Te faaroo no te faanuu i te mau mou‘a

Peresideni Gordon B. Hinckley

Te mea i titau-roa-hia ia tatou , o te faaroo rahi ïa. Ia ore ana‘e te reira, eita te ohipa e nuu. Na roto i te faaroo, aita e taata e nehenehe e tape‘a i to’na tupuraa.

E au mau taea‘e e au mau tuahine, e haamata vau na ni‘a i te hoê parau no‘u iho.

Te peresideni o te Ekalesia, no te Ekalesia taatoa ïa. To’na ora, e ere ïa i to’na iho. Ta’na ohipa o te tavini ïa.

I teie nei, ua ite pauroa outou e, ua paari roa vau i teie nei. Ua tupu te 96raa o to‘u oro‘a fanauraa i te ava‘e tiunu i ma‘iri a‘e nei. Ua faaroo vau e, te uiui nei te mana‘o o te taata no ni‘a i to‘u ea. Te hinaaro nei au e haapapû i te reira vahi. Mai te mea e, e tae‘ahia ia‘u te tahi tau ava‘e rii â, o vau ïa te mea paari roa a‘e i te tahi atu peresideni na mua a‘e nei, i te taviniraa. Aita vau e parau nei i teie parau no te faateitei ia‘u, no te oaoa râ. I te ava‘e tenuare ra, ua tapuhia vau. Ua riro ïa ei ohipa fifi roa, te tumu rahi no te mea, aitâ vau i tape‘ahia a‘e nei i te fare ma‘i. I muri a‘e i te reira tapuraa, ua tupu mai te uiuiraa e, e rave faahou anei au i te tahi mau utuuturaa. Ua faaoti au ia na reira. Ua parau to‘u mau taote e, ua riro te mau ohipa i ravehia ei temeio. Ua ite au e, te tumu no te reira, na roto ïa i ta outou mau pure no‘u. E mauruuru rahi to‘u ia outou.

Ua faati‘a te Atua ia ora â vau, aita vau i ite eaha te maororaa. Tera râ, noa’tu eaha te taime, e tamau noa vau i te rave maitai roa i ta‘u ohipa. E ere i te ohipa ohie ia faatere i teie Ekalesia rahi e te nanea. Aita hoê mea aita te Peresideniraa Matamua e hi‘opo‘a. Aita e faaotiraa rarahi, aita e haamau‘araa i te moni e ravehia ma te ore ta ratou parau faati‘a. E mea teimaha te hopoi‘a e te aehuehu atoa.

Tera râ, e mea ti‘a ia tatou ia rave noa haapa‘o i te roaraa ta te Fatu e hinaaro. Mai ta‘u i parau atu i te ava‘e eperera i mairi a‘e nei, tei roto tatou i To’na na rima. Mea maitai roa vau, mea maitai roa to‘u ‘ea. Tera râ, ia tae i te taime no te monoraa ia‘u, e tupu ïa te tauiraa ma te mărû e ia au i te hinaaro o te Taata Na’na teie Ekalesia. E no reira, e haere tatou i mua i roto i te faaroo – e o tera ïa te tumu parau ta‘u e hinaaro e tuatapapa i teie poipoi.

Mai te haamataraa mai ua haere teie Ekalesia i mua ma te faaroo. Ua riro te faaroo ei puai no te peropheta Iosepha Semita.

Te mauruuru nei au no te faaroo tei arata‘i ia’na i roto i te uru raau no te pure. Te mauruuru nei au no to’na faaroo no te tatara e no te haaparare i te Buka a Moromona. Te mauruuru nei au i te mea e, ua haere oia i mua i te Fatu na roto i te pure tei pahonohia mai na roto i te horo‘a-raa-hia mai te Autahu‘araa a Aarona e a Melehizedeka. Te mauruuru nei au i te mea e, na roto i te faaroo ua faati‘a oia i te Ekalesia e ua tuu i te reira i ni‘a i to’na haerea ra. Te haamauruuru nei au ia’na no te horo‘a o to’na ora ei faaiteraa papû no te parau mau o teie ohipa.

Te faaroo atoa te mana turai i muri ia Brigham Young. Ua feruri pinepine au i te faaroo rahi ta’na i faaohipa no te arata‘i mai i te hoê pŭpŭ taata rahi ia haere mai e parahi i roto i te peho no Roto Miti. Mea iti roa to’na ite i taua vahi ra. Aitâ oia i ite a‘e nei i te reira vahi, maori râ, i roto i te orama. Ia‘u i mana‘o, ua tuatapapa oia i te tahi mau ite rii, tera râ, fatata aita oia i ite hoê iti a‘e mea no ni‘a i te repo e aore ra, i te pape e aore ra, i te huru o te tau. Noa’tu râ i te reira, ia hi‘o a‘era oia i te reira vahi no te taime matamua, na ô a‘era oia ma te otiatia ore e, « Teie taua vahi ra, haere ana‘e » (B. H. Roberts, A Comprehensive History of the Church, 3:224).

E mai te reira ïa te huru no te mau peresideni tata’itahi atoa o te Ekalesia. Noa’tu te pato‘iraa u‘ana e vai ra, ua haere ratou i mua ma te faaroo. Te mau peretei anei tei haamou roa i ta ratou ra mau huero. Te pu‘e tau pa‘ura anei e aore ra, te hiona maoro anei. Te hamani-ino-raa anei a te faatereraa hau. E aore ra, aita i maoro a‘e nei, te hinaaro ru anei ia hapono i te tauturu i te feia tei roohia i te tsunami, e aore ra, te aueueraa fenua, e aore ra, te pape pu‘e anei i te mau vahi e rave rahi, hoê â ïa huru. Ua pau te mau atoa i roto i te fare vairaa. E rave rahi milioni faufaa moni tei operehia na te feia navai ore, ma te hi‘o ore i te Ekalesia – ua ravehia te mau mea atoa na roto i te faaroo.

E matahiti oro‘a fanauraa faufaa roa teie i roto i te aamu o teie Ekalesia, ua paatoa outou i te reira. Te 150raa teie te matahiti a tae mai ai te mau pŭpŭ pereoo huti a Wiilie e raua o Martin, e tae noa’tu i te mau pŭpŭ pereoo a Hunt e o Hodgett tei apee mai ia ratou.

E rave rahi te mau mea i papa’ihia no ni‘a i te reira, aita e titauhia ia‘u ia tatara huahua roa’tu i te reira. Ua ite maitai outou paatoa i te reira aamu. Te mea noa e ti‘a ia parau maori râ, te feia tei opua e tere i roto i taua tere roa ra mai te mau motu no te fenua Peretane mai e tae roa’tu i te peho no te Roto Miti Rahi ra, ua haamata ïa ratou i to ratou tere na roto i te faaroo. Mea iti roa e aore ra, aita hoê iti a‘e ite to ratou no ni‘a i te mea ta ratou e farerei atu. Tera râ, ua haere ratou i mua. Ua haamata ratou i to ratou tere ma faaineine maitai i te mau mea atoa. Ua haere noa i te itiraa taua faaineineraa ra to ratou a tere noa ai ratou i te pae tooa o te râ. A haamata ai ratou i to ratou tere fifi na ni‘a i te e‘a no Plate River e ta‘uma atu ai i te peho no Sweetwater, e rave rahi o ratou tei pohe. Ua tarani ratou i ta ratou maa; ua pohe ta ratou mau puatoro; ua fatifati to ratou mau pereoo huti; e ere to ratou mau ahu taotoraa e to ratou mau ahu i te mea maitai roa. Ua u‘ana mai te vero. Ua imi ratou i te fare aita râ hoê a‘e i itea. E vero tei te mau vahi atoa ati a‘e ratou. Ua pohepohe ratou i te po‘ia. E rave rahi tei pohe, e ua hunahia i roto i te repo paari to‘eto‘e.

Aua‘e râ, ua hemo ratou ia Franklin D. Richards na te fenua Peretane atoa mai. E pereoo puaahorofenua mama to’na hutihia e te puahorofenua, e ua ti‘a ïa ia’na ia tere vitiviti a‘e. Ua tae mai oia i te peho ra. Teie mau ïa te pu‘e tau i taua taime ra o te matahiti. Te tere ra te amuiraa rahi i taua taime ra. Ia farii a‘era o Brigham Young i te parau apî, ua ti‘a vave maira oia i mua i te amuiraa e na ô maira :

« I teie nei, te horo‘a nei au i te tumu parau na teie mau peresibutero o te paraparau atu i teie mahana, e i roto i te amuiraa, teie ïa, i te 5 o te mahana no atopa 1856, e rave rahi o to tatou mau taea‘e e mau tuahine tei ni‘a ratou i te mou‘a e to ratou mau pereoo huti, e penei a‘e paha, e rave rahi o ratou tei te atearaa e hitu hanere maire i te atea i teie vahi to tatou, e e mea ti‘a ia arata‘ihia mai ratou i ô nei, e mea ti‘a ia tatou ia haere e tauturu ia ratou. Ta ratou tumu parau maori râ, – Ia afa’i mai ia ratou i ô nei! Te hinaaro nei au i te mau taea‘e o te paraparau mai ia maramarama maitai ratou e, ta ratou tumu parau, o te mau taata ïa i ni‘a i te mou‘a, e te ohipa a te mau taata atoa, o te haereraa ïa e tii ia ratou e te hopoiraa mai ia ratou i ô nei, hou a topa ai te tau to‘eto‘e…

« Te pii nei au i te mau episekopo i teie mahana, eita vau e tia’i a nanahi, eita atoa a nanahi atu, no te farii e 60 pŭpŭ ateni maitai, e e 12 e aore ra, 15 pereoo paari. Aita vau e hinaaro e tono i te puatoro, te hinaaro nei au i te mau puaahorofenua e te ateni maitai. Te vai nei te reira i teie vahi, e ia roaa mai te reira e ti‘a ai ; e tae noa’tu 12 tăne faraoa ota, e e 40 taata faahoro pereoo maitai… e 60 e aore ra, e 65 pŭpŭ ateni maitai, e aore ra, puaahorofenua maitai e to ratou mau hatua…

« Te parau atu nei au ia outou » ta’na ïa i parau, « i te mau mea atoa ta to outou faaroo , te haapa‘oraa, e te parauraa no te haapa‘oraa, e ore roa te reira e faaora i te hoê o to outou varua i roto i te basileia o to tatou Atua, maori râ, e faaohipa outou i teie nei mau parau tumu ta‘u e haapii nei ia outou i teie nei. A haere e a hopoi mai i te reira mau taata e vai nei i roto i te mau mou‘a, e a haapa‘o maite i te reira mau mea, ta tatou e parau nei e, e mau mea tahuti, e aore ra, e hopoi‘a tahuti, ia ore ana‘e, faufaa ore ïa to outou faaroo ; te a‘oraa ta outou i faaroo ra, faufaa ore ïa te reira no outou, e e haere atu outou i hade ra, maori râ, e haapa‘o mai outou i te mau mea ta‘u i parau atu ia outou » (Deseret News, Atopa 15, 1856, 252).

I reira iho, ua pûpûhia maira te mau puaahorofenua, te mau ateni, e te mau pereoo paari. Ua pŭpŭ-atoa-hia mai te faraoa ota. Ua haaputu- vitiviti-hia te mau ahu e te mau ahu taotoraa. Hoê e aore ra, e piti mahana i muri iho, te tere nei te mau pereoo tei î roa i te tauhaa, i te pae hitia o te râ, na roto i te hiona puai.

Ia farerei a‘era te feia faaora i te Feia Mo‘a rohirohi, ua riro ratou mai te melahi no te ra’i mai. Ua tahe te roimata mauruuru o te taata. Te mau taata tei huti noa i to ratou pereoo, ua tuuhia’tu ïa ratou i roto i te mau pereoo, ia nehenehe hoi ia ratou ia tere vitiviti a‘e e tae roa’tu i te oire no Roto Miti.

Te tahi rahiraa e piti hanere taata tei pohe, tera râ, hoê tauatini tei faaorahia.

I rotopu ia ratou tei farerei i te ati ri‘ari‘a i ni‘a i te mau mou‘a ra, te vai ra ïa te metua tupuna vahine o ta‘u vahine. Tei roto atoa oia i te pŭpŭ pereoo paari.

I teie mahaa, te menema o ta‘u vahine i roto i te hunaraa ma‘i no Salt Lake City, te hi‘o maira ïa i raro i ni‘a i te menema o to’na metua vahine tupuna, o Mary Penfold Goble, tei pohe i roto i te rima o ta’na tamahine a tomo mai ai oia i roto i teie peho i te 11 no titema 1856. Ua hunahia oia i te poipoi a‘e. E toru ta’na tamarii tei pohe i roto i taua tere roa ra. Ua to‘eto‘e roa te avae o te tamahine tei ora mai.

Aue ïa aamu e. Ua î roa ïa te reira i te ati e te po‘ia e te to‘eto‘e e te pohe. Ua î roa te reira i te aamu no te mau anavai pape paari o te titauhia ia ratere na roto, te aamu o te mau vero hiona maniania, te aamu no Rocky Ridge i te ta‘uma mărû-noa-raa. Ia ma‘iri teie matahiti haamana‘oraa, e mo‘e roa paha te reira. Te ti‘aturi nei râ vau e, e tamau-noa-hia i te paraparau i te reira no te faahamana‘o i te mau u‘i no amuri a‘e, i te ati e te faaroo o te feia tei reva’tu na mua ia tatou. To ratou faaroo, to tatou ïa faturaa ai‘a. To ratou faaroo o te hoê ïa rave‘a faahaamana‘oraa ia tatou i te hoo ta ratou i aufau ia fana‘o tatou i te tamahanahana.

Aita te faaroo e faaite-noa-hia i roto i te mau ohipa tuiroo rarahi, mai te tere o te mau pionie huti pereoo. E faaite-atoa-hia râ te reira i roto i te mau ohipa ha’iha’i roa e te faufaa. E faaite atu vau ia outou i te hoê o te reira mau huru ohipa.

Te hamanihia ra te hiero no Manti Utah i taua taime ra, 120 matahiti i teie nei, o George Francis Paxman te hoê o te rave ra i te ohipa ei taata hamani tauhaa. O’na e ta’na vahine apî roa o Martha, hoê ta raua tamarii e te tia’i raua i te piti.

A tamau ai oia i te hoê o na opani teimaha i te pae hiatia o te râ o te hiero, ua tupuhia oia i te herni. E mauiui rahi to’na. Ua arata‘i atura o Martha ia’na i roto i te hoê pereoo, e ua faahoro atura ia’na i te oire no Nephi, i reira, faauta’tura ia’na i ni‘a i te pereoo auahi no te haere i Provo. I reira to’na poheraa. Ua pato‘i oia ia faaipoipo faahou, e ua faaea noa oia ei vahine ivi e 62 matahiti te maoro, ma te rave i te ohipa nira ahu no to’na oraraa.

I teie nei, e haere rii au i rapae i teie aamu, no te parau e, hou a faaipoipohia ai au i ta‘u vahine, ua pûpû vau i te hoê tapea rima no’na. I to maua faaipoiporaahia, ua pûpû faahou vau na’na hoê tapea rima. Ua oomo oia i te reira e rave rahi matahiti. E i te hoê mahana, ua ite a‘era vau e, ua tatara oia i taua mau tao‘a ra, e ua tamau i te tahi’tu tapea rima na’ina’i auro. No to’na mama ruau, o Martha Elizabeth Evans Paxman, te reira tapea rima faaipoipo. Na ta’na tane o George i horo‘a mai te reira ia’na. O te tapea rima ana‘e te tao‘a ta’na i vaiiho mai i roto i to’na oraraa. I te hoê mahana no te pu‘e tau haapoheraa raau, te tamâ ra o Martha i te fare. Ua afa’i oia i te mau tauhaa atoa i rapae no te tama maitai i te fare. I to’na tuturaa i te horahora tahua, ua hi‘o a‘era oia i raro, e aita e tapea rima faahou i ni‘a i to’na manimani rima. Ua imi a‘era oia na te mau vahi atoa. O te reira ana‘e te tao‘a haamana‘oraa na’na i ta’na tane here. Ua paheru oia i roto i te mau horahora, e aita ihoa te tapea rima i itehia. Ua tahe a‘era to’na roimata. Ua tuturi ihora oia i raro, e ua pure atura ma te aau tae mau ia tauturu mai te Fatu ia’na ia imi i te tapea rima. I to’na araararaa i to’na mata, hi‘o atura i raro, te vai noa maira te tape‘a rima.

Te tapea nei au i te reira i roto i to‘u rima i teie nei. E mea na’ina’i roa eita outou e ite mai. 18 carat te faito auro, ua tahito roa, ua ino, e ua fefefefe rii. Tera râ, e tapa‘o tera no te faaroo, te faaroo o te hoê vahine ivi tei taparu i te Fatu ma te oto rahi. Ua riro taua huru faaroo ra ei tumu no te ohipa. E aa no te tia’iraa e te ti‘aturiraa. Tera te huru faaroo ohie e ti‘a ia tatou paatoa ia farii.

I roto i te tere tamau o teie ohipa rahi, te mea i titau-roa-hia ia tatou , o te faaroo rahi ïa. Ia ore ana‘e te reira, eita te ohipa e nuu. Na roto i te faaroo, aita e taata e nehenehe e tape‘a i to’na tupuraa.

Ua parau te Faaora e, « Ahiri e faaroo to outou e mai te hoê huero sinapi noa iho te rahi, e ti‘a ïa ia outou ia parau noa’tu i teie nei mou‘a, A haere i ô atu; e na’na ïa e haere noa; e aita roa e mea e ore te ti‘a ia outou » (Mataio 17:20).

I ta’na ra tamaiti ia Helamana, ua parau o Alama e, « E a‘o atu ia ratou i te tatarahapa, e te faaroo i te Fatu ra ia Iesu Mesia ; e haapii atu ia ratou ia faahaehaa ratou ia ratou iho, ia haehaa e ia mamahu te aau ; e haapii atu hoi ia ratou ia pato‘i atu ratou i te mau faahema atoa a te diabolo, na roto i te faaroo i te Fatu ra ia Iesu Mesia » (Alama 37:33).

Ia haamaitai mai te Fatu ia tatou i te faaroo i roto i te ohipa rahi tei roto tatou i te ti‘araa. Ia riro te faaroo ei tiarama arata‘i ia tatou i te ru‘i na roto i to’na maramarama. Ia haere hoi te reira na mua ia tatou mai te pou ata i te ao ra.

Te pure nei au no teie, i te i‘oa mo‘a Oia te puai o to tatou faaroo, te Fatu ra o Iesu Mesia ra, amene.