O Wheelwright tei piihia ei peresideni apî no BYU–i Hawaii

Ua faaara te peresideni Gordon B. Hinckley i te piiraa o Steven C. Wheelwright, tei faaturahia ei orometua haapii e ei ti‘a faatere no te fare haapiiraa no Harvard Business, ei peresideni no te fare haapiiraa tuatoru no Brigham Young i–Hawaii i te 5 no tiunu 2007.

« Ua ite au e hopoi te peresideni Wheelwright ia BYU–Hawaii i to’na teiteiraa apî », o te parau ïa a te peresideni Hinckley i roto i te Pû Amuiraa no Roto Miti, i Utaha. « Na roto i to’na ite aravihi e rave rahi atu â mau ohipa, te ti‘aturi nei au e faaaano atu â oia ia BYU–Hawaii e i te haamaitairaa i te oraraa o te feia atoa o te haere mai i teie fare haapiiraa una‘una ».

I muri mai i teie faaararaa, ua farerei te peresideni Wheelwright i te mau piahi o BYU–Hawaii na roto i te rave‘a pee‘utari e te hoê « Aloha » anaanatae e ua parau e ua riro teie nei piiraa mai te hoê faahanahanaraa rahi.

« Te ti‘aturi nei au ia BYU–Hawaii e i ta’na misioni no te mea ua faatu‘atihia te haapiiraa i te pae varua e i te pae no te haapiiraa e ua faatumuhia i ni‘a i te faarahiraa o te huru e te maramarama o teie nei mau feia apî nehenehe roa », o te parau ïa a te peresideni Wheelwright.

Ua parau te peresideni Hinckley e, mai te iritiraa mai iho â o BYU– Hawaii ei fare haapiiraa tuarua i te matahiti 1955, ua riro mai oia ei fare haapiiraa tuatoru rahi roa no te mau peu tumu o te fenua, e i te rahiraa o te mau piahi 2,400 no roto mai i te 70 mau fenua e.

Ua roaa i te peresideni Wheelwright te ite na roto i te ohiparaa e te mau piahi no te mau ihotumu e rave rahi, oia’toa no Asia mai. E tavana hoi tei haamauruuruhia no te Harvard Business Schools no te faanahoraa MBA, ua rave na oia i te ohipa e te mau piahi o te ao atoa nei e ua tauturu i te imiraa i te ohipa na te mau piahi. Ua parau Elder Henry B. Eyring no te Pŭpŭ no te Tino Ahuru Ma Piti Aposetolo e na teie natiraa i haafaufaa i te mau piahi o BYU ia ho‘i atu ratou i to ratou mau fenua i muri mai i te faahanahanaraa.

I muri mai i te faahanahanaraa i Stanford e te hoê parau tuite MBA e Ph.D, ua ohipa te peresideni Whhelwright hoê matahiti i roto i te toro‘a haapii no INSEAD, te hoê fare haapiiraa toro‘a no te ao nei i Fontainebleau, i Farani, e i muri mai ua ho‘i mai i Harvard e i Stanford.

I Harvard no na matahiti e 30 to’na iteraa i te tavana no Harvard Business School e e peresideni ho‘i no BYU–Idaho o Kim Clark. Teie te parau a te peresideni Clark, e varua mana‘o maitai rahi to te peresideni Wheelwright e e taata here i te Fatu e e taata ti‘araa papû e te aueue ore i roto i ta’na mau fafauraa i te Fatu.

« Ua ite oia i te ra‘i e e riro oia i te faauru rahi i te ti‘aturiraa no te faaroo », o te parau ïa a te peresideni Clark.

Hou to te peresideni Wheelwright raveraa i ta’na tau faafaaearaa i Harvard i te tau to‘eto‘e no te matahiti 2006, ua riro na oia ei Edsel Bryant Ford Professor of Business Administration, e ei Baker Foundation professor, ei tavana matahiapo, e ei ti‘a faatere no te Harvard Business School Publication Activities. Ua riro atoa na oia ei Kleiner, Perkins, Caufield and Byers Professor of Management at the Stanford University Graduate School of Business.

I to’na apîraa, ua tavini na te peresideni Wheelwright ei misionare rave tamau i te fenua Ekotia. Ua tavini atoa na oia ei peresideni no te England London Mission mai te matahiti 2000 e tae atu i te matahiti 2003. Ua tavini atoa oia ei tauturu i roto i te peresideniraa tĭtĭ, ei melo apooraa teitei, ei episekopo. Mai to’na faaru‘eraa’tu i Harvard, ua tavini oia e ta’na vahine ei na misionare tavini i BYU–Idaho.

Ua paari mai te peresideni Wheelwright i Roto Miti e e aua puaatoro ta raua i Star Valley, i Wyoming. E pae a raua mau tamarii e 15 mootua.

E mono ïa te peresideni Wheelwright ia Eric B. Shumway, o tei tatufaahia mai BYU–Hawaii i muri mai i te taviniraa i roto e rave rahi mau ti‘araa mai te matahiti 1966 e ei peresideni mai te matahiti 1994 mai â.