E tae mai te Sabati
No te ora hoi e te tusia mure ore o te Faaora o te ao nei, e tahoê-faahou-hia tatou i te feia ta tatou i here roa.
Te oaoa nei au ia tae mai i rotopu ia outou i teie mahana, e ia rave mai i te puai mai roto mai i te mau iteraa papû. Aita e parau no te faahiti i to‘u oaoa rahi no ta outou mau parau e te patururaa here, no to outou here e no ta outou mau pure.
I teie mahana, te hinaaro nei au e hi‘o rii i te tahi mau haamana‘oraa.
I fanauhia vau e te mau metua maitai. Mai roto mai i to‘u metua tane, o Joseph L. Wirthin, ua haapii au i te faufaa o te ohipa e te aroha. I riro oia ei episekopo no ta matou paroita i te tau no te fifi rahi i te pae faaravairaa faufaa. Ua haamana‘o tamau noa oia i te feia i vai i roto i te ati. Ua haere oia e tauturu i te feia ravai ore, e ere noa no te mea e, ta’na te reira hopoi‘a, no te mea râ e, to’na mau te reira hinaaro.
Ma te rohirohi ore, ua aupuru e ua haamaitai oia i te oraraa o te mau taata e rave rahi tei mauiui. I roto i to‘u feruriraa, e episekopo mau oia.
Te mau taata atoa tei ite i to‘u metua tane, ua ite ïa ratou e, e taata ohipa oia. I te hoê taime, ua parau mai te hoê taata ia‘u e, e nehenehe ta’na e rave i te ohipa a na taata e toru. Mea varavara roa te taime e faafaaea oia. I te matahiti 1938, te tere maitai ra ta’na ohipa imiraa faufaa, ua farii a‘era oia i te hoê piiraa no roto mai i te peresideni o te Ekalesia, o Heber J. Grant.
Ua parau maira te peresideni Grant ia’na e, te faanahonaho faahou ra ratou i te Episekoporaa Faatere rahi i taua mahana ra, e te hinaaro ra ratou i to‘u metua tane ia riro ei tauturu no LeGrand Richards. Ua maere to‘u metua tane i te reira, e ua ani atura oia e, e nehenehe anei ta’na e pure no ni‘a i te reira, na mua.
Na ô mai nei te peresideni Grant e, « E te taea‘e Wirthlin, e 30 noa minuti toe e haamata faahou ai te tahi pureraa no te amuiraa, e te hinaaro nei au e haamaha rii i to‘u rohirohi. Eaha to oe mana‘o ? »
Pahono atura ihoa to‘u metua tane e, e. Ua tavini a‘era oia e 23 matahiti te maoro ; e 9 matahiti, o’na ïa te Episekopo Faatere o te Ekalesia.
E 69 matahiti to to‘u metua tane i pohe ai oia. Tei pihai iho vau ia’na i te taime a topa ai oia. Aita i maoro i muri iho, ua faaru‘e mai oia.
Te mana‘ona‘o pinepine nei au i to‘u metua tane. Te mo‘emo‘e nei au no’na.
To‘u metua vahine, o Madeline Bitner, o te tahi atoa ïa taata tei haaputapû i to‘u oraraa. I to’na apîraa, e maona maitai roa oia, e aito no te horo vitiviti. E huru maitai noa to’na e te here hoi, to’na râ vitiviti, e mea taahoa roa ïa. E mea pinepine oia i te parau e, « Haaviti ». E ia parau ana‘e oia, e haaviti roa’tu â matou. Ia mana‘o ana‘e au tera paha te tahi tumu i riro ai au ei tata horo vitiviti roa ia ha‘uti ana‘e au i te faahoro popo.
E opuaraa rarahi ta to‘u metua vahine no ta’na mau tamarii, e ua titau oia i te mea maitai roa no roto mai ia ratou. Te haamana‘o noa nei â vau ia’na ia parau e, « Eiaha outou ia riro ei taata ui‘ui ». Ui‘ui, ta’na ïa parau no te hoê taata tei faahupehupe ma te titau ore i to’na faito puai mau. « Mea ti‘a ia oe ia haamaitai a‘e â i ta oe ohipa ».
E 87 matahiti to to‘u metua vahine i pohe ai oia, e mea pinepine au i te mana‘ona‘o ia’na, e te mo‘emo‘e nei au no’na, eita e nehenehe e parau.
To‘u teina tuahine, o Judith, e taata papa’i parau ïa, e hamani himene, e e ti‘a rauti. Ua rau te mau mea ta’na e au, mai te evanelia, te himene e te imi i te mau mea tahito. Te oro‘a mahana fanauraa o Judith, te tahi noa ïa mahana rii na mua a‘e i to‘u. Pauroa te matahiti, e horo‘a vau na’na hoê dollar moni parau ei tao‘a horo‘a na‘u no to’na oro‘a fanauraa. E toru mahana i muri iho, e horo‘a mai oia na‘u e 50 toata ei tao‘a horo‘a na’na no to‘u oro‘a fanauraa.
Ua pohe o Judith i te tahi tau matahiti i ma‘iri a‘e nei. Te mo‘emo‘e nei au no’na, e te mana‘ona‘o pinepine nei au ia’na.
E haere mai au i ni‘a i ta‘u vahine i teie nei, o Elisa. Te haamana‘o nei au i te taime matamua a farerei ai au ia’na. No te tauturu i te tahi hoa to‘u, ua haere au i to’na fare e tii i to’na tuahine, o Frances. Na Elisa i iriti mai i te opani e, no‘u nei, i reiraraa ra to‘u faatupuraa i te hinaaro ia’na.
Ia‘u i mana‘o, ua tupu atoa te tahi mea i roto ia’na, no te mea, te mau parau matamua e ore roa e moehia ia‘u maori râ, « Ua ite au e, o vai outou ».
Te haapii ra o Elisa i te reo Peretane i te reira taime.
Tae roa mai i teie mahana, te poihere noa nei â vau i teie na ta‘o e pae, mai te huru e, o te mau parau nehenehe roa a‘e ïa i roto i te reo o te taata nei.
E mea au na’na te ha‘uti tennis, e ta’na tairi matamua, e mati paa’ina mau. Ua tamata vau e ha‘uti i te tennis e o o’na, e i te hopea, ua faaru‘e au no to‘u iteraa e, eita ta‘u e nehenehe e ta’iri i te mea aita vau e ite ra.
Ua riro oia ei puai e ei oaoaraa no‘u. Aua‘e oia i riro mai ai au ei taata maitai a‘e, ei tane maitai a‘e, e ei metua tane maitai a‘e. Ua faaipoipo maua, e ua fanau e va‘u tamarii, e ua haere apipiti maua e 65 matahiti te maoro.
Ua rahi roa te mau mea ta‘u e faaho‘i na ta‘u vahine, eita e nehenehe e parau. Aita vau i ite e, te vai ra anei te hoê faaipoiporaa maitai roa, tera râ, ia au i ta‘u hi‘oraa, te mana‘o nei au e, to maua te mea maitai roa a‘e.
A paraparau ai te peresideni Hinckley i te hunaraa o te tuahine Elisa, ua parau oia e, e ohipa ino mau e te ati rahi ia mo‘e ana‘e te taata ta oe i here. E puta roa te reira i roto i te varua.
Ua tano oia. Ua riro na o Elisa ei oaoaraa rahi no‘u, i teie nei, ua riro to’na mo‘eraa ei otoraa rahi roa no‘u.
I roto i te mau hora mo‘emo‘e, ua feruri tamau noa vau i te mau mea no te ora mure. Ua feruri noa vau i te mau haapiiraa tamahanahana o te ora mure.
I roto i to‘u oraraa, ua faaroo vau e rave rahi a‘oraa no ni‘a i te Ti‘a-faahou-raa. E mai ia outou, e nehenehe ta‘u e tai‘o aau atu i te mau mea tei tupu i taua Sabati pâtâ matamua ra. Ua tapa‘o vau i ni‘a i ta‘u mau papa’iraa mo‘a i te mau irava no nii te Tia-faahou-raa e te vai ra ta‘u mau faahitiraa parau ohie noa ia itehia, na te mau peropheta no te anotau hopea nei, no ni‘a i taua tumu parau ra.
Ua ite tatou eaha te Ti‘a-faahou-raa – te tahoêraa ïa te varua e te tino i roto i to’na ra huru maitai roa.1
Ua parau te peresideni Joseph F. Smith e, « te feia ta tatou e taa ê nei, e farerei faahou ïa tatou ia ratou e e hi‘o ia ratou i roto i to ratou ra huru mau. E farerei faahou tatou i taua tino ra ta tatou i farii na i roto i te tahuti nei ».2
Ua faaaano faahou atu te peresideni Spencer W. Kimball i te reira a parau ai oia e, « Ua papû ia‘u e, ahiri e nehenehe ta tatou e feruri ia tatou iho i roto i to tatou huru maitai roa ra, te tino, te feruriraa, te varua, tera ïa to tatou huru ia hoi faahou mai tatou ».3
Ia ti‘afaahou ana‘e tatou, « E faatiahia teie tino pohe nei mai te pohe mai ei tino pohe ore,… Eita [tatou] e pohe faahou ».4
Te ite ra outou ? Te ora i to’na ra huru mau ? Aita e ma‘i, aita e mauiui, aita e teimaha i te ma‘i tei haape‘ape‘a tamau noa ia tatou i te tahuti nei ?
Ua riro te Ti‘a-faahou-raa ei tumu parau rahi i roto i te ti‘aturiraa o te mau Keritetiano. Ahiri aita te reira, aita ïa e faufaa to tatou faaroo. Ua parau te Aposetolo Paulo e, « e aore te Mesia i tia i nia ra, e haavare mau ta matou a‘o nei, e e haavare atoa to outou faaroo ».5
I roto i te aamu taatoa o te ao nei, i vai na te mau varua teitei e te paari, e rave rahi hoi o ratou tei titau i te ite taa ê i te Atua. Ia ti‘a mai râ te Faaora mai te menema mai, ua rave Oia i te hoê mea aore roa e taata i rave a‘e nei. Ua rave oia i te hoê mea aore roa e taata e nehenehe e rave. Ua omutu oia i te taamu o te pohe, eiaha No’na noa, no te feia atoa râ i ora na – te parau ti‘a e te parau ti‘a ore.6
Ia ti‘a mai te Mesia mai te menema ra, a riro mai ai Oia ei matamehai no te Ti‘a-faahou-raa, ua horo‘a oia i taua horo‘a ra no te mau taata atoa. E na roto i taua ohipa hanahana ra, ua tamărû oia i te oto rahi e amu nei i te varua o te feia tei pohe ê tei herehia e tatou ra.
Te feruri nei au i te poiri rahi o taua Mahana pae ra a faasataurohia te Mesia.
I taua Mahana Pae ri‘ari‘a ra, ua aueue ihora te fenua, e ua poiri roa. Ua farara maira te mau vero i ni‘a i te fenua nei.
Teie mau taata iino tei titau ia haapohe Ia’na, te oaoa nei ïa ratou. I teie nei, aita o Iesu faahou, e mea papû e, te feia tei pee Ia’na, e haere ê atu ratou. I taua mahana ra, ua ti‘a noa ratou ma te upootia rahi.
I taua Mahana ra, ua mahae a‘era te paruru o te hiero.
O Maria no Magadalena e o Maria, te metua vahine o Iesu, ua teimaha roa raua i te oto e te pe‘ape‘a. Teie taata rahi ta raua i here e i faatura, teie ïa e tarere nei i ni‘a i te satauro, ua pohe.
I taua mahana pae ra, ua pe‘ape‘a roa te mau Aposetolo. O Iesu, to ratou Faaora – te taata tei haere na ni‘a i te miti, tei faati‘a i tei pohe ra, O’na iho, tei roto Oia i te rima o te feia iino ra. Ua hi‘o noa raua Ia’na, ma te tauturu ore, ua upootia To’na mau enemi i ni‘a Ia’na.
I taua Mahana pae ra, te Faaora o te taata nei, ua faahaehaahia ïa e ua haamauiuihia, ua hamani-ino-hia, e ua tahitohitohia.
E mahana pae teie tei î roa i te oto rahi ri‘ari‘a e o te hohoni maite i te varua o te feia tei here e tei faatura i te Tamaiti a te Atua.
Te feruri nei au i te mau mahana atoa mai te omuaraa mai o te aamu o teie nei ao, teie Mahana pae te mea ino roa a‘e.
Aita râ te ati rahi o taua mahana oto i vai tamau noa.
Aita te pe‘ape‘a i vai noa. No te mea, i te Sabati iho, ua ofati te Fatu ti‘a faahou i te mau tape‘a o te pohe. Ua pa‘uma oia i ni‘a mai roto atu i te menema, e ua fâ mai ma te hanahana ei Faaora no to te ao atoa nei.
E i roto noa i te hoê taime, te mau mata tei î na i te roimata tahe ra, ua mărô ïa. Te mau utu atoa tei muhumuhu i te pure oto e te pe‘ape‘a, i teie nei, te parau nei ïa i te mau parau haapoupou maere, no te mea, o Iesu te Mesia, te Tamaiti a te Atua ora ra, ua ti‘a mai ïa i mua ia ratou ei hotu matamua no te ti‘a-faahou-raa, ei faaiteraa e, te pohe o te haamataraa ïa no te hoê oraraa apî e te nehenehe.
E Mahana pae to tatou tata’itahi – oia hoi, taua mau mahana ra mai te huru e, ua parari huahua roa te ao nei, vai noa’tu ai te mau huahua i raro i pihai iho ia tatou. Tatou paatoa te farerei i taua huru taime ra, mai te huru ra e, eita ta tatou e nehenehe faahou e faati‘a faahou. E roaa pauroa to tatou Mahana pae.
Tera râ, te faaite papû nei au na roto i te i‘oa o te taata tei upootia i ni‘a i te pohe – E tae mai te Sabati. I roto i te poiri o to tatou oto, e tae mai te Sabati.
Noa’tu te huru o to tatou pe‘ape‘a. Noa’tu te huru o to tatou oto. E tae mai te Sabati. I teie anei oraraa e aore ra, a muri a‘e. E tae mai te Sabati.
Te faaite papû nei au e, e ere te Ti‘a-faahou-raa i te fabula. Tei ia tatou nei te mau iteraa papû o te feia tei ite Ia’na. E rave rahi tauatini taata i roto i te fenua tahito e te Fenua Apî, tei ite i te Faaora ti‘afaahou. Ua fafa ratou i te mau puta i roto i To’na ra rima, te avae e te aoao. Ua ta’i ratou i te oaoa faito ore a apa ai ratou Ia’na.
I muri a‘e i te Ti‘a-faahou-raa, ua faaapi-faahou-hia te mau pipi. E ua ratere ratou na te ao atoa nei no te poro i te parau apî hanahana o te evanelia.
Ahiri ratou i ma‘iti, e nehenehe ratou e mo‘e ê, e ia hoi atu i roto i to ratou huru oraraa e ta ratou ohipa. Te vai ra te tau, e mo‘e roa ïa to ratou rave amuiraa i te ohipa.
E riro ratou i te huna i te ti‘araa Atua o te Mesia. Aita râ ratou i na reira. I mua i te fifi, te maamaa e te pohe, ua tomo ratou i te mau vahi atoa, i roto i te hiero e te mau sunago no te poro ma te itoito i te parau no te Mesia, te Tamaiti ti‘a faahou a te Atua ora ra.
E rave rahi o ratou tei pŭpŭ i to ratou ora faufaa rahi ei faaiteraa papû hopea. Ua pohe ratou i te pohe maratiri, ma te faaiteraa papû no te Mesia ti‘a faahou i ni‘a i to ratou ra utu, a pohe atu ai ratou.
Ua taui te Ti‘a-faahou-raa i te oraraa o te feia tei ite i te reira. Eita anei te reira e taui atoa i to tatou ?
E ti‘a paatoa mai tatou i rapae i te menema. E i taua mahana ra, i reira to‘u metua tane e apa ai i to‘u metua vahine. I taua mahana ra, e tape‘a faahou vau i roto i ta‘u na rima ta‘u Elisa here.
No te ora hoi e te tusia mure ore o te Faaora o te ao nei, e tahoê-faahou-hia tatou i te feia ta tatou i here roa.
I taua mahana ra, e ite ai tatou i te here o to tatou Metua i te Ao ra. I taua mahana ra, e oaoa ai tatou i te mea e, ua upootia te Mesia i ni‘a i te mau mea atoa ta tatou e ora e a muri noa’tu i pihai iho i tei herehia e tatou.
Na roto i te mau oro‘a mo‘a ta tatou e farii i roto i te hiero mo‘a, eita to tatou faaru‘eraa i teie nei oraraa tahuti poto roa e faataa ê maoro i te mau auraa tei natihia i te mau taura taamu mure ore.
Ta‘u teie iteraa papû hanahana e, e ere te pohe i te hopearaa o te oraraa. « Tei teie nei ao ana‘e ra ta tatou e tiai i te Mesia nei, e ati rahi to tatou i to te taata atoa ».7 Na roto i te Mesia ti‘afaahou, « Ua horomii-roa-hia te pohe i te re i riro ra ».8
Aua‘e to tatou Taraehara here, e nehenehe ta tatou e faateitei i to tatou mau reo, e tae roa’tu i rotopu i to tatou mau Mahana pae pouri, e ia porohaere e, « E te pohe e, teihea to oe tara ? E hade e, teihea to oe re ? »9
A paraparau ai te peresideni Hinckley i te mo‘emo‘e ri‘ari‘a o te tupu mai i ni‘a i te feia tei mo‘e ê tei herehia e ratou, ua fafau atoa mai oia e, i roto i te muhu ore o te pô, e muhumuhu mai te hoê reo iti ha‘iha‘i e te faaroo-ore-hia i te hau i to tatou varua, « maitai te mau mea atoa ».
E oaoa rahi to‘u no te mau haapiiraa ti‘a o te evanelia, e no te horo‘a o te Varua Maitai tei muhumuhu mai i to‘u varua i te mau parau tamahanahana e te hau tei fafauhia mai e to tatou peropheta here.
Mai roto mai i te hohonu o to‘u oto, te oaoa nei au i roto i te hanahana o te evanelia. Te oaoa nei au i te mea e, te Peropheta Iosepha Semita, ua ma‘itihia oia no te faaho‘i faahou mai i te evanelia i te fenua nei i teie tau tuuraa hopea nei. Te oaoa nei au i te mea e, e peropheta to tatou, te peresideni Gordon B. Hinckley, te faatere nei i te Ekalesia a te Fatu i to tatou nei anotau.
Ia haro‘aro‘a tatou e ia ora ma te mauruuru no te mau horo‘a faufaa rahi te tae mai nei ia tatou nei, tatou te mau tamaiti e te mau tamahine na te hoê Metua ora i te Ao e no te fafauraa o taua mahana nehenehe ra a ti‘a faahou mai ai tatou paatoa ma te oaoa rahi mai roto mai i te menema.
Ia ite tamau noa tatou e, noa’tu te pouri o to tatou Mahana Pae, e tae mai te Sabati, ta‘u ïa pure na roto i te i‘oa o Iesu Mesia ra, amene.