T’áá Ałtsojį’ Yá’át’ééh Dooleeł Diyin God Bighan Ntsáagí Bee Aha’da’deet’aahígíí Binahjį’
Doo ła’ aláhgo ánááná t’éida Diyin God bighan ntsáagí biyi’di bił aha’díínt’ánígíí bik’eh honíł’į́įgo doodai’ áadi bił aha’dídíít’ááłígí bik’eh honíł’į́įdo.
Sheik’s dóó shilahkéí ayóó’ííníshníinii, díí ntsaago áłah siidlį’ígíí, shił, diyingo shił baa hasti’. Nihich’į’ haasdziihígíí baa shił hózhǫ́ aadę́ę́’ Sodizinjí da’nohtahígí dóó áłtaháásįiįlgóó nohokáá’ ahíyéesáagóó. Ayóó’ánhíínísh’ní, dóó shił bééhózingo éí Bóhólníihii ayóó’ánhó’ní.
Ashdladiin biláago nááhaiyę́ędą́ą́’, Rexburg, Idaho Ricks Collegedi bá naat’áanii nishłíínít’éé’. June 5, 1976yę́ędą́ą́’ abíínígo, she’asdzáá, Kathy, bił Rexburgdóó nihił dah adiilwod Idaho Falls Idaho Templego nihik’is ła’ hool’áagóó diyingo ahiho’diiljeeh bá ál’néehgo. Ákohgo, dį́į́’ ashiiké yázhí niha’ áłchínígo, áłchíní ya’áhályání doo áłchíní yináldzidígí nihika’ánálwo’go Diyin God bighan ntsaágó dahdidiit’ash. Niha’áłchíní asdzáá ba’áhalyą́ądoígí bił ninii’nel dóó t’áá áhaníjį’, tádiin-dah alzhin hoł oolwoł bíighago nihił dahadiilwod.
Diyin God bighan ntsaádi nizhónígo nihee i’íí’ą́, t’áá áłahjį’ ákót’éełeh. Ákoga’, ałtso diyingo ahiho’diiljeeh bá ályaago—hooghangóó nihił ndeeswodgo bá hast’e’ áda’diilnééh nt’éé’—t’óó ahayói Diyin God bighan ntsáadi ndaalnishígí dóó neheskaiyę́ę t’óó bił ándahadįįhgo ahił dahalne’. T’áadoo nááhodoo’ná’í, Diyin God bighan ntsáadi ndaalnishígí ła’ nihił hoolne’ éí Teton Dam Idaho ha’a’aahjígoógí naan’ní’áhí k’é’éltǫ́’ daaníílá! Tó lą’í tseebídiin mííl ntsaágí dóó bi’aan (300 mííl cubic meters) ánéelą́ą’go nihich’į’ yinah díí táadi neeznádiin tsin sitą́ bííghah áníłtéelgo (775 square km). K’asdą́ą́’ ałtso Rexburg kin dahshijaa’ígí táłtł’ááh silį́į́’, dah hooghan dóó chidíyę́ę da adahaaz’éél. Áadi náhást’éí dimííl yázhí ałníí’dóó bi’aan kéédaha’t’ináa t’áá hooshch’į’ bighanyę́ę ádaasdiidgo ch’éékai.
Baa ntsókeesígí át’ao, baa tsídiikééz dóó baa nihíni’ niha’áłchíní ayóó’ííníí’ninígíí daats’í t’áadoo át’éhégo naháaztą́ niidzin, dóó hódahgo da’ółta’ígí dóó bá da’ólta’í ndaalnishígíí, dóó ayóó’ííníí’níigo áadi kéédaha’t’ináá. Tádiin tsisitą́ t’áá bich’į’di ánízáadi nait’aash, dóó íídą́ą́’, éí k’ad béésh bee hane’í ndeijaahígí dóó saad biyi’jį’ yiltązhígí ádaadingo, niha’áłchíní t’áá hooshchį’ bee bich’į’ hodoonihígí ádingo, doodai’ kodóó Idaho Fallsdóó Rexburgjį’ ndi’doolwołígí doo bííghahgóó, t’áá ałtsogóó atiin dada’deeskaal.
T’áadoo oo’ne’ígóó t’áá ákǫ́ǫ́ da’njáhágóó nihaahodeet’ą́ Idaho Fallsdi. Da’njáhídi nihaahodeet’ą́ągo Kathy bił ntsídiniigo’go nihiZhé’é Yá’ąąshdi Hólónígíí bich’į’ na’iisiikan niha’áłchíní ayóó’ííníi’ninígí nihá ba’áhólyą́ t’áadoo át’éhígóó naháztą́ądoo dii’níigo dóó báhádzidgo áhoodzáagi dimíílyázhí lą’ígóó bee bich’į’ dahwidiiznááígí ałdó’ ba’áhólyą́. Bénáshniih Kathy éí tł’éé’bíígha naagháago yishką́ ba’áłchíní yąą bíji’go. Azhą́ ayóó át’ao ntsíshiiłkees ndi, ni’kwíisdzaa dóó iiłhaazh.
Hodíína’go hool’áagóó shich’ooníhígí nahshidiiłt’e’ dóó áshíłníílá, “Hal, ha’át’íísh binyé íłwosh kóhoot’éego?”
Díí saad doonaaki nilį́į́go shijéíí dóó shintsékees biyi’di bee shił hoone’. She’asdzáá ábidishníílá: “Kathy, t’áá ha’át’aoshį́į́ áhoodzaaígí, t’áá ałtsojį’ yá’át’ééh dooleeł Diyin bighan ntsáagí binahjį’. Diyin God bił aha’diniit’ánígíí binahjį’ dóó hool’áagóó ahidanhi’deestł’ǫ́ niha’áłchíní bił t’áá łáhádoo nihighan haz’áádoo.”
Ákwe’é hoolzhishgo, t’áá íídą́ą́ nihił bééhózin Bóhólníihi bee Ii’sizíinii nihijéí dóó nihintsékees biyi’di nihił ííshjáá ályaa t’áá aaníiniihígí: Diyin bee ó’ool’įįł ahiho’diiljeehgo, Bóhólníihii bighan ntsaahígí t’éiyá biyi’góne’ ál’į́ dóó Diyin God bibee’adziilii bee óhólníihii bee ál’į́, éí bee she’asdzáán bahastiin nishłį́įgo ahíshiiljée’go anhi’diilyaa, dóó niha’áłchíní ałdó’ nihéshjée’go ádaalyaa. Éí t’áá íyisí binahjį’ doo néeldzid dadoo, dóó baa ahxééh niidzį́į́’ nihe’ashiiké yá’át’éehgo naháaztą́ą́ lá.
President Thomas S. Monson éí kót’ao haadzí’ígíí binahjį’ Kathy dóó shí doo baa hoyoo’nééhgo íídą́ą́’ tł’éé’go ániit’éhąą. “Bóhólníihii bighan ntsaahígí biyi’go ałnánéidáahgo, Diyin k’ehgo iiná íilį́įdoo dóó nihił hodeesyéél doo. … T’áá íyisí nihił bééhodoozįįł Yisda’iiníiłii bizaad yee yáłti’go ííłnínígí kóNíigo: ‘Hodeesyéél nihaanishłé, shí shits’ą́ą́ doógí nihaanishłé. … T’áadoo nihijéí bichį’ ndahiyoołnání, náhádzid ndi t’áadoo biyi’ hołóní [John 14:27].’”
Bee shik’ihojisdli’ t’áá áłahjį’ shił hodéesyéélgo Bóhólníihii bighan ntsáagí baa hasti’ígíí biyi’ yah anáshdáahgo. Bénáshniih t’óó áłtsé Salt Lake Templedi ya ííyáhąądą́ą́’. Íídą́ą́’ ánii naasháago.
Dego déé’į́į́ ńt’éé’ yá dootł’izhgo shich’į’ ąą’ ádzaa dóó ndeezdíín nahalin silį́į́’. Dóó íídą́ą́’, díí saad baa tsídékéés: “Díí kodi n’deezdínídi t’áá íídą́ą́ hweesh’į́.” Ákondi t’áá áko baa tsídékééz, doo t’áá shí ádishníí da, díí saad: “Dooda, díí yee’ t’ahdoo kwe’é hoołtséé da. T’ahdoo ni’dichíí yę́ę́dą́ą́’ béínílnii’. Díígi’átao áadi baahast’i’go haz’ą́ Bóhólníihii nináhádáhádi.”
Shik’is dóó shilahkéí, jooba’ íinisingo t’áá aaníinii bee nihił hashne’ Bóhólíihii bighan ntsaágóó áłnánéidáahgo, nihiyi’ sizíinii hool’áagóó bee hinii’nánígí nihxeéyiyiiłníí, Diyin God nihizhé’é át’éhígí dóó BiYe’ diyinígíí, dóó aláahgo yá’ąąshdi nihighanígóó ndiidááł niidzin doo.
Ánii áłah da’azlį́į́’ígíí biyi’dóó, President Russell M. Nelson na’neeztą́ą́:
“Táá íyisí siihasingo haz’ą́ diyink’ehgo iiná éí bee iinánígí bee hijiináago éí Diyin God bighan ntsaádi bił aha’díínít’ánígíí bee!”
“Táá at’éént’éé’ yiníídlánígí dóó t’áá at’é Diyin God yee haadzíí’yę́ę bidine’é Yił áhá’deet’ánígíí Diyin bighan ntsaadi áhíídookah.”
“Diné t’ááła’í nîtinígo Diyin yił ałha’dadeest’ánígí … Diyin God bighan ntsaágí biyi’di—dóó yik’eh dahółínígí—éí Jesus Christ bibee’adziilii lą́’ígóó yee naalnishgo bee bá’áhoot’i’.”
Kót’ao ałdó’ na’neeztą́ą́’ éí “t’áá Diyin God bił aha’diniit’ą́ą́ doo, hool’áagóó t’áá bí t’éiyá bikéé’ yiidáał doo. Diyin God éí doo nihits’ą́doogáał da bikéé’ yiidáałgo. T’áá aaníigo éí, t’áá ałtso Diyin God yił aha’dadeest’ánee ayoo áyóó’áyo’níigo yaa jooba’ dóó bee ajooba’ yee yik’ijidlí.”
President Nelson naat’áanii nilinígí diyingo bee bił hane’ígí éí, Bóhólníihii binahjį’ tsį́į́łgo áhoodzáá, dóó t’ahdii tsį́į́łgo bee áhoonííł, nahasdzáán bikáá’góó Diyin God bighan ntsaágí ádaalne’. Díí binahjį’ Diyin God bee ó’oolįįł bee yisdá’iildééhígíí ba’áłchíní bá ádadoolníiłgo yich’į’ ąą’áyósin dóó aláadi ilhózhóonii baa hont’i’go yá áyósin dóó diyingo yił aha’daadeet’aahgo bik’eh dahółį́ doo. Kót’ao ła’yiilaago diyingo bił ałha’diniit’ą́ągo doo t’áá łahí-di t’éiyá ájiiłįįh da hwe’iina’ bee bik’eh áhojiiłįįh. Bóhólníihii aní nihijéé t’áá át’éént’éé’ bee, dóó nihe’adziil bee, dóó nihinkékees bee, dóó nihitsxe’ígí bee.
T’áá ahxą́ą́h Diyin God bighan ntsaáhídi ałnáánídáahgo bee áda’oolįįł aníłį́įgo binahjį’ hodinísingo Bóhólníihii bikéé’ sinízį́ dííleeł. Diyin God bighan ntsaágí biyi’di bił ałha’díínt’ánáa dóó beenílniihgo, Ii’sizį́ Diyinii t’áá áłahjį’ nił hólóodoo ndziilgo ánósindoo dóó doo naahchinígó ánósindo.
Áko inda adinídíín dóó siihasin t’áá aaníinii bee nił hoone’ yę́ę t’áá aaníigo nił beehodoozįįł. Nił beehodoozįįł t’áá áłtso Diyin God bee bił aha’díínt’ánígíí binahjį’ biighahgóó yínááł doo, áko éí bee bínindlį́įgo bił bee aha’díínt’ánígíí bik’eh honíłį́į doo.
Díí t’áá aaníigo bee nihił hoone’, háálá Diyin God bił aha’diniit’ánígíí, éí Nihí ka’análwo’go doo nihąąh ch’éédidoogáał da, dóó Bee ajooba’ doo yee t’ah nízingo doo nihxee iidoołdįįł da.”
Diyin God bighan ntsaa’ígíí biyi’góne’ bił aha’da’diniit’ánígíí bee nihighan haz’ą́ądóó ayóó o’óní ba’ííníidlíigo bee da’ahííníitą́go anoonééł doo bidééłníígo dóó hool’ool’áágóó bił hohniidlǫ́ǫ doo. Diyin God bighan ntsaa’ígíí biyi’góne’ ałhaaniit’áazhgo bił ałha’diniit’ánígíí dóó nihighan haz’áadóó bił aha’da’diniit’ánígíí bik’eh honiil’į́įgo Diyin God niha’áhalyą́ągo nihich’ą́ą́ naagháado dooyá’áshóonii ádaat’éí bee doo t’áá sáhí ádaantsíikees da doo dóó ádaahodzódlí nihits’ą́ąjį’ hwííłį́į doo.
T’áá áłahjį’ doo baa dayoohnééhgo nihi k’iskéí dóó nihi lahkéí bił ałk’i dadínót’į́į’go nihighan haz’áádoo Bóhólníihii bik’ehgo hoot’ááł bee bá dahwíínóhaahgo t’éiyá ákódoonííł. Áłchíní bá ndah hoołaahgo hwendí áłhá sodadilzin. Saad ałhídeet’áahgo tóó bee hahalzhíshídi bits’ą́ą́’ ni’kódaołe’, dóó ałhiká andaajahígíí bee baa dahoniih. Ahił háájéé’ danlínígíí ahidiníł náago ahá sodadilzingo dóó ahíł ká andaajahgo, éí bijéí bee daalzhólí dóó yee yá’át’éehgo ałhaa nitsidaakees dóó bimá dóó bizhé’é ałdó’ yich’.
Kwe’é, éí Malachi Diyin God yá yáłt’i’í Elijah náasdi áhodooníiłgo yaahoolne’ kóníigo: “Diyin éí áłchíní bijéíí biyi’di k’ididoolyééł bizhé’é bich’į’ t’áá aaníí áha’níigo bee hada’iisdzíí yę́ę, dóó áłchíní bijéíí bizhé’é bich’į’go nidadoolyis. Jó éí doo ádzáágóó, Bóhólníihii niyáago nahasdzáá t’áá ńt’ę́ę́’ t’áadoo biniiyéhí da doolééł.”
Nanhi’dintaahgo, ach’į’nahwii’ná, dóó nihijéíí daneezgaigo t’áá áníiltso bee diikah. Doo ła’ baatxis hodidooljizh da “t’áá áníiltso host haa’íí’á nahalingo nihi dídóółniił.” Ákondi, Diyin God bighan ntsáagí biyi’go ałnánéídáahgo dóó Bił aha’diniit’ánígíí, bá ałch’e’ ádiníilzingo Bóhólníihii t’áá nihí siizinígi ádii’níłígíí yee nihił halne’doo.
Kathy bił Logan Utah Templedi ałhaaniit’áázhgo ahinhi’diiljéé’, íídą́ą́-Elder Spencer W. Kimbal Diyin bee ó’oolįįł yee hool’áágóó ahíshiiljéé’go nihá áyiilaa. Saad ílíinii yee nihich’į’ haadzíígo kóní: “Hal dóó Kathy, yá’át’ééhgo hiinohná áko nihik’ihodiinii’go, doo nanitł’ahgo bich’į’ dahdidooh’ash.”
Íídą́ą́’, nihich’į’ ha’oodzíí’go t’áadoo hazhó’ó bik’idiitą́ą da, ákó éí yá’át’ééhgo nihee’iina’ yá’át’éehgo íílį́įgo hoolzhish áko bá hasht’e’ádinníiłzindo háadida Bóhólníihii bá nidoołnish nihik’ihodiinii’go doo nanitł’ahgo bich’į’ dahdidiit’ash. Neeznáá nááhai ahisiigah dóó hóóshdę́ę́’, nt’éé’ t’áadoo hooyání nihi’déékeed Commissioner of Church Educationdę́ę́’, Neal A. Maxwell áníigo.
President Kimball Diyin God bighan ntsaádi anhidííniid yę́ę́ “doo nanitł’ahgo bich’į’ dahdidooh’ash” ninę́ę bohoolyaa. Kathy bił Californiadi iiná baa hózhǫ́ǫgo íílínę́ę naanish ła’ bee shik’ihodiinii’ dóó áadi doo bééhasinda ndi. Jó áko nihighan haz’ą́ą́dóó dahdidiikahgo báhasht’e’ ádadíníilzin nt’éé’ háálá diyin yá yáłti’í, diyin bighan hodilzindi, diyingo ił hane’di, náásgóó áhodoonííłgo yiyiiłtsą́ éí bá hasht’e’ ádadíníilzin nt’éé’.
Sheik’s dóó shilahkéí ayóó’ííníshníinii, oo’íinii nishłį́įgo t’áá aaníigo shił bééhózin éí doo ła’ aláhgo ánááná t’éida Diyin God bighan ntsáagí biyi’di bił aha’díínt’ánígíí bik’eh honíł’į́įgo doodai’ áadi bił aha’dídíít’ááłígí bik’eh honíł’į́įdo. T’áá haa’ígí shį́į́ Diyin God bił aha’díín t’ánígíí bąąh yínáałgo, baa nanhiinishąąh bíínghahgo á’dílnééh dóó Diyin God bighan ntsaágóó áłnáándáahgo bee ná ahóót’į’go á’dílnééh. T’áá ahxááh t’áá bíínóhxahígo ałnáándaah doo. Diyin God bił aha’dinít’aah dóó díínísingo bik’eh honíł’į́. T’áá aaníigo bee nihił hasne’ ashdla’diin nááhoaiyę́ędáá’ tł’éé’ ííłníi’go Idaho Fallsdi da’nijahágóne’ Kathy bił hweeshne’yę́ęgi át’ao nihił hashne’: “T’áá ałtsojį’ yá’át’ééh dooleeł Diyin God bighan ntsáagí bee aha’da’deet’aahígíí binahjį’.”
T’áá aaníí oo’íinii nishłį́įgo shił beehózin Jesus éí t’áá aanííh Christ nilí. T’áá aaníí hiná dóó Bísodizin bá Hooghan yiláajį’ sizí. Diyin God bighan ntsaágíí naaznelígí éí Bóhólníihii bighan ádaat’é. President Russell M. Nelson éí nahasdzáán bikáá’góó Diyin Yá yáłti’ nilį́. Ayóó’ííníshní, dóó t’áá łá’í noozínígo ayóó’ánhííníshní. Jesus Christ bízhi’ baa hast’ii binahjį́ ’ádishní, áamen.