Ei vahi parururaa e ei vahi haapuraa
Te paraparau nei tatou i te parau no te Ekalesia mai te hoê vahi haapuraa, to tatou paruru. Te vai ra te hau e te parururaa i roto i te Ekalesia.
I te 26 no Tiurai 1847, o te toruraa ïa o te mahana ratou i roto i te peho (te piti o te mahana, e Sabati ïa), Brigham Young e te tahi mau melo no te Pŭpŭ no te Tino Ahuru Ma Piti Aposetolo e te tahi atu mau taata, ua pa‘uma ratou i ni‘a i te hoê puu moue piti kilometera i te atea mai te vahi ta‘u e ti‘a nei i teie taime. Feruri ihora ratou e, e vahi tano maitai teie no te faati‘a i te hoê reva no te mau nunaa atoa. E tahei re‘are‘a to Heber C. Kimball. Ua taamu ratou i te reira i ni‘a i te turutootoo o Willard Richards e ua tahirihiri noa te reira i ni‘a roa, te hoê reva no te mau nunaa. Topa ihora Brigham Young i taua vahi ra, te Mou‘a no te Reva.1
Pou maira ratou mai te mou‘a mai i to ratou mau pereoo ra, i ta ratou mau tauihaa ra ta ratou i ta’ita’i e 2.000 maile i te atea, e i piha’i iho i ta ratou mau ratere rohirohi tei apee mai ia ratou. E ere te tumu o to ratou itoito i ta ratou mau tao‘a, i te mea râ o ta ratou i ite.
Ua ite ratou e e mau Aposetolo ratou na te Fatu o Iesu Mesia. Ua ite ratou e, ua horo‘ahia mai te autahu‘araa ia ratou na roto e te mau ve‘a melahi. Ua ite ratou e, e faaueraa e e fafauraa ta ratou no te horo‘a ei rave‘a e roaa ai te faaoraraa mure ore e te faateiteiraa i te mau taata atoa. Ua papû ia ratou e, na te faaururaa a te Varua Maitai i tauturu ia ratou.
Ua faaohipa ratou ia ratou iho na roto i te aroteraa i te aua faaapu, te faati‘araa i te fare no te paruru ia ratou i te to‘eto‘e e fatata mai nei. Ua faaineine ratou i teie ti‘araa fenua no te tahi mau ratere o tei apee mai ia ratou i teie vahi haaputuputuraa apî.
Na te hoê heheuraa tei papa’ihia e iva matahiti na mua’tu, i arata’i ia ratou ia « Ti‘a mai na i ni‘a e ia anaana mai na, ia riro to outou maramarama ei hi‘oraa no te mau nunaa ;
« E ia riro te putuputuraa i ni‘a iho i te fenua no Ziona, e i ni‘a iho i to’na mau tĭtĭ, ei parururaa, e ei vahi haapuraa no te vero, e i te riri ia niniihia’tu te reira ma te anoi ore i ni‘a i te ao paatoa nei » (PH&PF 115:5-6).
Ua titauhia ratou ia riro ei « maramarama, » e ei « hi‘oraa. »
Te hi‘oraa tei haamauhia na roto i te heheuraa, tei roto ïa i te mau papa’iraa mo‘a i roto i te mau parau haapiiraa o te evanelia a Iesu Mesia. Te mau parau tumu o te oraraa o te evanelia ta tatou e haapa‘o nei, ua niuhia ïa i ni‘a i te parau haapiiraa, e ua tuati te hi‘oraa e te mau parau tumu. Ua natihia tatou i ni‘a i te mau hi‘oraa na roto i te fafauraa, o te ravehia na roto i te mau oro‘a o te evanelia e te feia tei farii i te autahu‘araa e i te mau taviri o te mana.
Aita e ti‘amâraa to te reira mau Taea‘e faaroo, e aita to tatou e ti‘amâraa, no te faahuru‘e i te hi‘oraa e aore ra, no te haapae i te reira. E ora tatou ia au i te hi‘oraa e ti‘a ai.
E ere te reira i te raau e aore ra, i te tamahanahanaraa ia parau ohie noa e, aita e fifi to te reira. Ua ite tatou paatoa e, e fifi, i te mea e, « ua navai to te taata nei haapiiraahia , ia ite ratou i te maitai e te ino » (2 Nephi 2:5).
Mai te mea e, e rave tatou ia au i te maitai hopea e maraa ia tatou, eita ïa tatou e haaparuparu. Mai te mea e, eita e oti ia tatou e aore ra, e topa tatou, te vai noa ra te rave‘a o te tatarahapa e te faaoreraa hara.
E mea ti‘a ia tatou ia haapii i ta tatou mau tamarii i te hi‘oraa o te morare ia haapae i te mau peu viivii atoa. Te mana faufaa rahi i roto i to ratou tino tahuti « e faaohipahia ïa te reira i rotopu ana‘e i te tane e te vahine tei faaipoipohia ia au i te ture. »2 E mea ti‘a ia tatou ia haapa‘o hope roa i roto i te faaipoiporaa.
E haapa‘o tatou i te ture no te tuhaa ahuru. E haapa‘o tatou i ta tatou mau hopoi‘a i roto i te Ekalesia. E putuputu tatou i te mau hepetoma atoa no te pureraa oro‘a no te faaapî i ta tatou mau fafauraa e ia farii i te fafauraa i roto i taua na pure ohie ra no te pane e no te pape. E faatura tatou i te autahu‘araa e e haapa‘o hoi i te mau fafauraa e i te mau oro‘a.
Ua ite teie mau Taea‘e i ni‘a i te Mou‘a no te Reva e, e ora noa ratou i te hoê oraraa matarohia e ia vai noa te hoho‘a o te Mesia i to ratou mata ra (a hi‘o Alama 5:14).
Ua ite ratou e, e mea ti‘a ia riro te mau tĭtĭ ei paruru e ei vahi haapuraa tera râ, i taua taime ra, aita â ïa e tĭtĭ i ni‘a i te fenua nei. Ua ite râ ratou e, ta ratou ohipa, o te faati‘araa ïa i te mau tĭtĭ no Ziona i roto i te mau nunaa atoa o te fenua nei.
E mea papu e, ua maere ratou eaha ïa huru riri e aore ra, vero tei niniihia mai tei ore â i itehia a‘e nei e ratou. Ua faaoroma‘i na ratou i te pato‘iraa u‘ana, te ino, te taparahiraa taata. Ua taninahia to ratou mau fare, ua haruhia to ratou mau fenua. Ua tiahihia ratou i rapae i to ratou mau fare i tera taime e i tera taime. Ua ite ratou i taua taime ra, mai ta tatou e ite ra i teie mahana e, aita e hopea to te pato‘iraa. Ua taui to’na hoho‘a, aita râ e hopea. Aita e hopearaa to te mau titauraa tei faaruruhia e te Feia Mo‘a matamua. E mea huru ê rii paha te mau titauraa apî, aita râ i iti atu i to tei faaruruhia e ratou.
I teie mahana, ua hau i te tauatini tĭtĭ to Ziona e tei te ao atoa nei te reira. E rave rahi milioni melo i teie nei e te rahi noa’tura. Eita teie e mau ia tape‘a, no te mea na te Fatu teie ohipa. I teie mahana, te ora nei te mau melo i roto e 160 fenua e te paraparau nei i roto hau atu i te 200 reo.
Te ora nei te tahi mau melo i roto i te ri‘ari‘a faito ore no te mau mea e tupu mai i ni‘a ia tatou e i ni‘a i ta tatou mau tamarii i roto i te ao nei. Te haere noa’tura i te poiriraa i te pae morare e i te pae varua. Mai te mea e, e haaputuputu tatou i roto i te fare pureraa, e ia haapa‘o i te mau ture haehaa roa o te evanelia, e ia haapa‘o i te oraraa morare, haapa‘o i te Parau Paari, ia auraro i to tatou autahu‘araa e i te tahi atu mau ohipa, aita ïa tatou e ora i roto i te mata‘u. Ua riro te Parau Paari ei taviri no te ora maitai o te tino e no te heheuraa. A haapae i te ti, te taofe, te ava, te avaava, e te mau raau taero.
E nehenehe ta tatou e ora i te vahi ta tatou e hinaaro i te ora, ma te imi i te mau rave‘a atoa no te haamau i te hoê oraraa, e oraraa haehaa anei e aore ra, e oraraa auhune anei. E ti‘amâraa to tatou no te faariro i to tatou oraraa mai ta tatou e hinaaro, ma te haapapû e, ua ti‘a anei te reira i te hinaaro o te Manahope, ma te ti‘aturi tamau noa i te arata’iraa a te varua.
E paruru e e vahi haapuraa te tĭtĭ tata’itahi e e hi‘oraa hoi. Te vai ra i roto i te tĭtĭ te mau mea atoa e hinaarohia no te faaoraraa e no te faateiteiraa o te mau taata e haere mai i roto ia’na ra, e e mea fatata roa te mau hiero.
Aita to te ino e hopearaa. Ua hape rii te tatararaa e te faaite-raa-hia tatou te mau melo e to tatou aamu, te tahi e mea ino roa, e te tahi ra, aita ïa i au i te mau haapiiraa a Iesu Mesia e a Ta’na evanelia. I te tahi taime, te pato‘io nei te mau orometua ia tatou. E rave ratou i te mau mea e ore roa tatou e rave. Eita tatou e aro, e aore ra, e faaino, e aore ra, e pato‘i ia vetahi ê mai ta ratou e rave ra.
Tae roa mai i teie mahana te vai ra tera mau aamu maamaa o te operehia nei e o te faahiti tamauhia nei e rave rahi taime e ua ti‘aturihia te reira. Te hoê o te reira maori râ, e tara atoa to te mau Momoni.
Tau matahiti i ma’iri a‘e nei, tei roto vau i te hoê amuiraa i te fare haapiiraa Tua Tahi no Oregon. I reira te vai ra hoê episekopo Katorika, hoê rabbi, hoê orometua Episcopalian, hoê orometua Porotetani, hoê orometua Unitarian, e o vau nei.
Ua faaineine te peresideni no te fare haapiiraa, Dr. Bennett, i te hoê inuraa taofe. Ui mai nei te hoê o ratou e, teihea vahine ta‘u i hopoi mai. Ua parau atu vau ia ratou e, hoê noa ta‘u vahine. No te hoê tetoni te maoro, ua mana‘o vau e, ua riro vau ei faatapitapiraa. I muri iho, ua ui atura te hoê taata i te episekopo Katorika e, ua afai mai anei oia i ta’na vahine.
Te uiraa i muri iho, no‘u ïa no ô mai i te Taote Bennett: « E parau mau tera e, e tara to te mau momoni ? »
Ataata a‘era vau e na o atura e, « E pahere au i to‘u rouru, ia ore te reira e itehia. »
Tuu a‘era te Taote Bennett i to’na na rima i ni‘a i to’na upoo pahure e na o maira e, « Eita roa’tu vau e riro ei Momoni! »
Te vahi maera roa’tu, te parau nei teie feia maramarama roa e, e ere tatou i te Keritetiano. Na tera e faaite mai ia tatou e, e mea iti roa e aore râ, aita roa to ratou e iteraa no ni‘a ia tatou. E parau mau te reira e, eita ta oe e nehenehe e faateitei ia oe iho na roto i te taumiraa ia vetahi ê i raro.
Te feruri nei te tahi mau taata e, na ta tatou mau ture teitei roa e tape‘a i te tupuraa i te rahi. E huri tatou i te reira parau. Na te mau ture teitei e faarahi i te tupuraa. E tamarii tatou paatoa na te Atua, hutihia mai i te parau mau e te maitai.
Te vai nei ta tatou titauraa ia aupuru i te utuafare i roto i te ao nei i roto i te ata poiri o te ino. Te tahi pae o to tatou mau melo tei roto ratou i te papû ore, e i te tahi taime te uimaere nei e : te vai ra anei te hoê vahi e nehenehe e haere no te faaatea i te ino ? Te pahonoraa, aita. Te parururaa e te vahi haapuraa, te reira ïa te vahi e orahia nei e to tatou mau melo.
Ua tohu te Buka a Moromona e, « Ei reira, e haamaitaihia’i te ohipa e te Metua i roto i te mau nunaa atoa ra, i te faaineineraa i te e‘a e haaputuputuhia’i to’na ra taata i to ratou a‘ia » (3 Nephi 21:28).
Te feia e haere ê i rapae i te ao nei no te tomo mai i roto i te Ekalesia, e ua haapa‘o i te mau faaueraa, ua faatura i te autahu‘araa, e ua rave i te ohipa, ua itehia ïa ia ratou te vahi haapuraa.
Te tahi tau hepetoma i ma’iri a‘e nei i roto i te hoê o ta matou mau apooraa, o Elder Robert C. Oaks, hoê o na Peresideni Hitu ahuru e hitu (e taata faatuhaahia teie no te nuu faehau Marite i te ti‘araa tenerara e maha fetia, e raatira no te nuu manureva NATO Air Forces i Europa Ropu), tei faahaamana‘o mai ia matou i te hoê faaauraa i tarimahia e na fenua 10 i ni‘a i te pahi tama’i ra o Missouri i roto i te oo‘a no Tokyo Bay i te 2 no Setepa 1945 ra, na te reira i faahope i te Tama‘i Rahi II o te Ao nei. Te tahi pae o matou tei Asia ïa i taua taime ra. Te parau ra o Elder (Tenerara) Oaks e, « Eita e ti‘a ia‘u ia feruri i teie mahana e, e nehenehe e faatupu i te hoê putuputuraa mai teie te huru e aore ra, e tarima i te hoê faaauraa no te tape‘a i te tama‘i e te taparahiraa taata e te ino ta tatou e aro nei. E ere ïa i taua tama’i ra. »
Eiaha tatou e mata‘u, noa’tu i roto i te hoê ao aita e hopearaa to te aroraa. Te tamau noa nei â i teie mahana te aroraa tei tohuhia i roto i te mau heheuraa. A oaoa tatou e a ti‘aturi. Eiaha tatou e mata‘u. Ua riro te mata‘u ei enemi no te faaroo.
Ua ite tatou e, ua faatumuhia te mau faaoaoaraa i roto i te Ekalesia i ni‘a i te utuafare. Te mau vahi atoa e melo to reira, e mea ti‘a ia ratou ia haamau i te hoê utuafare i reira te mau tamarii e farii-poupou-hia’i, e e aupuruhia ai ei « tufaa no ô ia Iehova ra » (Salamo 127:3). Te hoê utuafare ti‘amâ no te Feia Mo‘a i te mau Mahana Hopea nei, e hi‘oraa oia na to te ao atoa nei.
E ere ta tatou i te tapea noa i te hoê faito hi‘oraa teitei, o tatou tata’itahi râ tei titauhia ia riro ei hi‘oraa, ei paruru, ei vahi haapuraa. Titauhia ia tatou ia « anaana [to tatou] maramarama i mua i te aro o te taata nei, ia hi‘o ratou i [ta tatou] parau maitai, e ia haamaitai i to [tatou] metua i te ao ra » (Mataio 5:16 ; a hi‘o atoa 3 Nephi 12:16).
Na te mau tautooraa e te mau rohiraa a te mau u‘i i mutaaiho ra, i hopoi mai i to tatou nei anotau te îraa o te evanelia a Iesu Mesia, te mana no te faatere, e te mau rave‘a no te faaoti i te ohipa. Ua tae paatoa mai te reira i roto i teie tau tuuraa no te îraa o te mau tau i reira e hope roa ai te tupuraa o te mau mea atoa, e e faaineinehia ai te fenua nei no te taeraa mai o te Fatu.
E tuhaa tatou no teie ohipa mai tera mau taata tei tatara i te tahei re‘are‘a i ni‘a i te turutootoo a Willard Richards e pou ana‘e mai ai i raro mai ni‘a mai i te Mou‘a no te Reva. Taua tahei ra tei tahirihirihia i ni‘a roa, e tapa‘o faaite ïa no te haaputuputuraa rahi tei tohuhia na i roto i te mau papa’iraa mo‘a tahito e to teie nei anotau.
Te paraparau nei tatou i te parau no te Ekalesia mai te hoê vahi haapuraa, to tatou paruru. Te vai ra te hau e te parururaa i roto i te Ekalesia. Ua faatumuhia oia i ni‘a i te evanelia a Iesu Mesia. Te haapii nei te Feia Mo‘a ia hi‘o i roto ia ratou iho no te ite i te mana faaora o te Faaora o te taata nei. Te mau parau tumu o te evanelia e haapiihia nei i roto i te Ekalesia e o te apohia mai mai roto mai i te mau papa’iraa mo‘a, e riro te reira ei arata’i no tatou te taata tata’itahi e no to tatou utuafare.
Ua ite tatou e, te mau nohoraa ta tatou e haamau, e to to tatou mau huaai, e riro ïa ei vahi haapuraa tei faahitihia i roto i te mau heheuraa – te « maramarama », te « hi‘oraa, » te « reva » no te mau nunaa atoa, e te « vahi haapuraa » i mua i te mau vero (a hi‘o PH&PF 115:5-6 ; Isaïa 11:12 ; 2 Nephi 21:12).
Te reva i ni‘a i te reira tatou e amui tahi ai, o Iesu Mesia ïa te Tamaiti a te Atua, te Fanau Tahi a te Metua, Na’na hoi teie Ekalesia, e To’na i‘oa ta tatou e rave nei, e To’na mana ta tatou e mau nei.
Te hi‘o nei tatou i mua ma te faaroo. Ua hi‘o tatou i te mau ohipa e rave rahi i roto i to tatou oraraa, e rave rahi â te tupu mai, e o te titau i to tatou itoito, e o te haapuai i to tatou faaroo. Titauhia ia tatou ia « oaoa, e ia ou‘au‘a noa i te oaoa ; e utua rahi hoi ta tatou i te ao ra » (Mataio 5:12).
A paruru tatou ma te hinaaro mau i te aamu o te Ekalesia, e « eiaha e haama i te evanelia a [Iesu] Mesia : no te mea o te mana ïa o te Atua, ia ora te feia atoa i faaroo ra » (Roma 1:16).
E hi‘o atu tatou i te mau titauraa, no te mea eita ta tatou e nehenehe e ape i te reira, e a haapii i te evanelia a Iesu Mesia e a haapii no ni‘a Ia’na ei Faaora no tatou, e ei haapuraa no tatou, to tatou Faaora.
Mai te mea e, ua navai noa te hoê tahei re‘are‘a tahito no te faariro ei reva no te nunaa, e nehenehe atoa ïa i te mau tane haehaa tei mau i te autahu‘araa, e te mau vahine haehaa e te mau tamarii i roto i te mau utuafare haehaa, te ora ra i te evanelia ma te maitai roa e ati a‘e te ao nei, e nehenehe ratou paatoa ia anaana ei reva, ei paruru, ei vahi haapuraa i mua i te mau huru mea atoa e niniihia mai i ni‘a i te fenua nei.
« Te paraparau nei tatou i te Mesia, e te oaoa nei tatou i te Mesia, e te a‘o nei tatou i te parau a te Mesia, e te tohu nei hoi tatou i te Mesia, e te papa’i nei hoi tatou i ta tatou mau tohu, ia ite ta tatou mau tamarii i te tumu e hi‘ohia’tu e ratou no te matararaa i ta ratou mau hara » (2 Nephi 25:26).
E ruperupe teie Ekalesia. E upootia oia. Ua papû vau i te reira. Te faaite nei au i teie iteraa papu na roto i te i‘oa o Iesu Mesia, amene.