E Hoa i te Hoa
Te hanahana o te Atua o te ite ïa
« E mai te mea e hau a’e to te hoê taata noaaraa i te ite e i te maramarama i roto i teie oraraa nei na roto i to’na itoito e to’na haapa‘o…, e maitai a‘e oia i roto i te ao e tae mai ra » (PH&PF 130:19).
Ua vai au i roto i te ohipa haapiiraa i te roaraa o to‘u oraraa. I to‘u apîraa ra, ua mana‘o vau e te auraa o te haapiiraa o te haereraa ïa i te fare haapiiraa, te raveraa i te mau hi‘opo‘araa, e te fariiraa i te mau numera maitai. Tera râ, a tupu ai au i te paari, ua haamata vau i te ite i te taa-ê-raa i rotopu i te aravihi i te fare haapiiraa e te riroraa ei taata ite. E nehenehe ta te hoê taata e manuïa i te mau hi‘opo‘araa aore râ oia e riro ei taata ite. Te haapiiraa mau o te haapiiraa ïa e nahea ia haapii mai. I to‘u iteraa i taua haapiiraa râ, ua riro te haapiiraa ei ohipa arearea.
Te hoê o te mau fâ o te oraraa tahuti nei o te haapiiraa mai ïa – ia noaa te ite e te maramarama. Te faaite nei te Parau Haapiiraa e te Mau Parau Fafau 93:36, « te hanahana o te Atua ra o te ite ïa ». E mana‘o paha outou e te auraa o te ite o te riroraa ïa ei taata aravihi i te ohipa no te haapiiraa, tera râ te ite o te faaohiparaa atoa ïa i te ite o ta tatou i farii no te mau fâ parau-ti‘a.
E tae riirii noa mai te ite pae tino e te pae varua. Ua tupu to‘u iteraa papû ma te faaue na ni‘a iho i te faaue, te a‘o na nia iho i te a‘o; te tahi vahi iti i ŏ nei, e mai reira hoi i ô te tahi vahi iti (a hi‘o Isaia 28:10) – mai te reira te huru e tupu nei i te rahiraa o te mau melo o te Ekalesia. Ei tamaiti apî, te haamana‘o nei au i to‘u metua vahine i te tai‘oraa i te Buka a Moromona e te mau aamu o te Ekalesia ia‘u nei. Ua ite au i te hoê huru au maite, hau, e te papû e te mea o ta‘u e haapii mai ra e mea mau ïa. Ua faatupu teie iteraa i te hoê hinaaro papû ia haapii rahi atu â na roto i te tai‘oraa i te mau papa‘iraa mo‘a. Aita’tu e mana rahi a‘e i ni‘a i to‘u oraraa maori ra te tai‘oraa, te tuatapaparaa, e te ma‘imiraa i te mau papa‘iraa mo‘a ia noaa mai te ite e te maramarama hau atu â.
Ua paari au ei taure‘are‘a i California i te tau a riro mai ai te mau peu ino, mai te avaava taero e te pehe ha‘iriiri, ei mea auhia e te taata. No te ite o ta‘u i farii, ua ma‘iti au ia ore e rave i taua mau mea ra. Te faaineine ra vau ia riro ei misionare e ia tavini i te Fatu. I roto i te misioni, ua haapaari te iteraa e te tavini ra vau i te Fatu i ta‘u faaotiraa ia rohi papû i te paturaa i To’na basileia. Te taviniraa ei misionare o te hoê ïa o te mau rave‘a maitai roa ia haapii mai e ia noaa te ite pae varua.
Te faufaa mau o te haapiiraa o te riroraa ia outou ei mauihaa i roto i te mau huru ohipa atoa o te tupu – ia feruri eaha te mea e rave aita ana‘e to outou e mana‘o eaha ra te rave! Ua haapii pinepinehia tatou i roto i te mau papa‘iraa mo‘a ia imi ho‘i i te ite na roto i te haapii e na roto atoa i te faaroo (PH&PF 88:118). I roto i to tatou iho mau oraraa, i roto i to tatou mau utuafare, e i roto i te Ekalesia, e nehenehe ta tatou e farii i te mau haamaitairaa no te puai pae varua, te arata‘iraa, e te parururaa, a imi ai tatou na roto i te faaroo, ia noaa mai te maramarama e ia faaohipa i te ite pae varua i roto i te parau-ti‘a.