Faaoroma‘iraa e tae atu i te haamataraa
E hitu matahiti te maororaa, ua hoonahia râ te tia‘iraa.
«O vai ma te mau orometua haapii? » ua ani atu vau i to‘u mau hoa a haere ai matou na ni‘a i te poromu i te hoê po‘ipo‘i mahana maa i te ava‘e febuare 2000. E 14 matou i taua taime ra.
« E mau hoa ratou no‘u e tei ŏ nei ratou no te tahi mea mai te hoê misioni », ua na ô maira oia. Aita roa’tu matou i paraparau no ni‘a i te haapa‘oraa faaroo na mua’tu, noa’tu e mau hoa maitai ana‘e matou. Ua parau mai oia e e haere ra matou i te mau piha haapiiraa i te reo Peretane ta to’na mau hoa e haapii ma te moni ore. Ua ite oia e e anaanatae vau no te mea te haere ra vau i te hoê fare haapiiraa tuarua Peretane.
I to matou tomoraa’tu i roto i te fare, ua haru to‘u na mata i ni‘a i te mau hoho‘a e vai ra i ni‘a i te mau papa‘i. E fare pureraa anei teie? E ere roa’tu te reira mai te hoê fare pureraa Orthodox no Bulgaria, te hoê ana‘e fare pureraa ta‘u i mata‘ita‘i na mua’tu. Te faariro nei te rahiraa o te taata i te ti‘aturiraa faaroo ei mea hape. No reira, a vai ai te fenua Bulgaria i raro a‘e i te faatereraa haavî e tae noa’tu i te matahiti 1989, ua faahapahia te mau ti‘aturiraa faaroo, e ua faariro noa â te mau taata e rave rahi i te reira ei mea ti‘a ore.
Ua ani mai to’u hoa mai te mea ua hinaaro anei au i te haere i te pureraa i te po‘ipo‘i a‘e. Ua pahono atu vau e, hau atu no te ui maere eiaha râ no te mana‘o haamori. Ua ite au e mai te mea e haere oia, aita ïa e ohipa hape ta’na e rave ra.
Ua haamata vau i te haere tamau i te pureraa. Ua hinaaro vau ia rahi atu â to‘u ite no ni‘a i te mau haapiiraa a teie ekalesia. Ua hinaaro vau ia ite no te aha taua feia apî ma te i‘oa tei pinehia i ni‘a i to ratou mau ahu i faaru‘e ai i to ratou mau fenua no te haere mai i te fenua Bulgaria e oomo ai ia ratou iho i roto i te varua pato‘i i ŏ nei. Noa’tu e aita to‘u e faaroo i taua taime ra, ua tape‘a noa te tahi mea ia‘u ia haere i te mau faaoaoaraa a te Ekalesia. Ua au vau i te varua hoa o te mau misionare e te mau mata ataata o te mau melo.
Ua riro vau ei hoa no te feia apî tamahine i roto i te amaa. Ua maere au i to ratou faaroo e to ratou hinaaro rahi ia tavini ia vetahi ê. Te haamana‘o nei au i to‘u pure-matamua-raa i roto i te piha a te Feia Apî Tamahine. Aita roa’tu vau i pure noa‘e na mua’tu, aita vau i ite i te puai rahi o te hoê pure. Aita vau i ite i te tuatiraa puai e to tatou Metua i te Ao ra ta te hoê pure e afa‘i mai. Aita vau i ite e e tamahine au Na’na. Aita roa’tu vau i faaea i te pure i muri mai. I te mau taime atoa ua tiia‘u ia upooti‘a i ni‘a i te hoê fifi, ua ite au e e nehenehe ta‘u e ani i to‘u Metua i te Ao ra no te arata‘iraa. E faahaere pinepine mai taua mau pure ra i te roimata i to‘u na mata no te mea ua nehenehe ia‘u ia ite i te haapapûraa a te Varua Mo‘a e te here nei te Atua ia‘u. Ua haamata vau i te ti‘aturi i te Fatu.
Ia tae mai te mau faahemaraa no te taure‘are‘araa, e faaroo papû a‘ena to‘u ia Iesu Mesia, tei horo‘a mai ia‘u te puai no te haavî i teie mau faahemaraa. Ua nehenehe ia‘u ia ite nahea Satane i faahema’i i to‘u mau hoa i te mau mea no te ao nei e nahea te mau faahemaraa riirii e arata‘i atu ai i te mau faahemaraa rahi a‘e. E mea fifi roa ia tape‘a i ta‘u mau ture, na te tuatiraa râ ta‘u i haamau e to‘u Metua i te Ao ra na roto i te pure i tauturu ia‘u ia faaea atea ê atu i te mau faahemaraa. Ua faaoti au i te ora i te mau ture no te faanahoraa no te ora. Ua ite au ma te feaa ore e e haamaitaihia vau ia tae i te hoê mahana.
Aita râ vau i amui atu i te Ekalesia i taua taime ra. Ua pato‘i etaeta roa to‘u na metua, to‘u ihoa ra metua tane. Ua taa râ ia‘u to’na ti‘araa. Aita roa‘e to’na na metua i afa‘i ia’na i te pureraa; ua paari oia i te tau a faaterehia’i te fenua e te faatereraa haavî. Ua ite râ vau e ua faaineine te Fatu i te hoê rave‘a ia tomo atu vau i roto i te Ekalesia i te hoê mahana. Ua ite a‘ena vau e e mea fifi roa taua rave‘a ra. Ua haapii mai râ vau na roto i te mau papa‘iraa mo‘a e e nehenehe te mau tamataraa e riro ei maitai no tatou.
Ua haere au i te haapiira evanelia e i muri iho i te haapiiraa evanelia na te feia apî paari, ua haere au i te mau faaoaoaraa a te Ekalesia, e ua haamata atoa vau i ta‘u iho buka te Faahaereraa ia‘u iho i Mua. Ua tia’i anaanatae noa vau i te haere atu i te mau faaoaoaraa a te Feia Apî Tamahine. Eita roa e aramoinahia ia‘u te mau hora ta matou i rave no te tunuraa maa, te hamaniraa i te mau rata iti aore râ te mau tapa‘o buka, te faaunaunaraa i ta matou piha haapiiraa, aore râ te hautiraa i te mau hauti, mai te varua faahiahia no te hoaraa i rotopu ia matou. Ua tauturu te mau faaoaoaraa atoa ia‘u ia maramarama i to‘u natura hanahana e ta‘u ohipa i roto i te oraraa.
Te hoê o te mau opuaraa fifi roa‘e no te Faahaereraa ia‘u iho i Mua o te tamau aauraa ïa i « Te Mesia Ora ».1 Ia hi‘o ana‘e vau i te papa‘iraa, ua mana‘o vau e e riro te reira ei titauraa rahi ia tamau aau i te reira. I muri a‘e e piti hepetoma, ua ite a‘ena vau no te aha taua opuaraa ra i tabulahia’i i roto i te Opuaraa no te Faaroo. Ua riro te reira ei tamataraa no te faaroo e no te faaoroma‘i, te hoê tamataraa ma te mau maitai i muri mai. Ua tauturu te iteraa papû a te mau aposetolo ia haapaari i to‘u faaroo e to‘u iteraa papû. Na roto i te haamana‘oraa i ta ratou mau parau faauruhia no te oraraa e te misioni hanahana a te Mesia, ua noaa ia‘u te itoito i te faaite i to‘u iho iteraa no ni‘a Ia’na.
I te fatataraa o te 16raa o to‘u matahiti, ua faatupu matou i te hoê faanahonahoraa no te riroraa ei misionare rave tamau. Ua vahi matou ia matou i roto i te mau pupu e piti taata e ua ora matou mai te mau misionare no te hoê hepetoma i te maoro. Tera te taime matamua i haapii ai au i te faufaa rahi ia faaite i to tatou iteraa papû ia vetahi ê. Ua tauturu teie faaoaoaraa ia‘u ia ite i te fifi ia tavini i te Fatu, i te oaoa atoa râ ta tatou e ite na roto i te faaiteraa i te evanelia e te iteraa e nahea te mau haapiiraa a te Mesia e taui ai i te oraraa o te tahi taata. Ua tauturu te reira ia‘u ia ite eaha mau râ « te ti‘araa ei ite o te Atua i te mau mahana atoa e i te mau mea atoa, e i roto i te mau vahi atoa » (Mosia 18:9)
Ei « melo ore itoito » mai ta te mau taata atoa i pii ia‘u, ua haapii au ia farii i te faaoroma‘i e te ti‘aturi e ia tae i te hoê mahana e riro mai au e melo no te Ekalesia. Ua ite au e tamataraa te reira i to‘u faaroo e to‘u faaoroma‘i. Ua ui au eaha ra te roaraa taime i titauhia no te tamâ ia’na iho e no te haamata i te hoê oraraa apî.
Ua tae mai taua mahana ra fatata e hitu matahiti i muri a‘e i to‘u hoa afa‘iraa ia‘u i te fare pureraa i taua po‘ipo‘i to‘eto‘e ra no te ava‘e febuare 2000. Ua bapetizohia vau i to‘u 21raa o te matahiti i te fare misioni i Sofia. Ua riro te mahana no tobapetizoraa te hoê o te mau mahana oaoa roa‘e no to‘u nei oraraa. Ua ite au i taua taime ra te here faaora rahi a te Metua i te Ao ra no‘u. Ua ite rahi au i te reira a rave ai au i te oro‘a i te mahana i muri iho. Aita i nehenehe ia‘u ia tape‘a i te roimata. Te faaite mai ra te Varua e ura ra i roto ia‘u e ua hoonahia te tia‘iraa. Ua nehenehe ia‘u i taua taime ra ia oaoa i te horo‘araa a te Varua Maitai e te tahi atu mau haamaitairaa no te riroraa ei melo no te Ekalesia.
Ua mauruuru vau i to’u haamaitai-raa-hia e te iteraa no te evanelia tei faaho‘ihia mai. Ua ite au e e nehenehe ta tatou e upooti‘a i ni‘a i te mau tamataraa o te oraraa na roto i te faaroo e te faaoroma‘i. Aita e haamaitairaa rahi atu a‘e e te hoonahia maori râ te riroraa ei melo no te Ekalesia mau i ni‘a i te fenua. Aita’tu e mea e afa‘i mai i te oaoa rahi a‘e maori râ te iteraa tatou te mau melo ti‘amâ o te Ekalesia i farii e, e nehenehe ta tatou e ora faahou i pihaiho i te Atua.