E nehenehe ta te taraehara e haapapû i to outou hau e to outou oaoa
Te oaoa maoro mau, o te apeehia e te puai, te itoito, e te aravihi i te upootia i ni‘a i te mau fifi rahi atoa, e tae mai ïa te reira a haatumu ai outou i to outou oraraa i ni‘a ia Iesu Mesia.
Te hinaaro nei to tatou Metua i te Ao ra ia oaoa tatou tata’itahi i te hau e te oaoa i roto i te oraraa tahuti nei. Ua haapii to tatou Fatu ra, o Iesu Mesia e Ta’na mau peropheta nahea e noaa’i taua hau e taua oaoa ra, i roto ihoa râ i te hoê ao tei rahi te fifi, te rahi noa’tu ra te maroraa e te puai noa’tu ra te mau faahemaraa u‘ana.
E faahoho‘atu vau te rave‘a hape e noaa’i te hau e te oaoa e te rave‘a tano, na roto i te faaohiparaa i te hoê faahoho‘araa no te pa‘umaraa i te mou‘a. Te vai nei te feia o te tamata i te pa‘uma i te hoê papa’i mou‘a fifi na roto i te hoê rave‘a tei piihia « te raveraa ona ana‘e ». E pa‘uma ratou ratou ana‘e, ma te tauhaa ore, te mau hoa ore, aore râ te tahi parururaa. Te ti‘aturi nei ratou i ni‘a i to ratou iho aravihi e to ratou iho paari. Te rave nei ratou i te reira no te oaoa e noaa mai na roto i te oraraa i te hoê oraraa ataata e te fifi rahi. Te rave nei ratou i te reira noa’tu te mana‘o e aita e maoro roa e marua ratou e e pepe ino roa ratou aore râ e pohe ratou. Ua riro ratou mai te feia e rave rahi o te faaruru nei i te mau tamataraa e te mau faahemaraa o te oraraa ma te parururaa ore e noaa na roto i te haapa‘oraa i te mau faaueraa a te Atua, ma te arata‘ihia e te Varua Mo‘a. I roto i te ao fifi no teie nei tau, e mea papû roa e ofati ïa ratou i te mau ture faufaa rahi, ma te mau hopea raa mauiui e te ino. Eiaha e ora i to outou oraraa ma te ti‘aturi noa i ni‘a « iho ia outou ». E mea papû roa e hi‘a outou i te hara.
Te vai nei te hoê e‘a papû a‘e no te pa‘uma i te mou‘a. Ia tamata ana‘e na taata e piti i te pa‘uma i te hoê e‘a fifi, e pa‘uma te taata arata‘i i te hoê papa’i mou‘a ma te patia atu i te mau tutau tei faa area rii hia te tahi i te tahi. E taamuhia ta’na taura i te tutau e te hoê ponao auri. E haa papûhia te parururaa e te hoê hoa tei piihia te piti o te taata pa‘uma, tei tuu ia’na iho i te hoê vahi papû maitai. E paruruhia ïa te taata arata‘i ia haapapû maitai te piti o te taata pa‘uma i te taura, oia hoi, e hi‘opo‘a maite oia e nahea te taura e tuutuuhia’i. Na roto i teie nei raveraa e paruruhia ïa te taata matamua a pa‘uma ai oia. Mai te mea noa’tu e tupu mai te tahi ati mana‘o-ore-hia na te tutau ïa e paruru e e tape‘a te maruaraa. Eita te piti o te taata pa‘uma e paruru noa i te taata matamua, e faaitoito atoa râ oia i te taata matamua ma te horo‘araa i te tahi mau mana‘o e te tahi mau faaararaa a paraparau noa’i raua te tahi e te tahi. Ua riro ta raua fâ ei hoê ohipa faahiahia e te paruruhia na roto i te upooti‘araa i ni‘a i te hoê tamataraa faufaa rahi. E faaohipa raua i te mau ravea e te mau mauhaa tei tamatahia e tei faaite mai i to ratou paari. Te vai nei i roto i te mauhaa faufaa rahi te hoê taura taamu, te hoê taura e nehenehe e ti‘aturihia, e mau huru tutau atoa no te patiti atu i ni‘a i te papa’i mou‘a, te hoê pute e huahua repo uouo no te haamaitai te tapearaa, e te mau tiaa tano aore râ te mau tiaa taa ê ta te taata pa‘uma matamua e nehenehe e faaohipa no te tape‘a – maite-raa i te papa’i o te mou‘a tarere.
Ua tuatapapa na taata pa‘uma e piti i te mau ture e te mau raveraa no te pa‘uma i te mou‘a. Ua farii raua i te arata‘iraa a te mau taata pa‘uma aravihi e ua matau maitai raua nahea ia pa‘uma e nahea ia faaohipa i te mau mauhaa. Ua faanaho raua i te hoê haerea e ua faaoti raua nahea ia rave amui i te paumaraa. Ia atea ana‘e te paumaraa a te taata arata‘i, e ia ite oia i te hoê vahi tano tei paruruhia, e haapapû ïa oia i te taura a pee mai ai te piti o te taata pa‘uma i te taura mai te au i to’na roaraa. Ia noaahia ia’na te taata matamua, e haamata-faahou-hia te raveraa. E haapaari te hoê i te taura a pa‘uma atu ai te tahi ma te patiti i te mau tutau i te mau metera atoa no te paruru mai te mea e tupu noa mai te tahi ati marua. Noa’tu e mea huru ataata e e mea fifi roa te ohipa paumaraa i te mou‘a, na teie nei mau raveraa e horo‘a mai i te ohipa faahiahia, tei faatupu papûhia na roto i te haapa‘oraa i te mau faatureraa tano.
I roto i te oraraa mau, te mau tutau o te mau ture ïa a te Atua o te horo‘a mai i te parururaa i te mau tamataraa atoa ta outou e faaruru atu. Te taura e te mau ponao auri o te haapaari i te taura i te mau tutau e faahoho‘a ïa i te haapa‘oraa i taua mau faaueraa ra. Ia haapii ana‘e outou i taua mau faaueraa, e ia a tamau noa ana‘e i te haapa‘o i te reira, e ia faataa outou i te hoê faanahoraa no te ape i te ati, e roaa ïa outou i te mau ravea papû no te farii i te parururaa i te mau faahemaraa a Satane. E faatupu ïa outou i te puai no te huru taata o te haapuai ia outou i mua i te hara. Mai te mea noa’tu e rave outou i te hoê raveraa hape aita ïa e hopearaa ino no te mea te vai ra te taura aore râ te tauturu e vai nei na roto i to outou tatarahaparaa.
A vaiiho i te Faaora ia riro ei « arata‘i » no outou i roto i te oraraa. Ua parau oia e, « te Mato o te Ra’i… o te haere mai i roto na te uputa, e e pa‘uma i ni‘a i piha’i iho ia‘u, e ore roa ïa e ma‘iri ».1 E arata‘i papû maitai te Arai ia outou i ni‘a i te mau tamataraa fifi o te oraraa nei. Ua riro ta’na mau ture ei mau tutau papû no te parururaa o te tiavaru i te măta‘u e o te haapapû i te manuiaraa i roto i te hoê ao ataata. E horo‘a mai teie huru oraraa i te hau e te oaoa ia outou.
Te oaoa maoro mau, o te apeehia e te puai, te itoito, e te aravihi i te upootia i ni‘a i te mau fifi rahi atoa, e tae mai ïa te reira a haatumu ai outou i to outou oraraa i ni‘a ia Iesu Mesia. E horo‘a mai te haapa‘oraa i Ta’na mau haapiiraa i te hoê tereraa paruruhia i roto i te tereraa o te oraraa. E titau te reira i te itoito. Noa’tu e aita e haapapûraa e noaa mai te manuiaraa i tera ihoa taime, te vai nei râ te haapapûraa e, i te taime tano a te Fatu, e tae mai te mau pahonoraa, e e vai mai te hau, e farii outou i te oaoa.
Te mau tamataraa ta outou e faaruru nei, te mau ohipa o te faatupu ia outou ta outou e farerei nei, ua opuahia ïa ei mau hautiraa no te hoê tau poto noa i ni‘a i te tahua hautiraa no te oraraa ma te hau e te oaoa tamau. Te oto, te mamae o te aau e te oaoa-ore-raa, e mau ohipa ïa o te tupu i roto i te oraraa. Aita i opuahia e riro ratou ei mau mea faufaa rahi no te oraraa. Aita vau e faaiti nei i te teimaha o teie mau ohipa. Mai te mea e e mea faufaa rahi te haapiiraa ta oe e farii, e roa atoa ïa te taime tamataraa, tera râ, eiaha te reira ia riro ei tumu hoê roa no te mau mea atoa ta outou e rave. E nehenehe e e ti‘a i to outou oraraa ia riro ei oraraa maitai mau. Na to outou iteraa e to outou haapa‘oraa i te mau ture a te Atua e horo‘a i to outou nei oraraa te opuaraa hanahana ia upooti‘a ana‘e outou i te mau fifi o te oraraa. Na teie hi‘oraa e tape‘a i te mau tamataraa i roto i to ratou iho ti‘araa – ei mau ofa‘i o te arata‘i i te tupuraa e te manuiaraa rahi atu â.
Te haapa‘o maitai nei te Fatu i to outou iho tupuraa e to outou iho paariraa. E faaoioi hia to outou haereraa i mua ia faati‘a ana‘e outou Ia’na ia arata‘i ia outou na roto i te mau ohipa atoa ta outou e farerei , ia farii outou i teie ite aore ra aita. A ti‘aturi i te Fatu. A ani ia arata‘ihia outou e te Varua no te ite i To’na ra hinaaro. A ineine i te farii i te reira. E noaa ïa ia outou te oaoaraa rahi roa‘e e te manuiaraa rahi roa‘e i roto i teie oraraa tahuti nei.
Te hau e te oaoa e mau hotu faufaa rahi ïa no te hoê oraraa parau-tia. E vai te reira na mea maori ana‘e te Taraehara a Iesu Mesia. E e haamaramarama atu vau i te reira.
Te rave tata’itahi nei tatou i te mau hape i roto i te oraraa. Te hope‘araa o te ofatiraa ïa i te mau ture mure ore. Te parau-tia o taua tuhaa ïa o te Ravea Oaoa a te Metua i te Ao ra o te haamau i te nahonaho. Mai te ture o te huti i te hoê taata pa‘uma i te mou‘a, o te vai noa mai. E hoa te reira mai te mea e haapa‘ohia te mau ture mure ore. E riro te reira ei ino no outou mai te mea aita ratou e tau‘ahia. E haapapû te parau-tia e e farii outou i te mau haamaitairaa ta outou i tutava na roto i te haapa‘oraa i te mau ture a te Atua. E titau atoa te parau-tia e ia aufauhia te mau ture atoa tei ofatihia. Ia haapa‘o ana‘e outou i te mau ture a te Atua e haaamaitaihia outou, e aita râ e faufaa ê atu e nehenehe e faataahia i te hiti no te aufau i te utu‘a o te mau ture ta outou i ofati. Mai te mea eita te reira e matara, e nehenehe ta te mau ture i ofatihia ia faatupu i te ati i roto i te oraraa e e tapea ia outou ia hoi atu i te Atua ra. Na te oraraa ana‘e, te mau haapiiraa e te Taraehara ihoa râ a Iesu Mesia e nehenehe e haamatara’tu ia outou i teie nei fifi rahi.
E nehenehe te mau titauraa a te parau-tia no te ture i ofatahia e haamâhahia na roto i te aroha tei noaa na roto i to outou tatarahaparaa e te haapa‘o tamau noa raa i te mau ture a te Atua. E mea faufaa rahi roa taua tatarahaparaa e taua haapa‘oraa ra ia nehenehe i te Taraehara ia faatupu i te taatoaraa o te temeio i roto i to outou oraraa. E nehenehe ta te Faaora e aufau i ta outou utu‘a tata’itahi ma te parau-tia e e nehenehe ta’na e faaore i ta outou hara na roto i te e‘a aroha o to outou tatarahaparaa. Na roto i te Taraehara e nehenehe ia outou ia ora i roto i te hoê ao i reira te parau-tia e haapapû ai e e tapea outou i te mea i noaa ia outou na roto i te haapa‘oraa. Na roto i To’na aroha e nehenehe ia outou e faaore i te mau hopea o te mau ture i ofatihia.
Te Taraehara, o te hoê ïa raveraa no te tahi atu taata, e e hopearaa mure ore to te reira, e ua ravehia te reira e te Tamaiti a te Atua ana‘e.2 Na roto i te Taraehara ua ofati te Faaora i te mau tapea o te pohe. Na te reira i faati‘a e ia haavâhia tatou e te Faaora. E nehenehe te reira e pato‘i i te hoê oraraa mure ore i raro a‘e i te faatîtîraa a Satane. E opani te reira i te mau uputa no te faateiteiraa no te feia atoa o tei ti‘a ia farii i te faaoreraa hara na roto i te tatarahaparaa e te haapa‘oraa.
Na te feruri-hohonu-raa i te hanahana o te Taraehara e faatupu i te mana‘o hohonu no te maere, te mauruuru rahi, e te haehaa hohonu. E nehenehe ta taua mau mana‘o ra e horo‘a ia outou te tura’iraa puai ia haapa‘o i Ta’na ra mau faaueraa e ia tamau noa i te tatarahapa i te mau hape ia noaa rahi atu â to outou hau e to outou oaoa.
Te ti‘aturi nei au e noa’tu te itoito o to tatou tamataraa, eita e noaa, na roto i to outou feruriraa taata, ia taa maitai i te auraa mure ore no te Taraehara, e e mea nahea atoa te reira i te faatupu-raa-hia. E nehenehe noa tatou e ite i roto i te tuhaa iti roa‘e te mea ta te Faaora i mauiui, i tapitapi te mana‘o e i mamae aore râ te fifi o to tatou Metua i te Ao ra i te hi‘oraa i Ta’na Tamaiti i te raveraa i te tamataraa faito ore no Ta’na Taraehara. Noa’tu â te reira, e ti‘a ia outou ia tuatapapa maite i te Taraehara ia taa maitai ia outou mai te au i to tatou nei puai. E nehenehe ta outou e haapii i te mea e titauhia no te haapa‘o i Ta’na ra mau faaueraa, ia oaoa i te hau e te oaoa i roto i te oraraa tahuti nei. E nehenehe e noaa ia outou e te mau melo haapa‘o o te utuafare, te haamaitairaa ia ora i pihaiho Ia’na e to outou Metua i te Ao ra e a muri noa’tu.
Ua haapii o Lehi i ta’na ra tamaiti o Iakoba , « E e ore roa e tia i te hoê taata… ia parahi i mua i te aro o te Atua, maori râ na roto i te mana, e te aroha, e te maitai hoi no te Mesia Mo‘a ».3
Ua mau o Iesu Mesia i te mau maitai tei ore roa i mauhia e te tahi ê atu taata. E Atua Oia, o Iehova, hou To’na fanau-raa-hia i Betelehema. Aita To’na Metua here i horo‘a noa Ia’na To’na tino varua ua riro râ o Iesu Ta’na Tamaiti Fanau Tahi i roto i te tino nei. Ua ora to tatou Fatu i te hoê oraraa maitai e te hara ore e no reira ua matara oia i te mau titauraa a te parau-tia. E mea maitai roa Oia i roto i te mau huru atoa, te here, te aroha, te faaoroma‘i, te haapa‘oraa, te faaoreraa hara e te haehaa. E aufau To’na aroha i ta tatou tarahu i te parau-tia ia tatarahapa e ia faaroo ana‘e tatou Ia’na. No te mea hoi e e noa’tu ta tatou mau tutavaraa maitai roa‘e ia haapa‘o i Ta’na mau haapiiraa, eita â tatou e manuia, e no To’na ra aroha e e « ora’i tatou, hope noa’tu to tatou itoito atoa ».4
Te faaite papû nei au e na roto i te mauiui e te mamae ite-ore-hia e tei numera ore hia, ua noaa i te Faaora To’na ti‘araa ia riro to tatou Taraehara, ei Arai no tatou, to tatou Haavâ Hopea. Ua ite au te ora nei Oia e ua here Oia ia outou. A faariro noa Ia’na ei « arata‘i » no outou i roto i te oraraa. Na te mau tutau papû o Ta’na mau ture e haapapû ia outou te parururaa e te manuiaraa a faaruru ai outou i te mau tamataraa. Eita ïa outou e hi‘a i roto i te hara teiaha. E riro ïa to outou oraraa ei oraraa hau e te oaoa o te faakoronahia e te faateiteiraa i roto i te Basileia Tiretiera. I te i‘oa o Iesu Mesia, amene.