Te hoê buka faahiahia, te hoê pahonoraa faahiahia
I te taime a faaineine ai au ia bapetizo e ia haamauhia ei melo no te Ekalesia, ua hepohepo roa vau mai te mea te ma‘iti ra vau i te e‘a ti‘a. Ua ite to matou mau misionare amaa i Gyumri, Aremenia, e te vai nei to‘u mau feââraa no ni‘a i te Buka a Moromona e te amuiraa’tu i te Ekalesia, no reira ua ani mai ratou ia‘u ia haere na muri ia ratou a haapii ai ratou i te tahi mau haapiiraa misionare.
I to matou taeraa’tu i te fare matamua, ua ui Elder Perrin ia Anichka mai te mea ua tai‘o anei oia i te mau pene i faataahia. Ua pahono mai oia « aita », « ua mo‘ehia ia‘u ». No reira ua tai‘o amui matou i te 2 Nephi 29-33. A tai‘o ai matou i te pene 29, ua tuatapapa matou i te mau tohuraa no ni‘a i te Buka a Moromona e to te mau Edene pato‘iraa i te reira i te mau mahana hopea nei ma te parauraa : « E Bibilia! E Bibilia! E Bibilia ta matou, e aore atu â Bibilia » (irava 3). Ua putapû vau i taua pene ra i roto i te taato‘araa o te haapiiraa.
I muri iho ua haere atu matou i te tahi ê atu fare. I to matou tai‘oraa i te Buka a Moromona i reira, ua ui te metua o te vahine ta matou e haapii ra, « eaha taua buka ra? »
Ua hamaramarama vau e o te Buka a Moromona ïa : Te tahi ite no Iesu Mesia. Ua riri oia e ua parau mai, « e Bibilia a‘ena ta matou, e eita e nehenehe ia vai mai te tahi ê atu Bibilia ».
Ua haamana‘o vau i te pene ta‘u i tai‘o e 10 minuti iho nei ia Anichka.
Ua haamata Elder Perrin i te parau : « e Bibilia ta oe, no roto mai ïa i te nunaa tahito fafauhia a te Atua. Ua tamau â oia i te parau, « ua hamani te Atua i te mau taata atoa, e te heheu nei Oia i Ta’na ra mau parau i Ta’na ra mau tamarii, oia ho‘i te mau taata atoa i ni‘a i te fenua nei. Noa’tu e e Bibilia ta outou, aita anei oe e mana‘o e e horo‘a’tu te Atua i Ta’na mau parau ia vetahi ê? » Ua tamau oia i te parau, ma te tatara atu i te haamataraa o te Buka a Moromona.
Ua maere au i te ohipa i tupu iho nei. E au ra e aita’tu e iteraa papû hau atu i te rahi no te tatararaa i to‘u mau mana‘o pe‘ape‘a no ni‘a i te Buka a Moromona maori râ te iteraa i te tupuraa o ta’na mau tohuraa.
I teie nei ma te au mau e nehenehe ia‘u ia parau e ua riro te Buka a Moromona e buka mau roa‘e. Ua ite au e te here nei te Atua ia tatou paatoa e eita Oia e haamo‘e ia tatou. Faahou â e faahou â, ua ite au te faahiahiaraa o te Buka a Moromona.