Ua tae faahou maira te mau peropheta i te fenua
E ere i te mea faufaa ore no teie nei Ekalesia i te faite atu i to te ao nei, te vairaa mau o te tohuraa, te hi‘oraa, e te heheuraa e ti‘a râ ia matou ia faaite atu i te reira.
Aita i maoro roa i muri a‘e i to to matou hoa o Carolyn Rasmus amuiraa’tu i te mau orometua haapii no te Fare Haapiiraa Teitei no Brigham Young, ua titau manihini te hoê pŭpŭ o to’na mau hoa apî haapii tamarii ia’na ia haere atu na muri ia ratou i te hoê haereraa i te mou‘a i te hoê Mahana Maa i ni‘a’tu i te oire no Provo. E ere o Carolyn i te melo no te Ekalesia a Iesu Mesia i te Feia Mo‘a i te mau Mahana Hopea nei, ua ite râ oia i to’na farii-maitai-raa-hia i rotopu i to’na mau hoa ohipa apî. Ua amui oioi atura oia ia ratou no te tere.
A hiti tamau noa’i te mahana i ni‘a, ua pa‘uma teitei noa’tu â te feia pa‘uma i te pae mou‘a. E a fatata ai i te hora ahuru, ua haamata ihora te mau taata i roto i te pŭpŭ ia imi i te mau vahi no te parahirahi. Ua mana‘o a‘era o Carolyn, « E mea faahiahia ïa te reira. Nahea hoi to ratou iteraa e ua hinaaro vau i te faafaaea ? » e ua imi atoa oia i te hoê vahi maitai no te faafaaea. E au ra râ ua hinaaro mau te feia pa‘uma i teie nei faafaaearaa, ua tatara mai te tahi i te mau peni tara e te mau buka no te papa’i, e ua faatano a‘era te tahi o ratou i te hoê afata radio.
Ua riro te mea tei tupu i taua taime ra ei tumu hoê roa o tei taui i to’na oraraa e a muri noa’tu. Ua parau te hoê o to’na ra mau hoa, « Carolyn, e ti‘a ia matou ia haamaramarama’tu ia oe i te tahi mea. Teie te Mahana Maa matamua no te ava‘e Atopa e no matou nei, e ere noa te reva au maitai e te rauere nehenehe i te tau toparaa rauere, e amuiraa rahi atoa râ na te Ekalesia. Ei Feia Mo‘a i te mau Mahana Hopea nei, i te mau vahi atoa tei reira matou aore râ eaha te mea o ta matou e rave ra, e faaea matou e e faaroo matou. No reira e parahi tatou i ŏ nei i rotopu i te mau tumu raau rahi e te mau tumu paina, e hi‘o atu i raro i te afaa, e e faaroo atu i te mau peropheta a te Atua no na hora e piti ».
« E piti hora ! » te mana‘o ïa o Carolyn. « Aita vau i ite e te vai ra te mau peropheta a te Atua o te ora noa ra », te na reira ra oia i te parauraa, « e aita roa’tu vau i ite e te vai nei e rave rahi mau peropheta no te paraparau e piti hora ! » Aita roa hoi oia i ite e e faaea faahou ratou i te hora piti i te avatea e piti faahou â hora e e ani ratou ia’na ia faaroo i te radio i te fare e maha faahou â hora i te mahana i muri mai.
Te toe‘a ra, e aamu noa ïa. Na roto i te tao‘a arohao te hoê buka tapo‘i iri pu‘a o te mau papa’iraa mo‘a no ô mai i ta’na mau piahi ra, te here o te mau hoa e te mau utuafare i roto i te paroita ta’na i hamata i te haere atu, e te mau ohipa varua ta tatou e hinaaro ia farii te feia e haere atu i te maramarama o te evanelia, ua bapetizohia o Carolyn e ua haamauhia ei melo no te Ekalesia. Te toe‘a ra, mai ta ratou hoi e parau ra, e aamu noa ïa. Na roto i to’na matauraa’tu i te Amuiraa rahi i taua mahana ra a parahi ai i ni‘a i te tupuai mou‘a no te Fare Haapiiraa Teitei no Brigham Young, ua ite te tuahine Rasmus i to’na iho tupuraa ia au i te titauraa tohu a Isaïa, « E haere mai, e haere tatou i nia i te mou‘a o Iehova, i te fare o te Atua o Iakoba ; e na’na e haapii mai i ta’na haapa‘oraa, e haere tatou na te e‘a ta’na e faaite maira. I na Ziona’tu hoi te ture i te revaraa’tu, e te parau a Iehova, i na Ierusalema’tu ïa ».1
Te fatata’tura tatou i te hopearaa no te tahi â amuiraa rahi faahiahia. Ua haamaitaihia tatou i te faarooraa i te mau parau poro‘i a to tatou feia faatere, te peresideni Gordon B. Hinckley ihoa râ, te taata ta tatou e turu ei parau na te Atua i te fenua nei, to tatou peropheta ora, hi‘o e heheu parau. Mai ta te mau peropheta i rave i te mau tau tuuraa evanelia mai ia Adamu e tae noa mai i teie nei mahana, ua haaputuputu mau te peresideni Hinckley ia tatou i roto i te hoê haaputuputuraa tei tuati i te peho no Adamu-Onidi-Ahamana, ua here oia ia tatou e ua haapii ia tatou e ua ninii mai i ni‘a iho ia tatou ta’na haamaitairaa.2
Te mana‘o nei au e, e mea tano ia parau e, te pure ta te mau taea‘e e te mau tuahine atoa i faahiti a paraparau ai ratou i teie nei hopea hebedoma, maori râ, ia riro ïa te amuiraa rahi ei faaitoitoraa e mai te mea e titauhia, ia riro te reira ei rave‘a faataui i to tatou nei oraraa mai tei tupu i ni‘a i te tuahine Rasmus e i te tahi atu mau tauatini taata e rave rahi o te pahono nei i te mau afa matahiti atoa i ta tatou nei himene a te Feia Mo‘a i te mau Mahana Hopea nei, « Mai Faaroo i te Reo o te Peropheta, e ia faaroo i te parau na te Atua ».3
I roto i ta‘u nei iho faaiteraa no te iteraa papû e te mauruuru no te mau parau poro‘i e te auraa o te amuiraa rahi, e horo‘a atu vau e toru a‘e mea ta teie nei mau rururaa e piti taime i te matahiti e faaite nei i to te ao atoa nei.
A tahi, te faite u‘ana papû mai nei teie nei mau rururaa e, te vai faahou nei te hoê peropheta ora i ni‘a i te fenua nei o te paraparau nei i roto i te i‘oa o te Fatu. E auê ïa to tatou hinaaro i taua arata‘iraa ra ! E mea arepurepu e e mea fifi to tatou nei tau. Te ite nei tatou te mau tama‘i na te ao atoa nei e te hepohepo i to tatou iho nei fenua. Te faaruru nei te mau taata tupu i piha’i iho ia tatou i te mau mauiui i roto i to ratou iho mau oraraa e te mau oto i roto i te utuafare. E rave rahi mau taata e ite nei i te ri‘ari‘a e te mau huru fifi atoa. Te faahaamana‘o nei te reira ia tatou e a haati ai taua mau mahu poiri ra i te feia ratere i roto i te orama a Lehi no te tumu raau no te ora, ua tapo‘i te reira i te mau taata atoa – te parau-tia e te parau-tia ore, te feia apî e te feia paari, te melo faafariu-apî-hia e te melo aravihi atoa. I roto i taua parabole ra te faaruru nei te taatoaraa i te pato‘iraa e te hepohepo, e na te auri ana‘e – te parau a te Atua – e nehenehe e afa’i ia ratou i te vahi papû. Ua hinaaro tatou paatoa i taua auri ra. Ua hinaaro tatou paatoa i taua parau ra. Aore roa e taata e paruruhia mai te mea aita taua auri ra, no te mea ia ore te reira auri e nehenehe i te hoê e « [mairi] i te mau e‘a au ore ra, e [moe] atu » te na reira te mau papa’iraa.4 Auê ïa tatou i te mauruuru no to tatou faarooraa i te reo o te Atua e to tatou iteraa i te puai o taua auri ra i roto i teie nei amuiraa i roto i na mahana e piti.
E ere i te mea pinepine tera râ i roto i te mau matahiti i terehia mai ua parau mai te tahi mau taata e, aita te mau taea‘e e ite nei i te mau mea e tupu nei i roto i te oraraa i roto i ta ratou mau a‘oraa, e aita ratou e ite i te mau fifi, e e mea tahito ta ratou mau faatureraa e faaohiparaa, e ere no to tatou nei tau.
Ei taata iti roa‘e o te mau taata tei turuhia e outou o te ite mata i te arata‘iraa o teie Ekalesia, te parau atu nei au ma te puai atoa o to‘u nei varua e aore â vau i amui a‘e nei, i roto anei i to‘u nei iho oraraa aore râ to‘u nei oraraa ohipa, i te hoê pŭpŭ taata o te ite nei i te mau mea e tupu ra i roto i te oraraa, tei ite hohonu i te mau fifi ta tatou e faaruru nei, tei tuatapapa maite i te mau mea i tupu i mutaa ihora, tei vai ara noa i te mau mea apî, tei hi‘opo‘a maitai, ma te feruri hohonu, e ma te pure i te mau mea ê atoa. Te faaite papû nei au i te maramarama o teie nei pŭpŭ tane e vahine no ni‘a i te mau tumu parau no te oraraa morare e te oraraa o te sotaiete tei hau i to te tahi faanahonahoraa aore râ aivanaa ta‘u e ite nei o te tuatapapa nei i taua mau fifi ra i te mau vahi atoa i ni‘a i te fenua nei. Te faaite nei au i to‘u iho iteraa papû no to ratou maitai rahi, no to ratou itoito i te raveraa i te ohipa, e no te haehaa o to ratou nei oraraa. E ere i te mea faufaa ore no teie nei Ekalesia i te faite atu i to te ao nei, te vairaa mau o te tohuraa, te hi‘oraa, e te heheuraa e ti‘a râ ia matou ia faaite atu i te reira. E mori anaana mau teie i roto i te hoê ao pouri e e anaana te reira na roto atu i teie nei mau oro‘a o te amuiraa rahi.
Te piti, ua riro teie nei mau amuiraa ei piiraa ia rave i te ohipa eiaha noa i roto i to tatou nei iho oraraa no vetahi ê atoa râ i pihaiho ia tatou, te mau taata no to tatou iho utuafare e faaroo e te mau taata e ere no tatou. Teie po‘ipo‘i, ua faahaamana‘o mai te peresideni Hinckley ia tatou e, teie te 150raa o te mahana oro‘a no taua mau pŭpŭ pereoo huti ra o tei roohia i te fifi i roto i te to‘eto‘e rahi i Nebraska e ua mau roa ratou i roto i te hiona ino roa no te fenua teitei o Wyoming. Area i taua taime mau ra no te ava‘e atopa 1851, te tupu ra ïa te amuiraa rahi i Roto Miti nei. Ua faahiti oia i mua ia tatou i te poro‘i faauruhia no te amuiraa, a te peresideni Brigham Young i te Feia Mo‘a, ia « haere i teie nei e [ia] afa’i mai i ô nei taua mau taata ra i te vahi papû ».5
E mea papû roa, te parau tumu o te amuiraa rahi i te ava‘e atopa 1856 o te faaoraraa ïa i te feia i roto i te ati, oia atoa ïa te parau tumu no teie nei amuiraa e te amuiraa i mairi a‘enei e te amuiraa i te matahiti i mua i te ava‘e eperera. E ere paha te mau mata’i to‘eto‘e e te mau menema to‘eto‘e ta tatou e faaruru i teie nei amuiraa, tera râ te vai noa ra â te taata i roto i te ati i rapae – te feia vêvê e tei rohirohi, tei hepohepo e tei paruparu, o ratou tei « mairi atu i roto i te mau e‘a au ore » o ta tatou i faahiti iho nei, e te nahoa « tei faaerehia’tu i te parau mau no te mea ana‘e aita ratou i ite i te vahi te reira e itea mai ai ».6 Tei rapae paatoa ratou, te feia paruparu e te rima tautau,7 i roto i te mau tau vero e tupu ra. E nehenehe ratou e faaorahia e te feia ana‘e tao‘a e e ite rahi a‘e to ratou e o te nehenehe e tauturu rahi atu â. Eiaha e haapeapea ia ani e « Tei hea hoi ratou ? » Tei te mau vahi atoa ratou, i to tatou rima atau e i to ta tatou rima aui, i to tatou mau vahi nohoraa e i te vahi raveraa ohipa, i te mau oire atoa e te mau fenua e nunaa atoa o te ao nei. A rave i ta outou pŭpŭ taata e mau pereoo, a faatomo atu i to outou here, to outou iteraa papû e te hoê pute maa varua, e a tere i te mau vahi atoa. E arata‘i te Fatu ia outou i te mau taata tei roto i te ati mai te mea e farii outou i te evanelia a Iesu Mesia tei haapiihia i roto i teie nei amuiraa. A iriti i to outou aau e to outou rima i te feia tei roohia i te ati i teie nei piti ahuru ma hoê o te tenetere mai te au i te mau puhaparaa o te mau pŭpŭ taata a Martin. Ia na reira ana‘e tatou te faatura ra ïa tatou i te aniraa pinepine a te Fatu no te mau mamoe i mo‘e e te mau diderama tei mo‘e e te mau varua tei mo‘e.8
E te hopea, te hoê amuiraa rahi a te Ekalesia o te hoê ïa parau faaite i to te ao atoa nei e o Iesu te Mesia, e ua fâ mai Oia e To’na ra Metua, te Atua e te Metua no tatou paatoa, i te tamaiti peropheta o Iosepha Semita no te faatupu i taua fafauraa tahito ra e e faaho‘i faahou mai o Iesu no Nazareta tei ti‘a-faahou mai i Ta’na Ekalesia i ni‘a i te fenua nei e « e hoi mai ïa Oia mai te reira atoa ra, mai [ta te Feia mo‘a no Iudea] i ite atu ia’na i te revaraa’tu i nia i te ra‘i ra ».9 Ua riro teie nei amuiraa e te mau amuiraa atoa o te hoê ïa faaiteraa e no to’na aroha ua haere mai oia i ni‘a i te fenua nei i roto i te vêvê e te haehaa, no te faaruru i te oto e te pato‘iraa, te oaoa ore e te pohe ia faaorahia tatou i te mau ati a ora noa ai tatou, e « no to’na paruparu e ora’i tatou ».10 Te faaite hua nei teie nei amuiraa i te mau nunaa atoa, i te mau opu atoa e te mau reo atoa e te mau fenua atoa i te fafauraa a te Mesia e « tia hoi to’na aroha i te vai-maite-raa ».11
I te feia atoa o te mana‘o nei e ua mo‘e ratou aore râ aore e ti‘aturiraa, aore râ o te mana‘o nei e ua rahi e ua maoro roa ta outou mau hara, ia outou atoa o te haape‘ape‘a nei e ua roohia outou i te ati i ni‘a i te mau fenua papû e te to‘eto‘e no te oraraa nei e ua ino to outou pereoo huti i roto i te tere, te faaite u‘ana nei teie nei amuiraa i te himene tamau a Iehova « E faatoro noa mai râ hoi i ta’na rima ».12 Ua parau Oia e « E faatoro noâ hoi au i to‘u rima ia ratou, [noa’tu] e faaru‘e ratou ia‘u ; area e aroha vau ia ratou… ia tatarahapa ratou, e ia haere mai ia‘u nei ; no te mea ua faatorohia to‘u rima i te mahana atoa, te na reira maira te Fatu te Atua sabaota ».13 E e vai noa To’na aroha e a muri noa’tu e te toro noa ra Oia i To’na rima. O Oia te hinaaro mau o te Mesia, te aroha e ore roa e mau, taua aroha o te vai noa noa’tu ua mo‘e te tahi atu mau puai.14
Te faaite papû nei au no ni‘a i teie nei Iesu aroha o te faatoro nei i te rima, o te faaora nei, e teie Ta’na Ekalesia faaora tei niuhia i ni‘a i To’na aroha faaora, e, mai ta te mau taata i roto i te Buka a Moromona i faaite, « Ua tae maira te mau peropheta i ô te feia ra, i tonohia maira hoi ratou e te Fatu [no te a‘o ia ratou]… E ua tae faahou maira te mau peropheta i te fenua ».15 Te faaite papû nei au e ua riro mau te peresideni Gordon B. Hinckley taua peropheta ra, mai te upoo e tae roa’tu i te manimani avae, o oia o ta tatou i here i to’na oraraa e to’na reo, e o ta tatou i pure ma te tuutuu ore no’na. E opani oia i teie nei i teie rururaa afa matahiti. Te faaite nei au i to‘u nei iho mana‘o mauruuru no taua haamaitairaa ra, e no teie nei mau haamaitairaa atoa e no te mau haamaitairaa e rave rahi atu â i te taime no te amuiraa rahi, i te i‘oa o Iesu Mesia, amene.