Te hoe pure e to‘u taea‘e hahaere
Te haamâ nei au i te parau, e i vai na te hoê tau e ua faariro vau i te mau taea‘e hahaere e haafifiraa eiaha râ ei haamaitairaa. E imi ïa vau i taua mau taime ra te mau rave‘a ia ore vau e ia parahi mai i ta ratou mau tere hahaere ia nehenehe ia‘u ia rave faaoti i ta‘u nei ohipa.
No reira vau i pe‘ape‘a taa ê roa’i i te taime a riro mai ai o Lincoln ei taea‘e hahaere no matou. Aita roa oia e ma‘iri i te hoê tere hahaere. Ua ineine noa ta’na haapiiraa e ua rave maite oia i ta’na mau hopoi‘a ei taea‘e hahaere. Ua mauruuru vau i tamau tautooraa aita râ vau i haapa‘o maitai ia’na e to’na hoa ia haere ana‘e mai raua no ta raua hahaereraa i te mau ava‘e atoa. E mea hoa roa o Lincoln i te mau taime atoa; e huru iria rii to‘u i te mau taime atoa.
I te hoê matahiti i te omuraa o te tau mahanahana, te rave ra vau i te ohipa i roto i te aua. E mea ateatea e e mea mahanahana te mahana. I te rahiraa o te taime ua riro te raveraa i te ohipa i roto i te aua mai te hoê rapaauraa, i taua râ mahana ua hepohepo roa vau. No tapuhia iho nei ta‘u tane faaipoipo i ni‘a i to’na tua, e te faaruru nei matou te utuafare i te tahi mau faaotiraa fifi.
No to‘u hinaaro i te mau pahonoraa, ua ite au ia‘u i te tuturiraa i roto i te aua. Ua tahe te mau roimata a pure ai au ma te tuutuu ore no te arata‘iraa a te Fatu. Ua hinaaro noa vau i te tahi hau. Ahani ua nehenehe ia‘u ia farii i te tahi haapapûraa e ere to matou oraraa i mua i te mea hepohepo roa mai teie taime. Ua pure u‘ana vau, ma te faarahi i to‘u reo i te tahi mau taime, ma te taparu i te Fatu i te ti‘aturi e hau atu i te mau mea atoa te hau.
I to‘u ho‘iraa’tu i te fare i muri a‘e i to‘u taparuraa i te Fatu, ua rohirohia roa vau. Ua oaoa vau e aita roa’tu e taata i te fare ia nehenehe ia’u ia maitai mai. Aita i maoro roa i to‘u tataraa i to‘u mau tiaa ohipa, ua pate mai te oe opani. O Lincoln te taata hopea roa i roto i to‘u feruriraa, i to‘u râ iritiraa i te opani, te ti‘a noa mai ra oia e ta’na vahine faaipoipo, aita râ e buka haapiiraa i teie taime.
No te taime matamua roa, ua oaoa vau i te iteraa’tu ia’na. Ua ani au ia raua ia tomo mai. Ua paraparau matou e ua ui mai o Lincoln no ni‘a i te ohipa a ta‘u tane faaipoipo, no ni‘a i ta maua na tamahine e pae, e te tahi atu mau ohipa no te utuafare. Aita raua i maoro mai, e a ti‘a ai raua no te haere, ua ani mai o Lincoln mai te mea e nehenehe ta’na e vaiiho mai i te hoê haamaitairaa i ni‘a i to matou nei utuafare. Ua mauruuru roa vau, ma te ui ia‘u iho nahea râ oia i ite ai e e farii maitaihia mai te hoê pure. Ua tuturi matou, e a faaroo ai au i ta’na mau parau tamahanahana, ua ani taa ê oia no te hoê haamaitairaa no te hau i ni‘a i to matou nei utuafare.
I roto i taua taime ra, ua ite au i te mana‘o tamahanahana i te faaîraa i to‘u nei aau. Ua ite au i taua taime ra e te vai ara ra te Fatu e e maitai te mau mea atoa.
Ua pahono maramaramahia ta’u mau pure e te papû na roto ia Lincoln, to matou taea‘e hahaere haapa‘o maitai. Na roto i te faaturaraa i ta’na tiaauraa e te peeraa i te mau omumuraa a te Varua Maitai ua vaiiho mai oia ia‘u te hoê faaiteraa papû no to’na piiraa mo‘a.