noho whakataha, ka akiaki i te hunga rangirua me te hunga poke, ā, ka meatia ngā merekara e taea ana anake i raro i te maru o te Atua.
Ka waiata hareruia, ā, ka hāmama ōhana! Mā te mana mau tonu me te painga mutunga kore, i roto i te mahere hari o te Atua, ka mahi tahi ngā mea katoa hei painga mō tātou. E taea ana e tātou te huri atu ki te oranga i runga i te māia me te wehi kore.
Me ka waiho ko tātou anake, tērā pea kua kore e mōhio ki ō tātou ake pai. Ina “kōwhiri au i ahau anō,“ kei te kōwhiri hoki au i ōku rohenga, ngoikoretanga, āwangawanga. I te mutunga, me pai tātou kia mahi i ngā mea tino pai ake. I te mea ko te Atua anake te mea e pai ana, kei te whai atu i te tiketiketanga i roto i a Ihu Karaiti. Ka eke tātou ki ō tātou tino āhua, āhua pai ake mā te pana atu i te āhua o te ira tāne, ira wahine rānei me te huri hei tamaiti i te aroaro o te Atua.
E taea ana mā runga i te whakawhirinaki me te whakapono i te Atua, kia whakatapua ō tātou whakamātautau me ō tātou whakamamaetanga hei painga mō tātou. I whakaora a Hōhepa, te mea i hokona atu hei taurekareka ki Ihipa, i tana whānau me tana iwi nō muri iho mai. Nā te herenga o te Poropiti Hōhepa Mete i Liberty ia i whakaako mā ēnei mea “e mātau koe, ā, ka riro hei painga mōu.” Mehemea ka ū te whakapono, ka meinga ngā uauatanga me ngā whakahere kua kore nei e kōwhiria e tātou hei manaakitanga ki a tātou, ki ētahi atu anō i ngā āhuatanga maha.
Ka whakanuia e tātou tō tātou whakapono, whakawhirinaki hoki i te Ariki tērā ka mahi tahi ngā mea katoa hei painga mō tātou i a tātou e mātau haere ki tētahi tirohanga mau tonu; kia mārama ai he “wā poto noa“ ō tatou whakamātautau; kia kitea ai ka whakatapua ō tātou whakamamaetanga hei painga mō tātou; kia whakaae atu ngā aituā, ngā mate ohorere, ngā mate ngau i te tinana, me te mate urutā tētahi wāhanga o te ao matemate; kia whakawhirinaki anō ki te mea e kore tō tātou Matua i te Rangi e tuku whakamātautau mai hei whakawhiu, hei whakawā i a tātou. Kua kore rawa Ia e hoatu ki tētahi he kohatu kātahi ka tonoa te paraoa, he nākahi rānei ki tētahi kātahi ka tonoa he ika.
Ina tau mai ngā whakamātautau, i te nuinga o te wā i te hiahia tātou kia whakarongo mai, kia piri mai rānei tētahi. I taua wā tonu, kāore e pai ana ngā whakautu whakaaro kore, ahakoa te aroha o taua tangata. I ētahi wā e tino kōingo ana tātou kia pōuri, kia mamae, kia tangi tahi mai tētahi; tukua tātou kia mamae, kia hōhā, i ētahi wā kia riri pū anō; me te whakaae ake kāore tātou e mōhio ana ki ngā mea katoa.
Ina whakawhirinaki tātou ki te Atua me Tōna aroha ki a tātou, ka mahi tahi ō tātou mea pōuri nui rawa i te mutunga hei painga mō tātou.
E mahara ana au ki tētahi rā i whai kupu au mō tētahi tukinga waka kino rawa i pākia ai ki ētahi o tōku mea arohaina. I aua wā, i runga i te mamae me te whakapono, ka kōrero tahi tātou me Hopa, “I homai e te Ariki, ā, kua tangohia atu e te Ariki; kia whakapaingia te ingoa o te Ariki.”
Huri noa atu i te Hāhi whānui o te ao, ka tuku wāhi whakaruruhau ngā pou ā-rohe me ngā takiwā neke atu i te 3,500 me ngā peka neke atu i te 30,000 kia haumarutia ai i ngā marangai. Engari kei roto i ō tātou pou ā-rohe me ō tātou wāri, he tokomaha te hunga i reira e pākia ana e ngā uauatanga nui, ahakoa e mōhio ana (kāore anō rānei kia mōhio) ka mahi tahi ngā mea katoa hei painga mō tātou.
I Huddersfield, Ingarangi, i whakataua a Teina Samuel Bridgstock kua pā te matepukupuku taumata tuawhā ki a ia i mua tata i tana karangatanga hei tumuaki pou ā-rohe hou. Nō muri i tēnei whakataunga, ka uia tana hoa wahine, a Anna, me aha ia e haere atu ai ki te uiuitanga.
“Nā te mea” te kī a Tuahine Bridgstock, “ka karangatia koe hei tumuaki pou ā-rohe.”
I te tīmatatanga i kīa ka kotahi, ka rua tau rānei te roa e ora ai ia, kei te tau tuawhā a Tumuaki Bridgstock (kei konei ia i te rā nei) o tana mahi. He nui ana piki me ana heke. Kei te whakatupu haere tōna pou ā-rohe i tō rātou whakapono, mahi whakarato, me tō rātou aroha. Ehara i te ngāwari, engari e ū ana tana hoa wahine rātou ko tana whānau i runga i te whakapono, te whakawhetai, me te pōuritanga e whakawhirinaki nei rātou ka huri hei hari mau tonu mā roto i te Whakamārietanga o Ihu Karaiti.
Ina tau, tūwhera, āio tātou, ka rongo tātou i te ātaahua, te pūtake, me te āio o te kawenata e tukua mai nei e te Ariki. I ngā wā e tapu ana, ka tukuna e Ia kia paku kite i te āhuatanga mau tonu tūturu o te ora, i reira mahi tahi ngā mea iti hei painga mō te hunga tuku me te hunga whiwhi.
I kōrero mai a Rebekah, te tamahine o te tumuaki mīhana tuatahi,mō tā te Ariki whakautu i tana inoi whakaaio ki tētahi mahi hei whakautu i te inoi o tētahi atu.
I tētahi pō, i a Rebekah e tangi ana mō te matenga o tana whaea, ka rongo ia i tētahi whakaaro nui kia haere atu ki te hoko penehīni mō tōna waka. I tana taenga atu ki te whare penehīni, ka tūtaki ia ki tētahi kuia e raru ana ki te rapu hā i tana taputapu hā. Whai muri iho, i hoatu e Rebekah te taputapu hā o tōna whaea ki taua kuia. Kātahi ka kī atu tēnei kuia ki a ia, “Kua wetekina e koe ngā herehere e herea nei au.” E mahi tahi ana ngā mea hei painga ina minita tātou pērā i a Ihu Karaiti.
I whakamāramatia iho e tētahi matua kua whakahonoa tahi ki tana tama taumata kaiako te pakeke, ka kī “Ko te minitatanga tā tāua huri mai i te kiritata e kawe pihikete ana ki ētahi hoa tata, e aro tuatahi ana ki te wairua.” Mā te piri ki ngā kawenata a Ihu Karaiti e whakaaio, e whakahono, e whakatapu.
Ahakoa i ngā pōuritanga, ka whakamaharatia tātou i roto i ngā whakarite o te wairua, nā, i mōhio tō tātou Matua i te Rangi ki ō tātou āhuatanga i ngā wā i ngoikore ai, i mokemoke ai tātou. Hei tauira, i tau ai te mauri o tētahi whānau i kawea atu ai tā rātou tamaiti ki te hōhipera mā runga waka tūroro i tā rātou maumahara nā te Wairua Tapu i kohimu atu he aha ngā mea e heipū ake ai.
I ētahi wā ko te āhuatanga mau tonu tūturu e tukuna mai ai e te Ariki kia rongo ai tātou, arā, ko te rongo i ngā whanaunga kei tua i te ārai. I rongo tētahi tuahine i te hari i tana whakatahuritanga ki te rongopai a Ihu Karaiti. Heoi, e rua ngā mea taumaha i pā ai ki tōna oranga—ko tana kite atu i tētahi aituā poti me te rironga o tōna whaea he mea whakamomori.
Heoi i wikitōria tēnei wahine i runga i tōna wehi ki te wai nā konā ka rumakina ki te wai. Ā, i taua rā harikoa nui, i kite atu ia i tētahi e rumakina ana hei kairīwhi mō tōna whaea kua mate i roto i te temepara. “I ora taku whaea i te rumakitanga temepara, ā, i wetekina anō ōku here,“ te kī a tēnei tuahine. “Koia te wā tuatahi i rongo ai au i te rangimārie mai i te matenga o tōku whaea.”
E pari kārangaranga ana ā tātou hīmene tapu i Tana whakaū i te mahi tahi o ngā mea katoa hei painga mō tātou.
He taunakitanga te Pukapuka a Moromona e taea te pupuri i ō tātou ringa koia ko Ihu te Karaiti, ā, e whakatutuki ana te Atua i Ana poropititanga. He mea tuhi e ngā poropiti i kite ai i ō tātou rā, e tīmata ana te Pukapuka a Moromona ki tētahi āhuatanga—arā, tētahi whānau e aro atu ana ki ngā whakaaro taupatupatu. Heoi, i a tātou e rangahau ana, e whakaaro ana ki a 1 Nīwhai 1 tae noa atu ki Moronai 10, ka tōia mai tātou ki a Ihu Karaiti i runga i te whakaaturanga kaha, nā, ka manaakitia tātou e ngā mea i tū ai i reira i taua wā.
I te Ariki e tō mai ana i ētahi atu whare o te Ariki kia tata ai ki a tātou mā roto i Tana poropiti ora, ka kite tātou i ngā manaakitanga temepara e mahi tahi ana hei painga mō tātou. I tētahi āhua, ka haere mai i runga i te kawenata me te tikanga tapu ki te Atua tō tātou Matua rāua ko Ihu Karaiti, ā, ki te rapu i te tirohanga mau tonu ki te oranga. Tētahi me tētahi, ingoa me te ingoa, ka tukuna ki ngā mema arohaina o te whānau—ngā tūpuna—ngā tikanga tapu me ngā manaakitanga kawenata i tā te Ariki tauira mō ngā kaiwhakaora ki Maunga Hīona.
I te mea kei te whakatata mai ngā temepara ki a tātou i ngā wāhi maha, ko tētahi whakahere temepara e taea nei e tātou te tāpae, koia, kia nui ake tā tātou rapu i te tapu i roto i te whare o te Ariki. Kua maha ngā tau tātou e penapena ana, e whakarite ana, ā, e whakahere ana kia haere ai ki te temepara. Ināianei, pērā i ngā mea e taea ana, tēnā koa kia nui ake tō koutou haere mai ki te Ariki i Tana whare tapu. Tukuna mā te koropiko temepara me te mahi whakarato e manaaki, tiaki, me te whakahihiko i tō ngākau, me ngā ngākau o tō whānau—arā, ko tō whānau ināianei ko tō whānau rānei a muri ake nei.
Waihoki, mēnā e taea ana, tēnā koa me whakaaro ki te manaakitanga o te hopu i ō ake kākahu temepara. I kī ai tētahi kuia nō tētahi whānau māhaki ko tana hiahia kē i ngā mea katoa i te ao, koia, ko ōna ake kākahu temepara. I kōrero tana moko, “I kohimu mai taku kuia, ʻka mahi au i roto i ōku ake kākahu temepara, ā, ina mate au, ka tanumia au i aua kākahu.” Ā, i te taenga mai o taua wā, i pērātia.
Pērā i tā Tumuaki Russell M. Nelson e whakaako nei, “Ka whakakotahitianga mea katoa e whakapono nei tātou me ia whakaari kua meatia nei e te Atua ki Tana iwi kawenata i roto i te temepara.”
I ngā wā mau tonu, ko te pūtake o te hanganga o te ao me te āhuatanga o te Atua Ake anō koia ko te whakakotahi i ngā mea katoa hei painga mō tātou.
Koinei te pūtake mau tonu o te Ariki. Koinei te tirohanga mau tonu o te Ariki. Koinei Tōna tirohanga mau tonu.
Ina rehurehu te kite atu, ina kāore e mārakerake ana te kite atu i tō pūtake, ina hiahia koe kia pai ake te āhuatanga o te oranga engari kāore e mōhio ana me pēhea, tēnā koa, me haere mai ki te Atua tō tātou Matua rāua ko Ihu Karaiti. Me whakawhirinaki kei te ora Rāua, kei te aroha ki a koe, ā, e hiahia ana ngā mea katoa hei painga mōu. Kei te whakaatu atu au e pērāhia ana, mutunga kore, ā, mau tonu, i runga i te ingoa tapu o Ihu Karaiti, āmine.