Ua parau mai ratou ia tatou

Te faariroraa i te amuiraa ei tuhaa no to tatou oraraa

E riro teie mau mana‘o i muri nei ei tauturu i ta tatou iho tai‘oraa e aore râ, te aparauraa no te pô utuafare. (E faahororaa te mau numera i roto i te paruru no te api matamua o te a‘oraa). E nehenehe atoa te tabula o te mau aamu e tauturu.

Na te mau tamarii

A maimi i te mau parau

A faaî i te mau vahi vata : « Te faaite papû nei au ia outou e, e ere te Ti‘a-faahou-raa i te ______________ ». (Tautururaa: A maimi i roto i te a‘oraa a Elder Joseph B. Wirthlin i te api 28). Eaha ïa te auraa ? Nahea te hoê iteraa papû no ni‘a i te Ti‘a-faahou-raa i te taui i to oe oraraa i te mau mahana atoa ?
I roto i te a‘oraa a Elder Jeffrey R. Holland, eaha te ohipa a te mau taata haere i rave i te hora no te amuiraa rahi ? (Tautururaa : E haamata te a‘oraa i te api 104). Eaha ïa ta oe e rave i te hora no te amuiraa rahi ?
Mai ia Pahorana i roto i te Buka a Moromona, eiaha tatou ia riro ei feia ite-ore i te peu maitai mai te mea e na reira mai te taata ia tatou. Eaha ïa ta oe e parau i te hoê taata mai te mea ua na reira mai oia ia oe ? (Tautururaa : A imi i te a‘oraa a Elder David A. Bednar i te api 89).

Te mau ohiparaa

Ua haapii te peresideni James E. Faust i te auraa no te riroraa ei pîpî na te Faaora. Teie ta’na i parau, « Te vai nei te mau haamaitairaa no te aupîpîraa no te taato‘a mai te mea ua hinaaro outou i te aufau i te hoo ». A tufetu i te hoê api parau na ropu. I te hoê pae, a papa‘i i te mea o ta outou e « aufau » no te riroraa ei pîpî na te Mesia, mai te tai‘oraa i te mau papa‘iraa mo‘a, te haereraa i te pureraa, te parauraa i te parau mau, e te riro ei taata maitai. I te tahi a‘e pae, a papa‘i i te mau haamaitairaa e roaa na roto i te peeraa i te Mesia mai te oaoa, te hau, te parururaa, te arata‘iraa e te mau auraa utuafare mure ore. E mea ti‘a ia rave outou i te taime hoê, te hoê ma’itiraa i rotopu i te maitai e te ino, a haamana‘o i ta outou tabula no te mau haamaitairaa e to ratou faufaa ia outou.
Ua parau te tuahine Elaine S. Dalton e : « I te feia apî no te fanauraa teitei, a hi‘o i roto i te mau haamaramarama o te mure ore ! A hi‘o ia outou iho i roto i te mau hiero mo‘a o te Fatu. A hi‘o ia outou iho i te oraraa i te hoê oraraa ti‘amâ e te mâ. Te ti‘aturi mai nei te mau u‘i ia outou ! » A papa‘i i te hoê hoho‘a no outou iho i pihai iho i te hoê hiero e aore râ, a pia i te hoê hoho‘a no te hoê hiero i roto i te hoê hi‘o o ta outou e hi‘o i te mau mahana atoa. A faahaamana‘o ia outou iho i te mau fâ parau-ti‘a e e nahea outou ia faaea ti‘amâ noa no te rave faaotiraa i te reira.

Na te feia apî

Te vaira anei te mau melo no ta outou piha haapiiraa e aore râ, no ta outou pŭpŭ o te aro nei ? Eaha ta outou e rave no te tauturu ia ratou ? A tai‘o i te mea o ta te peresideni Thomas S. Monson e ta Elder Henry B. Eyring i parau no ni‘a i te rave faaotiraa i ta outou hopoi‘a e i te utuuturaa ia vetahi ê. (56 e 43)
A tai‘o i te aamu o ta te Episekopo Richard C. Edgley i faati‘a no te mau tauera. (72) Eaha to outou iho iteraa taa ê no te parau-ti‘a o ta outou e nehenehe e faaite ? A faaoti i teie nei ia vai parau-ti‘a noa i roto i ta outou mau ohipa e vetahi ê.
A ui ia outou iho e te vaira anei to outou huru « teie au; a faaûru ia‘u i teie nei ». Mai te mea e aita, nahea outou ia taui ? A hi‘opoa faahou i te a‘oraa a A. Roger Merrill, peresideni rahi no te Haapiiraa Sabati no ni‘a i te titauraa ia roaa hau atu, i roto i te mau a‘oraa e te mau haapiiraa. (92)
Eaha atu â te mau mea ino o ta outou e ape ia ore outou e huti-ê-hia’tu i te hoê « oraraa oaoa, faatutonuhia i roto i te evanelia » ? A tai‘o no ni‘a i te « tarau » i muri mai i te mau umeraa i roto i te a‘oraa a Elder Marcus B. Nash i te api 49.

Na te feia paari

No te aha te peresideni Gordon B. Hinckley i hinaaro ai i te u‘i o muri mai ia haamana‘o i te mau pionie ? Nahea tatou ia faahanahana i ta tatou « faufaa tupuna » – te mau faatusiaraa faaroo i ravehia e te Feia Mo‘a matamua ? Eaha ta tatou e rave ia patuhia i ni‘a i te ohipa i haamatahia mai e ratou ? (82)
E mea nahea to ratou iteraa no ni‘a i te Taraehara i te faaputapuraa i te huru o ta Elder Joseph B. Wirthlin e ta’na vahine oraraa i to raua oraraa ? (28) E mea nahea to teie iteraa i te tamahanahanaraa ia Elder Wirthlin i muri mai i te pohe o ta’na vahine ? A feruri nahea ia aparau i te a‘oraa a Elder Wirthlin i te hoê taata ua pohe ta’na i here.
A tai‘o i te aamu o Elder Robert C. Oaks i parau no ni‘a i te tamaiti o tei faatusia i te pereoo piti huira. (15) Eaha te huru o te metua tane o teie tamaiti ? Eaha’tu a ïa o ta outou e rave ia faaoroma‘i atu â i te mau melo o to outou utuafare e ia vetahi ê ? Eaha na mana‘o tauturu e maha o ta Elder Oaks i horo‘a no te riroraa ei taata faaoroma‘i atu â ?

Te mau aamu e tia ia tai‘ohia e ia operehia

I roto i te mau a‘oraa haamata i te mau api i tabulahia i raro nei, te vai nei te mau aamu e te mau mana‘o e tano ia operehia.

Te papa e te tamaiti e haere e taora poro i te hora 5 i te po‘ipo‘i, 9

Te papa i faaoroma‘i i ta’na tamaiti o tei faatusia i te pereoo piti huira, 15

Te maratiri o Rafael Monroy e o Vincente Morales, 20

To te hoê diakono hopoiraa i te haruharuraa o te haapiiraa na te autahu‘araa i te hoê atu diakono, 43

To te hoê papa faatusiaraa no te hoo mai i te hoê matini auri na ta’na vahine, 46

To Marcus B. Nash tai‘araa i te hoê i‘a, 49

To te hoê tamaiti haamaitai-raa-hia i muri mai i to’na toparaa na ni‘a i te hoê vahi haapoomiiraa, 51

To te hoê tahu‘a opereraa i te maa na te hoê metua vahine otahi, 53

To te hoê tamaiti iteraa i te temaradino a te arii a rave faaoti ai oia i ta’na ohipa, 56

To Thomas S. Monson faaûru-raa-hia ia haere e farerei e e haamaitai i te hoê hoa tei tape‘ahia i te fare ma‘i, 56

To te feia apî tamahine amoraa ia Jami Palmer i to ratou haereraa i te mou‘a, 62

To te hoê vahine tuati paraparauraa i te evanelia i te hoê taata faahoro pereoo, 69

To Richard C. Edgley faaho‘iraa e toru na tauera i te vahi o ta’na i rave mai i te reira, 72

To te hoê taata moni raveraa i te mau ve‘a i roto i te hoê matini vairaa, 72

To Martha Paxman iteraa i to’na taamu faaipoiporaa tei mo‘e, 82

To te pŭpŭ pereoo puto faaora-raa-hia i ni‘a i te mau aivi, 82

Te feia faatere o te mau pionie afa‘iraa i ni‘a te hoê reva i to te mau nunaa, 85

To te hoê taata faaûru-raa-hia i te tauturu i te hoê taata faaapu matapo, 97

Te hoê vahine o te faaroo nei i te amuiraa rahi a haere ai oia e te mau hoa, 104

Te mana‘o nei teie metua vahine apî e eita oia i te mea ti‘amâ i te here o te Atua, 108

To te hoê vahine faaûru-raa-hia ia hahaere i te hoê tuahine o te Sotaiete Tauturu tei roto i te oto, 113

Te imiraa Anne C. Pingree i te faaoreraa hara i te hoê vahine o ta’na i haamauiui, 113

Ua pure te hoê metua vahine otahi e hitu tamarii ia horo‘ahia hoê pô ohipa ore na’na, 115

Ua aufau teie na taata faaipoipo i ta raua tuhaa ahuru e aita raua i po‘ia faahou, 115