![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe9%2Ffd%2Fe9fd3efae1ffe6695438e983e41b106c093e528f%2Fe9fd3efae1ffe6695438e983e41b106c093e528f.jpeg/full/!250,/0/default)
Álílee Ádaat’éii, Diyin God Yándaal’a’ii, dóó Diyin God Bibee’adziiliígíí
Diyin God bibee adziilígíí bee shik’ihojidlíido ninízingo, álilee ádaat’eii dóó Diyin God yándaal’a’ii háká anájahgo, éí Diyin God bił ahadeet’aahígíí bee atiin bikáágóó t’áá ła’íniizínígo bikáá’ yiidááł doogo nihá áyiilaa.
Lą’í éí ádaaní álílee ádaat’éii doo hólǫ́ǫ da, dóó Diyin God yándaal’a’ii doo t’áá aaníida, dóó yá’ąąshdi éí da’deelkaal. Shí éí t’áá aaníigo shił beehózin álílee ádaat’éii t’ahndii hólǫ́, dóó Diyin God yándaal’a’ii nihitahgóó hólǫ́, dóó yá’ąąshdi éí t’áá aanii ąą’ádaat’é.
Nihi Yista’iiníiłii, Jesus Christ, nahasdzáán yikáá’ naagháháadą́ą́’, Diyin God beeadziilii bibee áandítį́hí alą́ąjį’ Bá halne’í Apostle Peter yeinínil Díí bee áandítį́hí binahjį’, Peter dóó ła’ ałdo’ Apostles danlinígíí Yista’iiníiłii Bisódizin Báhooghan dayiyéełyeed nt’éé’. Áko éí Apostles asdįįdgo, Diyin God beeadziilii bibee áandítį́hí nahasdzáán bikáá’doo náádiilyá.
T’áá aaníigo shił bééhózin t’áá ałk’idą́ą́’ Diyin God beeadziilii bibee áandítį́hí yę́ę ninalyá. Peter, dóó James, dóó John dóó t’áá ałk’idą́ą́’ Diyin God yádahalne’ii danlinę́ę naadiijéé’go Bibee’adziilii bibee áandítį́hí Diyin God Yá Yáłti’íí Joseph Smith yaa dayizhjaa’, éí Bóhól’níihii ání “Shił haz’ą́ądi bibee aándítį́hí át’é, dóó shisodizin bina’nitin bił baa deet’ą́.”
T’áá éíí bee áandítį́hí dííjį́įjį’ Diyin God Yá Yádaałti’íí baa dahaasyá. Hasdla’áadah hastoii bikéé’ nisiidzínígíí Diyin God Yá Yádaałti’íí, dóó ééhózin yaa dahalne’ii, dóó diyingo bił ííshją́ą́ ádaal’ínígíí díí bee áandítį́hí Bóhólnííhii Bisodizinjí biyi’ yá naat’áanii danlí. T’áá ałk’idą́ą́’ át’éhą́ągi át’ao, t’áá ła’í náás silį́’ígíí Apostle nilį́ígo bee bik’ihodiinii’ t’áá át’éént’éé’ Diyin God bibee’adziilii bibee áandítį́hí dahyoojihgo yee naalnish. Éíí éí President Russell M. Nelson, Diyin God yá yáłti’ii nilį́ dóó dííjį́įdi sodizinjí ninályáhígíí yá naat’áanii President nilį́: Jesus Christ Bisodizin Yánaazinígíí.
Yisda’iiníiłii Bi Sodizinjí, Diyin God bibee’adziilii nihaa yiiléego yee nihik’ijidlí—t’áá bił Diyin God bidziilígí yee nihíká anáwo’. Bee óhólníihii bee lą́ azlį́į’go Diyin God bibee’adziilii bibee áandítį́hí, bee Diyin God bich’į’ dilzingo ha’iidziih dóó dilzingo ó’ooljįł bee bá hasht’e’ áda’diilneh áko Bił kéé dahwiit’į́į doo. Tó bee alzį́į́h dóó sodizin bee aahilyéhígíí áłtsé ha’al’įįh, aadóó inda Diyin God bighan ntsaahígíí biyi’di, bił aha’deet’aah be’átiin bee naas didiidááł éí bee Bił yah anáhoot’i’.
Nihitsiit’ááh dahdadées’nii’go, Diyin God bibee’adziilii bee nihá sodahodizin, binahjį’ yiidááłgo bee ééhózin, dóó bee yá’áhoot’ééh, dóó biyi’doo nanhi’dintin, dóó bee néidziih, dóó bee nihidziilgo Jesus Christ bekéé yiidááł. Iiná yisht’ihígíí biyi’ díí ts’idá ayóó át’éego be’adziilii bee shik’ihojidlí. Diyin God bizaad biyi’di ííshją́ą́ ályaa, bee wójíhígíí éí Melchizedek Priesthood diyingo bibee’adziilii.
Tséłkéí nishłį́įgo díí bee’adziil ayoo shił nilíínt’éé’, Diyin God bibee’adziilii bee sohodizingo aláahgo binahjį’ shił ííshją́ą́ alyaa. Kéyah Chiledi Diyin God bá na’nitinii nishłį́įgo, bił na’nishtinígíí tsilao danhiiłtsood dóó ałts’ádanhiznil. Biniinaanígíí t’áadoo yee nihił dahoolne’da. Ídą́ą́ éí binaat’áaniishchíín da’ahigáago. Lą’í dimííl yázhí yilt’éego diné tsilaołtsoí bitsilao dabiiłtsood dóó t’áá áajį’ doo nibee dahoyoozįįhda t’áadoo bits’ą́ą́ doo ndahodiists’ą́ą́’ da.
Ndashídééłkid dóó bik’ijį’, t’áá sáhí awalyagóne’ sídáago ntséskees, doo béé hózinda díí daats’í t’áá shǫǫ shik’éí néídeestsééł nsingo. ShiZhé’é Yí’ąąshdi Hólónígíí bech’į’ sodeeszin, bich’į na’ooshkąąhgo: “ShiZhé’é Yí’ąąshdi Hólónóonii díí t’áá áłahjį’ bee nahshi’dintin éí Ná nda’nitinígíí ba’áhólyáago bik’idiní’į́į́’ígíí. T’áá shǫǫdí Shizhé’é, doo éíí ayóó’ánisht’éeda, ákondi t’áá áłahjį’ nik’ehonish’į́ dóó díí tł’éé’ Ndziil bee shiká anilyeed t’áá shǫǫdí.”
Lą’í naahaiyę́ę dą́ą́’ t’áá Tó bee shi’doolzį́į́’ dóó bik’ijį’, Sodizinjí aa’iilyéhígí bee atah níyá dóó Ii’sizį́ Diyinii shaayíyá. Áádóó sodeeszįįd, t’áá sáhí, béésh ndaaz’áhígí bine’dę́ę́’, t’áá hooshchį’ Ii’sizį́ Diyinii shaaníyá dóó sha’áhályáán ńt’éé’. Shipatriarchal blessingshá bee sohodoozinyę́ę shéé yiyííłnii’, jó éí ałdo’ Diyin God bibee adziilii át’é. Biyi’di, éí Diyin God t’áá aaníinii yee shich’į’ haazíí’ yiinishdlą́ągo éí Diyin God bighan nitsaádi k’ad dóó hool’áago asdzáaní nizhóní dóó t’áá aaníinii yá’át’éehii dóó ayóó’ónínígí bił ałhaanihi’di’doo’nił, amá dóó azhé’é nohłį́įdo niha’áłchíní hodooleeł ashiiké dóó at’ééké, dóó shik’ihojidlíigo dóó ntsaago Israel bá azhé’é deeshłeeł.
Ákót’ao saad dadiyinígí bee shich’į’ ha’oodzíí’go shił hasht’e’ hodíít’e’. Táá aaníigo éí shiZhé’é Ya’ąąshdi Hólóoníí ayóó’áshó’níigo ákót’ao shich’į’ haadzíí’, Bí éí t’áá aaníí áníigo haadzíígíí ye’doolííł. Íídą́ą́’ bá na’nitiní nishłį́į́go, baa ákoníízį́į́’ díí yá’át’ééh hodooleełgo ch’éédeshdááł dóó t’áá aaníí bee ha’oodzíí’ígí behodoolnííł.
Nááhai dóó bik’ijį’, NihiZhé’é Yí’ąąshdi Hólónígíí shich’ooní yee shik’ijisdli’ éí asdzání nizhóní dóó yá’át’éehgo hiná dóó bee ayóó’ó’ni’ hólǫ́ǫ́. Lynette dóó shí Diyin God bighan ntsaaidi hool’áago doo ałts’ádiit’asgo ałxinhi’diistl’ǫ́. T’áá ííyisí ayóó’ííníi’nínígíí táá’ ashiiké dóó t’áá ííyisí ayóó’ííníi’nínígíí dį́į́’ at’ééké bee nihik’ihjisdli’go shiilchį́. K’ad azhé’é nishłį́’, tsosts’idts’áadah shináá haiyęędą́ą́’ shipatriarchal blessing ánínęę bee shik’ihojisdli’ígíí bik’ehgo áhoodzaa.
“Ákohgo, shik’iskéí [dóó shilahkéí], Jesus Christ yá’ąąshgodei anáádzáhígíí daats’í biniinaa álee bee ádahooniił yęę ásdįįd? …
“… Dooda; Diyin God yándaalʼaʼii tʼahdii nihookáá’ dine’é bá’áłchíní yíká ańdaajah.”
T’áá aaníinii baa hashne’ éí álílee ádahoonííł dóó bee í’ool’įįłígíí t’ahdii bee na’anish, t’áá kóníghanígo éí Diyin God bibee adziiliígíí binahjį’. Ła’ Diyin God bibee adziilii bee sohodizinígíí éí t’ááhoshch’į’ be’el’įįh, t’áá bahat’áadí yit’į́įgo dóó bik’idiitįįhgo. Nááná ła’ éí t’áá kóódígo naanish dóó doo ałtso bik’idi’iitį́į́ł da díí iiná biyi’. Ákondi Diyin God éí t’áá aaníí áníigo hahadziih, t’áá áłahjį’, díí nihi family history biyi’doo baa hane’ígi át’ao:
Shinálí hastiin, Grant Reese Bowen bidziilgo be’oodlą hólóó nt’éé’. Ádaahalne’go ayóó bénáshniih bipatriarchal blessing bá ályaago. Kóníigo adaahalne’go, néyíízoh: “Patriarch nilinígíí t’áá aaníigo shá yee haadzíí’ bee na’ádziih sheenílá. Kóníílá, ‘Bitah dahoneezgaiígíí ndadoodzih. Aoo’, ádaadin ndi níla’ biyaadoo ndahidoo’naał.’”
Díkwííshį́į́ nááhai, Shinálí hastiin tł’oh ałk’i yitł’in nt’éé’ bijéí biyi’di bił hóóne’ hooghanígo ndídaah bi’doo’niid. Bizhé’é bidaah yílwod. “Grant, nimá áníídí ádin,” níílá bizhé’é.
Shinálí hastiin néyíizoh yę́ę biyi’ dóó ánáadi’ní: “T’áádoo ni’kóshnéhé tsxį́į́ļgo hooghan biyi’ hadiishwod dóó tł’óó’go hooghan bighą́ą́h di’áhídí shimá bik’ih da’na’íistání yikáá sitį́į́lá. Nééł’į́į́’ dóó iiná bii’ ádingo yiiłtsą́. Shipatriarchal blessing bénáshnii’ dóó bee ha’oodzíí’yę́ę éí iinídlą́ągo, bee binahjį’ bitah dahoneezgai yę́ę ndadoodzih; dóó ádaadin yę́ę ndahidoo’naał. Bitsiits’iin bikáá’gi dahdishnii’, dóó Bóhólníihii ábidííniid bee shich’į’ hadííndzíí’ yę́ę patriarch nilínígíí t’áá aaníigo yee haadzí’ígíí, k’ad shich’į’ ééhonísįįh dóó shimá iiná biih ndeeshdlééłgo naadidoo’nah. Bóhólníihii bich’į’ ádeehadeesdzíí’ díí Yee shíka’ eelwodgo, éí doo nát’ą́ą́’ kóndeesh’nííł da t’áá she’oodziil nt’éé’ bee Bi bee’oolįįł bee bina’nitin bá bee na’nishtindo. Áádóó sodiszingo, shimá deezghal dóó áníílá, ‘Grant, ná shidiidzį́į́s. Spirit World di naasháánt’éé’, ndi aadę́ę́ nát’ą́ą́’ náshíínkeed. Díí t’áá áłahjį’t’áá aaníinii bee dahózinii át’é nihnch’į’dóó shighan haz’ą́ą́dóó bich’į’.’”
President Russell M. Nelson nanhineeztą́ą́ álilee ádaat’éii biká dadínóh’į́į́’ dóó ndeénółí nihiłní. T’áá aaníinii éí binahjį’ Diyin God bibee’adziilii ninályá, Diyin God bee adziil dóó bee óhólníihii nahasdzáán bikáá’go hólǫ́. Áká ana’áwo’ dóó na’nitin bee, diné dóó sáanii, ánii naagháhígíí dóó naasilį́į́’ígíí, Diyin God bibee’adziilii bee na’anishígíí da’atah. Éí álilee k’ego bee na’anish, dóó Diyin God yándaal’a’ii yił ndaalnish. Éí yá’ąąsh dę́ę́ bee na’anish, dóó Diyin God ba’áłchíní t’áá ałtso bee bik’ihojidlí.
1989yę́ędą́ą́, tsosts’id yilt’éego niha’áłchíní sodizin báhooghandóó bił ch’aa nsiikaigo nát’ą́ą́’ neikah nt’éé’. Éí ahiłiijį́į’go. Lynette éí nihe’awéé’ hastą́ą́góne’ígíí k’adę́ę bee haleehgo. Bí éí ádaayoosnahgo t’áá biyi’ídi ayóó íits’a’go áde’ítł’ó ábi’doo’niid. T’áá ákohgo naana’áztiingi nihił adeeswodgo; chidí leii’ nihik’ijį’ ha’ííłbą́ą́z. Tsosts’idiindi neełkidgo nihił oolwołgo, bits’ą́ąjį’ haalo’. Nihi chidí nihił náhidéémááz, atiin yishdlézhígíí bikáá’jį’ nihił ch’élzhóód, dóó bits’ą́ąjį’ joobaa’ígo inda nihił neeztsiz, dahna’íístánígíí łeeshtahjį’.
Áko bénáshniih Lynette shich’į’ yáłt’igo disíts’ą́ą́: “Shayne, ndaadílkał nich’ijígóogi ch’ídahidii’nah.” Bik’idahasdáhí biziiz bee she’astł’ǫ́ǫgo dahshoołtééł. T’áá hodíída’go inda shił k’ééhazdood. Áłchíní t’ááła’í nitinígo shitsésǫ gódeh ch’íheejaa’, éí chidí bikáá’jigo silį́į́’. Áłchíní daachah, haalá hóót’įįd danízingo.
T’áá naahodoo’na’go neeznáá binááhai nihich’é’é, Emily, bihosiilza’. Bizhi’ ch’ééh yííníijí, doo íits’a’í da. Sodizinjí da’atahígíí, nił bił da’íjeehyę́ę, nihíká ííjéé’ t’áá áwołí bee hadaniitáago. T’áá áwołí bee chahałxeeł biyi’. Bee n’dildlaadí bee n’dishdlaadgo chidi biyi’ náádéésht’į́į́’ dóó t’óó bik’ee disyiz, Emily hwónshéhígo chidi bitł’ááhdi sitį́įgo yiiłtsą́. Hadeeshgaazhgo ádishní, “Díí chidí Emily bik’idadidiit’ááł.” Chidí bikáá’doo sésił dóó nát’ą́ą́ kwíishłaa. T’áá díkwíí ííjéé’ chidí dahdeidii’ aahgo, áko t’áá bí állee k’eh bikee’jígo ninálts’id, Emily bits’íís doo naha’náágo yit’į́h silį́į́’.
Emily doo ndízih da. Biniijį’ didze’tsoh dik’ǫ́zhígíí nahalingo yiijį́į́’ lá. Áádóó ádishní, “Bá sodadidiilzįįł.” Ła’ shik’is ayóó’ííníshní dóó sodizinjí bil yah anáshjahígíí shił ntsidadeesgo’ dóó Melchizedek Priesthood bee óhólníihii bee, Jesus Christ bízhi’ bee, nihizaad bik’eh áhoolyaago iiná biih ńdasiilyá. T’áá ákohgo, Emily hanáázhil.
Lą’í ahéé’ílkid nahalin, áko inda azee’ál’į́į́dę́ę́’ chidí nihaayílwod. Áádoo tsį́į́łgo Emily azee’ál’į́į́góó dahdeidiiłtį́. Bijéí yilzólii atídzaago shijizh dóó bigod gónaa bits’id k’indláád lá. Nízaago nihoolzhiizh doo ndídzihgo bitsiighąą’ niłch’i biyi’ ádingo biniinaa bitsiigha’ bąąh dahiidoo’aał ha’níínt’éé’. Emily doo ch’énádzíídgo t’ááła’í yiską́ dóó ałníí’ azlį́į́’. T’áá náás básodadiilzin dóó bá ch’iyáán ádąąh deit’íín nt’éé’. T’áá ałtsojį’ bitah yá’át’ééh násdl į́į́’go bee bik’ihojisdli’. Dííjį́įdi, éí Emily dóó bahastiin, Kevin, ba’áłchíní at’ééké hastą́ą́.
Álilee bee, t’áá ałtso łahjígoógíí t’áadoo atídeidzaada. Lynette awéé’ bee haz’lį́į́’ éí Tyson át’į́į́lá. Bí ałdo’ t’áadoo haadeidzaada lá dóó Atsá Biyáázh biyi’ bi’dizhchį́. Tyson bi’dizhchį́į́ doo, tseebíí ndeezidgo, nihiZhé’é Yi’ąąshdi Hólónígíí yich’į́’ anáázá. Nihe’awéé’ éí Diyin God yánaala’a’ii nilį́įgo nihaa’áhalyą́. Nihighan haz’ą́ą́dóó nihił hólǫ́ǫgo nihił bee dahózin áko náasdi bił náá da honiidlǫ́ǫdoógíí baa nił dahózhǫ́.
Chidí Emily yik’ideiz’ánáá éí bił béé dahózin doo ndaazgo yik’ideez’ą́. Shił bééhózin t’áá’íídą́ą́’ éí yá’ąąshdę́ę́ Diyin God yándaala’a’ii nihíká ííjéé’go Emily bits’íís chidí bik’idahsiit’ą́. Ałdo’ shił bééhózin Emily ádin nt’éé’ diyingo ó’ool’įįłígíí Diyin God bibee’adziilígíí diyinii bee be’iina’ baanályá.
Bóhólníihii Bá ndaalnishii t’áá aaníinii yił ííshjáán ádayiilaa kóníigo: “Nihilą́ąjį’ nihá yishááł. Shí nihinish’áají sezį́į doo dóó nihiníshtł’ájí, dóó Shii’sizį́įnii nihijéí biyi’di hólǫ́ǫ doo, dóó shá nidaal’a’ii nihínázt’i’ doo, bee nihidziil doo.”
T’áá’ aaníínii baa hashne’ éí “Diyin God Bee’adziilígíí Diyinii, Diyin God Biye’ Bee O’ool’įįł”Melchizedek Priesthood át’é—bi bee áandítį́hí, bee óhól’níihii, dóó bee adziilii ninályá kohjį’ nahaszáán bikáá’jį’, dííjį́įdi. Doo éíí t’áá áłahjį’ bíká sodiilzinígíí nihá ádooníił da, Diyin God bee álilee ádaat’éii t’áá bí bik’ehgo nihá íidoolííł, t’áá Bí bibee oolkiłígíí bik’ehgo, dóó nihá Naha’áhígíí bik’ehgo.
Diyin God bibee adziilígíí bee shik’ihojidlíido ninízingo, álilee ádaat’eii dóó Diyin God yándaal’a’ii háká anájahgo, éí Diyin God bił ahadeet’aahígíí bee atiin bikáágóó t’áá ła’íniizínígo bikáá’ yiidááł doogo nihá áyiilaa. Sodizinjí da’atahígíí dóó naat’áanii danlínígíí ayóó’ádanó’nínígíí nika’adoojahgo bee naas didíínááł.
T’áá aaníinii baa hashne’ éí Jesus Christ, Diyin God Biye’ nilį́, hiná dóó Bi Sodizin Báhooghan yilą́ąjį’ sizį́ binahjį’ éí Diyin God yá yádaalne’ii Diyin God bibeeadziilii bee aandítį́hí dadeiyójááhgo yee ndaalnish. Ii’sizį́ Diyinii t’áá aaníí hólǫ́. Yisdá’iiníiłii Be’iina’ nihá nineidiní’ą́ yee nanhiłdziih, yee nihánina’ídlá, dóó nihił hooghangóó bił naniikááh.
Shí éí t’áá aaníigo shił beehózin álílee ádaat’éii t’ahndii hólǫ́, dóó Diyin God yándaal’a’ii nihitahgóó hólǫ́, dóó yá’ąąshdi éí t’áá aanii ąą’ádaat’é. Oo, t’áá aanii nihá ąą’ádaat’é! Jesus Christ bízhi’ binahjį’, amen.