Te mau parau opaniraa
Te vaiiho atu nei matou i to matou here e ta matou haamaitairaa ia outou na. Ia parahi mai te Varua o te Fatu i roto i to outou mau tiahapa na.
E au mau taea‘e e au mau tuahine here, mai te temeio ra te huru teie amuiraa ta tatou. Aita hoê mea e nehenehe e faaauhia i te reira i roto i te ao taatoa nei. Ia feruri ana‘e tatou e, te haaputuputu nei tatou i roto i teie fare amuiraa rahi, e te mau parau ta tatou e parau nei, te ta’ita’ihia’tura ïa na te ao atoa nei, ia ti‘a hoi i te mau taata atoa i roto i te mau fenua atoa ia haamori amui i te Atua ora, e temeio mau e te nehenehe rahi teie. Te feia atoa i paraparau mai, ua paraparau maitai ratou. Ahani pai e, te vai ra te taime, e faaroo ïa tatou i te taatoaraa o te mau Hui Mana Faatere Rahi. Eita râ hoi e nehenehe e na reira. Ua faauru te mau ti‘a no tera pŭpŭ tauturu e tera pŭpŭ tauturu ia tatou na roto i ta ratou mau parau poro‘i.
Na reira atoa te mau pure, ua faauru maitai te reira ia tatou. Mea nehenehe mau te mau himene.
E oaoa rahi to matou no teie Pû Amuiraa rahi, teie fare rahi i ô nei tatou i haaputuputu ai, e no te mau rave‘a aravihi o teie tau i ti‘a ai i ta matou mau parau ia ta’ita’ihia na te mau fenua atoa e tae roa’tu i roto i to tatou mau taata i tera fenua e i tera faito tau.
Te ani nei matou ia vai te hau i te fenua nei e te pure tamau nei matou ia tae mai te reira.
I teie nei, e au mau hoa here e, te vaiiho atu nei matou i to matou here e ta matou haamaitairaa ia outou na. Ia parahi mai te Varua o te Fatu i roto i to outou mau tiahapa na. Ia riro te here ei arata‘i i to outou mau auraa utuafare.
E te pure nei matou no te reira mau mea, ma te parau atu ia outou e, parahi ana‘e no te ono ava‘e i muri nei, i te i‘oa mo‘a e te maitai o to tatou Faaora, ma te vaiiho atu i to matou here e te haamaitairaa ia outou na, i To’na ra i‘oa, te Fatu ra o Iesu Mesia, amene.