Te haamana‘oraa i te here o te Fatu
E titauhia ia imi ia ite i te aroha o te Fatu i roto i to tatou oraraa.
E au te hoho‘a peni Te Mesia i roto i te hoê Ahu Ura, a Minerva Teichert, ei faahoho‘araa maitai roa i ta tatou papa‘iraa mo‘a o ta matou i maiti no teie nei pô : « Ua ati-noa-hia vau e te rima o To’na ra aroha » (2 Nephi 1:15). E hi‘oraa manava to te Mesia a faatoro mai ai oia i to’na rima ia tatou. Mai Ta’na i ani manihini i te Ati Nephi ia « ti‘a mai i ni‘a e haafatata mai ia‘u » (3 Nephi 11:15), oia’toa ïa Ta’na ani-manihini-raa mai ia tatou ia haere taihoê mai Ia’na ra, ia ite atoa tatou e « o [Oia] te Atua no to te ao nei, e o tei pohe no te mau hara a to teie nei ao » (3 Nephi 11:14). E ite ïa tatou e nahea ia ati-noa-hia i To’na ra aroha ia farii tatou i taua aniraa manihini ra.
Te ti‘aturi nei au e ua ite tata‘itahi outou, i te hoê taime e aore râ, i te tahi atu taime i te ati-noa-raa-hia i roto i te rima o te Mesia. Mai te mea râ ua riro outou mai ia‘u nei, te vaira te tahi mau taime e feaa outou, e ahoaho e e pipiri outou i te ohipa o te oraraa e faaohipa rahi nei ia outou, ia ore te patururaa a te Varua. Noa’tu e e mana‘o outou e ua faruehia outou. Ia û vau i teie mau mana‘o, te raau paruru maitai a‘e, o to‘u ïa mau haamana‘oraa i te hau o te Mesia tei tae mai no te haapuai ia‘u. No reira i teie pô, te ani manihini nei au ia outou ia haamana‘o e o vau atoa nei i te huru no te iteraa i te here o te Fatu i roto i to outou oraraa e ia ati-noa-hia i roto i To’na rima.
Ua pohe to‘u mama e metua vahine apî roa â ia vau. Te hinaaro noa nei â vau i ta’na mau haapiiraa e i ta’na mau a‘o. I muri mai i te ite-raa-hia e e ma‘i mariri ai taata to’na, e ono noa hepetoma e toe ra no’na. I te matamua roa, ua tapitapi au no to‘u papa. Ua mauruuru râ vau i te mea aita to‘u mama i mauiui maoro roa e ua riro to’na pohe ei iteraa taa ê no matou. Area te tahi mau hepetoma i muri mai, o te mahana faahanahanaraa ïa o te mau metua vahine e to’na atoa mahana fanauraa e haamata ihora vau i te mihi ia’na. Ua hinaaro vau ia tauahi oia ia‘u, e te hinaaro atoa ra vau ia ite i to’na huru. Ua hinaaro vau i te parau ia’na e ua here e te mihi nei au ia’na.
I te hoê pô, a pure ai au ma te ta‘i (o ta‘u ïa ohipa tumu), ua ite au i te mahanahana i te faîraa ta‘ueraa i to‘u tino – i te reira iho taime. Ua ite roa vau e o te – here ïa o te Fatu tei ati-noa ia‘u ma te horo‘a mai i te hau e te puai. Area râ, no te faufaa rahi, ua riro taua taime ra ei haamana‘oraa na‘u mai te hoê tao‘a aroha no te puohu e no te haamana‘o ia fifi te oraraa.
I te tahi mau taime, e tae mai te here i mana‘o-ore-hia ei hopea no te hau noat’u e aita i hinaarohia – e aita atoa e fifi taa ê i farereihia e au. I te hoê Sabati mo‘emo‘e no te tau faatoparaa rau‘ere raau, te parahi ra vau i roto i to‘u parahiraa tai‘oraa papa‘iraa mo‘a, e te mata‘ita‘i ra vau i te mau rau‘ere raau re‘are‘a e topa ra mai ni‘a mai i te tumu maa a to‘u mau hoa tapiri. Ua hi‘o ti‘a’tu vau na ni‘a‘e i ta‘u mau papa‘iraa mo‘a e ma te faaara-ore-hia, ua ite au i te hoê hau e te oaoa i te faîraa ia‘u. E mea poto roa ino taua taime ra, area te haamana‘oraa o te here o ta‘u i ite ra, ua vai ïa i to’na vairaa. Ua riro ïa ei tao‘a aroha no te haamana‘oraa no te oraraa e no te mau taime fifi.
Area i te mau mahana atoa, ia imi maite au i te reira, e ite au i te here o te Fatu i roto i to‘u oraraa e e ite au i To’na rima ia ati-noa ia‘u. E ite au i te tapa‘o o te here o te Fatu i roto i ta‘u mau hahaereraa o te taime poipoi ia ateate te reva e ia hiti mai te mahana i te hitia o te râ ; e ite au i To’na aroha ia tae mai te hoê papa‘iraa mo‘a i roto i to‘u feruriraa e ia aparau mai ia‘u na roto i te hoê e‘a apî. E ite au i To’na aroha ia haapiihia vau e te mau vahine maitai o te Sotaiete Tauturu e aore râ, e te mau tuahine hahaere o te tau‘a mai nei ia‘u. E ite au Ia’na ia pahono to‘u aau i te mau pehe nehenehe e aore râ, i te hoê a‘oraa e au ia mana‘ona‘o-noa-hia. E te mau tuahine, tei te mau vahi atoa te Fatu ia araara tatou i to tatou mau mata e i to tatou aau i To’na aroha.
Area râ, te vaira te mau vahine i rotopu ia tatou, te ti‘aturi papû nei au e, te mana‘o nei ratou i teie iho taime e, « I nahea e roaa’i to‘u taime no te hoê hahaereraa o te poipoi ? I nahea ra te taime hopea i rave ai au 10 minuti no te hau no te tai‘o i ta‘u mau papa‘iraa mo‘a » E aore râ, « I nahea ra te taime hopea i ore ai au i ite i te mauiui i roto i te hoê mahana ? i hepohepo ai au ? i mauiui ai to‘u upoo ? » E ua ite au e e parau mau e, e au te oraraa mai te hoê fata no te mau titauraa, te mau ririraa e te mau otoraa. Area te Fatu ra, e vai tamau noa ïa oia : Te faatoro noa maira oia i to’na rima. Ia fifi tatou, e haamana‘o tatou i te hau o Ta’na i parau ia tatou i te mau taime e rave rahi. E hopoi mai To’na hau i te tamahanahanaraa e te puai, o ta te ao nei e ore e ti‘a ia horo‘a no tatou.
Ei mau vahine faaroo no te Ekalesia a Iesu Mesia i te Feia Mo‘a i te Mau Mahana Hopea Nei, ua haamaitaihia tatou i te Varua Maitai. A titau ai tatou i te Faaora i roto i to tatou oraraa, e faaite papû mai te Varua Maitai ia tatou i te aroha o te Metua e o Ta’na Tamaiti, to tatou Faaora, no tatou. Na roto i te iteraa i to Raua aroha e ere te reira mea na roto noa i to tatou iho hiaai e mea na roto atoa râ, i ta tatou mau ohipa. E te mau ohipa e titauhia ia tatou ia rave, ua ite maitai tatou i te reira: te pure taa ê mau e te haehaa, apeehia e te hoê faarooraa i te mau pahono a te Fatu ; te tai‘o tamauraa i te papa‘iraa mo‘a e te hoê taime no te feruri hohonuraa i te mea o ta tatou e tai‘o ; e inaha, te hinaaro-mau-raa i te hi‘opoa ia tatou iho e i te ti‘aturiraa i te mau fafauraa a te Fatu e, e « faariro oia i te mau mea paruparu ei mea etaea no tatou » (Etera 12:27) . A tai‘o ai e a feruri hohonu ai tatou, e ti‘araa to taou ia farii i te mau muhumuhu a te Varua, e a haapa‘o maite ai tatou i teie mau muhumuhu, e ite ïa tatou i te mau mahana tata‘itahi atoa e te ohipa nei te Fatu i roto i to tatou oraraa. E ite ïa tatou Ia’na, mai ta Elder Neal A. Maxwell i parau e, « i roto i te mau hu‘ahu‘araa o to tatou oraraa » (Neal A. Maxwell, « Becoming a Disciple », Ensign, Tiunu 1996, 19). E ia tae mai taua iteraa ra, e ite ïa tatou i To’na hau e e ite ïa tatou e ua ati-mau-hia tatou i te rima o To’na ra aroha.
I roto i te haapiipiiraa na te feia faatere no te ao atoa nei i te ava‘e Tenuare 2004 ra, ua a‘o u‘ana mai te peresideni Gordon B. Hinckley i te mau vahine o te Ekalesia e « Ia Ti‘a Papû ma te Aueue -Ore » i mua i te ino o te tupu rahi nei i roto i te ao (« Standing Strong and Immovable », Haapiipiiraa na te feia faatere no te ao nei, 10 no tenuare 2004, 20). E te mau tuahine e, no reira tatou i titauhia’i ia imi ia ite i te aroha o te Fatu i roto i to tatou oraraa. No reira tatou i titauhia’i ia haamana‘o e ia faaherehere i to tatou iho mau iteraa rau i roto i To’na hau e i te puai o ta te reira e hopoi mai. E no reira tatou e ti‘a’i ia faaite i to tatou iho mau iteraa rau no te faaroo e no te iteraa papû i ta tatou mau tamarii e i te feia metua ore e aore râ, fetii ore.
Te hinaaro nei to tatou mau utuafare i te hau o te Atua i roto i to ratou oraraa, e mai te mea eita e nehenehe ia tatou e aore râ, eita tatou e ani manihini i te Fatu i roto i to tatou oraraa, e riro to tatou mau utuafare mai te hoê feruriraa mana‘o no to tatou iho peapea. Ua anihia te mau vahine ia riro ei metua faaamu no to ratou utuafare e mea ti‘a atoa râ ia tatou ia haapaari : e mea ti‘a atoa ia riro tatou ei mau niu papû i ni‘a i te reira e patuhia’i to tatou mau ti‘ahapa. Te hinaaro nei to tatou mau utuafare ia tatou ia parau i te hau ia ratou, mai te Fatu e parau i te hau ia tatou. Titauhia ia riro to tatou mau fare ei mau vahi i reira ta tatou mau tamarii e to tatou mau hoa e hinaaro ai e noho, e vahi i reira te feia atoa o te tomo mai e huti ai i te puai e te itoito no te faarururaa i te mau tamataraa o te oraraa i roto i teie ao ino rahi. E hinaaro ta tatou mau tamarii ia aparau tatou no te « Mesia,… ia oaoa i te Mesia, [e] ia a‘o no te Mesia » (2 Nephi 25:26), ia ite ratou e e hi‘o râ ratou i hea ia roaa te hau o tei hau ê atu i te ite taata nei » (Philipi 4:7).
A haamana‘o e te mau tuahine e, e mea ateate e te ohie te titauraa manihini a te Faaora, e e mea faufaa rahi no tatou e e mea tamau: « E haere mai outou ia‘u nei, e te feia atoa i haa rahi, e tei teiaha i te hopoi‘a… A rave mai i ta‘u zugo i ni‘a ia outou… te mârŭ nei hoi ta‘u zugo » (Mataio 11:28-30) . O teie te fafauraa a te Fatu ia‘u e ia outou na.
Ta‘u pure no tatou tata‘itahi oia ïa ia haamana‘o tatou i to te Fatu parauraa i te parau no To’na hau ia tatou e i to’na ati-raa ia tatou i roto i te rima o To’na aroha. No te mea e mea faufa, e nehenehe anei outou mai te mea aita â outou i ite i teie aroha, ia imi e ia iteahia ia outou a rave noa’i outou i ta outou mau ohipa o te oraraa. A na reira ai outou i te mau mahana, i te mau ava‘e e i te mau matahiti o to outou oraraa, e riro te mau haamana‘oraa o te mau ohipa e te Fatu ei mau horo‘a monamona no te iriti i te hoê taime faahou – e aore râ, rave rahi mau taime – no te haapuai ia outou ia fifi te oraraa.
« E hau ta‘u e vaiiho ia outou nei », o te fafauraa ïa a te Fatu, « e ere mai ta to te ao nei horo‘a ta‘u horo‘a ia outou » (Ioane 14:27). E hau. E puai. O te mau mea ïa o ta tatou e hinaaro e mai te mea nehenehe. Titau-noa-hia râ ia hi‘o ti‘a tatou i to’na na rima faatoro. Na roto i te i‘oa o Iesu Mesia, amene.