Te Parau Poro‘i a te Tuahine Hahere

Ia riro ei mauihaa i roto i te rima o te Atua na roto i te faaineineraa no te tae-piti-raa mai o to tatou Fatu

Na roto i te pure a maiti e a tai‘o mai roto mai i teie parau poro‘i te mau papa‘iraa mo‘a e te mau haapiiraa o te pahono i te mau hinaaro o te mau tuahine ta outou e hahaere ra. A faaite i ta outou mau ohipa o tei tupu e te iteraa papû. A ani ia ratou ia na reira atoa.

Nahea vau ia faaineine no te tae-piti-raa mai o Iesu Mesia?

PH&PF 38:30 : « Ia vai ineine noa outou e ore outou e măta‘u ».

Elder Dallin H. Oaks no te Tino Ahuru ma Piti Apotesolo : « Te vai ra e maha tuhaa e ore roa e marôhia e te feia mo‘a i te mau mahana hope‘a nei : (1) E ho‘i mai te Fatu i ni‘a i te fenua nei ma te mana e te hanahana rahi no te faatere i te roaraa hoê tauasini matahiti i roto i te parau-ti‘a e te hau. (2) I te taime o To’na tae-raa-mai e tupu ïa te haamouraa i te ino e te ti‘a-faahou-raa o te parau-ti‘a. (3) Aore roa e taata o tei ite i te taime no to’na tae-raa-mai, tera râ (4) ua haapiihia tei haapa‘o maitai ia haapii i te mau tapa‘o e ia vai ineine no te reira… E ti‘a roa ia tatou ia faaineine i te pae tino e i te pae varua no te mau mea e tupu o tei tohuhia i te taime no te tae-piti-raa mai ». (« Faineineraa no te tae-piti-raa mai », Liahona, Me 2004, 7, 9).

Kathleen H. Hughes, tauturu matamua tahito i roto i te peresideniraa rahi o te Totaiete Tauturu : « Te haamau atu nei outou i te niu no te hoê ohipa rahi roa. E na roto i te mau mea iti nei e tupu mai ai tei rahi roa ra’ (PH&PF 64:33; amuihia’tu te haapapûraa)… Te ohipa rahi o ta tatou e hinaaro i te rave e na roto mai ïa i te « mau mea iti ». Te hoê o taua mau mea iti ra, o ta‘u i haapii mai, oia ia e ti‘a ia‘u ia imi i te taime no te faaî i to‘u iho vairaa pape pae varua i te mahana tata‘itahi » (« Mai roto mai i te mau mea iti », Liahona, Novema 2004, 109).

Elder Robert D. Hales no te Tino Ahuru Ma Piti Aposetolo : « Te titau nei te Fatu ia tatou ia riro ei feia haapa‘o maitai, paieti, itoito mai te feia o tei ora e o tei pohe na mua a‘e ia tatou. Ua piihia ratou ia faatusia i to ratou mau oraraa no te evanelia. Ua piihia tatou ia faatusia i to tatou mau oraraa no te reira atoa tumu… Ua faaineine te taato‘araa o te mau tau tuuraa evanelia i te e‘a no te tae matamuaraa mai te Fatu e Ta’na taraehara. Mai te reira atoa, ua hamau te aamu e te tohuraa i te niu no te faaho‘i-raa-hia mai te evanelia na roto i te peropheta o Iosepha Semita. Te vai ra anei to tatou mata no te ite e te faaineine nei, te mau mea e tupu nei e te mau tohuraa no ni‘a i to tatou tau, ia tatou no te tae-piti-raa mai o te Faaora? » (« Preparations for the Restoration and the Second Coming : ‘My Hand Shall Be over Thee ‘ », Liahona, Nov. 2005, 91-92).

Nahea vau e nehenehe ai e riro ei mauihaa i roto i te rima o te Atua no te tautururaa ia vetahi ê ia faaineine?

PH&PF 34:6 : « A faateitei mai na i to oe reo… e a ti‘aoro atu ho‘i i te parau tatarahapa…, i te faaineineraa i te e‘a o te Fatu no to’na tae-piti-raa mai ».

Peresideni Spencer W. Kimball (1895-1985) : « Te riroraa ei vahine parau-ti‘a i te taime e tupu ai te mau ohipa hopea i ni‘a i teie fenua, na mua a‘e i te tae-piti-raa mai to tatou Faaora, e piiraa hanahana ïa. E nehenehe te puai e te mana o te vahine parau-ti‘a i teie mahana ia tata‘iahuru i roto i te mau taime hau e te hepohepo ore. Ua tuuhia mai oia i ô nei no te tauturu ia haamaitai, ia paruru, e ia tiaau i te utuafare – oia ho‘i te niu e te faanahonahoraa hanahana roa‘e o te totaiete. Ua fatata te tahi atu mau faanahonahoraa i roto i te totaiete i te topa e ua topa atoa, tera râ e nehenehe ta te vahine parau-ti‘a e tauturu ia faaora i te utuafare, o tera ana‘e paha te vahi paruru hopeahia o ta te tahi mau taata e ite i ropu i te vero rahi e te arepurepu » (« Privileges and Responsabilities of Sisters », Ensign, Novema. 1978,103).