Te u‘i matamua
Na roto i te riroraa ei taata matamua o tei farii i te evanelia i roto i to outou utuafare e riro ïa outou ei u‘i matamua, e u‘i ma‘itihia, e na roto hoi i te reira e haamaitaihia ai te mau u‘i no te tau i mairi, to teie tau e no te tau a muri a‘e.
Rave rahi mau mahana i mairi a‘e nei, te aparau ra matou no ni‘a i te mau a‘oraa i roto i te tamaaraa utuafare. Te faaineine ra ta maua tamahine o Clarissa, 13 matahiti, i te hoê a‘oraa no te pureraa oro‘a o ta matou amaa i Moscou i te fenua Rusia ma te aau taia. Ua parau râ vau ia’na e aita e fifi e upooti‘a te mau mea’toa e haapapû atura ra vau ia’na i to‘u iho nei hepohepo ma te parau atu e aita hoi oia e a‘o i mua tauasini feia i roto i te Amuiraa Rahi. Inaha, horo‘a mai nei Clarissa i ta’na haapapûraa e i ta’na a‘o ma te parau e « Eiaha e haape‘ape‘a papa, e feruri noa râ tatou e, e amaa rahi ». E te mau taea‘e e te mau tuahine, e amaa rahi mau teie.
Ua maiti au i te a‘o atu i teie po‘po‘i no ni‘a i te u‘i matamua no te mau melo no Te Ekalesia a Iesu Mesia i te Feia Mo‘a i te Mau Mahana Hopea Nei. O outou te feia matamua o to outou utuafare o tei farii i te parau poro‘i o te a Iesu Mesia o tei faahofaahou-hia mai i te fenua nei i to tatou nei mahana e te mau peropheta, mau hi‘o e mau heheu parau ora. E faahaehaa outou ia outou iho, e faaohipa i te faaroo i roto ia Iesu Mesia, e tatarahapa i ta outou mau hara atoa e i te raveraa i ni‘a ia outou te i‘oa o Iesu Mesia na roto i te bapetizoraa na roto i te utuhiraa e ia farii i te horo‘a a te Varua Maitai.1 Na roto i te riroraa ei taata matamua o tei farii i te evanelia i roto i to outou utuafare e riro ïa outou ei u‘i matamua, e u‘i ma‘itihia, e na roto hoi i te reira e haamaitaihia ai te mau u‘i no te tau i mairi, to teie tau e no te tau a muri a‘e.2
Te riroraa ei melo no te u‘i matamua o te Ekalesia e ere ïa i te mea ohie. E haere outou na te mau vahi o tei ore i haerehia e te hoê o to outou utuafare. E riro te mau mea e haaati nei ia outou ei tamataraa. E mea iti e aore râ, aita roa, e mau hoa e aore râ, mau fetii ia maramarama mai e ia paturu mai ia outou. I te hoê taime, e riro outou i te faataia ma te uiui e, e mea ti‘a anei. Te tumu o ta‘u a‘oraa i teie po‘po‘i no te haapapûraa ïa ia outou e oia mau.
E tape‘a te mau melo no te u‘i matamua i te ti‘araa taa ê e te faufaa i roto i te Ekalesia e to ratou mau utuafare. Ua ite anei outou e te mau melo no te u‘i matamua o te afa ïa o te rahiraa o te mau meloraa o te Ekalesia.3 Peneia‘e aita teie mau numera i roaa i te haamataraa mai o te Ekalesia mai to teie mahana. Na to outou râ faaroo e to outou iteraa papû i hopoi mai i te puai e i te haamaitairaa rahi i te tahi mau melo no te Ekalesia. Na roto ia outou, ua roaa mai te hoê iteraa hohonu atu no te mau parau tumu o te evanelia e ua haapuaihia to outou mau iteraa papû.
Ua tuu outou i te puai rahi i roto i te Ekalesia a faaohipa’i outou i to outou iteraa papû, ta outou mau taleni, to outou mau ite, to outou mau puai e to outou itoito no te paturaa i te basileia i roto i ta outou mau paroita e mau amaa. Ua riro outou ei mau hi‘oraa rahi no te pororaa i te evanelia, te raveraa i te mau misioni, te tonoraa i te mau tamarii i te misioni e i te faamanavaraa mai i te mau melo apî. E imi atu â outou na roto i te here i te feia e haaati ra ia outou, ma te faateitei e ma te haamaitairaa ia ratou na roto i te taviniraa faaûru. Te rahiraa o te mau mea i ravehia i roto i te Ekalesia i teie mahana, e ore te reira e noaa i te ravehia maoti râ, na roto i ta outou mau tutavaraa.
Hau roa’tu râ i te faufaa, ei melo no te u‘i matamua, e ti‘araa faufaa roa to outou i roto i to outou utuafare. E hi‘oraa maitai outou no to outou utuafare ei pĭpĭ mau na Iesu Mesia. Noa’tu e melo ratou no te Ekalesia e aore ra, aita, mai te mea e, e ora outou i te evanelia i roto i te utuafare, e ite te feia e haaati nei ia outou i te here o te Faaora na roto ia outou. Ua ite ratou e ua faaŏ outou i roto i te ohipa maitai, noa’tu e aita ratou i taa maitai i te reira e aore râ, aita i rava‘i to ratou faaroo no te farii i te reira. A faaoroma‘i e ia here, a pure i te mau mahana atoa ia ite e, e nahea e ti‘a ai ia outou ia tavini ia ratou, e na te Fatu e tauturu mai ia outou e ia haamaitai mai ia outou ia faaûru i to outou utuafare i roto i te mea maitai. Na roto i te oraraa ma te parau ti‘a, e faati‘a ïa outou i te mau hoho‘a no te faaroo e no te parau ti‘a. Na te reira mau hoho‘a e hamani i to outou oraraa area râ, te mea faufaa roa e riro te reira ei arata‘iraa no to outou utuafare e to outou huaai.
Ei u‘i matamua, ua riro atoa outou ei taviri no te iriti i te mau haamaitairaa a te Fatu no te mau melo o te utuafare o tei pohe e o tei ore e faaroo i te evanelia e o tei ore e farii i te mau oro‘a faaora. Na outou ïa e haamata i teie ohipa no ratou. Te tia‘i mai nei ratou ia imi outou ia ratou e ia tauturu ratou ia outou ia maimi i to ratou mau parau tuatapaparaa. Ia itehia mai te reira ia outou, na roto i to outou ora-viivii-ore raa e haere ïa outou i te hiero e e rave i te mau oro‘a faufaa no ratou. E taamu teie mau oro‘a ia outou i to outou mau tupuna e e hopoi mai i te puai i te pae varua i roto i to outou oraraa.
No te mea o outou te u‘i melo matamua, te mau ma‘itiraa tata‘itahi ta outou e rave e mea faufaa roa ïa. Noa’tu râ, e riro te mau opuaraa haapa‘o-ore i te faateimaha i ni‘a i te mau u‘i o muri nei oia’toa to outou oraraa. Ua pûpûhia i te hoê melo taure‘are‘a no te u‘i matamua te ava i te vahi raveraa ohipa te mahana i muri mai i to’na bapetizoraa. Tei reira paatoa to’na mau hoa e te inuinu ra. Te vaira i reira te faahemaraa. Aita roa te hoê i ite noa‘e, ua bapetizohia oia i nanahi ra e ua fafau i te Fatu. Ua pato‘i oia i te rave i te inu e ua faainohia. A feruri ai oia i muri mai i te ohipa i tupu, teie ta’na i papa‘i, « A maha ahuru matahiti i teie nei mai taua mahana mai â vau i rave ai i taua mau fafauraa no te (bapetizoraa) e e nehenehe roa vau e parau e ua… haapa‘o vau i te Ture Paari… te ti‘aturi nei au mai te mea e farii au i (taua) inu ra, penei a‘e, eita vau e haapa‘o i te Ture Paari ».4
Area râ, ua haapa‘o te Mesia i ta’na mau fafauraa o te bapetizoraa. I muri mai, ua farerei e ua faaipoipo oia i te hoê tamahine faaroo. E raua toopiti atoa, ua faaamu e va‘u tamarii i roto i te evanelia. I teie nei, i te onoraa o te u‘i, e rave rahi hanere huaai to raua. E rave rahi tatini o ratou tei tavini i roto i te mau misioni e ua afa‘i i te evanelia ia vetahi ê. Ta’na tautooraa i roto i te aamu utuafare ua iriti ïa i te mau haamaitairaa o te evanelia i te tahi atu mau hanere taata. Na te hoê noa faaotiraa a te hoê u‘i matamua i faatupu i te taa- e-raa e rave rahi tauasini.
Te ite ra outou i teie nei no te aha e mea faufaa te u‘i matamua ? Te taa ra ia outou te ti‘araa faufaa o ta outou i ohipa mai e te faaûruraa o ta outou i faaite ? Eiaha roa e haafaufaa‘ore ia outou e i to outou mana no te haaputapû ia vetahi ê. Ua ite Satane e o vai râ outou e e faaitoito oia i te haavare ia outou ia rave i te mau ma‘itiraa ti‘a-ore. I te tahi mau taime, noa’tu ta tatou mau tutavaraa maitai roa, e rave iho â tatou i te hape. Auaa râ, ua faaineine te Fatu i te hoê e‘a no tatou ia upoo-ti‘a na roto i te tatarahaparaa e te ti‘aturiraa i ni‘a i te Taraehara a Ta’na Tamaiti. Eiaha e haaparuparu mai te mea e rave outou i te hoê hape. E riro te tatarahapa e te haere-tamau-raa i mua, o te mau haere‘a faufaa‘e paha ïa e ti‘a ia faananea i roto i te u‘i matamua. A faaoroma‘i e a faanuu noa i mua na roto i te haapa‘oraa.
I roto i te Ekalesia, e tai‘o e e tau‘a parau rahi tatou no ni‘a i te mau pionie matamua i roto i te aamu o te Ekalesia. Ua riro ratou ei mau melo no te u‘i matamua mai ia outou na. Ua ora ratou i te mau tamataraa o te mau mahana tata‘itahi o te utuafare, o te ohipa e o te faaroo. Ua ora ratou i te hoê oraraa maitai e i te taviniraa faaroo i roto i te Ekalesia e te haamaitairaa i to ratou mau utuafare. Ia hape ratou, e ti‘a faahou mai ratou e e haere faahou i mua. I teie nei, o tatou tei riro ei huaai no ratou, e hi‘o tatou i muri ma te faatura e te popou no to ratou faaroo.
E nehenehe ta ratou ai‘a tupuna e riro na outou ei mau melo no te u‘i matamua. A faaea faaroo noa, a tavini i to outou taata tupu, a haamaitai i to outou utuafare, e a rave i te mau ma‘itiraa tano. O outou te u‘i matamua, e u‘i maitihia no te haamaitai i to muri atu, to teie nei e to muri nei. Te faahanahana nei matou ia outou. E faahanahana mai te mau u‘i o muri nei ia outou. Area te mea faufaa a‘e, e faahanahana te Atua ia outou no te riroraa ei mau taata haapa‘o i roto i te u‘i matamua. Na roto i te i‘oa o Iesu Mesia, amene.