Te horo‘a nei te mau taote o te Ekalesia i te horo‘a no te hi‘o

Ua aro noa na o Blendina Muca i te mau matahiti matamua o to’na oraraa i te hoê fifi mata fera. I muri mai rave rahi matahiti rapaauraa manuïa ore i to’na fenua i Albanie, ua roaa ia’na te tauturu a te mau taote mata o te fenua Marite o tei haere i to’na fenua no te ohipa tauturu i to te ao nei.

|« Mai to‘u â na‘ina‘iraa to‘u mata feraraa », o te parau ïa a te vahine Muca. « Ua tono to‘u papa ia‘u e farerei i te taote, e ua horo‘a mai i te mau raau topata e te titi‘a mata… Aita râ te reira i faaafaro i to‘u na mata – ua ino roa’tu râ – area râ, ua haere noa vau ma te ti‘aturi e e maitai mai te reira ».

Taa è noa’tu i te mau ta‘oti‘araa o to’na hi‘oraa, e na roto i to teie nei tamahine no te fenua Albanie itoito ia riro ei vahine nira ahu aravihi, o to’na ïa toro‘a.

I to te tuahine o te tuahine Muca faafariu-raa-hia i roto i te Ekalesia, ua matara te hoê uputa i te fifi o teie vahine apî. Na te mau misionare o te ohipa tauturu i to te ao nei a te Ekalesia haereraa i teie bapetizoraa, ua ani manihini i te vahine Muca ia haere e hi‘opo‘a ia’na i te fare ma‘i no te mata e paturuhia e te Ekalesia i te mau taote no te mau Hau Amui no Marite mai.

Na te taote Rick Olson, te hoê taote mata no te mau tamarii e ei rave ohipa hoi no te fare haapiiraa tuaturo no Iowa i tapu i te mata o te vahine Muca. Hou teie tapuraa, ua putu teie vahine apî, to’na tuahine e te mau hoa i roto i te pure e te taote Olson.

« Ua ani te taote i te Atua ia faariro i to’na na rima mai te auro ra te huru no te tata‘i i to‘u na mata », o te parau ïa a te vahine Muca, « e ua na reira Oia. Ua ite au e ua faatupu te Atua i te hoê semeio ».

Teie horo‘a no te hi‘o – te rapaauraa i te mau fifi o te mata, te mau tauihaa i horo‘ahia, e te patururaa i teie faanahoraa – ua pûpûhia ïa no te faahoturaa i te mau fenua i raro a‘e i te parururaa a te mau taviniraa a te Ekalesia i to te Ao nei.

Na te taote George Pingree, te hoê taote mata no Roto Miti tei rave i ta’na tau faafaaearaa, i peresideni i teie nei tuhaa ohipa rahi no na 200 taote mata tei horo‘a i to ratou taime no teie nei tabula ohipa.

« E 40 milioni mata pô i roto i te ao atoa nei », o ta te taote Pingree ïa i parau, « rave rahi e mau mata tapo‘ihia e te hoê paruru iri, e te tahi atu mau fifi o te nehenehe e faaafarohia ».

Na te mau misionare no te ohipa tauturu i to te ao nei e imi i te mau hinaaro taa è i te mau fenua riirii o te parau ïa a Dean Walker, ti‘a faatere no teie mau ohipa Taviniraa Tauturu a te Ekalesia i to te Ao nei.

« E horo‘ahia’tu te mau titauraa, e i muri iho e faataa ratou i te hoê opuaraa ia tano i te mau titauraa o te fenua iho ». o te parau ïa a te taea‘e Walker. « Ua ti‘a ia matou ia rave 10 e tae atu i te 15 opuaraa i te matahiti hoê – te mau opuaraa no te haapii i te ea i te feia utuutu ma‘i i roto i te mau rave‘a e i te mau ohipa o te horo‘a i te mau hopearaa no te haamaitai atu â i te hi‘oraa no te mau taata e rave rahi ».

Te ite taa è nei te vahine Muca i te oraraa i muri mai i to’na tapu. Teie ta’na i parau: « To‘u hinaaro i teie mahana, o te ho‘iraa ïa i te fare haapiiraa tuatoru e ia tatuturu i te feia te hepohepo nei – te tautururaa i te mau taata mai ta te Atua i na reira ia‘u. Te tupu mau nei te mau semeio ».