Ua pohe o Elisa Young Rogers Wirthlin

Ua faaru‘e mai Elisa Young Rogers Wirthlin, te vahine a Elder Joseph B. Wirthlin no te Pŭpŭ no te Tino Ahuru Ma Piti Aposetolo i te 16 no atete 2006 no to’na paari.

Ua faafaahiahia Elder Wirthlin i to’na hoa mure ore i roto i te putuputuraa no te mahana maa avatea o te amuiraa rahi (a hi‘o i te api 28) : « Ua riro oia ei puai e ei oaoaraa no‘u. No’na hoi, i riro ai au ei taata, ei tane faaipoipo e ei metua tane maitai a‘e… Ua tarahu rahi roa‘e au ia’na i te mea o ta‘u e nehenehe e parau. Aita vau i ite e te vaira anei te hoê faaipoiporaa maitai a‘e area râ, i to‘u nei hi‘oraa, to maua iho nei… No te mea ua riro Elisa ei oaoaraa rahi no‘u, ua riro ïa to’na pohe ei otoraa rahi no‘u ».

Ua fanauhia o Elisa Rogers, te tamarii apî a‘e o na tamarii e maha i te 22 no tiunu 1919 i Roto Miti. Ua faaipoipohia raua o Elder Wirthlin i roto i te Hiero no Roto Miti i te 26 no me 1941 e David O. McKay, i te reira taime e tauturu ïa oia no te Peresideniraa Matamua. Ua piihia elder Wirthlin ei Aposetolo i te matahiti 1986 ra.

E tamarii te tuahine Wirthlin no roto mai i te tupunaraa no te mau pionie o Utaha. To’na papa o Orson Madsen Rogers, e mootua ïa na Aurelia Spencer Rogers, te peresideni matamua no te Paraimere tei faanahonahohia i Utaha i te matahiti 1878. To’na mama o Bernice Young, o te mootua tamahine ïa a Joseph Young, te teina o te peresideni Brigham Young.

Ei piahi faahanahanahia no te Fare Haapiiraa Tuatoru no Utaha i roto i te pae no te haapiiraa, ua rave te tuahine Wirthlin i te ohipa ei papa‘i parau i roto i te piha toro‘a no te faatereraa o te fare haapiiraa e tae roa’tu i te taime ua fanau oia i ta’na aiu matamua. I muri mai ua tauturu oia i ta’na tane i roto i te mau ohipa haapa‘o parau i to raua fare a faatere ai ta’na tane i ta’na iho ohipa imiraa moni.

E hitu a te Wirthlin tamarii tamahine e hoê tamaroa. Ua haere ta raua mau tamarii atoa i te Fare Haapiiraa no Uintah, i Roosevelt Junior High School e i East High School – taua mau fare haapiiraa i haerehia e te tuahine Wirthlin i to’na apîraa. A haere noa’i ta’na mau tamarii i te haapiiraa, ua rave itoito oia i roto i te TMO [taatiraa na te mau metua e te mau orometua haapii], e ei melo no te opera club e ua haapii atoa i roto i te hoê piha haapiiraa no te ohipa himeneraa.

Aita oia i tere pinepine haere a vai apî ai te mau tamarii, ua tere râ oia i to’na tere matamua na ni‘a i te manureva i te rae‘a-raa-hia to’na matahiti i te 50. Mai te reira mai taime, ua tere haere oia i roto e rave rahi mau fenua e ta’na tane i roto i te mau titauraa a te Ekalesia. Ua ora na te utuafare Wirthlin i te fenua Helemani e pae matahiti, i reira to’na hereraa i teie fenua e i te mau taata.

I roto i ta’na taviniraa i roto i te mau pŭpŭ tauturu o te Ekalesia, e oto rahi roa oia ia titau ana‘ehia te hoê tauturu no te mau utuafare e mauiui ra e aore râ, te vaira to ratou mau fifi. Na roto i te philosophia e tei te vahi maitai mau outou no te taviniraa, e popou roa oia ia pûpû i ta’na tauturu.

Te vaira te hoê tauihaa taa ê i roto i to’na fare o tei pûpûhia i te tuahine Wirthlin e to’na mama. E parahi pinepine oia i roto i taua parahiraa ra no te tai‘o i te mau papa‘iraa mo‘a e te tahi atu mau materia no te tamahanahana, te faaitoito e te faaoaoaraa. Te tahi atu mau ohipa auhia e te tuahine Wirthlin te tairiraa popo, te raraa e te hahaereraa. E mea au atoa na’na to’na faahoaraa e ta’na tane i ta raua mau tamarii e va‘u, e e 46 mootua e e 49 mau hina.