Ua amui te apooraa i te fenua Polonia no te paruru i te utuafare o te ao taato‘a nei

Hau i te 3.300 mau taatiraa o te ao nei tei ta‘iruru i te fare no te Ihotumu e no te Ite Ihi no Varsovie i te fenua Polonia mai te 11 e tae atu i te 13 no me 2007, no te hoê rururaa IV no ni‘a i te Utuafare. Ta ratou fâ oia ïa, no te haapii e no te haapapû e na te Atua i faati‘a i te utuafare o te taata nei e e mea faufaa no te hoê totaiete maitai.

Ua mana‘o teie mau feia o tei haere mai i teie rururaa e tei raro a‘e te mau utuafare o te ao nei i te haruraa e te ti‘aturi nei e, te vai nei te hoê titauraa no te haamau i te tahi mau ture niu no te parururaa i te mau utuafare o te ao atoa nei. Ua tae mai teie mau taatiraa na Tireni mai, Niu Tirani, Afganistan, Mehiko e Philipino no te faarotahi i ni‘a e rave rahi mau fifi o te faahoruhoru nei i te mau utuafare o te ao nei.

Ua tauturu Ellen Sauerbrey, tauturu papa‘i parau no te mau Hau Amui no Marite no te mau taata, te mau taata tapuni e te feia haere i te fenua è i te farii manihiniraa i teie rururaa e ua topa i te i‘oa o te utuafare, te hoê faanahoraa tahito roa‘e e te aueue ore.

« No mua‘e te utuafare i te mau hau atoa, e e itehia i roto i te mau Ihotumu e i roto i te mau tau atoa… Aita te hau i hamani i te utuafare; area râ, na te mau utuafare i hamani i te hau » o te parau ïa a Sauerbrey vahine.

Ua farii manihini-atoa-hia o Roman Giertych tane, faatere hau no te pae o te haapiiraa e ei mono faatere hau matamua no te fenua Polonia i te apooraa e ua parau e, mai te mea aita e utuafare aita ïa e faatereraa hau, e hau e e ora.

Te mau tumu parau i aparauhia i roto i teie rururaa oia ïa te haamaruaraa tamarii, te faaipoiporaa e te hoê taata hoê â apeni, te toparaa o te huiraatira, te hoho‘a faufau, te mau faahaparaa i te utuafare i roto i te mau parau apî e te faaapîraa o te mau peu tahito o te haapa‘oraa faaroo.

Te tumu parau no ni‘a ia Hollywood e te utuafare, ua parau Don Feder, ti‘a faatere no te mau paraparauraa no te rururaa o te ao nei no te mau utuafare e: « I te mau mahana atoa, te topa nei e rave rahi mau tâne faito ha‘iriiri a te hoê taiete Marite i roto i to outou mau fenua e te mau utuafare. Te hi‘o nei au ia Hollywood, e to’na mau hotu – e te mau faati‘amâraa – mai te taotoraa, te hamani-ino-raa, te haapi‘oraa, te faaroo-ore-raa, te aroraa i te ekalesia e te mau ite morare hohonu no te pato‘i i te utuafare.

Ua paraparau Brad Wilcox, orometua aravihi i te pae no te ite totiare no te fare haapiiraa tuatoru no Virginie no ni‘a i te nohoraa amui e te ora maitai o te mau tamarii.

« E au te mae‘araa o te nohoraa amui i Europa i te arata‘i… i te rahi o te vai mo‘emo‘raa o te metuaraa, e ua ite tatou e e riro te vai mo‘emo‘eraa o te metuaraa i te haamata‘u i te ora maitai o te mau tamarii », o ta’na ïa i parau.

I te opaniraa o te rururaa, ua faaotihia te hoê parau poro‘i no Varsovie ei pure no te utuafare o te piti ahuru ma hoêraa o te tenetere: « Te hoê utuafare mau, te poieteraa a te Atua, o te hoê ïa oraraa faufaa o te taata nei, niuhia i ni‘a i te hoê faaipoiporaa no te hoê oraraa taato‘a i rotopu i te hoê tane e i te hoê vahine, ei reira te mau taata apî e tôhia’i, e fanauhia’i e e faaamuhia’i ».

Ua riro te Rururaa o te Ao nei no te mau Utuafare (RAU) ei ohipa na te ao nei tei faatupuhia no te mau faanahonahoraa utuafare, te mau taata aravihi, te feia faatere e te mau taata maitatai no roto mai e 60 fenua o te imi nei i te faaho‘i faahou mai i te utuafare mau ei ti‘ahapa totiare faufaa no te taiete.

Na Allan Carlson i faati‘a i te (RAU) i Rockford, i Illinois i te matahiti 1997 ra. Ua faatupuhia e toru rururaa i mairi a‘e nei i Prague i te Hau Repubilita no Tchecoslovaquie (1997), i Genève, i te fenua Tuite (1999) e i Mehiko (2004).

Te faaite ra te RAU e: « Ua riro te hoê utuafare mau, ei ti‘ahapa totiare faufaa, tapa‘ohia i roto i te naturaa taata e o tei faarotahihia i ni‘a i te hinaaro apitiraa o te hoê tane e te hoê vahine no te hoê fafauraa no te hoê oraraa roa o te faaipoiporaa… E imi te utuafare maitai i te here e te taviniraa i to ratou mau huiraatira e te feia tei roohia i te ati. E mea ti‘a ia faaturahia te mau haapiiraa totiare e te ihotumu e ia paturuhia te mau ture e te mau hopoi‘a a te utuafare ».