2006
Te haafatataraa’tu Ia’na
Novema 2006

Te haafatataraa’tu Ia’na

Elder Craig A. Cardon

No te Hitu Ahuru

No reira, e ti‘a te autahu‘araa, na roto i te mau ohipa a te Varua, ia haafatata atu i te mau taata i te Atua na roto i te faatoro‘araa, te mau oro‘a e te tamâraa i te natura o te taata.

Tau matahiti i mairi a‘e nei, ua faanuu atu to‘u utuafare i roto i te hoê fare i roto i te hoê area apî, e fariu i ni‘a i te mau mou‘a o te pae hitia o te râ. I te hoê poipoi Monire, ia oti au i te oomo i to‘u ahu e ua ineine no tere vitiviti atu i te ohipa, te arata‘i mai nei ta maua tamaiti iti e ono matahiti o Craig i to’na teina iti maha matahiti o Andrew i roto i te piha. Ma te papu maitai hi‘o ti‘a maira ia‘u e parau maira, « E papa, i nanahi ra i te Paraimere, ua parau to matou orometua ia matou e, mai te mea te maura oe i te autahu‘araa e nehenehe oe e parau i te mau mou‘a ia haere i ŏ atu. Ua parau i teie ia Andy , aita oia e ti‘aturi ia‘u. Te mau nei oe i te autahu‘araa e Papa ? » Ma te haafariu i ta’na tamaiti iti e ma te faatano i to’na rima i te haamaramarama hi‘o ti‘a mai nei ia‘u e parau maira, « Te ite ra oe i teie mau mou‘a ? A faaite ia’na e Papa! »

Te mea i tupu i muri mai i te reira o te hoê ïa iteraa au maitai. Aue ïa vau i te oaoa no ta‘u na tamaroa iti o te haamata nei i te hoê oraraa haapiiraa no ni‘a i te autahu‘araa.

A haapii maite mai ai te Fatu i te feia o ta’na i horo‘a i te autahu‘araa e na roto i te faaroo e haere te mau mou‘a i ŏ atu1 – e te vai nei te mau papa‘iraa no teie mau ohipa tei tupu,2 e to‘u ti‘aturiraa o te hopoiraa mai ïa i te hoê iteraa rahi a‘e i te huru o te parau haapiiraa o te autahu‘araa o te faanuu atu i te taata nei ia piri atu i te Atua, ia nehenehe ratou ia riro mai Ia’na e ia ora e amuri atu i pihai iho Ia’na. No te mau tamarii tamaroa e no te mau tamarii tamahine a te Atua teie parau haapiiraa. No teie tumu, te pure nei au ia riro te mea o ta‘u e faaite nei ei tautururaa no na pae e piti.

I te matahiti 1823, ua fâ mai te melahi Moroni ia Iosepha Semita, e faaite maira oia rave rahi mau papa‘iraa mo‘a, oia’toa teie papa‘iraa no roto mai ia Malaki : « Inaha, e tuu atu vau i te Autahu‘araa ia outou na roto i te rima o te peropheta ra o Eliaha… »3 Na teie papa‘iraa matamua no ni‘a i te autahu‘araa i roto i teie tau tuuraa evanelia, i omua mai te hoê faanahoraa tei faarahihia i roto i te mau matahiti i muri atu.

I te matahiti 1829, ua faahoi mai Ioane Bapetizo i te autahu‘araa a Aarona4 apeehia i muri noa mai e Petero, Iakobo e Ioane o tei faaho‘i mai te autahu‘araa a Melehizedeka.5

I te matahiti 1836, ua faaho‘i mai o Mose e o Elia i te mau taviri no te haaputuputuraa o Iseraela e te tau no te tuuraa evanelia a Aberahama,6 apeehia mai i muri iho e Eliaha tei faaho‘i mai i te mau taviri no te taatiraa. Te na ô ra te hopea o teie heheuraa i te peropheta Iosepha, « No reira, ua tuuhia’tu te mau taviri no teie tau ta‘uraa i roto i to orua na rima. »7

No te mea ua vai faahou te mana o te autahu‘araa, te mau toro‘a e te mau taviri i ni‘a i te fenua nei, i te matahiti 1841, ua haapapu mai te Fatu i te peropheta Iosepha te faufaa no te paturaa i te mau Hiero, i roto i reira Oia e horo‘a mai ai i Ta’na mau tamarii te mau oro‘a o te autahu‘araa ia nehenehe Ta’na mau tamaroa e tamahine ia faaineine no te hoi i pihai iho Ia’na.8

Teie Ta’na i parau : « [Ia] hamani i teie fare… ia ti‘a ia‘u ia heheu atu i ta‘u mau oro‘a i roto i te reira i ta‘u mau taata. No te mea te opua nei au i te heheu… te mau mea hoi no ni‘a i te tau tuuraa no te îraa i te mau tau atoa ».9

I te matamua roa i Kirtland, ua haapii te Fatu i te peropheta Iosepha no ni‘a i tăpŭraa e te fafauraa no te autahu‘araa, ma te tatara i te mau huru na roto i te reira te mau haamaitairaa e tupu ai.10 I muri mai, i Nauvoo, ua tupu te ite mai te mau rave‘a mure ore e te mana o te autahu‘araa11 i te haamaitairaa i Ta’na mau tamarii faaroo atoa i roto anei i teie oraraa e aore râ, i te oraraa i muri nei.12 A horo‘ahia’i te autahu‘araa i te mau tamaroa faaroo a te Atua, e tuhaa atoa ta Ta’na mau tamarii tamahine e e tuhaa no To’na ra « feia » e na roto ia ratou Oia i heheu mai ai i Ta’na mau oro‘a no te autahu‘araa. E te haamaitairaa tei fafauhia no « te mau mea atoa a [te] Metua ra »13 e roaa i te tane e i te vahine o te faaohipa i te faaroo i roto ia Iesu Mesia, o tei farii i te mau oro‘a e ua faaoroma‘i i roto i te faaroo e tae noa’tu i te hopea. « No reira, i roto i te mau oro‘a [no te autahu‘araa a Melehizedeka], te mana no te huru Atua e faaitehia mai ai. »14

Te vaira te oro‘a teitei a‘e o te hiero no te hoê tane e no te hoê vahine, mai te mea ua taatihia raua no te faati‘a i te hoê utuafare mure ore. E mea na roto ïa i te reira e te taato‘araa o te mau oro‘a o te autahu‘araa, te mau utuafare o te fenua nei e haamaitaihia’i.15 Ua riro teie oro‘a taatiraa ei pu no te mau opuaraa o Ta’na i fafau i te feia faaroo o tei ore i taatihia i roto i teie oraraa e ere hoi na ratou te hape, e farii i teie haamaitairaa i roto i te oraraa e tae mai.16 Aita atu e haapa‘oraa i roto i te mau haapa‘oraa atoa o te haapapu maitai mai i te aifaitoraa o te here o te Atua no Ta’na mau tamaroa e no Ta’na mau tamahine.

E mana atoa to te autahu‘araa no te taui i to tatou naturaraa. Mai ta Paulo i papa‘i, « Te feia [atoa] o tei faatoro‘ahia i roto i teie autahu‘araa ua faarirohia ïa ei Tamaiti na te Atua. »17 Aita i faaite-noa-hia i roto i te faatoro‘araa e i te oro‘a ua faaite atoahia râ i roto i te haamaitairaa o te aau o te taata iho, te hoê mea e tupu i roto « i te tau i haapa‘ohia ra »18 a « [auraro] ai tatou i te parau a te Varua Maitai e a [faaru‘e] ai i te mau peu a te taata tino nei. »19 Ia faatoro‘a-ana‘e-hia te hoê taata i te autahu‘araa a Melehizedeka, e tomo oia na roto i te hoê « haapa‘oraa »20 e na roto i te reira oia e tamâhia’i na roto i te taviniraa ia vetahi ê, to’na ihoa ra utuafare, e e haamaitaihia na roto i te auhoaraa tamau a te Varua Maitai.21

Ua haamaramarama mai te Fatu ia tatou paato‘a a haapii ai Oia i te feia o tei mau i te autahu‘araa e, e hopoi mai te parau-ti‘a-ore i te hoê hopearaa no te mana o te ra‘i e aore râ, no ta’na faaûruraa a haapuai ai te parau-ti‘a i te reira. Ua faaite Oia i te mau peu maitata‘i o te « faarahi i te varua » mai te « taparuraa… na roto i te faaoroma‘i … na roto i te mărû… na roto i te haehaa… e na roto i te here mau ra. »22 E ua horo‘a faahou mai Oia i teie mau parau haapiiraa : « Ia î noa atoa hoi to outou mau aau i te aroha i te mau taata atoa, e i te utuafare faaroo, e ia faauna‘una noa te taiata ore i to outou mau feruriraa i te mau taime atoa ; ei reira to outou ti‘aturiraa e puai roa ai i mua i te aro no te Atua ; e e mairi mai ai te haapiiraa no te autahu‘araa i ni‘a i to outou aau mai te hupe no te ra‘i maira ».23

E mea faufaa i muri mai i te ani manihiniraa mai ia tatou ia aroha i te « mau taata atoa » ua horo‘a mai te Fatu i teie pereoda, « e i te utuafare faaroo. » No te aha ? Aita anei te « mau taata atoa » e amuihia i roto i « te utuafare faaroo » ? A feruri na i teie mau fifi ia maramarama te taata i teie pereoda i horo‘a-taa-ê-hia mai, « to outou iho » utuafare faaroo. Tera râ, e mea iti te feia i roto i te Ekalesia o te faaite nei i te aroha i te mau utuafare melo ore i ta ratou iho mau vahine e ta ratou mau tamarii, te mau taea‘e e tuahine e te mau metua. E faahua ratou i te faaite i te mata aiai i mua i te taata a faaitoito ai ratou i te tanu i te faahuehueraa, i te faahaehaaraa i te feia e ti‘a ia haafatatahia mai ia ratou. E ere teie mau mea i te mea tano.

Ua parau mai te Fatu no te mau feuriraa o te faauna‘una – o te faanehenehe e o te araraahia – e te taiata ore i te mau taime atoa. Eita teie mau feruriraa e rata i te hara.24 Ia riro ta tatou « Oia, ei Oia ; e ta outou Aita ei aita. »25 ma te faati‘a-ore i te haavare e te rave‘a haavare. E ite ratou i te maitai e te ite paari i roto ia vetahi ê, ma te faaitoito-ore i te mau ino i roto ia vetahi ê o te ore e nehenehe ia ape.

E faaoti te irava na roto i teie haapiiraa nehenehe roa tei faaauhia mai te hoê rave‘a « tamâraa ». Ia taa maitai i te faaohiparaa o teie mau parau tumu i roto i te tamâraa o to tatou iho nei oraraa, a hi‘o na i na hapaina pape e piti nei, hoê â o raua hoho‘a, a tuu i te hoê i roto i te hoê piha haumi. I muri mai i te hoê tau, e haamata te pape i te haapaari i roto i te hoê no te mea tei roto te reira i te hoê anuvera taa ê, no te mea aita i faaineinehia no te reira, e te tahi hapaina ra ua vai noa ïa mai to’na ra huru mărô e te ino ore. Ma te faahepo-ore, e nehenehe te haumi e « ô mai »26 i roto i te hoê hapaina, area te tahi ra aita ïa. Hoê â ïa huru, e faarahi te mau peu maitata‘i i te varua , te aroha no vetahi ê, no to tatou iho ra mau utuafare, e e faauna‘una to outou feruriraa mai te viretu e faatano i to tatou mau anuvera i te pae varua no te vaiiho i te haapiiraa no te autahu‘araa ia mairi mai i ni‘a i to tatou varua.

No reira, e ti‘a te autahu‘araa, na roto i te mau ohipa a te Varua, ia haafatata atu i te mau taata i te Atua na roto i te faatoro‘araa, te mau oro‘a e te tamâraa i te natura o te taata, no te horo‘a atu i te mau tamarii a te Atua te mau rave‘a ia nehenehe ratou ia riro mai Ia’na e ia ora e amuri atu i pihai iho Ia’na – te hoê ohipa hanahana atu i te parau i te mau mou‘a ia haere i ô atu.27

E opani au i ta‘u a‘oraa ma te amui i ta‘u pure e ta thomas Kelly i roto i te mau parau i papa‘ihia e Parley P. Pratt :

Mai te hupe i te aahiata

Te mairi mai ra i raro nei

E farari e faaapî

I te fenua mărô nei,

E te Fatu ho mai i ta

Oe evanelia

Haamaitai mai ia matou

Mai te hupe fenuaa.28

Na roto i te i‘oa o Iesu Mesia, amene.

Te Mau Nota

  1. A hi‘o Mataio 17:20.

  2. Etera 12:30 ; Mose 7:13 ; a hi‘o atoa Iakobo 4:6 ; Helamana 10:9.

  3. Te Aamu o Iosepha Semita 1:38.

  4. A hi‘o PH&PF 13.

  5. A hi‘o PH&PF 18:9 ; 27:12.

  6. A hi‘o PH&PF 110:11-12.

  7. PH&PF 110:13-16.

  8. Mai te mau haapiiraa a te Peropheta Iosepha Semita i roto i te piha o ni‘a mai i ta’na fare toa i Nauvoo, ua faaho‘i mai te Fatu i te mau oro‘a no te hiero i te fenua nei hou to ratou heheu-raa-hia mai e aore râ, i to ratou faaiteraahia i To’na mau taata i roto i te Hiero no Nauvoo, mai Ta’na e rave nei i teie mahana i roto i To’na mau hiero atoa, apeehia e ta’na mau heheuraa e ta’na mau faaûruraa. (A hi‘o History of the Church, Buka 5, mau api 1-2.)

  9. PH&PF 124:40-41 ; haapapûraa tuuhia‘tu ; hi‘o atoa te mau irava 31-32, 34, 39.

  10. PH&PF 84:33-42.

  11. A hi‘o PH&PF 128:8-9.

  12. A hi‘o PH&PF 137:7-9. A hi‘o atoa Ia Poro Haere i Ta‘u nei Evanelia (2004), 86.

  13. PH&PF 84:38.

  14. PH&PF 84:20.

  15. A hi‘o Aberahama 2:11.

  16. « Ua faaite te peropheta ma te ateate e, e ore te Atua e tape‘a i te haamaitairaa i Ta’na mau tamarii tamaroa e aore râ, mau tamarii tamahine mai te mea ua here ratou Ia’na, ua faaroo Ia’na, ua haapa‘o i Ta’na mau faaueraa, e ua faaoroma‘i ma te faaroo e tae atu i te hopea » (M. Russell Ballard, Counseling with Our Councils: Learning to Minister Together in the Church and in the Family, api 55). « Te feia o tei faataahia no te [taatiraa i roto i te hiero e i te hoê utuafare mure ore] e farii i te mau haamaitairaa hanahana, i roto i te taime mau o ta te Fatu i faataa, e farii ïa i teie ao e aore râ, i te ao o muri nei » (Elder Richard G. Scott, « The Power of Righteousness, » Liahona, Tenuare 1999, api 81).

  17. Iritiraa a Iosepha Semita, Hebera 7:3; a hi‘o atoa Mose 1:6.

  18. Mose 7:21.

  19. Mosia 3:19.

  20. Alama 13:2, 16 ; PH&PF 107:3.

  21. A hi‘o PH&PF 20:77, 79 ; 121:46.

  22. PH&PF 121:41-42.

  23. PH&PF 121:45.

  24. A hi‘o Alama 13:12.

  25. Mataio 5:37.

  26. PH&PF 121:46.

  27. A hi‘o Mose 1:39.

  28. « Mai te Hupe Poipoi, » Himene, no. 74.